Read kapsiki Matiye 14 Bible Online

Matiye 14 - kapsiki bible

Matiye 14

¹Ma vəa ŋkwa shɛ ne, nahe Hɛrode, ŋgwamna nya kesleke hɛɗia Galilɛ kefave zləvəa Yɛsə.

²Ma ke sha mbeli nyi kemene nda slene: «Gheŋkɛ Zhaŋe Batiste. Gheŋkɛ nde samenyɛ kwa kwele le mpi. Vatse mene meŋele ŋkɛ kala nya.»

³Kwa nza nde Hɛrode nde gezete nda ke mbeli kakese Zhaŋe, kahwepe ŋkɛ kwa zewe lɛ ba'a kave ŋkɛ kwa daŋgayɛ, tewəmbəreke Hɛrodiyade, male ta Filipe, menənyɛ.

⁴Kwa nza ŋkɛ ma ke Zhaŋe shɛ: «Kehi na kakele Hɛrodiyade kamale ta ŋa we.»

⁵Kaɗe Hɛrode kapesle Zhaŋe, ama kaghazlənə ŋkɛ va ka Zhəwif, va nya veyi Zhaŋe hɛ pɛtɛ kande mɛ ŋkwa ta Shala.

⁶Ma kwa menete gəsəkəa ya ta ŋkɛ Hɛrode ne, ntake wəzha ta Hɛrodiyade kawetse kwa kema ta mbeli nyi hekakɛ mbeli yitea gəsəkəa shɛ. Ndeɗehwe nda nde ke Hɛrode.

⁷Ma ke zemete nda fela: «Yayata wəsə nya 'yɛwe na va 'ya ne, kave ŋa ŋkɛ 'ya.»

⁸Ma ke kala nya gezete meghekɛ: «Slake ɗa ghəa Zhaŋe Batiste mbeli te parantɛ.»

⁹Kwele kwele zhɛ nda wənəa meghe, ama va fela nya zemete ŋkɛ kwa kema ta mbeli nyi hekakɛ ŋkɛ ne, pa gezete kezha sla nda ŋkɛ mbeli kase ke wəzha shɛ.

¹⁰Pa ŋkɛ ghweneghe kwete wəndə kalə kasla ghəa Zhaŋe Batiste kwa daŋgayɛ.

¹¹Pa mbeli keleke ghəa shɛ te parantɛ ba'a ndeke nda ŋkɛ ke wəzha shɛ. Pa wəzha shɛ ndeke nda ke meghekɛ.

¹²Pa mbeli nyi ketəkwə təkwə Zhaŋe se kakelete geva ta ŋkɛ ba'a lamte ŋkɛ. Pa hɛ lə kagezete nda wəshi nyi kemenete geva ke Yɛsə.

¹³Ma kwa fate ghena shɛ Yɛsə ne, ntəŋə ŋkɛ slənyɛ te ŋkwa shɛ, pa dzawa kwa kwambelə kalə kadzete ŋkwa nya ɗema mbeli te. Ama nahe mbeli kefate ŋkwa nya nza hɛ te, pɛtɛ mbeli shavenji mbe meleme ta nci kezha zele Yɛsə dzeyi mɛa hələ.

¹⁴Ma kwa same Yɛsə kwa kwambelə ne, dəkwə ŋkɛ te mbeli kwele kwele. Pa heli zhɛte nda yitea hɛ, pa mbete mbeli nyi shewə hwa hɛ.

¹⁵Nahe tɛhwɛɗi kesenyɛ. Pa mbeli nyi ketəkwə təkwə hendave nda geva, ma ke hɛ shɛ: «Hetɛhwɛɗi ŋkwa, nahe ŋkwa nya kenza hwa gamba. Geze nda ke mbeli nyi yitea lə hɛ kapa wəshi kezeme mbe meleme.»

¹⁶Ma ke Yɛsə sha hɛ: «Kahi hɛ kalə cakeɗake we. Ɗave nda mə wəshi kezeme ke hɛ le ghəa ŋayɛ.»

¹⁷Ma ke hɛ: «Deke 'yɛmbe dəghwəa ɗafa mcɛfe ba'a kelepe bake ya va ghen'yɛ.»

¹⁸Ma ke Yɛsə sha hɛ: «Fəave ɗa mə hɛ.»

¹⁹Ma kwa sebe ta ŋkɛ ne, pa gezete nda ke mbeli kantishɛ te gwəzə. Pa ŋkɛ kelete 'yɛmbe dəghwəa ɗafa nyi mcɛfe ba'a kelepe nyi bake, pa kafete kema yitea ghweme ba'a tsate nda ŋ'wese ke Shala, pa neheve ɗafa shɛhɛ mbe ba'a ndeke nda hɛ ke mbeli nyi ketəkwə təkwə kezha nehe nda hɛ hɛ ke mbeli.

²⁰Pa yayata wəndə zehwe behe. Pa mbeli pɛrekɛ kwaciga meŋe bakeghəmbe le kwetiɓəa ɗafa nyi ketene.

²¹Gare slibə mcɛfe zhili nyi kezehwe ɗafa shɛ, kaɗema mbeli keɓelate mi ba'a ŋwale.

²²Te ŋkwa shɛnyɛ kwa sebe ta ŋkɛ ne, pa Yɛsə veyi mbeli nyi ketəkwə təkwə kwa kwambelə kezha jive kema ta ndərə hɛ mpelɛa ma, vəa ŋkwa nya geze nda ŋkɛ ke mbeli kalə sha ghɛ.

²³Ma kwa lənji mbeli sha ghɛ ne, pa dzemenyɛ hwa ghweme kezha səkwə Shala. Mba ŋkɛ kwetɛŋenyɛ te ŋkwa shɛ nda se viɗi.

²⁴Cakeɗake kwambelə yitea hələbə. Kwele kwele gaŋkəɗə geva ŋkɛ va sefə nya kevɛ kwa kema ta nci.

²⁵Ma takwa ŋkwa kakiɗi ne, pa Yɛsə se sha mbeli nyi ketəkwə təkwə le dzeghwa te yɛmə le seɗa.

²⁶Ma kwa nakɛ ŋkɛ hɛ kadzeghwa te yɛmə ne, benake hɛ va ghazlənə, ma ke hɛ: «A mte.» Ntake hɛ katsa lewela le ghazlənə.

²⁷Ma ke Yɛsə gezete nda ghena ke hɛ kahe kahe: «Hwepete mə ghə, 'ya ŋkɛ, ghazlənəma yɛ ma.»

²⁸Ma ke Piyɛre shɛ: «Nde sleke ŋkwa, ma kenza nde gha ŋkɛ kaganda ne, ndeke ɗa hweŋkwa kadzeghwa te yɛmə kalə sha gha gi.» --

²⁹«Nde», a ke Yɛsə shɛ. Cape ŋkɛ same kwa kwambelə kadzeghwa te yɛmə le seɗa kezha lə sha Yɛsə.

³⁰Ama kwa nakɛ sefə ŋkɛ ne, ntake ghazlənə kazhɛ nda. Ma kwa nza yɛmə kanda ŋkɛ ne, ma ke tsate lewela: «Nde sleke ŋkwa, mbele ɗa gi!»

³¹Taghanyɛ ne, pa Yɛsə haghe dzeve, keseve ŋkɛ, ma ke shɛ: «Nda ɓɛhwɛ yɛ ta ŋa ka. Yitea wa nza ghəa ŋa bake bake wa?»

³²Pa hɛ dzawanji kwa kwambelə, gweɗakwe sefə.

³³Kagwəɗəŋə ka təkwə təkwə nyi kwa kwambelə mbe kema ta ŋkɛ kahawe ve, ma ke hɛ shɛ: «Kaganda nza na Wəzege ta Shala.»

³⁴Pa hɛ zlakemte ndərə ba'a ntsehe te hɛɗia Zhɛnɛzarɛt.

³⁵Pa mbeli nyi te ŋkwa shɛ ɗepete ba'a ghwenakɛ mɛ kadzembe kweci meleme nyi dzeyi yitea hɛ, pɛtɛ mbeli fəke nda ka zereghwe ke Yɛsə.

³⁶Kasəkwə ŋkɛ hɛ kezha kwaɗe mɛa lekwesa ta ŋkɛ hɛ nahe. Ma yayata wəndə nya kekwaɗakɛ ŋkɛ ne, pələsə ŋkɛ.