Read kapsiki Habakək 3 Bible Online

Habakək 3 - kapsiki bible

Habakək 3

¹Səkwə ghə ta nde mɛ ŋkwa Habakək, kala cimə nehwene ghate ŋkɛ.

²Mahwətə, nahe 'ya kefate wəshi nyi gezete na, Mahwətə, nahe ghazlənə kezhɛte ɗa va hɛ. Ma mbe nza ta n'yɛ teghweme ne, menete wəshi nyi kala nyighɛ, ncɛte hɛ mbe nza ta n'yɛ teghweme. Ya wənəa ŋa nza kehwepe hwepe ne, menete n'yɛ ganyɛa ŋa zhɛkwa.

³Wa nya Shala kase mbe Tɛman, Shala nya kaganda kasawa pelɛ ta ghweme ta Paran. Zhɛne mpi. Nahe ŋkwa nya pelɛ ghweme kenza bətə mbe zləvəa ŋkɛ ba'a hɛɗi kenza rayɛ va tsahe ŋkɛ.

⁴Kaɓele ŋkɛ kala waŋe, kaslesla ghwə shave mbe dzeve ta ŋkɛ, te ŋkwa nya wəfərə berete ta ŋkɛ.

⁵Kadzeghwa ba mbe kema ta ŋkɛ, kaŋkeɗe seɗa ɗawa kwa ŋkwa seɗa ta ŋkɛ.

⁶Ma vəa ŋkwa nya ghereŋe ŋkɛ ne, kagaŋkəɗə hɛɗi. Ma vəa ŋkwa nya newe hwelefefi ŋkɛ ne, kabare bare hɛ. Kaŋzleŋzla ghweme nyi heca, kadedase geva wəmbə nyi vəashi, ghenci nyi kese kahweŋkwa ta ŋkɛ vəashi.

⁷Kanewe 'ya nda za geva sebe te yɛ cɛ lekwesa nyi mbe Kəwshan ba'a nda gaŋkəɗə geva ŋkwa kenza nyi mbe Madiyan.

⁸Mahwətə yawe, va yɛ hələ hwepete wənə na na? Kaganda ne, va yɛ hələ na? Va ndərə bezenyɛ wənəa ŋa na? Kadzeme ləmbə na kala wəmata gədəwə nya ntsehe ŋa gədəwəa lɛmə kalə kahərə ŋkwa.

⁹Kantsə rəgia ŋa na, nahe yɛ have ta ŋa kenza kaghena nyi gezete na gheci gheci. Zhɛne mpi. Kaperawe hɛɗi na laka yɛ hələ.

¹⁰Ma vəa ŋkwa nya nakɛ ŋa yɛ ghweme ne, kabare bare hɛ va ghazlənə, kame va nyi jama jama te hɛɗi, kagaka ndərə nya wəba ba'a kagaŋkeɓe ŋkɛ pa pelɛ ghweme.

¹¹Kwa kema ta ɓele ta have ta ŋa nyi kezlə, kwa kema ta yɛ slesla ta megha ta ŋa ne, kaghereŋe yɛ veci le tere te ŋkwa nci.

¹²Kadzeghwa na te hɛɗi lema va hwepe ta wənə, kaŋkeɗe hwelefefi na va beze ta wənə.

¹³Nahe na keshave kezha mbele mbelia ŋa, kezha mbele meghe nya ntave na. Nahe na kepeslekɛ wəndə nya te ghəa hwelefe ta ka 'yaghwa mehele, nahe na kezamte sebe te mbeli nyi yite. Zhɛne mpi.

¹⁴Nahe na kehame yɛ have ta nci mbe ghəa mbeli nyi te ghəa ka ghema, vəa ŋkwa nya se hɛ kala va nya wəba kezha taze n'yɛ jive mbe yayata bela. Nahe hɛ kese katsa gaghwe kala wəsə nya lə hɛ kaslekwe ka titikwəa kɛfi tewəfərə.

¹⁵Kadzeghwa na kwa ndərə le gədəwəa lɛməa ŋa, mbe wəvaɗe wəvaɗe ta yɛ gaŋkeɓe ta yɛmə.

¹⁶Nahe 'ya kefate gaka shɛ ba'a nahe mehele ta ɗa ketazenyɛ. Kabare bare bəzhia mɛa ɗa va ghazlənə, nahe geva ta ɗa kenza keta ta, kabare bare ŋkwa nya yitea ŋelia ɗa. Mbe nza divə ne, kaneghe vecia yaka 'ya kezha lə kampa le mbeli nyi keha ɓəmə mpa.

¹⁷Kwa nza ŋkɛ ne, kazhɛne yɛ dasekwa kaya we, kazhɛne yɛ rɛzɛŋe kave ya we, kazhɛne yɛ bekele kaya we, kazhɛne yɛ wəve kamene wəshi we. Nahe timɛti kezanji kwa yɛ zlema, kezhɛne yɛ sla kanza kwa yɛ gəzhi we.

¹⁸Ama 'ya ne, katezlama 'ya te Mahwətə, katenza 'ya fare fare te Shala nya kembele ɗa.

¹⁹Shala Mahwətə ya kaberete ta ɗa: kave ɗa wɛrewɛ ŋkɛ kala le, kave ɗa dzeghwa ŋkɛ dzeyi te yɛ wəmbə.