Read kapsiki Habakək 2 Bible Online

Habakək 2 - kapsiki bible

Habakək 2

¹Katenza 'ya te ŋkwa keya ŋkwa ta ɗa, kateghereŋe 'ya pelɛ zli. Kateneghe wəsə nya tegeze ɗa Shala 'ya ba'a tsema tsema tezhɛne nehwene ta ɗa ŋkɛ.

²Ma ke Mahwətə zhɛnete ɗa: «Rafete wəsə nya ncɛte ŋa 'ya, rafete ŋkɛ te pelɛ nyi slapesla slapesla kezha jaŋga ŋkɛ mbeli tiɗiɗi.

³Kenaka və kase kezha mene geva wəsəa shɛ we, ama takwa takwa ŋkɛ kamene geva, kenza ŋkɛ katseŋwə we. Ya gheŋkɛ dera ne, neghe ŋkɛ, kwa nza ŋkɛ kaganda tese ŋkɛ, kaɗema vəa ŋkɛ kambeɗemte geva.

⁴Ma pa na sha rafe: Kateza wəndə nya kekele ghə, ama katenza wəndə nya tiɗiɗi teghweme.»

⁵Kaganda ne, nahe mcɛlə kenza dzawe: kanza ka kele ghə te ŋkwa nya kwetɛŋe we, nahe hɛ kenza kaka ɓerawe kala ghɛa mbelia kwahɛɗi. Kala mte ne, kegha hɛ kabehe we. Katsene pɛtɛa hɛɗi hɛ yitea ghəa nci, kave pɛtɛa hwelefefi hɛ mbe dzeve ta nci.

⁶Ama kategeze hɛ ba'a kateŋele hɛ pɛtɛa hwelefefi nyi hərəte hɛ. Ma ke hɛ sha tegeze: «Ndiremi ya te gheyɛ nyi ketsene mcɛlə laka ghərə wəshia kweci mbeli! Hweŋkwa tefɛa yɛ ketsene dewa kadzehwa ghəa ŋayɛ wa?

⁷Kateɗema mbeli kenzəɓəave ŋayɛ dewa katesate te ŋkwa vəkə na? Kateɗema mbeli nyi kegagəzə ŋayɛ katefeɗeghe na? Katefə wəshi ŋayɛ hɛ le ŋa nci perə.

⁸Kala nya fəmte wəshia hwelefefi kwele kwele yɛ ne, katefə wəshia ŋayɛ pɛtɛa hwelefefi nyi ketene. Kwa nza ŋkɛ ne, kampə ŋkwa yɛ, kamene berete yɛ te kweci hɛɗi, te kweci meleme ba'a te mbeli nyi mbe hɛ.

⁹Ndiremi ya te gheyɛ nyi ketsene wəshi mbəɗəkwə kadzeki ghɛa ŋayɛ, yitea nza yɛ pelɛ ghəa ŋkwa kezha mbele va ndiremi.

¹⁰Hawe yapəliave nda yɛ ke ghɛa ŋayɛ: ma laka mpə hwelefefi kwele kwele ne, ghəa ŋayɛ yampə yɛ.

¹¹Ya yɛ pelɛa zli ne, katetsa lewela hɛ kezha ve ŋayɛ fete, katezhɛne nda sheghwə nyi jive te cɛ ke hɛ.

¹²Ndiremi ya te gheyɛ nyi keŋa yɛ meleme laka mpə ŋkwa ba'a wəsə kwa ndiremi.

¹³Vatse gɛ ne, ghə yaleɓe mbeli kezha ghwə, yaka yasa mbeli gəmə. Ashɛ va Mahwətə nde berete se wəsə nya wəka?

¹⁴Kaganda ne, mpɛafe tenza hɛɗi va ɗepe zləvəa Mahwətə, kala nya nza ndərə viɗi va yɛmə.

¹⁵Ndiremi ya te gheyɛ nyi kesa nda wəsə kesa nya dzawe kala wəsəa kwamasa ke kweci mbeli kezha ghwəyi hɛ ba'a kezha nza hɛ derelɛŋe lɛŋe.

¹⁶Katenza yɛ shewə va hawe, kaɗema kazləvə: sa le ŋa ŋayɛ perə yitea nza yɛ derelɛŋe lɛŋe gi! Kateŋka ŋayɛ Mahwətə kasa zlerekwe ta hwepe wənəa ŋkɛ. Tagha gɛ, katezhɛre zləvəa ŋayɛ kahawe.

¹⁷Ma berete nya se yɛ kamene te Liban ne, katezhɛne geva nde kadzeghəa gheyɛ. Nahe yɛ kempəmte wəshi keseɗa, ama katedake ŋayɛ wəshi keseɗa. Katemene geva pɛtɛa wəshi nyi va nya mpəmte ŋkwa yɛ, va nya menete berete yɛ te kweci hɛɗi, te kweci meleme ba'a te mbeli nyi mbe hɛ.

¹⁸Wa yakete ŋkwa shala nyi feɗete mbeli le wa? Nahe hɛ kenza kawəshi nyi vɛsəte mbeli yitea mze nyi keve nda ve ghə te wəshia kwadanji ke mbeli. Wa raberə nda ve ghə wəndə ŋelɛ te shala nyi keɗema nyi kageze ghena ba'a nyi menete nyi ŋkɛ le ghəa ŋkɛ wa?

¹⁹Ndiremi ya te gheyɛ nyi kegeze: Sate ŋa, pe yɛ sha mesla ta sheghwə keɗema: Feɗeghe ŋa, pe yɛ sha pelɛ nya keɗema kageze ghena, ndagwara wəsə shɛ katekete ŋayɛ hɛ we. Ya ghenci nza kefi fi le mze kwa tere tere le mze kwa tɛawetɛa ne, mpi shɛ mbe hɛ we.

²⁰Ama nahe Mahwətə kenza mbe ghɛa ŋkɛ nya keveyi geva tekeleke. Nza hɛɗi lema tikə tikə kwa kema ta ŋkɛ!»