Read kapsiki Matiye 23 Bible Online

Matiye 23 - kapsiki bible

Matiye 23

¹Tagha gɛ, ntake Yɛsə kageze nda ghena ke mbeli nyi ketseneke geva tagha ba'a mbeli nyi ketəkwə təkwə.

²Ma ke sha hɛ: «Nahe ka rafe wəsə mahalegə ba'a ka Fariziyɛn kenza kaka ncɛ nda wəsə mahalegəa Moyize ke mbeli.

³Hawe mə ba'a mene mə slene le ghena nyi geze ŋayɛ hɛ, ama menema wəshi nyi mene hɛ ma, kwa nza nde kamene wəshi nyi geze hɛ hɛ we.

⁴Wəshi nyi ɗaŋeɗa ɗaŋeɗa yahwepe hɛ kave kwa ghəa mbeli, ama kakwaɗe hɛ hɛ ya le kwatɛka ta dzeve kezha kemane ŋkwa kave kwa ghə we.

⁵Kezha tsahe hɛ mbeli mene pɛtɛa wəshi nyi mene hɛ hɛ. Tsagha ne, mbake yambake bezlea paya nyi mɛa kema ta nci hɛ ba'a mtsehe yamtsehe biya ta tsa nyi dzeyi mɛa lekwesa ta nci hɛ.

⁶Ma ketsene mbeli yitea wəsə kezeme ne, ŋkwa nya ganyɛ yawədə hɛ, ma mbe cɛ kesəkwə ghə ne, wəsə kentishɛ nya ganyɛ yawədə hɛ.

⁷Le hawe ɗe hɛ kanjiŋwe hɛ mbeli te shikwə. Rabi ɗe hɛ kaheka hɛ mbeli.

⁸Ama gheyɛ ne, sepama yɛ yitea heka ŋayɛ mbeli kaNde sleke ɗa ma, kwa nza ŋkɛ ka mama yɛ pɛtɛ, va nya nza ŋkɛ kwetɛŋe Nde sleke ŋayɛ.

⁹Hekama kwete wəndə kayita kwake te hɛɗi ma, kwa nza ŋkɛ kwetɛŋe Yiteyɛ ŋayɛ nya pelɛ ghweme.

¹⁰Zelema hweŋkwa yɛ kezha heka ŋayɛ mbeli kawəndə nya te ghə perə ma, kwa nza ŋkɛ kwetɛŋe wəndə nya te ghəa ŋayɛ, gheŋkɛ Kriste.

¹¹Newe ghəa ŋkɛ wəndə nya kwele ma hwa gheyɛ kande mene slene ta ŋayɛ.

¹²Ma wəndə nya kekele ghəa ŋkɛ ne, kateshifə ŋkɛ, ma wəndə nya keshifə ghəa ŋkɛ, katekele ŋkɛ.»

¹³Ndiremi ya te gheyɛ ka rafe wəsə mahalegə ba'a ka Fariziyɛn, ka mbəɗəkwəa kɛfi. Nahe yɛ keŋzlemte nda ŋkwa kedzembe Meghe nya pelɛ ghweme ke mbeli. Kaɗe yɛ kadzembe le ghəa ŋayɛ we. Kafɛa nda ŋkwa yɛ ke mbeli nyi keɗe kadzembe.

¹⁴Ndiremi ya te gheyɛ ka rafe wəsə mahalegə ba'a ka Fariziyɛn, ka mbəɗəkwəa kɛfi, pɛtɛ yɛ fəhwe wəshi va ka wedidi. Ɓiyitsa ne, katemə yɛ kwele kwele te səkwə ghə yitea newe ŋayɛ mbeli kambeli ganji. Vatse temeha geva ghwə dzawe te gheyɛ.

¹⁵Ndiremi ya te gheyɛ ka rafe wəsə mahalegə ba'a ka Fariziyɛn, ka mbəɗəkwəa kɛfi. Kadzasle hɛɗi ba'a yɛ ndərə yɛ kezha kemave wəndə nya ketəkwə təkwə Moyize kwetɛŋe. Ma nahe kekemave ŋkɛ yɛ ne, kazhɛre ŋkɛ kehi hi kaŋa ghwə nya keɗema kakiɗi, za ma ke gheyɛ bake zhigə.

¹⁶Ndiremi ya te gheyɛ, gheyɛ ka ncɛ nda hweŋkwa nyi kaka ghwələa kɛfi. Ma pe yɛ sha geze: Ma kezemete fela wəndə le ghɛa Shala ne, ghena te we. Ama kezemete fela ŋkɛ le mze kwa tere tere nya mbe ghɛa shɛ ne, nahe wəndəa shɛ kehwepete ghəa ŋkɛ.

¹⁷Ka gezhia kɛfi, ka ghwələa kɛfi! Wa ya kwele ma hwa yɛ ghɛa Shala le mze kwa tere tere nya mbe wa? Ashɛ ghɛa shɛ nde veyi mze kwa tere tere tekeleke wəka?

¹⁸Ma pe yɛ sha geze ɓiyitsa: Ma kezemete fela wəndə le reghwetɛ ne, ghena te we. Ama kezemete wəndə le wəsə nya te reghwetɛ ne, nahe ŋkɛ kehwepete ghəa ŋkɛ.

¹⁹Ka ghwələa kɛfi, wa ya kwele ma hwa yɛ wəsə nya ve mbeli te reghwetɛ le reghwetɛ nya keve wəsəa shɛ tekeleke wa?

²⁰Ma wəndə nya kezeme fela le reghwetɛ ne, ashɛ le reghwetɛ ba'a pɛtɛa wəshi nyi te zememte ŋkɛ wəka?

²¹Ma wəndə nya kezeme fela le ghɛa Shala, le ghɛa shɛ ba'a Shala nya mbe zeme ŋkɛ.

²²Ma wəndə nya kezeme fela le ŋkwa nya pelɛ ghweme ne, le pasla ta Shala ba'a Shala nya mentishɛ pelɛ pasla shɛ zeme fela ŋkɛ.

²³Ndiremi ya te gheyɛ ka rafe wəsə mahalegə ba'a ka Fariziyɛn, ka mbəɗəkwəa kɛfi. Kakele kwa meŋe ta bela ta meshigwə, shekwiɗi ba'a kweci wəshi nyi wəzate yɛ yɛ kase. Ama kapele se yɛ yitea wəshi nyi jama jama nyi teke wəsə mahalegə, kala nza tiɗiɗi, mene ganyɛ ba'a nza dɛŋe dɛŋe. Ndagwara wəshia shɛhɛ yahi yɛ kamene slene le hɛ, kaɗema kasərə wəshi nyi ketene.

²⁴Nahe yɛ kenza kaka ncɛ nda hweŋkwa nyi kaka ghwələa kɛfi. Katsa yɛ kwiɗi kwiɗi yɛ shave hwa wəsə kesa ta ŋayɛ, ama kanda zlegwemə yɛ.

²⁵Ndiremi ya te gheyɛ ka rafe wəsə mahalegə ba'a ka Fariziyɛn, ka mbəɗəkwəa kɛfi. Kayaɓe ŋkwa nya te wəmbəa helape ba'a tasa yɛ, ama mpɛafe ŋkwa nya kwa wənəa nci va wəshi ghərəa ŋayɛ ba'a wəshi nyi ndiremi ndiremi nyi zəzə yɛ.

²⁶Nde Fariziyɛn nya kaghwələ. Yaɓemte ŋkwa nya kwa hwəa helape ta ŋa yitea nza wəmbəa ŋkɛ wɛŋe.

²⁷Ndiremi ya te gheyɛ ka rafe wəsə mahalegə ba'a ka Fariziyɛn, ka mbəɗəkwəa kɛfi. Yipə yipə yɛ le kwele nyi fikɛ mbeli le teɓehwe, pelɛke te wəmbə ne, kendeɗe ndeɗenji hɛ. Ama kwa hwəa nci ne, mpɛafe 'yɛ'yɛa mbelia kwahɛɗi ba'a wəshi nyi keda da.

²⁸Tsagha gheyɛ perə, pelɛke te ŋwela ne, kambeli nyi tiɗiɗi newe ŋayɛ mbeli, ama kwa wənəa ŋayɛ, mpɛafe mbəɗəkwə ba'a mefətekwə.

²⁹Ndiremi ya te gheyɛ ka rafe wəsə mahalegə ba'a ka Fariziyɛn, ka mbəɗəkwəa kɛfi. Kaŋa nda kwele nyi ndeɗe ndeɗe yɛ ke ka mɛ ŋkwa, kapesa nda yɛ kwele ta mbeli nyi tiɗiɗi yɛ.

³⁰Ama ma pe yɛ sha geze: Ma ya nahe gheɓəmə kenza te vəa ka shihɛ ɓəmə ne, nza katenza gheɓəmə jikə le hɛ kezha mpə ka mɛ ŋkwa we.

³¹Laka ghena shɛ, nahe yɛ keɗepe kahwelefefia mbeli nyi kempəmte ka mɛ ŋkwa ta Shala yɛ.

³²Yawa, ntsə mə geva kakeɗaŋe slene nya ghate ka shihɛ ŋayɛ.

³³Nahe yɛ kenza kashishi ba'a kaŋwalea mentsape. Tsema zəzə yɛ kambele yɛ va dzembe ghwə nya keɗema kakiɗi wa?

³⁴Vatse gɛ, 'ya kateghwene ŋayɛ ka mɛ ŋkwa ta Shala, ka ntsehwele ntsehwele ba'a ka rafe wəshi mahalegə. Katempə kweci yɛ, katebaŋe kweci yɛ te sheghwə, kateɗa kweci yɛ le ghweɗa dzeyi mbe yɛ cɛ kesəkwə ghə ta ŋayɛ, katekeka kweci kemeleme kemeleme.

³⁵Vatse tedzeghəa gheyɛ mimia mbeli nyi tiɗiɗi nyi mpəmte mbeli vəashi, se te mimia Abɛl, wəndə nya tiɗiɗi hwa'a te mimia Zakari, wəzege ta Barashi nya peslekɛ yɛ kwelɛ yɛ ŋkwa nya keveyi tekeleke Shala le reghwetɛ.

³⁶Kaganda ne, ma 'ya sha gheyɛ: kate'yɛwe geva kelɛhe ta nci va mbeli nyi tsetse ŋkwa nyi.

³⁷Zhɛrəzalɛm, Zhɛrəzalɛm, ma gha nya kempə ka mɛ ŋkwa ba'a nya kebeza mbeli nyi ghweneke ŋa Shala le pelɛ ne, nahe 'ya keɗe katsene ŋwalea ŋa kala nya tsene ŋwalea ŋkɛ ghenda mbe bidzəa ŋkɛ, ama nahe yɛ kesema kaɗe.

³⁸Yawa, kakwəfi tenza ghɛa Shala ta ŋayɛ.

³⁹Kaganda ne, ma 'ya sha gheyɛ: ma se mɛa tsetsenya ne, katezhɛne kanakɛ ɗa hwa'a te veci nya tegeze: Kewəpi wəpi nza wəndə nya kese te sləa Mahwətə, pe yɛ we.