Read kapsiki Malashi 1 Bible Online

Malashi 1 - kapsiki bible

Malashi 1

¹Ghena nya gezete nda Mahwətə ke ka Israyɛl laka Malashi.

²Ma ke Mahwətə sha mbelia ŋkɛ: «Kaɗe ŋayɛ 'ya.» Ama gheyɛ ne, ma pe yɛ sha 'yɛwe: «Wa wəsə nya kencɛ ɗe ta ŋa wa?» Ma ke Mahwətə zhɛnete: «Ashɛ wəza meghekɛa Zhakob Ɛzawə wəka? Ndagwara nahe 'ya keɗehwe Zhakob

³ba'a keɗema Ɛzawə. Nahe 'ya kebezemte yɛ ghweme ta Ɛzawə ba'a nahe 'ya kendeke nda hɛɗia ŋkɛ ke kelɛ gamba nyi te ɓerama.

⁴Ma kegeze ka Ɛdom: ‹Nahe mbeli keŋzlakawa n'yɛ, ama katezhɛne ghen'yɛ kaŋa meleme ta n'yɛ nyi kakwəfi›, ke hɛ ne, wa nya ghena nya geze 'ya, 'ya Mahwətə nde berete nya: Ŋate hɛ hɛ, ama kateŋzla hɛ 'ya. Kateheka nda slə mbeli ke hɛ ‹kaHɛɗia ka 'yaghwa mehele› ba'a ‹kaMbeli nyi nza hwepe wənəa Mahwətə kənəa hɛ kevə kevə.›

⁵Ma gheyɛ ka Israyɛl ne, katenewe wəsəa shɛ yɛ, ma pe yɛ sha tegeze: ‹Nahe Mahwətə kenza wəbake zlake ke hɛɗia Israyɛl.›»

⁶Ma ke Mahwətə nde berete sha ka dzeghe Shala: «Kahawe wəzege va yitenyɛ ba'a kayɛ nda ghena nde mene slene ke nde sleke ŋkɛ. Kenza yiteyɛ ŋayɛ 'ya ne, tema zləvə nya ve yɛ te 'ya wa? Kenza ŋkɛ nde sleke ŋayɛ 'ya ne, tema hawe nya hawe yɛ va 'ya wa? Kaɓela ɗa ma yɛ, ama ma pe yɛ sha 'yɛwe: ‹Laka wa ɓelama ŋa n'yɛ wa?›

⁷Kafə wəshi nyi wale wale yɛ kase kadzete reghwetɛa ɗa, ama ma pe yɛ sha 'yɛwe: ‹Laka wa zhɛrete ŋa n'yɛ wale wale wa?› Yawa, ma pe yɛ gezete: Zləvə shɛ te reghwetɛa Mahwətə we.

⁸Ma kwa keleke wəsə keseɗa nya kaghwələ, nya ketseheɗe keɗema nya shewə yɛ kezha dzeghe ɗa melɛ ne, wəsə ganyɛ yamenete yɛ zəzə yɛ na? Ma kendeke nda wəsə keseɗa nya kala nyagha yɛ ke ŋgwamna ne, katenza ŋkɛ fare fare ba'a katemene ŋayɛ ganyɛ ŋkɛ zəzə yɛ na? Ka'yɛwe 'ya va gheyɛ, 'ya Mahwətə nde berete.

⁹Ma tsetsenya ne, dzare mə kampi ɗa dzeve, 'ya Shala ta ŋayɛ, kezha zhɛ heli 'ya yitea gheyɛ. Ma zəzə yɛ ne, katemene ŋayɛ ganyɛ 'ya kwa sebe ta wəsə nya menete yɛ na? Ka'yɛwe 'ya va gheyɛ, 'ya Mahwətə nde berete.

¹⁰Ganyɛ ma ŋzlemte gelembe nyi mɛa ghɛa ɗa kwete wəndəa ŋayɛ. Tagha gɛ, katezhɛne yɛ kalə kameha ghwə te reghwetɛa ɗa gəmə we. Kwa nza ŋkɛ ma 'ya Mahwətə nde berete ne, ndeɗehwe ɗa newe ŋayɛ we, zeɗehwe ɗa wəshi nyi fə ɗa yɛ kase we.

¹¹Se te kwete mendɛkwe ta hɛɗi hwa'a te kwete ne, nahe pɛtɛa hwelefefi keɗepe kwelea ɗa. Ma te yayata ŋkwa ne, katere ɗa 'wərdə mbeli ba'a kafə ɗa wəshi ganji mbeli kase. Kaganda ne, nahe pɛtɛa hwelefefi keɗepe kwelea ɗa, 'ya Mahwətə nde berete nde gezete.

¹²Ama gheyɛ ne, kakele zləvə yɛ seyi te reghwetɛa ɗa, ma pe yɛ sha geze: ‹Nahe reghwetɛa Mahwətə kenza wale wale, zləvə te wəsə kezeme nya kese te we.›

¹³Ma pe yɛ sha geze ɓiyitsa: ‹Wa nya yaka gɛ!› Deke 'ya, 'ya Mahwətə nde berete yaɓelama yɛ. Kafə ɗa wəshi keseɗa ghərə, nyi ketseheɗe keɗema nyi shewə yɛ kase. Ka'yɛwe 'ya va gheyɛ: Tsema nza 'ya kayɛte wəshi nyi kala nyi va gheyɛ, 'ya Mahwətə wa?

¹⁴Ndiremi ya te nde mbəɗəkwə nya nza wəshi keseɗa ganji ve, nda ve ɗa wəsə keseɗa nya nza beze te ŋkɛ, 'ya Shala kezha yipə meɗe mɛa ŋkɛ. Kwa nza ŋkɛ ma 'ya, 'ya Mahwətə nde berete: 'Ya ya kameghe nya wəba, kazhɛ nda ghazlənə ke pɛtɛa hwelefefi va berete ta ɗa.»