Read kapsiki Matiye 21 Bible Online

Matiye 21 - kapsiki bible

Matiye 21

¹Ma kwa nza hɛ takwa takwa yitea Zhɛrəzalɛm ba'a kwa ntsehe hɛ mbe kwete meleme ta Bɛtfazhɛ, pelɛ ghweme ta yɛ Bekele ne, pa Yɛsə ghwenakɛ mbeli nyi ketəkwə təkwə bake kalə te kema ta ŋkɛ, ma ke sha hɛ:

²«Kwiɗi mə kadzembe meleme nya te kema ta ŋayɛ, dzembema ta ŋayɛ ne, katenewe kwara yɛ tehwepe le wəzege ta ŋkɛ yite. Pelemte mə hɛ ba'a ŋkake ɗa mə hɛ.

³Ma kegezete ŋayɛ ghena kwete wəndə ne, ma pe yɛ sha zhɛne: Nde sleke ŋkwa nza kaɗe. Taghanyɛ ne, katepele hɛ mbeli kaslə.

⁴Katemene geva ŋkɛ kezha yipə geva ghena nya gezete nde mɛ ŋkwa, ma ke ghena shɛ:

⁵Ma pe yɛ sha meleme ta Siyon: Wa nya Meghea ŋa kase sha gha. Nahe ŋkɛ kenza kande shifə ghə. Nahe ŋkɛ kenza pelɛ ŋemalea kwara, pelɛ leve ta kwara, leve ta wəsə keseɗa nya kefə wəshi.»

⁶Pa mbeli nyi ketəkwə təkwə Yɛsə slə ba'a menete kala nya gezete nda ŋkɛ ke hɛ.

⁷Pa hɛ ŋkake kwara shɛ le wəzege ta ŋkɛ, pa hɛ hite lekwesa ta nci te wəmbəa nci, tarame Yɛsə pelɛ.

⁸Kwele kwele mbeli nyi kepelakeyi lekwesa ta nci kwa hweŋkwa, katsasle dzeve ta wəfe kweci kabete kwa hweŋkwa.

⁹Ma ke mbeli nyi mbe kema ta Yɛsə ba'a nyi kwetere wəmbəa ŋkɛ Sha tsa lewela: «Tsahe ɓəmə wəzege ta David! Kewəpi wəpi nza wəndə nya kese te sləa Mahwətə! Tsahe Shala nya pelɛ ghweme mbeli!»

¹⁰Ma kwa dzembe Zhɛrəzalɛm Yɛsə ne, ntake mbeli pɛtɛ kagəgə geva, ma ke mbeli 'yɛwete: «Wa wəndəa shɛ wa?»

¹¹Ma ke mbeli nyi kwele kwele zhɛnete: «Yɛsə, nde mɛ ŋkwa, nde Nazarɛt nya te hɛɗia Galilɛ.»

¹²Shilimə Yɛsə dzembe ghɛa Shala. Pa ŋkɛ ŋkakave pɛtɛa mbeli nyi kepamte wəshi ba'a nyi kepa wəshi shave mbe, pa tsetsəkwəate tabelea ka mbeɗe cɛdɛ ba'a tsəkwələa ka pamte gheɗepe te hɛɗi.

¹³Ma ke sha hɛ: «Ma ke rafete geva mbe Ghena ta Shala: Kateheka ghɛa ɗa mbeli kaghɛ kesəkwə ghə. Ama gheyɛ ne, nahe yɛ kezhɛrete ŋkɛ kazlera ta ka ghərəa kɛfi.»

¹⁴Kase ka ghwələa kɛfi ba'a ka gwadarea kɛfi sha Yɛsə mbe ghɛa Shala. Pa ŋkɛ mbete hɛ.

¹⁵Ntake mbeli nyi te ghəa ka dzeghe Shala ba'a ka rafe wəsə mahalegə kahwepe wənə kwa nakɛ wəshi meŋele nyi menete Yɛsə ba'a ŋwale nyi kezlape ghena hɛ mbe ghɛa Shala, ma ke ŋwalea shɛhɛ: «Tsahe ɓəmə hwelefe ta David.»

¹⁶Ma ke hɛ sha Yɛsə: «Nahe na kefave ghena nya geze hɛ tse na?» Ma ke Yɛsə zhɛnete: «E'e. Kegha yɛ kajaŋgate wəka? Ma ke Ghena ta Shala: Laka ŋwale fəshi ba'a yɛ velɛnjɛ ne, nahe na kevate tsahe te ghəa ŋa.»

¹⁷Kwa sebe ta ŋkɛ ne, pa Yɛsə slənyɛ yitea hɛ ba'a shavenyɛ mbe meleme kezha dzembe Bɛtani nya hɛnyɛ ŋkɛ mbe.

¹⁸Te hendɛ ta ŋkwa masheke, kwa zhɛneke geva Yɛsə kadzembe meleme, pa ma keseve ŋkɛ.

¹⁹Pa ŋkɛ nakɛ kwete dasekwa gwəzləmə mɛa hweŋkwa, pa hendeyite geva yite. Ama ya te we, deke sleke yanakɛ ŋkɛ. Ma ke sha dasekwa shɛ: «Katezhɛne na kaya ɓiyitsa tɛape we.» Te ŋkwa shɛnyɛ, pa dasekwa shɛ ghwelenyɛ.

²⁰Ma kwa nakɛ mbeli nyi ketəkwə təkwə, hehake hɛ va ghena shɛ. Ma ke hɛ 'yɛwete va Yɛsə: «Tsema ghwelenyɛ dasekwa nya tewə ketemə wa?»

²¹Ma ke Yɛsə sha hɛ: «Kaganda ne, ma 'ya sha gheyɛ: ma kenza nde yɛ ya va gheyɛ ba'a keɗema ghəa ŋayɛ kenza bake bake ne, deke wəsə nya menete nya 'ya le dasekwa yatemene we, ama wərə yɛ kageze: Slə ŋa teke ba'a negheyi ghəa ŋa kwa ndərə, pe yɛ sha ghweme nya, tsagha temene geva ŋkɛ.

²²Ma ya yɛ va gheyɛ ne, katekemave yayata wəsə nya 'yɛwe yɛ mbe səkwə ghə yɛ.»

²³Pa Yɛsə dzembe ghɛa Shala. Ma kwa teke nda wəshi ŋkɛ ke mbeli ne, hwa'a mbeli nyi te ghəa ka dzeghe Shala ba'a mbelia jama ta ka Zhəwif, ma ke hɛ shɛ: «Le berete ta wa mene wəshi nyi na wa? Wa nde ndeke ŋa hweŋkwa kamene kala nya wa?»

²⁴Ma ke Yɛsə zhɛnete nda ke hɛ: «'Ya kate'yɛwe ghena kwetɛŋe va gheyɛ perə, ma kezhɛnete ɗa ŋkɛ yɛ ne, kategeze ŋayɛ 'ya le nyama nyama berete mene wəshia shɛhɛ 'ya.

²⁵Wa nde ghweneke Zhaŋe kamene batɛme wa, Shala na, na mbeli?» Ma ke hɛ kwelɛ ghəa nci: «Ma kegeze gheɓəmə: Shala nde ghweneke ŋkɛ, a ke gheɓəmə ne, ma ke sha te'yɛwe va gheɓəmə: Va wa ɗema yɛ keyɛte ghena ta Zhaŋe tsagha wa?

²⁶Ama kegeze gheɓəmə: Mbeli nde ghweneke ŋkɛ, ke gheɓəmə ne, kazhɛ ɓəmə ghazlənə va mbeli, va nya nza ŋkɛ nahe mbeli pɛtɛ keɗepe Zhaŋe kande mɛ ŋkwa.»

²⁷Tagha gɛ, ma ke hɛ zhɛnete nda ke Yɛsə: «Keɗepe n'yɛ we.» Ma ke Yɛsə sha hɛ: «Yawa ma 'ya perə ne, kageze ŋayɛ 'ya le nyama nyama berete mene wəshia shɛhɛ 'ya we.»

²⁸Ma ke Yɛsə mtsehete: «Tsema zəzə yɛ te ghena nya tse wa? Ŋwale ya shɛ bake kwete wəndə. Ma ke sha nde ghate: Wəzege ta ɗa, kwiɗi kadzemte wəza ɓeshi.

²⁹Ma ke zhɛnete nda: Kalə 'ya we. Ama temə vireɗi ne, pa zəzəve ghena, cape ŋkɛ kadzemte.

³⁰Pa wəndəa shɛ lə sha nde bake ta wəzege ta ŋkɛ, pa gezete nda kala nya gezete nda ŋkɛ ke nde ghate. Ma ke wəzegea shɛ zhɛnete: E'e, kalə 'ya yita, ama kese ŋkɛ kalə we.

³¹Nyama hwa hɛ nde menete wəsə nya ɗe yita wa?» Ma ke hɛ: «Nde ghate.» Ma ke Yɛsə sha hɛ: «Kaganda ne, ma 'ya sha gheyɛ: mpelɛa ka tsehe jaɓeregwale ba'a mi nyi kamene mefətekwə tedzembe Meghe nya pelɛ ghweme ke gheyɛ.

³²Kaganda ne, nahe Zhaŋe kese sha gheyɛ kezha ncɛ ŋayɛ hweŋkwa nya tiɗiɗi, ama kese yɛ kayɛ ŋkɛ we. Ma ka tsehe jaɓeregwale ba'a mi nyi kemene mefətekwə ne, nahe hɛ keyɛte ŋkɛ. Ya gheyɛ nakɛ wəshia shɛhɛ ne, kese yɛ kezhɛre wənəa ŋayɛ kwetere wəmbə kezha yɛ ŋkɛ we.»

³³Fate mə kwete ghena keyipə pa: Pa wəndə ke wəve mɓete yɛ rɛzɛŋe, ŋate zli ntəslə yitea wəvea shɛ, lakwe ŋkɛ sha ŋkwa kehetəsə te keleɓa ba'a ŋakwe ŋkɛ sha ŋkwa keya ŋkwa. Pa ŋkɛ dapate nda ŋkɛ te dzeve ke ka mene slene, cape ŋkɛ kadzehwa mte.

³⁴Ma kwa nakanji wəshia shɛhɛ ne, pa ghweneghe nda ka mavashia ŋkɛ ke ka mene slene ta rɛzɛŋe kezha kele nda zhike ŋa ŋkɛ bela kase.

³⁵Pa ka mene slene kekeseve ka mavashia shɛhɛ, pa hɛ ɗate kwete, pa hɛ peslekɛ kwete, pa hɛ jɛwəmte kwete le pelɛ.

³⁶Pa wəndə ke wəve ghweneghe kweci ka mavashi kwele kwele ma ke nyi te kema, tsagha shɛ menete ka mene slene shɛhɛ le hɛ perə.

³⁷Ma kwa keɗaŋe, pa ghweneghe wəzege ta ŋkɛ, ma ke sha ŋa ŋkɛ: Katehawe hɛ va wəzege ta ɗa.

³⁸Ama kwa nakɛ wəzegea shɛ ka mene slene ne, ma ke hɛ kwelɛ ghəa nci: Yawa, wa nya nde zeme ghɛ nya te kwete və nya gɛ! Ngara ɓəmə. Peslekɛ ɓəmə ŋkɛ yitea nza wəve kaŋa ɓəmə.

³⁹Pa hɛ keseve ŋkɛ, pa hɛ kelemte ŋkɛ shave mbe wəve ba'a peslekɛ ŋkɛ hwa gamba.

⁴⁰Ma vəa ŋkwa nya tese wəndə ke wəve nyagha ne, tsema temene nda ŋkɛ ke ka mene slene shɛ wa?

⁴¹Ma ke hɛ shɛ: «Katempə ka mpə ŋkwa shɛhɛ ŋkɛ kakwa zhɛma heli ba'a katedape nda wəvea ŋkɛ ŋkɛ te dzeve ke kweci mbeli nyi keteve nda wəshi nyi kese te wəve te və nya ɗe ŋkɛ.»

⁴²Ma ke Yɛsə sha hɛ: «Kegha yɛ kajaŋga Ghena ta Shala wəka? Ma ke: Ma pelɛ nya neghamte mbeli nyi keŋa ŋkwa ne, gheŋkɛ nde zhɛrenyɛ kapelɛa megwekwe. Gheŋkɛ ya kaslene ta Mahwətə. Wəsə meŋele ŋkɛ kwa ntsə ta ɓəmə.

⁴³Vatse gɛ, ma 'ya sha gheyɛ: katekelehwe geva meghea Shala va gheyɛ kezha ve nda geva ke hwelefe nyi ketemene slene ganyɛ.

⁴⁴Ma yayata wəndə nya keteteɗe te pelɛa shɛ ne, katehwəshimte geva ŋkɛ. Ma nda pelɛa shɛ nde teɗe te wəndə ne, katehə ŋkɛ ŋkɛ.»

⁴⁵Kwa fave ghena keyipə pa ta Yɛsə mbeli nyi te ghəa ka dzeghe Shala le ka Fariziyɛn, nahe hɛ keɗepe te ghenci geze geva ŋkɛ.

⁴⁶Ntake hɛ kasepa ntsehwele kekese Yɛsə, ama kazhɛ nda ghazlənə ke hɛ va mbeli, va nya veyi Yɛsə hɛ kande mɛ ŋkwa.