Read kapsiki Zakari 7 Bible Online

Zakari 7 - kapsiki bible

Zakari 7

¹Ma te kwa wəfaɗe ta va ta Dariyəs kameghe, mbe hɛ kwa wəfaɗe ta tere kwa mesli, geze ta ŋkɛ, tere Kisləw ne, pa Mahwətə gezete ɗa ghena.

²Pa ka Bɛtɛl ghweneke yɛ Sarɛsɛr, Rɛgɛm-Mɛlɛk le kweci mbeli kezha səkwə kemane ta Mahwətə

³ba'a kezha 'yɛwe ghena va ka dzeghe Shala nyi kemene slene mbe ghɛa Mahwətə nde berete le ka mɛ ŋkwa, ma ke hɛ: «Mba nza ghen'yɛ kanehwene ba'a kamene səwəmayɛ mbe kwa mcɛfe ta tere mbe va, kala nya mene ghen'yɛ se vəashi na?»

⁴Tagha gɛ, ma ke Mahwətə nde berete sha 'ya:

⁵«Ma pa na sha ka dzeghe Shala ba'a pɛtɛa mbeli nyi te hɛɗi: Va mberefaŋemsə ɓeshi ne, kamene səwəmayɛ yɛ ba'a kaŋgaɗe ghə yɛ mbe yɛ tere kwa mcɛfe le kwa mberefaŋe, ama kezha 'ya menete səwəmayɛa shɛ yɛ na?

⁶Ma kwa zeme wəshi yɛ ba'a kwa sa wəshi yɛ ne, ashɛ kezha ghəa ŋayɛ zeme yɛ ba'a sa yɛ wəka?»

⁷Ma vəashi ne, nahe ka mɛ ŋkwa kese kazlape ghena nyi kese va Mahwətə kala nyi te və nya nza mbeli nyi mbe yɛ Zhɛrəzalɛm le meleme nyi dzeyi yite gwezlayɛ, nya nza mbeli mba te yɛ hɛɗia Nɛgɛv le hɛɗi nya kwake kwake.

⁸Ma ke Mahwətə sha 'ya:

⁹«Wa nya ghena nya geze Mahwətə nde berete nya: Meha mə ghwə tiɗiɗi, nza mə le ɗe ba'a ganyɛa mehele kwelɛ ghəa ŋkɛ.

¹⁰Sa nda ma yaka yɛ ke ka wedidi, ya ke ka mezhɛtiti, ya ke ka se se, ya ke ka titikwəa kɛfi ma. Zəzəma ghena kwa ndiremi yɛ kwelɛ ghəa ŋayɛ ma.»

¹¹Ama hɛreɗɛ mbeli ɗema fa: pa hɛ zhɛrete wəmbə ba'a zhiɓəmte sleme ta nci kezha ɗema fa.

¹²Pa hɛ zhɛrete ghə ntɛaŋe ntɛaŋe kala kwacaregesla kezha ɗema fa wəshi nyi teke nda Mahwətə nde berete ke hɛ ba'a ghena nyi geze nda ŋkɛ ke hɛ laka sefəa ŋkɛ, le mɛa ka mɛ ŋkwa nyi vəashi. Vatse hwepenyɛ wənəa Mahwətə kwele kwele.

¹³Ma ke Mahwətə nde berete gezete: «Ma kala nya se 'ya kaheka hɛ kaɗema hɛ kese kafa ɗa ghena ne, tsagha se hɛ kaheka ɗa kaɗema 'ya kese kafa nda ke hɛ.

¹⁴Pa 'ya tetazeyi hɛ hwa mama ta hwelefe nyi ɗepema hɛ. Shalala nzanyɛ hɛɗia nci kwa sebe ta nci. Wəndə shɛ kadzembe, ya kashave mbe we. Pa hɛ zhɛremte hɛɗi nya ndeɗe nya kakwəfi.»