Read kapsiki Zakari 2 Bible Online

Zakari 2 - kapsiki bible

Zakari 2

¹Newe 'ya sha ŋkwa ne, dəkwə 'ya te tereme wəfaɗe.

²Ma 'ya 'yɛwete va nde ghwene nya kegeze ɗa ghena: «Wa yaɗe tereme nyi kancɛ wa?» Ma ke zhɛnete ɗa: «Tereme nyi ketazemte Zhəwda, Israyɛl ba'a Zhɛrəzalɛm yancɛ hɛ.»

³Kwa sebe ta ŋkɛ, pa Mahwətə ncɛte ɗa ka gezla wəshi wəfaɗe.

⁴Ma 'ya 'yɛwete: «Wa yase mbeli nyi kamene wa?» Ma ke zhɛnete ɗa: «Ghenci se kadake ba'a kampə tereme nyi keɗate hɛɗia Zhəwda. Nahe hɛ ketazemte mbeli nyi mbe kwetɛ kwetɛŋe, wəndə shɛ kezhɛnete nda ghə ke hɛ we.»

⁵Ma newe 'ya sha ŋkwa ne, dəkwə 'ya te kwete wəndə nya nza zewe kedzeghe ŋkwa yitea dzeve ve.

⁶Ma 'ya 'yɛwete ve: «Dzema na wa?» Ma ke zhɛnete ɗa: «'Ya katedzeghe Zhɛrəzalɛm kezha ɗepe yɛ bezle le biya ta ŋkɛ.»

⁷Tagha, ntəŋə nde ghwene nya kegeze ɗa ghena yitea dzeghwa vəa ŋkwa nya nza kwete nde ghwene kase shɛ.

⁸Ma ke shɛ: «Hwɛ shɛ na geze nda ghena ke mempɛhweta ca, ma pa na shɛ: Kaɗema zli yite hi Zhɛrəzalɛm kanza, tewəmbəreke wəba ta mbeli ba'a wəshi keseɗa nyi ketenza mbe.

⁹Wa nya ghena nya geze Mahwətə nya: ‹'Ya le ghəa ɗa nde tenza kazli nya kaghwə yite, katencɛ zləvəa ɗa 'ya mbe!›»

¹⁰Ma ke Mahwətə: «Slə mə! Slə mə, gheyɛ nyi tazemte 'ya kwetɛ kwetɛŋe, laka bela kwa gwela ba'a bela kwa zeme, laka ŋkwa kesame ta veci ba'a ŋkwa kepəkwə ta ŋkɛ, hwɛ mə tsetsenya, slə mə shave mbe hɛɗi nya laka bela kwa gwela! 'Ya Mahwətə nde gezete.

¹¹Slə mə ka Zhɛrəzalɛm, gheyɛ nyi mbe Babilone le nza, mbele mə ghəa ŋayɛ kahe kahe.»

¹²Wa nya ghena nya geze Mahwətə nde berete, nya keghweneke ɗa le slene nya wəba te ghəa kweci hwelefefi nyi kefəhwe ŋayɛ nya: «Ma yayata wəndə nya kekwaɗe ŋayɛ ne, haha ta ntsə ta ɗa yakwaɗe ŋkɛ.

¹³Kaganda ne, 'ya kateɗa kweci hwelefefi. Ma tsagha, katefə hɛ mbeli nyi kese kaka mavashia nci le ŋa nci perə.» Ma ketemenete geva ŋkɛ ne, kateɗepete yɛ Mahwətə nde berete nde ghweneke ɗa.

¹⁴Ma ke Mahwətə zhɛkwa: «Ncɛ mə zlama ta ŋayɛ ka Zhɛrəzalɛm, katese 'ya kanza te tepe ta ŋayɛ.

¹⁵Ma te vecia shɛ ne, kwele kwele mbeli nyi ketezele ɗa, 'ya Mahwətə. Katezhɛre hɛ kambelia ɗa. Te tepe ta ŋayɛ tenza 'ya.» Ma ketemenete geva ŋkɛ ne, kateɗepete yɛ Mahwətə nde berete nde ghweneke ɗa sha gheyɛ.

¹⁶Katezhɛne Zhəwda kanza kaŋa Mahwətə le ghəa ŋkɛ te hɛɗi nya keveyi nda geva tekeleke. Katezhɛne Zhɛrəzalɛm kanza kameleme nya ntave ŋkɛ.

¹⁷Pa yayata wəndə nza tikə kwa kema ta Mahwətə, kwa nza ŋkɛ, vəkə teshave ŋkɛ ki ghɛ nya keveyi nda geva tekeleke!