Read kapsiki Zakari 13 Bible Online

Zakari 13 - kapsiki bible

Zakari 13

¹Ma te vecia shɛ ne, katehwɛ ɗasle kezha yaɓe yɛ jaɗafa ba'a yɛ nza wale walea hwelefe ta David ba'a mbeli nyi mbe Zhɛrəzalɛm.

²Ma ke Mahwətə nde berete: «Ma te vecia shɛ ne, kateza sebe 'ya te wəshi nyi zhɛrete mbeli kashala te hɛɗi nya, wəndə shɛ katezhɛne kahekɛme sləa nci we. Kateŋka mbeli nyi keveyi ghəa nci kaka mɛ ŋkwa 'ya ba'a katekele mawe ta hawe va kweci shala 'ya shave mbe gheyɛ.

³Ma kenza wəndə mba kageze kala nde mɛ ŋkwa ne, ma tegeze nda yɛ yitenyɛ le meghekɛ: ‹Wərə mte na, kwa nza ŋkɛ tseŋwə yasla na te sləa Mahwətə.› Tagha gɛ, katempahwe ŋkɛ yɛ yitenyɛ le meghekɛ vəa ŋkwa nya geze ghena ŋkɛ kala nde mɛ ŋkwa.

⁴Ma te vecia shɛ ne, katezhɛ nda hawe ke ka mɛ ŋkwa kegeze ghena ba'a keɓela wəshi nyi nakɛ hɛ. Kateɗe hɛ kazhɛne kaghwete mbeli laka seɗe lekwesa kwa shintia ka mɛ ŋkwa we.

⁵Ama tegeze yayata wəndə: ‹Nde mɛ ŋkwa 'ya we, nde wəza 'ya. Wəve ya va 'ya se kawəzege.›

⁶Tagha gɛ, ma te'yɛwe mbeli ve: ‹Wa yancɛ perawe nyi kwa hate nyi va gha wa?› Ma tezhɛne ŋkɛ: ‹Wəsə nde ɗakɛ ɗa ki ghɛa ka mcɛhɛ ɗa.›»

⁷Wa nya ghena nya geze Mahwətə nde berete nya: «Kafayɛ, maghe kənəa nde ya wəshia ɗa ba'a kənəa mcɛ ɗa nya kehwepe ghə. Peslekɛ nde ya wəshi yitea tazenji timɛti, nda teme 'ya kənəa zhɛgwəa lɛmə.»

⁸Ma ke Shala zhɛkwa: «Katempə bela ta mbeli nyi te hɛɗi bake mbe mahekene, deke bela ta nci kwetɛŋe nde tenza teghweme.

⁹Katedzeghe mbeli nyi ketene teghwemea shɛhɛ 'ya kala nya dzeghe mze kwa tere tere ba'a mze kwa tɛawetɛa mbeli mbe ghwə. Ma tsagha ne, katenehwene ɗa nehwene hɛ ba'a katefa səkwə ta nci 'ya. ‹Mbelia ɗa yɛ›, tegeze nda 'ya ke hɛ, ‹Shala Mahwətə ta n'yɛ na›, tegeze ɗa hɛ.»