Read kapsiki Azhɛ 1 Bible Online

Azhɛ 1 - kapsiki bible

Azhɛ 1

¹Ma te kwa bake ta va ta Dariyəs mbe meghe, mbe hɛ kwetɛŋe te mbe tere kwa ŋkwaŋe ne, pa Mahwətə gezete nda ghena ke nde mɛ ŋkwa Azhɛ kezha geze nda ke Zorobabɛl, wəzege ta Shɛyaltiyɛl, ŋgwamna nya mbe Zhəwda ba'a ke Yɛshəwa, wəzege ta Yosadak, wəndə kwelea ka dzeghe Shala.

²Ma ke Azhɛ gezete: «Wa nya ghena nya geze Mahwətə nde berete nya: Ma ke mbeli nyi sha geze: Kenaka və kezhɛne kaŋa ghɛa Shala kase we.»

³Ma ke Mahwətə gezete laka nde mɛ ŋkwa Azhɛ:

⁴«Nahe ŋkɛ kehi kanza yɛ ki ghɛ ganjia ŋayɛ vəa ŋkwa nya nza ghɛa ɗa kakwəfi na?

⁵Ma tsetsenya gɛ, wa nya ghena nya geze Mahwətə nde berete nya: Cɛkəvə mə wəshi nyi kemene ŋayɛ geva.

⁶Kwele kwele tsawete wəshi yɛ, ama ɓɛhwɛ meneke hɛ yɛ se te wəve. Kazeme wəshi kezeme yɛ, ama kabehe yɛ we. Kasa wəshi kesa yɛ, ama kakete yɛ we. Kaseɗe lekwesa yɛ, ama kazhɛ ŋayɛ ntasle. Kaŋ'we zhɛme yɛ, ama kadzawa slibə nya kentsa ntsa dzawa ŋkɛ.

⁷Ma 'ya sha gheyɛ zhɛkwa, 'ya Mahwətə nde berete: Cɛkəvə mə wəshi nyi kemene ŋayɛ geva.

⁸Dzeme mə ghweme, tsasle mə sheghwə ba'a ŋa mə ghɛa ɗa zhɛkwa. Tagha gɛ, katenza ŋkɛ zeɗehwe ɗa ba'a katencɛ zləvəa ɗa 'ya, 'ya Mahwətə nde gezete.

⁹Nahe yɛ keveyi ghə kaŋ'we wəshi kwele kwele se te wəve, ama ɓɛhwɛ ŋ'wete yɛ. Ma wəshi nyi fəghe yɛ kadzeki ghɛa ŋayɛ ne, nahe 'ya ketsalemte hɛ le sefə. Va wa menete geva ŋkɛ kala nya wa, a 'ya sha gheyɛ, 'ya Mahwətə nde berete. Va nya nza ghɛa ɗa kakwəfi, vəa ŋkwa nya nza yayata wəndə kahi ghɛa ŋkɛ megela.

¹⁰Vatse gɛ ne, kese va kame we, kese hɛɗi kapese wəshi we.

¹¹Nahe 'ya kekeleke ɓɛaŋwela kadzete hɛɗi: pelɛ yɛ wəmbə, mbe yɛ wəvea ha, ŋa rɛzɛŋe, ŋa bekele ba'a ŋa kweci wəshi nyi wəza mbeli. Yaka ya te mbeli ba'a wəshi keseɗa ve, nahe pɛtɛa slene ta ŋayɛ kebeze.»

¹²Pa Zorobabɛl, wəzege ta Shɛyaltiyɛl, Yɛshəwa, wəzege ta Yosadak, wəndə kwelea ka dzeghe Shala ba'a mbeli nyi ketene fate ghena ta Shala Mahwətə ta nci, nyi kegezeke geva laka nde mɛ ŋkwa Azhɛ. Tsagha gɛ, nahe Azhɛ kemenete slene nya ndeke nda Mahwətə, ntake mbeli kahawe va Mahwətə.

¹³Zhɛne ne, ma ke Azhɛ, nde ghwene ta Mahwətə gezete nda ghena ta Mahwətə ke mbeli: «Katenza 'ya hwa gheyɛ, 'ya Mahwətə nde geze ŋayɛ.»

¹⁴Tagha gɛ, pa Mahwətə feɗeghete mehele ta Zorobabɛl, wəzege ta Shɛyaltiyɛl, ŋgwamna nya mbe Zhəwda, Yɛshəwa, wəndə kwelea ka dzeghe Shala ba'a pɛtɛa mbeli nyi ketene. Pa hɛ se, ntake hɛ kazhɛne kaŋa ghɛa Mahwətə nde berete, Shala ta nci,

¹⁵mbe hɛ kwa bakemsə wəfaɗeghəmbe ta tere kwa ŋkwaŋe mbe va shɛnyɛ.