Read kapsiki Matiye 20 Bible Online

Matiye 20 - kapsiki bible

Matiye 20

¹Kaganda deŋwa, kala nya nza ta Meghe nya pelɛ ghweme: pa kwete wəndə shave ki ghɛa ŋkɛ masheke masheke kezha zele ka mene slene mbe wəvea ŋkɛ.

²Pa ŋkɛ tseɓate le hɛ kezha ŋki nda slibə slibə ke hɛ te vəghwə, pa ghweneghe hɛ kadzembe wəvea ŋkɛ.

³Pa ŋkɛ shave ki ghɛ te kwəsərə, pa nakɛ kweci mbeli mentishɛ kaɗema slene va hɛ.

⁴Ma ke sha hɛ: Kwiɗi mə kalə kamene ɗa slene mbe wəvea ɗa nda ŋki ŋayɛ 'ya tiɗiɗi.

⁵Cape hɛ kalə. Pa wəndə ke wəve shave kwa ghə veci, zhɛne, kwa mtsa veci ba'a menete tsagha shɛ.

⁶Kakwa keɗaŋe ne, pa shave takwa veci kapəkwə ba'a sləyi kweci mbeli meghereŋe te ŋkwa kebeke, ma ke sha hɛ: Va wa nza ŋayɛ yɛ teke kavəghwə kaɗema kamene slene wa?

⁷Ma ke hɛ: Wəndə shɛ kehekakɛ n'yɛ kezha slene we. Ma ke sha hɛ: Ma nda tsagha nde ne, kwiɗi mə kalə kamene slene mbe wəvea ɗa.

⁸Ma kwa se tɛhwɛɗi ne, ma ke wəndə ke wəve sha wəndə nya te ghəa wəshia ŋkɛ: Hekake ka mene slene ba'a ŋkikɛ nda zhɛme ta ŋkɛ ke yayata wəndə. Kategha na te mbeli nyi fəte 'ya kwa sebe, nda tekeɗaŋe na te nyi keghate.

⁹Ke mbeli nyi kedzembe slene kwa tɛhwɛɗi ne, pa ŋkikɛ nda slibə slibə ke hɛ.

¹⁰Ma kwa se mbeli nyi kedzembe slene masheke ne, ma zəzə hɛ, za ma tenza ŋa nci. Ama kala nya ŋkikɛ nda mbeli ke mbeli nyi kwa sebe ŋkikɛ nda mbeli ke hɛ.

¹¹Ma kakele cɛdɛa shɛ hɛ, ntake hɛ kandəghwə ndəghwə va wəndə ke wəvea shɛ.

¹²Ma ke hɛ shɛ: Deke lerə kwetɛŋe menete slene mbeli nyi hekakɛ na kwa tɛhwɛɗi. Va wa ŋki n'yɛ cɛdɛ na yipə yipə le hɛ, ghen'yɛ nyi kevəghwə te ghwə ta veci wa?

¹³Ma ke wəndə ke wəve sha kwete wəndəa nci: Keghwetete ŋa 'ya na mcɛ ɗa. Ashɛ nahe na keyɛte kamene slene kaslibə te vəghwə wəka?

¹⁴Kelete cɛdɛa ŋa, kwiɗi ŋa. Tsagha ndeke nda 'ya ke wəndə nya hekakɛ 'ya kakwa keɗaŋe. Va nya ɗe 'ya nda menete 'ya tsagha.

¹⁵Ashɛ 'ya kamene kala nya ɗe 'ya le cɛdɛa ɗa wəka? Na, zlɛ zhɛ ŋa va nya nza mehele ta ɗa ndeɗekə na?

¹⁶Tagha gɛ, ma ke Yɛsə mtsehete: Tsagha shɛ ne, katenza ka keɗaŋe kaka ghate ba'a katenza ka ghate kaka keɗaŋe.

¹⁷Ma kwa nza Yɛsə kadzeme Zhɛrəzalɛm ne, pa hekakɛ mbeli nyi ketəkwə təkwə nyi meŋe bakeghəmbe kaghəa nci. Ma ke sha hɛ kwa dzeghwa hɛ:

¹⁸«Fa mə, wa nya gheɓəmə nyi kadzeme Zhɛrəzalɛm, katepamte nda Wəzege ta za mbeli ke mbeli nyi te ghəa ka dzeghe Shala ba'a ke ka rafe wəsə mahalegə, kateve nda fete kemte hɛ te ghwə.

¹⁹Kateve nda ŋkɛ hɛ ke kweci hwelefefi. Kateŋ'wəshi ŋkɛ hɛ, kateɗa ŋkɛ hɛ le ghweɗa, katebaŋe ŋkɛ hɛ te sheghwə kwa zleŋkwa. Ma te kwa maheke ta hɛ ne, katesame ŋkɛ kwa kwele le mpi.»

²⁰Pa meghekɛa ŋwalea Zɛbɛdɛ se sha Yɛsə le ŋwalea nta, gwəɗəŋə nde te kema ta Yɛsə kezha 'yɛwe wəsə ve.

²¹Ma ke Yɛsə shɛ: «Wa yaɗe na wa?» Ma ke shɛ: «Zəzəte yitea nza ŋwalea ɗa nyi bake nyi vare gha veci nya tenza na kameghe, te kwa gwela ta ŋa kwete, te kwa zeme ta ŋa kwete.»

²²Ma ke Yɛsə shɛ: «Keɗepe wəsə nya 'yɛwe yɛ yɛ we. Kapesle yɛ yitea sa yaka nya tesa 'ya na?» Ma ke hɛ shɛ: «Kapesle ghen'yɛ yite.»

²³Ma ke Yɛsə: «Wərə yɛ kasahwe yaka nya sa 'ya. Ama 'ya nde nta wəndə nya kentishɛ laka bela kwa zeme ta ɗa ba'a nya laka kwa gwela we. Ma ŋkwa shɛ ne, kaŋa mbeli nyi hite nda ŋkɛ Yiteyɛ ɗa ke hɛ tenza ŋkɛ.»

²⁴Ma kwa fate ghena shɛ ka təkwə təkwə Yɛsə nyi ketene meŋe ne, pa hɛ hwepete wənə va ŋwalea malea shɛ.

²⁵Pa Yɛsə hekakɛ hɛ pɛtɛ, ma ke sha hɛ: «Nahe yɛ keɗepe kamene kwele mbeli nyi te ghəa mbeli ba'a mbeli nyi te ghəa hɛɗi te mbeli.

²⁶Kahi ŋkɛ kanza tsagha kwelɛ gheyɛ we. Ma wəndəa ŋayɛ nya keɗe kanza te ghə ne, zhɛrete ghəa ŋkɛ ŋkɛ kande mene slene ta ŋayɛ.

²⁷Ma wəndəa ŋayɛ nya keɗe kanza kande ghate ne, zhɛrete ghəa ŋkɛ ŋkɛ kamava ta ŋayɛ.

²⁸Tsagha ɗema Wəzege ta za kese kezha mene nda slene mbeli, ama nahe ŋkɛ kese kezha mene nda slene ke mbeli ba'a kezha ve mpia ŋkɛ kambeɗe mbeli kwele kwele.»

²⁹Ma kwa shave Yɛsə mbe Zhɛriko ne, kwele kwele mbeli nyi kezelete ŋkɛ.

³⁰Bake kweci ka ghwələa kɛfi tagha mentishɛ mɛa hweŋkwa. Ma kwa fave hɛ Yɛsə nde dzeyi vare hɛ ne, ma ke hɛ tsate lewela: «Nde sleke ŋkwa, hwelefe ta David, zhɛ heli yitea ghen'yɛ gi!»

³¹Ntake mbeli kaŋele hɛ kezha nza hɛ divə, ama ma ke hɛ tsate lewela le berete ɓiyitsa: «Nde sleke ŋkwa, wəzege ta David, zhɛ heli yitea ghen'yɛ gi!»

³²Pa Yɛsə ghereŋe ba'a hekakɛ hɛ, ma ke sha hɛ: «Wa yaɗe yɛ kamene ŋayɛ 'ya wa?»

³³Ma ke hɛ shɛ: «Nde sleke ŋkwa, pelemte n'yɛ ntsə ta n'yɛ.»

³⁴Pa Yɛsə zhɛakɛ heli yitea hɛ, pa kwaɗakɛ ntsə ta nci. Taghanyɛ ne, ntake hɛ kanewe ŋkwa. Ntəŋə hɛ yitea Yɛsə.