Read kapsiki Zakari 1 Bible Online

Zakari 1 - kapsiki bible

Zakari 1

¹Ma te kwa deghese ta tere, mbe kwa bake ta va ta Dariyəs te meghe ne, ma ke Mahwətə sha nde mɛ ŋkwa Zakari, wəzege ta Bɛrɛkiya ba'a shia Ido:

²«Nahe 'ya Mahwətə kehwepete wənə kwele kwele va ka shihɛ ŋayɛ.

³Ma pa na sha geze nda ke ka Israyɛl: Wa nya ghena nya geze Mahwətə nde berete nya: Zhɛne mə geva kase sha 'ya Mahwətə nde berete, katezhɛne geva 'ya kase sha gheyɛ. 'Ya Mahwətə nde berete nde gezete.

⁴Tekema ka shihɛ ŋayɛ yɛ ma. Ma vəashi ne, nahe ka mɛ ŋkwa kese kafɛa hɛ yitea hweŋkwa kwa ndiremi ba'a slene nyi ndiremi ndiremi te sləa ɗa, ama kese hɛ kaɗe kafa ɗa ba'a kantsehwele yitea 'ya we. 'Ya Mahwətə nde gezete.

⁵Tema ka shihɛ ŋayɛ tse wa? Kaghala ghala nzanji ka mɛ ŋkwa teghweme na?

⁶Ndagwara ma ghena ba'a wəshi nyi gezave nda 'ya ke ka mene slene ta ɗa nyi kaka mɛ ŋkwa ne, nahe hɛ kekeseke mehele ta ka shihɛ ŋayɛ. Pa hɛ zhɛrete nza ta nci, ma ke hɛ: ‹Nahe Mahwətə nde berete ketarete kamene ɓəmə kala dzeghwa ta ɓəmə ba'a slene ta ɓəmə, tsagha shɛ menete ɓəmə ŋkɛ.›»

⁷Ma te kwa bake ta va ta Dariyəs mbe meghe, mbe hɛ bakemsə wəfaɗeghəmbe te tere kwa meŋe kwetɛŋeghəmbe, geze ta ŋkɛ terea Shebat ne, pa Mahwətə gezete nda ghena ke nde mɛ ŋkwa Zakari, wəzege ta Bɛrɛkiya ba'a shia Ido. Wa nya ghena nya ɓelate Zakari nya:

⁸Ma heviɗia shɛ ne, pa 'ya nakɛ wəndə pelɛ gədəwə kwa gheme. Meghereŋe ŋkɛ hwa sewahe nyi kwa zlərə. Kwa sebe ta ŋkɛ ne, kweci gədəwə nyi ghemea ghemea, nyi mede mede ba'a nyi ghwaba ghwaba ya shɛ.

⁹Ma 'ya 'yɛwete va wəndə nya pelɛ gədəwə: «Wa wəsə nya ɗe gədəwə nyi kancɛ wa nde sleke ɗa?» Ma ke nde ghwene ta Shala nya kegeze ɗa ghena zhɛnete ɗa: «Katencɛ ŋa 'ya.»

¹⁰Ma ke wəndə nya hwa yɛ sewahe sha 'ya: «Mahwətə nde ghwenakɛ hɛ kezha dzedzeghwamte hɛɗi.»

¹¹Ma ke ka zleɗe gədəwəa lɛmə nyighɛ sha nde ghwene ta Mahwətə nya meghereŋe hwa yɛ sewahe: «Nahe ghen'yɛ kedzedzeghwamte hɛɗi, gweɗakwe ba'a gwezlayɛ ŋkwa nya te.»

¹²Ma ke nde ghwene ta Mahwətə zhɛkwa: «Mahwətə nde berete, va mberefaŋemsə menete na le wənə tehwepe va Zhɛrəzalɛm ba'a va kweci meleme nyi mbe Zhəwda. Hwa'a te nyama və teneghe na kazhɛ heli yitea hɛ wa?»

¹³Pa Mahwətə zhɛnete nda le ghena ganji ba'a ghena nyi kemtsehe berete ke nde ghwene nya kegeze ɗa ghena.

¹⁴Ma ke nde ghwene nya kegeze ɗa ghena nya sha 'ya: «Zlapete: ‹Wa nya ghena nya geze Mahwətə nde berete nya: Kwele kwele ɗe yɛ Zhɛrəzalɛm le ghweme ta Siyon 'ya.

¹⁵Ama kwele kwele hwepenyɛ wənəa ɗa va kweci hwelefefi nyi gwezlayɛ. Ma kwa nza hwepe ta wənəa ɗa mba ɓɛhwɛ ne, pa hɛ mtsehate ndiremi te ka Israyɛl.

¹⁶Vatse gɛ, wa nya ghena nya geze 'ya, 'ya Mahwətə nde berete nya: Katezhɛne geva 'ya kadzembe Zhɛrəzalɛm le zhɛ heli. Mbagha tezhɛne ghɛa ɗa kaŋa geva ba'a katezhɛne mbeli kaŋa meleme.›

¹⁷Zlapete ghena nya zhɛkwa: ‹Wa nya ghena nya geze Mahwətə nde berete nya: Mpɛafe tezhɛne wəshi ganji kanza mbe yɛ meleme ta ɗa. Katezhɛne Mahwətə kamtsehe nda berete ke Siyon, katezhɛne ŋkɛ kanta Zhɛrəzalɛm.›»