Read kapsiki Matiye 13 Bible Online

Matiye 13 - kapsiki bible

Matiye 13

¹Te vecia shɛ ne, ntəŋə Yɛsə shavenyɛ ki ghɛ ba'a lə kantishɛnyɛ mɛa ndərə kezha teke nda wəshi ke mbeli.

²Kwele kwele mbeli tsenete geva yite. Vatse dzawanyɛ ŋkɛ kwa kwambelə ba'a ntishɛnyɛ ŋkɛ kwa. Mba mbeli pelɛke te hələbə mɛa yɛmə.

³Kwele kwele gezete nda ghena ŋkɛ ke hɛ le ghena keyipə pa. Ma ke sha hɛ: «Ma te kwete veci ne, cape kwete wəndə slə kadzemte kezha ŋkisə ha.

⁴Ma vəa ŋkwa nya ŋkisə ha ŋkɛ mbe wəvea ŋkɛ ne, pa kweci betenji kwa hweŋkwa, pa yɛ 'yɛ se ba'a tsehahwe hɛ.

⁵Pa kweci menji hwa pelɛ, te ŋkwa nya dewə hɛɗi. Pa hɛ pesenji kahe kahe va nya ɗema hɛɗi kwele kwele te ŋkwa.

⁶Ma kwa ɓele veci ne, pa hɛ ghwelenji va nya dewə yɛ slərə yitea hɛ.

⁷Ma kweci ha shɛhɛ ɓiyitsa ne, hwa tigə menji hɛ. Pa tigəa shɛhɛ kelenji ba'a ŋkweŋkwahemte hɛ.

⁸Pa kweci ha shɛhɛ menji te hɛɗi ganyɛ ba'a menete ghə megela: gwəmsə ha kwa kweci, ŋkwaŋemsə kwa kweci, mahekenemsə kwa kweci.»

⁹Ma ke Yɛsə mbakete: «Fa ghena wəndə nya nza sleme ve!»

¹⁰Pa mbeli nyi ketəkwə təkwə se sha Yɛsə, ma ke hɛ shɛ: «Wa raberə nda geze nda ghena na ke hɛ le ghena keyipə pa wa?»

¹¹Ma ke Yɛsə sha hɛ: «Nahe Shala kendeke ŋayɛ hweŋkwa keɗepe wəshi nyi tewəfərə te ghena ta Meghe nya pelɛ ghweme. Ama ghenci ne, kekemave hweŋkwa shɛ hɛ we.

¹²Kwa nza ŋkɛ, ma wəndə nya nza wəshi ve ne, katemtsehe nda wəshi mbeli, kezha nza wəshi kwele kwele ve, ma wəndə nya ɗema wəsə ve, ya nya ɓɛhwɛ nya ve ŋkɛ ne, katekele mbeli ve.

¹³Vatse nda se 'ya kageze nda ke hɛ le ghena keyipə pa, va nya newe ŋkwa kaɗema kaveregheve, nya fa ghena hɛ kaɗema kafave ghena nya mbe.

¹⁴Kezha hɛ mene geva ghena kelɛŋə nyi gezete nde mɛ ŋkwa ta Shala Ɛzayi: Ma ke Shala: Katefa ghena yɛ megela, ama katefa ghena nya mbe yɛ we, katenewe ŋkwa yɛ megela, ama kateneweve yɛ we.

¹⁵Kaganda ne, nahe mehele ta mbelia shɛhɛ kezhɛrenyɛ ntɛaŋe ntɛaŋe. Nahe hɛ kezhiɓəte sleme ta nci, nahe hɛ keŋzlete ntsə ta nci, kezha ɗema hɛ kanewe ŋkwa le ntsə ta nci, kafa ghena le sleme ta nci, kafave ghena le mehele ta nci ba'a kazhɛre geva kase sha 'ya. Tagha gɛ, katembele hɛ 'ya.

¹⁶Ma gheyɛ le ŋa ŋayɛ ne, zlama ya va gheyɛ, kanewe ŋkwa ntsə ta ŋayɛ, kafa ghena sleme ta ŋayɛ.

¹⁷Kaganda ne, ma 'ya sha gheyɛ: kwele kwele ka mɛ ŋkwa ta Shala ba'a kweci mbeli nyi tiɗiɗi keɗe kanewe wəshi nyi newe yɛ, ama kenakɛ hɛ hɛ we, kaɗe hɛ kafa ghena nyi fa nyi yɛ, ama kefave hɛ hɛ we.

¹⁸Fa mə ghena nya mbe ghena keyipə pa ta nde tsawe ha.

¹⁹Ma mbeli nyi kefate ghena nyi geze mbeli te Meghe nya pelɛ ghweme kaɗema hɛ kefave ne, yipə yipə hɛ le hweŋkwa nya betenji ha kwa, pa Gətəli se ba'a nteɗehwe ghena nya ketsawete geva kwa wənəa nci.

²⁰Ma kweci mbeli ne, kala pelɛ nyi betenji ha hwa hɛ hɛ. Ma kwa fate ghena ta Shala hɛ, pa hɛ yɛte ŋkɛ le zlama.

²¹Ama kapele ŋkɛ hɛ kaha slərə mbe hɛ we, deke kezha və ɓɛhwɛ nza hɛ, ma kese yaka kadzete hɛ ba'a kenza mbeli kaghweze mɛ hwa hɛ tewəmbəreke ghena ta Shala ne, te ŋkwa shɛnyɛ teɗe hɛ.

²²Ma kweci mbeli zhɛkwa ne, kala ha nyi kebetenji hwa tigə tsawete geva ghena shɛ mbe hɛ, pa hɛ fate ghena shɛ, ama zəzə ta wəshi nyi te hɛɗi nya ba'a sla ntsə yitea mcɛlə nyi keghwete ŋkwa zhiɓəaghe geva kənəa ghena shɛ, shaŋe ŋkɛ kamene wəsə ya ci'a.

²³Nahe kweci mbeli kenza kala ha nyi ketsawete geva te hɛɗi ganyɛ ne, pa hɛ fate ghena, pa hɛ fave, yate ya, gwəmsə ya ta kwete, ŋkwaŋemsə ŋa kwete, mahekenemsə ŋa kwete.»

²⁴Pa Yɛsə gezete nda kwete ghena keyipə pa ke hɛ, ma ke: «Kala wa nza ta Meghe nya pelɛ ghweme ne, kala wəndə nya ketsawete ha ganyɛ mbe wəvea ŋkɛ.

²⁵Ma yitea hɛ mbeli pɛtɛ ne, pa nde ghema ta ŋkɛ lə heviɗi, pa tsawame cɛŋə mbe ba'a shekenyɛ.

²⁶Ma kwa kele ha ba'a kwa shave ŋkɛ le ghə mbe kwəɓə, darahwe mbeli te cɛŋə hwa ha perə.

²⁷Ma ke ka mavashi se kagezete nda ke wəndə ke ghɛa shɛ: Nde sleke n'yɛ, ashɛ ha ganyɛ yatsawete na te wəvea ŋa deŋwa wəka? Tema se cɛŋə hwe ɓiyitsa.

²⁸Ma ke sha hɛ: Kwete nde ghema nde menete. Ma ke ka mavashia shɛhɛ shɛ: Kaɗe na kadzemte ghen'yɛ nteɗemte cɛŋəa shɛ na?

²⁹Ma ke sha hɛ: Ewə, kwa nza ŋkɛ kanteɗemte ha ganyɛ yɛ vəa ŋkwa nya nteɗe cɛŋə yɛ.

³⁰Sərəakɛ mə hɛ pɛtɛ hwa'a te veci nya nehe ha. Te vecia shɛ, ma 'ya sha tegeze nda ke ka tsa ha: Tsamte mə yɛ cɛŋə kaba, tsene mə hɛ te ŋa nci ŋkwa kezha ndə mbeli. Kwa sebe ta ŋkɛ, fəke mə ha kasheke kadzawa tame ta ɗa.»

³¹Pa Yɛsə gezete nda kwete ghena keyipə pa ke hɛ, ma ke: «Yipə yipə Meghe nya pelɛ ghweme le ya ta balepale nya kelete kwete wəndə ba'a nya tsawete ŋkɛ mbe wəvea ŋkɛ.

³²Gheŋkɛ ya ɓɛhwɛ ma hwa pɛtɛa ya ta wəshi. Ama kwa pese ŋkɛ ne, gheŋkɛ ya kwele ma hwa pɛtɛa wəshi nyi kepese. Ma kwa kele ŋkɛ ne, kase yɛ 'yɛ kapa ghɛa nci dzeyi te yɛ dzeve ta ŋkɛ.»

³³Pa Yɛsə gezete nda kwete ghena keyipə pa ke hɛ, ma ke: «Meghe nya pelɛ ghweme ne, kala tenjɛne nya nza male kantave ɓɛhwɛ kezha bete hwa kiləwəa hə bakemsə mcɛfeghəmbe. Tagha ne, kawepe pɛtɛa həa shɛ.»

³⁴Le ghena keyipə pa gezete nda pɛtɛa wəshi Yɛsə ke mbeli, kese ŋkɛ kageze nda ghena ke hɛ kaɗema le ghena keyipə pa we.

³⁵Ma nda se ŋkɛ kamenete kala nya ne, kezha yipə ghena ta nde mɛ ŋkwa ta Shala, ma ke ghena shɛ: «Kategeze ghena 'ya le ghena keyipə pa. Kategeze wəshi nyi tewəfərə ghala pate geva hɛɗi lema 'ya.»

³⁶Pa Yɛsə sərəakɛ mbeli te ŋkwa shɛ, pa ŋkɛ lənyɛ sha ghɛ. Pa mbeli nyi ketəkwə təkwə hendave nda geva, ma ke hɛ shɛ: «Ncɛte n'yɛ ghena nyi se na kageze mbe yipə pa te cɛŋə nya mbe wəve gi!»

³⁷Ma ke Yɛsə sha hɛ: «Ma wəndə nya ketsawe ha ganyɛ ne, gheŋkɛ Wəzege ta za.

³⁸Ma wəve ne, gheŋkɛ ŋkwa nya te hɛɗi. Ma ha ganyɛ ne, gheŋkɛ ŋwalea Meghea Shala. Ma cɛŋə ne, ŋwalea Gətəli.

³⁹Ma nde ghema nya ketsawete cɛŋə ne, gheŋkɛ Gətəli. Ma və ketsa ha ne, gheŋkɛ kiɗi ta hɛɗi. Ma mbeli nyi ketsa ha ne, ghenci ka ghwene ta Shala.

⁴⁰Kala nya tsamte cɛŋə kezha bete hɛ mbe ghwə ne, tsagha temene geva ŋkɛ vəa ŋkwa nya tekiɗi hɛɗi.

⁴¹Kateghwene ka ghwene ta ŋkɛ Wəzege ta za, katetseha mbeli nyi keghwete ŋkwa yitea mene jaɗafa ba'a ka beze ghena hɛ shave mbe Meghea Shala.

⁴²Katebete hɛ hɛ mbe ghwə nya wəba. Katenehwene hɛ pelame pelame ba'a katenca slene hɛ mbe.

⁴³Ama mbeli nyi tiɗiɗi ne, kala veci teɓele hɛ mbe Meghea Yite nci. Fa ghena wəndə nya nza sleme ve.»

⁴⁴Kala mcɛlə nya tewəfərə mbe wəve nza ta Meghe nya pelɛ ghweme. Pa kwete wəndə nakɛ ŋkɛ ba'a zhɛne kawəfərəakɛ ŋkɛ. Mbe farefa ta wənəa ŋkɛ ne, pa ŋkɛ lə kapamte pɛtɛa wəshia ŋkɛ ba'a pave wəvea shɛ.

⁴⁵Yipə yipə Meghe nya pelɛ ghweme le nde zhɛre dzeve nya kezele wəsə kepesa geva nya ganyɛ.

⁴⁶Ma kwa nakɛ nya nza səkəmə kwele kwele te ŋkɛ ne, pa ŋkɛ lə kapamte pɛtɛa wəshia ŋkɛ ba'a pave wəsə kepesa geva shɛ.

⁴⁷Yipə yipə Meghe nya pelɛ ghweme le bararawe negha mbeli kwa ndərə. Ma kwa negha mbeli kwa ne, kese pɛtɛa kelepe ŋkɛ.

⁴⁸Ma kwa viɗi ŋkɛ ne, ntake ka kese kelepe kantsehe ŋkɛ same kwa ndərə. Kantishɛ hɛ kezha tseha kelepe ganji kadzawa kwaciga. Ma nyi ndiremi ndiremi ne, kabete hɛ hɛ.

⁴⁹Tsetse tenza ŋkɛ veci nya tekiɗi hɛɗi, katese ka ghwene ta Shala kanehe mbeli ganji le ka 'yaghwa mehele.

⁵⁰Ma ka 'yaghwa mehele ne, katebete hɛ hɛ mbe ghwə nya wəba, katenehwene hɛ pelame pelame ba'a katenca slene hɛ mbagha.

⁵¹Ma ke Yɛsə sha hɛ: «Nahe yɛ kefate pɛtɛa ghena nyi na?» -- «E'e», a ke hɛ.

⁵²Ma ke sha hɛ: «Yayata nde rafe wəsə mahalegəa Shala nya ketəkwə təkwə Meghe nya pelɛ ghweme ne, yipə yipə ŋkɛ le wəndə ke ghɛ nya ketseha wəshi mɛnɛfɛ ba'a wəshi meha shave hwa mcɛləa ŋkɛ.»

⁵³Ma kwa gezemte ghena keyipə pa nyi Yɛsə ne, pa slənyɛ te ŋkwa shɛ.

⁵⁴Pa ŋkɛ lənyɛ kadzembe meleme nya kele ŋkɛ mbe. Ntake ŋkɛ kateke nda wəshi ke mbeli mbe cɛ kesəkwə ghə. Heheɓake mbeli nyi tagha te ghena nyi geze ŋkɛ. Ma ke hɛ: «Tema seke nda se ntsehwele nyi geze ghena ŋkɛ le wa? Tsema se ŋkɛ nda mene wəshi meŋele ŋkɛ kala nyi wa?

⁵⁵Ashɛ wəzege ta nde sla sheghwə ŋkɛ wəka? Ashɛ meghekɛ Mari wəka? Ashɛ ka kesaka meghekɛ Zhake, Zhozɛf, Simon ba'a Zhəwde wəka?

⁵⁶Ashɛ teke pɛtɛa ŋwalea kwɛa meghekɛ hwa gheɓəmə wəka? Tema kemave nya ŋkɛ berete tsagha wa?»

⁵⁷Gheŋkɛ nde zhɛrenyɛ kawəsə nya teɗe hɛ ve. Ma ke Yɛsə sha hɛ: Kave nda zləvə mbeli ke nde mɛ ŋkwa ya tema tema, ama mbe meleme nya ya ŋkɛ hwa ka menəhɛnyɛ, ki ghɛa ŋkɛ ne, zləvə te we.

⁵⁸Kese Yɛsə kamene wəshi meŋele kwele kwele mbe melemea shɛ va nya dewə yɛ va hɛ we.