Read kapsiki Matiye 18 Bible Online

Matiye 18 - kapsiki bible

Matiye 18

¹Pa mbeli nyi ketəkwə təkwə Yɛsə hendave nda geva, ma ke hɛ shɛ: «Wa ya kwele ma mbe Meghe nya pelɛ ghweme wa?»

²Pa Yɛsə hekakɛ kwete wəzege, pa ghereŋeyi mbe kema ta nci.

³Ma ke: «Kaganda ne, ma 'ya sha gheyɛ: ma keɗema yɛ kezhɛrete mehele ta ŋayɛ kala ŋa ŋwale, kadzembe Meghe nya pelɛ ghweme yɛ we.

⁴Ma wəndə nya kwele ma mbe Meghe nya pelɛ ghweme ne, wəndə nya keshifə ghəa ŋkɛ ba'a nya kazhɛre ghəa ŋkɛ kala wəzege nya.

⁵Yayata wəndə nya kekemaneve wəzege nya kala nya te sləa ɗa, 'ya yakemaneve ŋkɛ.

⁶Ma keghwetame kwete wəndəa ŋwale nyi keyɛ ghena ta ɗa nyi wəndə mbe jaɗafa ne, ganyɛ ma hwepeyi nda vena nya wəba mbeli kwa welɛ ba'a negheyi ŋkɛ mbeli kwa ndərə.

⁷Ndiremi ya te mbeli nyi kwake te hɛɗi va wəshi nyi keghwete ŋkwa deŋwa! Wərə nda nza wəshi nyi keghwete ŋkwa kadzembe jaɗafa te hɛɗi, ama ndiremi ya te wəndə nya keghwete ŋkwa le wəshia shɛhɛ.

⁸Ma kenza ŋkɛ dzeve ta ŋa keɗema seɗa ta ŋa nde ghwete ŋa kadzembe jaɗafa ne, slamte hɛ ba'a betakɛ hɛ cakeɗake yitea gha, megela ma kemave mpi nya keɗema kakiɗi na kenya dzembe ghwə nya kaghala ghala na le dzeve ta ŋa bake keɗema seɗa ta ŋa cəkwə.

⁹Ma kenza nde ntsə ta ŋa nde ghwete ŋa kadzembe jaɗafa ne, feraɗemte ŋkɛ, neghamte ŋkɛ cakeɗake yitea gha, megela ma kemave mpi nya keɗema kakiɗi na le ntsə kwetɛŋe kenya tenegha ŋa mbeli kadzembe ghwə nya keɗema kakiɗi le ntsə bake.

¹⁰Ntsehwele mə yitea newe kwete wəndəa ŋwale nyi kala nya newe deweze kaŋka. Kaganda ne, ma 'ya sha gheyɛ: keveci keveci ka ghwene ta Shala ta nci kwa kema ta Yiteyɛ ɗa nya pelɛ ghweme.

¹¹Kwa nza ŋkɛ nahe Wəzege ta za kese kezha mbele mbeli nyi kezanji.

¹²Tsema zəzə yɛ wa? Timɛti gwəmsə ya shɛ va kwete wəndə. Ma kezanyɛ kwete kwetɛŋe ne, ashɛ wəndəa shɛ kasərə nyi meslimsə meslighəmbe pelɛ ghweme kezha lə kazele nya kezanyɛ wəka?

¹³Kaganda ne, ma 'ya sha gheyɛ: ma kesepate ŋkɛ ne, za ma tezlama ŋkɛ yite ke nyi meslimsə nyi meslighəmbe nyi ketene kaɗema keza.

¹⁴Tsagha ŋkɛ perə, kaɗe Yiteyɛ ŋayɛ nya pelɛ ghweme kaza kwete wəndə hwa ka dewə ŋeli nyi we.

¹⁵Ma kemenete jaɗafa wəza meyɛ ŋa ne, kwiɗi sləyi ŋkɛ kwetɛŋenyɛ shɛ ncɛte nda ghena nya bezemte ŋkɛ. Ma kefate ŋa ŋa ŋa ŋkɛ ne, nahe na kezhɛreke wəza meyɛ ŋa.

¹⁶Ama keɗema ŋkɛ keyɛte ŋa fete ne, hekakɛ wəndə kwetɛŋe keɗema mbeli bake kezha yipə geva yayata ghena te ghena ta mbeli bake keɗema mahekene, kala nya gezete Ghena ta Shala.

¹⁷Ma keɗema ŋkɛ keyɛte nda fete ke hɛ ne, geze nda ke Jikə ta ka Kriste, ma keɗema ŋkɛ keyɛte nda fete ke Jikə ta ka Kriste ne, newe mə wəndəa shɛ kala nde zelema Shala keɗema kala nde tsehe jaɓeregwale.

¹⁸Kaganda ne, ma 'ya sha gheyɛ: yayata ghena nya hwepete yɛ kwake te hɛɗi ne, katehwepe geva ŋkɛ pelɛ ghweme, yayata ghena nya pelemte yɛ kwake te hɛɗi ne, katepele geva ŋkɛ pelɛ ghweme.

¹⁹Kaganda ne, ma 'ya sha gheyɛ ɓiyitsa: ma keyipəte ghena mbeli bake kwake te hɛɗi kezha 'yɛwe yayata wəsə mbe səkwə ghə ne, kateve nda ŋkɛ Yiteyɛ ɗa nya pelɛ ghweme ke hɛ.

²⁰Kwa nza ŋkɛ, ma ketsenete geva mbeli bake keɗema mahekene te sləa ɗa ne, te tepe ta nci 'ya.»

²¹Pa Piyɛre se sha Yɛsə, ma ke shɛ: «Nde sleke ŋkwa, ŋkwini zhigə nza 'ya kakelemte te wənə beze ghena ta wəza meyɛ ɗa nya kemene ɗa jaɗafa keveci keveci Wa? Mberefaŋe zhigə na, na, tsema wa?»

²²Ma ke Yɛsə shɛ: «Mberefaŋe zhigə 'ya sha gha we, ama mberefaŋemsə zhigə mberefaŋe.

²³Vatse nza Meghe nya pelɛ ghweme kala kwete meghe nya keɗe kaɓela wəshia ŋkɛ le mavashia ŋkɛ.

²⁴Mba ŋkɛ kaɓela cɛdɛa ŋkɛ ne, pa mbeli keleke nda kwete wəndə nya nza dewa ta ŋkɛ ve kamiliyeŋə meŋe.

²⁵Wəsə shɛ va wəndəa shɛ kezha ŋki cɛdɛ shɛ we, ma ke meghe sha mbelia ŋkɛ: Pamte mə wəndəa shɛ, male ta ŋkɛ, ŋwalea ŋkɛ ba'a pɛtɛa ghɛa ŋkɛ kezha kemave cɛdɛa ɗa 'ya.

²⁶Gwəɗəŋə mava shɛ yitea hwəa nde sleke ŋkɛ, ma ke shɛ: Təhwə təhwə ŋa 'ya, teməakɛ ɗa temə ɓahwe, kateŋki ŋa pɛtɛa wəshia ŋa 'ya.

²⁷Pa heli zhɛte nda ke meghe yite, ma ke shɛ: Kwiɗi ŋa. Nahe 'ya kesərəakɛ ŋa dewa shɛ.

²⁸Shavema ta wəndəa shɛ ki ghɛa meghe, begeme ŋkɛ le mava nya nza ŋkɛ le, nya nza dewa ta ŋkɛ hwe kaslibə meŋe. Ghɛke ŋkɛ keseve ŋkɛ yitea ŋwələ, ma ke shɛ: Ŋkikɛ ɗa dewa ta ɗa ɓeshi.

²⁹Gwəɗəŋə kwete wəndə nya kamava kala gheŋkɛ yitea hwəa ŋkɛ, ma ke mpiyi nda dzeve: Təhwə təhwə ŋa 'ya, teməakɛ ɗa temə ɓahwe, kateŋki ŋa pɛtɛa wəshia ŋa 'ya.

³⁰Ama pa wəndəa shɛ ɗema. Ɓiyitsa ne, pa keseve ŋkɛ ba'a veyi kwa daŋgayɛ nda teŋkikɛ nda pɛtɛa dewa ta ŋkɛ wəndəa shɛ.

³¹Ma kwa nakɛ wəsə nya kemenete geva kweci ka mavashi ne, kwele kwele zhɛ nda wənəa nci ke hɛ va ghena shɛ. Cape hɛ kalə sha meghe kezha geze nda wəsə nya menete wəndəa shɛ.

³²Pa meghe hekakɛ ŋkɛ, ma ke shɛ: Mava nya 'yaghwa mehele, nahe 'ya kesərəakɛ ŋa pɛtɛa dewa nya hwa gha va nya se na kampi ɗa dzeve.

³³Ashɛ nahe ŋkɛ kehi kazhɛ heli na yitea kwete wəndəa ŋa kala nya zhɛakɛ heli 'ya yitea gha wəka?

³⁴Kwele kwele zhɛ nda wənəa ŋkɛ ke meghe. Pa ŋkɛ kelete mava shɛ ba'a veyi ŋkɛ kwa daŋgayɛ nda teŋkikɛ nda pɛtɛa dewa ta meghe ŋkɛ.»

³⁵Ma ke Yɛsə mtsehete ghena shɛ: «Tsetse temene ŋayɛ Yiteyɛ ɗa nya pelɛ ghweme keɗema yayata wəndəa ŋayɛ kekelemte beze ghena ta wəza meghekɛ te wənə.»