Read kapsiki Matiye 2 Bible Online

Matiye 2 - kapsiki bible

Matiye 2

¹Kwa Bɛtelɛhɛm yake geva Yɛsə, te hɛɗia Zhəwdɛ, te və nya nza Hɛrode mbe meghe. Ma kwa yake geva Yɛsə, pa ka ntsehwele ntsehwele same kwa ŋkwa kesame ta veci kadzembe Zhɛrəzalɛm.

²Ma ke hɛ 'yɛwete: «Tema wəzege nya keya nya, nya kameghea ka Zhəwif wa? Nahe n'yɛ kenakɛ saseregwa ta ŋkɛ same kwa ŋkwa kesame ta veci ba'a nahe n'yɛ kese kezha gwəɗəŋə kwa kema ta ŋkɛ.»

³Ma kwa fate meghe Hɛrode ne, ntake ŋkɛ kabare bare. Tsagha pɛtɛa mbeli nyi mbe Zhɛrəzalɛm.

⁴Pɛtɛ ŋkɛ tseneke mbeli nyi te ghəa ka dzeghe Shala, ka rafe wəsə mahalegə. Ma ke 'yɛwete va hɛ: «Tema ŋkwa nya teya Mɛsi te wa?»

⁵Ma ke hɛ shɛ: «Kwa Bɛtelɛhɛm, meleme ta ka Zhəwdɛ, kwa nza ŋkɛ ma ke nde mɛ ŋkwa ta Shala rafete:

⁶Ma gha Bɛtelɛhɛm nya te hɛɗia Zhəwda ne, kenza na ɓɛhwɛ ma hwa meleme nyi jama jama mbe Zhəwda we. Shave mbe gha teshave meghe nya keteya ka Israyɛl, mbelia ɗa.»

⁷Pa Hɛrode hekakɛ mbelia shɛhɛ tewəfərə. Pa ŋkɛ fave vəa ŋkwa nya ncɛte geva saseregwa va hɛ.

⁸Pa ŋkɛ ghweneghe hɛ kadzawa Bɛtelɛhɛm. Ma ke sha hɛ: Kwiɗi mə fake mə ghena ta wəzegea shɛ ndeɗekə. Ma vəa ŋkwa nya tenakɛ ŋkɛ yɛ ne, se mə kageze ɗa, kezha lə 'ya kahawe ve perə.

⁹Ma kwa gezete nda ghena nyagha meghe ke hɛ, ntəŋə hɛ. Dəkwə hɛ te saseregwa nya kebegheke hɛ same kwa ŋkwa kesame ta veci. Te kema ta nci ŋkɛ shanda, ma kwa kekave ŋkwa nya nza wəzegea shɛ ŋkɛ te, ntare saseregwa shɛ ghereŋenyɛ.

¹⁰Ma kwa nakɛ saseregwa shɛ hɛ meghereŋe ne, kwele kwele zlamate zlama hɛ.

¹¹Pa hɛ dzeki ghɛa shɛ, pa hɛ nakɛ wəzegea shɛ le meghekɛ Mari. Gwəɗəŋə hɛ mbe kema ta wəzegea shɛ kahawe ve. Pa hɛ pelemte wəshia nci, pa hɛ fəave nda mze kwa tere tere, 'wərdə kwa hə hə ba'a 'wərdə ganyɛ kawəshi gəmə.

¹²Ma kwetere wəmbəa ŋkɛ ne, pa Shala gezete nda ke hɛ te shiwə kezha ɗema hɛ kezhɛre geva dzeyi laka Hɛrode. Pa hɛ kelete kwete hweŋkwa kalə kadzete hɛɗia nci.

¹³Ma kwa dzeghwanji ka ntsehwele ntsehwelea shɛhɛ ne, pa nde ghwene ta Shala se sha Zhozɛf te shiwə, ma ke shɛ: «Sate, kelete wəzege le meghekɛ, hwɛ ŋa kadzawa Ɛzhipte, nza ŋa kwagha nda tegeze ŋa veci nya tesame na te 'ya. Va nya nza Hɛrode kasepa wəzegea shɛ kapesle ŋkɛ.»

¹⁴Pelɛhetɛme Zhozɛf, ntəŋə ŋkɛ le wəzegea shɛ ba'a meghekɛ heviɗi kadzawa Ɛzhipte.

¹⁵Pa ŋkɛ nzanyɛ kwagha hwa'a te mte ta Hɛrode. Kezha yipə ghena nyi gezete Shala laka nde mɛ ŋkwa ta ŋkɛ nda menete geva ŋkɛ, ma ke ghena shɛ: «Same kwa Ɛzhipte teheka wəzege ta ɗa 'ya.»

¹⁶Ma kwa ɗepe Hɛrode nahe ka ntsehwele ntsehwele keghwetete ŋkɛ ne, pa hwepete wənə kwele kwele. Pa ŋkɛ geze nda ke mbeli kampə pɛtɛa ŋwale tezhili nyi se te ŋwale nyi kemenete va bake ba'a nyi kekekavema va bake, nyi mbe Bɛtelɛhɛm ba'a nyi meleme nyi dzeyi yite. Nahe va nya kesleyi geva shɛ kenza yipə yipə le ghena nyi gezete nda ka ntsehwele ntsehwele.

¹⁷Nahe ghena nyi gezete nde mɛ ŋkwa ta Shala Zhɛrɛmi kemenete geva:

¹⁸«Nahe mbeli kefave lewela nya tsa mbeli mbe Rama, yɛ nehwene ba'a yɛ ŋgaɗe ghə. Rashɛl nde nehwene ŋwalea nta, kaɗe gweɗakwe nde kwa mpənji ŋwalea nta we.»

¹⁹Ma kwa mte Hɛrode ne, pa nde ghwene ta Shala se sha Zhozɛf te shiwə, kwa Ɛzhipte.

²⁰Ma ke shɛ: «Sate, kelete wəzege nya ba'a meghekɛ, zhɛneghe geva kadzete hɛɗia ka Israyɛl, kwa nza ŋkɛ nahe mbeli nyi kezele kapesle wəzege nya kempənji.»

²¹Cape Zhozɛf le wəzegea shɛ ba'a meghekɛ, pa zhɛneghe geva kadzete hɛɗia ka Israyɛl.

²²Ma kwa fa ŋkɛ Arkɛlawos ya kameghea ka Zhəwdɛ te ŋkwa yitenyɛ Hɛrode ne, pa ghazlənə zhɛ nda kedzembe melemea shɛ. Ma kwa gezete nda ghena Shala te shiwə ɓiyitsa ne, pa ŋkɛ lənyɛ laka ŋa ka Galilɛ.

²³Pa ŋkɛ ntishɛnyɛ mbe kwete meleme nya nza sləa ŋkɛ kaNazarɛt. Kezha yipə ghena nya gezete ka mɛ ŋkwa ta Shala nda menete geva ŋkɛ kala nya: «Kande Nazarɛt teheka ŋkɛ mbeli.»