Read kapsiki Matiye 16 Bible Online

Matiye 16 - kapsiki bible

Matiye 16

¹Pa ka Fariziyɛn ba'a ka Sadəsɛyɛn se sha Yɛsə kezha ŋa nda keleŋa ba'a 'yɛwakɛ wəsə kencɛ wəsə nya kese va Shala ve.

²Ma ke Yɛsə sha hɛ: «Ma kepəkwə veci ne, ma pe yɛ sha geze: megela tenza ŋkwa hendɛ, kwa nza ŋkɛ gheme ghweme.

³Masheke masheke ne, ma pe yɛ sha geze: katese va ɓeshi, kwa nza ŋkɛ gereɓənə ghweme. Nahe yɛ keɗepe nza ta ghweme ne, ama ndɛare yɛ kaɗepe wəshi nyi ncɛ wəshi nyi kemene geva tsetsenya.

⁴Nahe mbeli nyi tsetse ŋkwa nyi kenza kaka ndiremia mehele ba'a kambeli nyi keɗema dɛŋe dɛŋe te Shala. Wəsə kencɛ wəsə shɛ katendeke nda geva ke hɛ keɗema ŋa Zhonas we.» Pa ŋkɛ zlenekɛ hɛ, ntəŋə ŋkɛ dzeghwanyɛ.

⁵Ma kwa jive kwete kema ta hələ ka təkwə təkwə ne, nahe hɛ kezaghəyite kele ɗafa.

⁶Ma ke Yɛsə sha hɛ: «Ntsehwele mə yitea ghəa ŋayɛ va tenjɛne ta ka Fariziyɛn ba'a ŋa ka Sadəsɛyɛn.»

⁷Ma ke mbeli nyi ketəkwə təkwə gezete kwelɛ ghəa nci: «Va nya ɗema mə kekelete ɗafa nda geze ŋkɛ kala nya.»

⁸Nahe Yɛsə keɗepe ghena nyi geze hɛ, ma ke 'yɛwete va hɛ: «Tewəmbəreke wa nda geze yɛ: va nya ɗema ɗafa va gheɓəmə, pe yɛ wa? Dewə yɛte ghena ta ɗa yɛ ga!

⁹Pa tsetsenya kaɗema yɛ kefave ghena shɛ na? Nahe yɛ kezaghəyite 'yɛmbe dəghwəa ɗafa nyi mcɛfe nyi nehave nda 'ya ke mbeli slibə mcɛfe (5.000) na? Ŋkwini pɛrekɛ kwaciga yɛ le kwetiɓəa ŋkɛ wa?

¹⁰Na, nahe yɛ kezaghəyite 'yɛmbe dəghwəa ɗafa mberefaŋe nyi kebehekɛ mbeli slibə wəfaɗe (4.000) na? Ŋkwini pɛrekɛ kwaciga yɛ le kwetiɓəa ŋkɛ wa?

¹¹Tsema shaŋe yɛ va ɗepe kaɗema kaghena ta ɗafa yageze ŋayɛ 'ya kwa geze 'ya: Ya mə ghəa ŋayɛ va tenjɛne ta ka Fariziyɛn ba'a ŋa ka Sadəsɛyɛn, 'ya sha gheyɛ wa?»

¹²Tagha gɛ, nahe ka təkwə təkwə kefave kaɗema tenjɛne nya mene mbeli hwa ɗafa yageze ŋkɛ, wəsə nya teke nda ka Fariziyɛn ba'a ka Sadəsɛyɛn ke mbeli.

¹³Ntəŋə Yɛsə kadzeyi te hɛɗia ka Sɛzarɛ Filipe. Pa ka'yɛwe va mbeli nyi ketəkwə təkwə: «Ma yitea nya geze mbeli ne, wa ŋkɛ Wəzege ta za tse wa?»

¹⁴Ma ke hɛ shɛ: «Zhaŋe Batiste na, a ke kweci. Ɛli na, a ke kweci. Zhɛrɛmi na ke kweci, keɗema kwete ŋkɛ nde mɛ ŋkwa, a ke kweci.»

¹⁵Ma ke Yɛsə sha hɛ: «Yewə, take yɛ le ŋa ŋayɛ, wa ŋkɛ 'ya pe yɛ wa?»

¹⁶Ma ke Simon Piyɛre shɛ: «Gha ya kaMɛsi, Wəzege ta Shala nya teghweme.»

¹⁷Ma ke Yɛsə shɛ: «Zlama ya va Simon, wəzege ta Zhaŋe, wəndə ŋelɛ nde ncɛte ŋa ghena nya we, ama Yiteyɛ ɗa nya pelɛ ghweme.

¹⁸Fəyitekeghə ne, ma 'ya sha gha: Piyɛre na, geze ta ŋkɛ keleɓa, te keleɓa shɛ teŋa Jikə ta mbelia ɗa 'ya. Kapesle ghɛa mbelia kwahɛɗi yite we.

¹⁹Kateve ŋa wəsə keghwene Meghe nya pelɛ ghweme 'ya, yayata ghena nya hwepete na kwake te hɛɗi ne, katehwepe geva ŋkɛ pelɛ ghweme. Yayata ghena nya tepele na kwake te hɛɗi ne, katepele geva ŋkɛ pelɛ ghweme.»

²⁰Pa Yɛsə gezete nda ke mbeli nyi ketəkwə təkwə kezha ɗema hɛ kageze nda ke mbeli nahe ŋkɛ kenza kaMɛsi.

²¹Se te vecia shɛ ne, ma ke Yɛsə Kriste ghate geze nda ghena darahwe ke mbeli nyi ketəkwə təkwə: «Jara dzeme Zhɛrəzalɛm 'ya kezha sa yaka kwele kwele mbe dzeve ta mbelia jama, mbeli nyi te ghəa ka dzeghe Shala ba'a ka rafe wəsə mahalegə. Katepesle ɗa hɛ, ama te kwa maheke ta hɛ ne, katesame 'ya kwa kwele le mpi.»

²²Pa Piyɛre hekaghe kadzeyi kwetere ŋkwa kezha fɛa ŋkɛ kegeze kala nyagha, ma ke shɛ: «Pa Shala yakɛ ŋa va ghena shɛ, Nde sleke ŋkwa. Ewə, katemene ŋa geva ŋkɛ kala nyagha we.»

²³Tewətelɛwe Yɛsə zhɛrete geva, ma ke sha Piyɛre: «Slə ŋa cakeɗake yitea 'ya, Satan. Hweŋkwa kebeze ghena yazele ɗa na, kwa nza ŋkɛ zəzə ta Shala ya va gha we, ama ŋa wəndə ŋelɛ.»

²⁴Ma ke Yɛsə sha mbeli nyi ketəkwə təkwə: «Ma keɗe wəndə katəkwə təkwə ɗa ne, zaghəyite ghə ŋkɛ yitea ghəa ŋkɛ, heyite ghə ŋkɛ yitea sheghwə kwa zleŋkwa ta ŋkɛ ba'a təkwə təkwə ɗa ŋkɛ.

²⁵Ma wəndə nya keɗe kambele mpia ŋkɛ le ghəa ŋkɛ ne, kateza ŋkɛ. Ama wəndə nya kezamte mpia ŋkɛ tewəmbəreke 'ya, katekemave ŋkɛ zhɛkwa.

²⁶Wa yakete wəndə kemave pɛtɛa mcɛlə nyi te hɛɗi lema kezamte ghəa ŋkɛ ŋkɛ keɗema kezamte mpia ŋkɛ ŋkɛ wa? Wa wəsə nya nza wəndə kambeɗeke mpia ŋkɛ te wa?

²⁷Kwa nza ŋkɛ katesawa Wəzege ta za mbe zləvə nya ndeke nda Yitenyɛ le ka ghwene ta Shala. Kateŋki nda zhɛme ŋkɛ ke mbeli yipə yipə le slene ta nci.

²⁸Kaganda ne, ma 'ya sha gheyɛ: kampə kweci hwa mbeli nyi teke nyi keɗema hɛ kenaka kanakɛ se ta Wəzege ta za kala meghe we.»