Read kapsiki Zakari 12 Bible Online

Zakari 12 - kapsiki bible

Zakari 12

¹Wa nya ghena ta Mahwətə nya te ghəa Israyɛl. Ma ke Mahwətə nya kepelakeyi ghweme, nya keveyi yɛ shihəa hɛɗi ba'a nya kendeke nda mpi ke wəndə ŋelɛ:

²«Katezhɛre Zhɛrəzalɛm 'ya kala zlerekwe tɛ nya pɛre va hwepe wənəa ɗa: katedaghwele nda ghə ŋkɛ ke hwelefe nyi dzeyi yite. Kedaghwele daghwele tenza ghə te ka Zhəwda vəa ŋkwa nya dzaslete Zhɛrəzalɛm mbeli.

³Ma vəa ŋkwa shɛ ne, kateve Zhɛrəzalɛm 'ya kapelɛ menterese nya shɛma mbeli kapəkə. Pɛtɛ teɗa mbeli nyi kedzare kapəkə ŋkɛ zhi. Vatse tetsene geva hwelefe nyi te hɛɗi pɛtɛ yitea melemea shɛ.

⁴Ma te vecia shɛ, ma 'ya, 'ya Mahwətə: katedake yɛ gədəwəa nci 'ya, kaka gezhia kɛfi tezhɛre ka zleɗe gədəwəa lɛməa nci. Katenewe ghweme 'ya te Zhəwda, ama kateghwəghwələpə yɛ gədəwəa lɛməa kweci hwelefefi 'ya.

⁵Ma tegeze mbeli nyi te ghə mbe Zhəwda mbe ghəa nci: ‹Mbe Mahwətə nde berete, Shala ta nci berete ta mbeli nyi mbe Zhɛrəzalɛm.›

⁶Ma te vecia shɛ ne, katezhɛre mbeli nyi te ghə mbe Zhəwda 'ya kala ghwə nya ketse yitea sheghwə keɗema kala ghwə te wəvəzə yitea ghwɛpɛa ha. Kateɗa hwelefe nyi dzeyi yitea hɛ hɛ laka yayata bela. Ama te ŋkwa shɛnyɛ tenza mbeli nyi mbe Zhɛrəzalɛm.»

⁷Ka Zhəwda yatembele Mahwətə kaba. Ma tsagha ne, katenewe ghəa nci hwelefe ta David ba'a mbeli nyi mbe Zhɛrəzalɛm za ma ke ka Zhəwda nyi ketene we.

⁸Ma vəa ŋkwa shɛ ne, kateya ka Zhɛrəzalɛm Mahwətə: kaka berete kala David tezhɛre ka dewə ŋeli nyi hwa hɛ. Kala Shala keɗema kala nde ghwene ta Mahwətə tenza hwelefe ta David kwa kema ta nci.

⁹Ma ke Shala: Ma te vecia shɛ ne, katezele 'ya kaza sebe te hwelefe nyi ketese kaɗa Zhɛrəzalɛm.

¹⁰Katevɛ sefəa ɗe ganyɛ ba'a ŋa səkwə ghə 'ya kənəa hwelefe ta David ba'a mbeli nyi mbe Zhɛrəzalɛm. Ma tsagha ne, katezhɛre ɗa kema hɛ, tewəmbəreke wəndə nya mpahwemte hɛ. Katenehwene hɛ kənə kala nya nehwene wəzege kwetɛ mbeli. Kwele kwele tepesle ghə hɛ le nehwene kənə kala nya tepesle ghə mbeli le nehwene kənəa tezhɛa wəzege.

¹¹Ma te vecia shɛ ne, nehwene nya wəba nde tenza mbe Zhɛrəzalɛm kala nya yitea Hadad-Rimon, kwa zlərəa Mɛgido.

¹²Yayata yita nya te hɛɗia shɛ katenehwene te ŋa ŋkɛ ŋkwa: keghə keghə yɛ zhili le mi nyi kwa yita ta David, tsagha yɛ zhili le mi nyi kwa yita ta Natan,

¹³keghə keghə yɛ zhili le mi nyi kwa yita ta Lɛvi, tsagha yɛ zhili le mi nyi kwa yita ta Shimɛyi.

¹⁴Tsagha shɛ tenehwene kweci yita, te ŋa nci ŋkwa zhili, te ŋa nci mi.