Read kapsiki Matiye 27 Bible Online

Matiye 27 - kapsiki bible

Matiye 27

¹Masheke masheke ne, pa pɛtɛa mbeli nyi te ghəa ka dzeghe Shala ba'a mbelia jama ta ka Zhəwif tsenete geva kezha yipə ghena ta pesle Yɛsə.

²Pa hɛ hwepete ŋkɛ, pa hɛ keleke ŋkɛ ba'a ndeke nda ŋkɛ ke ŋgwamna Pilate.

³Ma kwa nakɛ Zhəwdas, wəndə nya kepamte Yɛsə, nahe mbeli kendeke nda fete ke Yɛsə ne, ntake ŋkɛ kazəzə. Zhɛne ŋkɛ zhɛneghe slibə nyi mahekenemsə kalə sha mbeli nyi te ghəa ka dzeghe Shala ba'a mbelia jama.

⁴Ma ke sha hɛ: «Ŋa ɗa fete. Nahe 'ya kepamte mimia wəndə nya ɗema fete ve.» Ma ke hɛ shɛ: «Ŋa n'yɛ kwete hwe na. Gha nde ɗepe le wəsəa ŋa.»

⁵Tereke Zhəwdas sha cɛdɛa shɛ mbe ghɛa Shala, cape ŋkɛ slənyɛ. Pa ŋkɛ peslekɛ ghəa ŋkɛ le zewe ŋezalawe te wəfe.

⁶Pa mbeli nyi te ghəa ka dzeghe Shala shɛhɛ fəte cɛdɛ. Ma ke hɛ: «Mahalegə ŋkɛ sha gheɓəmə kebete cɛdɛ nyi kadzehwa cɛdɛa ghɛa Shala, kwa nza ŋkɛ te mimia wəndə se ŋkɛ.»

⁷Ma kwa yipəmte ghena hɛ ne, pa hɛ pave wəvea nde ŋa ghene kezha la ka se se.

⁸Vatse heka wəvea shɛ mbeli pa ɓeshi kawəvea mimi.

⁹Tsagha menete geva ghena nyi gezete nde mɛ ŋkwa ta Shala Zhɛrɛmi, ma ke: «Pa hɛ kelete slibə nyi mahekenemsə. Cɛdɛa shɛ yatarete ka Israyɛl kaŋki te zhia ŋkɛ.»

¹⁰Pa hɛ pave wəvea nde ŋa ghene, kala nya gezete ɗa Shala tehwə ghweme.

¹¹Pɛkwe Yɛsə kwa kema ta ŋgwamna yitea meha ghwə. Ma ke ŋgwamna shɛ: «Gha ya kameghea ka Zhəwif na?» Ma ke Yɛsə zhɛnete nda: «Gha nde gezete.»

¹²Ama kwa ve nda fete mbeli nyi te ghəa ka dzeghe Shala ba'a mbelia jama ne, kazhɛne ghena ŋkɛ we.

¹³Ma ke Pilate shɛ: «Kefa fete nyi ve ŋa nyi hɛ na wəka?»

¹⁴Kazhɛne ghena Yɛsə we, heɓake ŋgwamna kwele kwele.

¹⁵Keva keva hwa gəsəkəa Pake ne, kapele nda nde daŋgayɛ ŋgwamna kwetɛŋe ke mbeli, wəndə nya ɗe hɛ yapele nda ŋkɛ ke hɛ.

¹⁶Kwete nde ndiremia mehele nya ɗepe mbeli pɛtɛ ya shɛ kwa daŋgayɛ, Barabas sləa ŋkɛ.

¹⁷Ma kwa tsenete geva mbeli ne, ma ke Pilate 'yɛwete va hɛ: «Wa yaɗe yɛ kapele ŋayɛ 'ya hwa yɛ Barabas le Yɛsə nya heka mbeli kaMɛsi wa?»

¹⁸Kwa nza ŋkɛ ne, nahe Pilate keɗepe va zlɛ kesave nda Yɛsə hɛ.

¹⁹Ma kwa nza Pilate mentishɛ te ŋkwa kemeha ghwə ne, pa male ta ŋkɛ ghweneke nda mɛ, ma ke shɛ: «Jara ma zlenekɛ ghena ta wəndə nya na. Wəndə nya tiɗiɗi ŋkɛ. Kwa nza ŋkɛ kwele kwele sahwe 'ya te shiwə ɓeshi tewəmbəreke gheŋkɛ.»

²⁰Pa mbeli nyi te ghəa ka dzeghe Shala ba'a mbelia jama gezete nda ke mbeli ka'yɛwe pele ta Barabas ba'a kapesle Yɛsə.

²¹Ma ke ŋgwamna 'yɛwete va hɛ zhɛkwa: «Nyama yaɗe yɛ kapele ŋayɛ 'ya hwa mbeli nyi wa?» Ma ke hɛ zhɛnete: «Barabas.»

²²Ma ke Pilate sha hɛ: «Tsema temene 'ya le Yɛsə nya heka mbeli kaKriste wa?» Ma ke hɛ pɛtɛa nci zhɛnete: «Baŋate ŋkɛ te sheghwə kwa zleŋkwa.»

²³Ma ke Pilate sha hɛ: «Wa wəsə nya bezemte ŋkɛ wa?» Ama ma ke hɛ sha lewela le berete: «Baŋate ŋkɛ te sheghwə kwa zleŋkwa.»

²⁴Newe ke Pilate kaɗema ŋkɛ mba kamenete kwete wəsə, ama mbake yambake geva gwəgwə ta mbelia shɛhɛ ne, pa kelete yɛmə ba'a pɛmte dzeve kwa kema ta mbeli pɛtɛ, ma ke: «Hwa mimia wəndə nya 'ya we, va gheyɛ wəsəa ŋayɛ.»

²⁵Ma ke mbeli pɛtɛ shɛ: «Nza mimia ŋkɛa shɛ kwa ghəa n'yɛ le ŋwalea n'yɛ.»

²⁶Waɗe Pilate pelave nda Barabas ke hɛ, pa ŋkɛ ndeke nda Yɛsə ke mbelia ŋkɛ kezha ɗa ŋkɛ le ghweɗa ba'a ndeke nda ŋkɛ ke hɛ kezha baŋe ŋkɛ te sheghwə kwa zleŋkwa.

²⁷Pa ka sewajɛa Pilate keleghe Yɛsə kadzeki ghɛ meghea ŋgwamna, pa pɛtɛa wəvəsəa sewajɛ dzasleyite geva yite.

²⁸Pa hɛ seɗemte lekwesa ta ŋkɛ ba'a seɗaghe nda gare kwa gheme kala meghe.

²⁹Pa hɛ tsate tigə kala derə meghe ba'a veyi nda mbe ghə, pa hɛ veyi nda ghwəvərə mbe dzeve kwa zeme. Gwəɗəŋə hɛ kwa kema ta ŋkɛ kaŋ'wəshi, ma ke hɛ sha geze: «Same, meghea ka Zhəwif.»

³⁰Pa hɛ ntifəate ndɛghwɛɗɛ te ba'a kelete ghwəvərə kezha mpa ŋkɛ kwa ghə.

³¹Ma kwa kiɗimte ŋ'wəshi ŋkɛ hɛ ne, pa hɛ seɗemte gare kənə ba'a zhɛneghe nda lekwesa ta ŋkɛ, ntəŋə hɛ le kalə kabaŋe ŋkɛ te sheghwə kwa zleŋkwa.

³²Ma kwa shave hɛ le Yɛsə ne, begeme hɛ le kwete nde Sirɛne nya nza sləa ŋkɛ kaSimon. Pa ka sewajɛ ŋkeyite ŋkɛ yitea kele sheghwə kwa zleŋkwa ta Yɛsə.

³³Hwa'a hɛ te kwete ŋkwa nya nza sləa ŋkɛ kaGolgota, geze ta ŋkɛ: Ŋkwa 'yɛ'yɛa ghə.

³⁴Pa hɛ gweɗəte tɛ le ɗawa ta wəshi nyi kwamte ba'a ndeke nda. Ma kwa ndɛamakɛ ŋkɛ ne, kezhɛne ŋkɛ kaɗe kasa we.

³⁵Pa hɛ baŋete te sheghwə kwa zleŋkwa, pa hɛ kanehehwe lekwesa ta ŋkɛ le sla kwasheghediɗi.

³⁶Ntishɛ hɛ tagha kaya ŋkɛ.

³⁷Ma pelɛagha te ghəa ŋkɛ, pa hɛ rafeyi ghena nya peslekɛ ŋkɛ mbeli te, ma ke ghena shɛ: «Wəndə nya ya kaYɛsə, meghea ka Zhəwif.»

³⁸Bake ka ŋwasle ŋkwa baŋete mbeli yitea Yɛsə te sheghwə kwa zleŋkwa, te kwa zeme ta ŋkɛ kwete, te kwa gwela kwete.

³⁹Ma mbeli nyi kedzeyi tagha ne, kakeɗeŋe ghə hɛ, kaŋele ŋkɛ hɛ, ma ke hɛ shɛ:

⁴⁰«Gha nya keɗe nya kampə ghɛa Shala ba'a kazhɛne kaŋa ŋkɛ mbe hɛ mahekene ne, mbelete ghəa ŋa le ghəa ŋa gi! Ma kenza ŋkɛ Wəzege ta Shala na ne, sawa ŋa pelɛ sheghwə kwa zleŋkwa nya gɛ!»

⁴¹Kaŋ'wəshi ŋkɛ mbeli nyi te ghəa ka dzeghe Shala, ka rafe wəsə mahalegə ba'a mbelia jama, ma ke hɛ:

⁴²«Nahe ŋkɛ kembelete kweci mbeli, kashɛ ŋkɛ mbele ŋa ŋkɛ ghə wəka? Ashɛ gheŋkɛ ya kameghea ka Israyɛl wəka? Sawanyɛ ŋkɛ te sheghwə kwa zleŋkwa nya tsetsenya nda yɛ ŋkɛ mə.

⁴³Nahe ŋkɛ keveyi zəzə ta ŋkɛ te Shala, kwa nza ŋkɛ ma ke gezete: Wəzege ta Shala 'ya. Yawa, newe ɓəmə kenza nde kambelete ŋkɛ Shala tsetsenya kenza kaɗe ŋkɛ ŋkɛ gɛ!»

⁴⁴Pa ka ŋwasle ŋkwa nyi baŋete mbeli dzeme vare bela ta ŋkɛ kaŋele tsagha shɛ.

⁴⁵Talala veci kwa ghə ne, pa viɗi veci menete geva te hɛɗi pɛtɛ. Ma nda kiɗi ŋkɛ ne, kwa mtsa veci.

⁴⁶Ma kwa nza veci kwa mtsa ne, ma ke Yɛsə zlapete le berete: «Ɛli, Ɛli, lema sabaktani», geze ta ŋkɛ, «Shala ta ɗa, Shala ta ɗa, yitea wa sərəakɛ ɗa na wa?»

⁴⁷Ma kweci mbeli nyi tagha ne, nahe hɛ kefate zlape ta ŋkɛ: «Ɛli yaheka ŋkɛ», a ke hɛ.

⁴⁸Ntəŋə kwete wəndəa nci le hwɛ, pa kelete bəzə ba'a selamahwe ŋkɛ hwa wəsə kwa ŋkɛara, pa hwepate ŋkɛ te tsafetse ba'a haghe nda ŋkɛ kadzeme ke Yɛsə kezha sa ŋkɛ.

⁴⁹Ma ke kweci mbeli gezete: «Ntsagwe, katenewe gheɓəmə ɓeshi kenza nde katese Ɛli kambele ŋkɛ gɛ!»

⁵⁰Kɛake Yɛsə sha lewela le berete zhɛkwa, mtiwə ŋkɛ.

⁵¹Ma te ŋkwa shɛnyɛ ne, pa mayafe nya keneheve ŋkwa nya mbe ghɛa Shala perawenyɛ sawa pelɛghə hwa'a kwake te hɛɗi. Kagaŋkəɗə hɛɗi, kapeperawe yɛ keleɓa,

⁵²kaghweghwene geva yɛ kwele, kasesame mbelia Shala nyi kempə kwele kwele le mpi.

⁵³Ma kwa same hɛ kwa kwele ne, cape hɛ kadzembe meleme nya keveyi geva tekeleke kwetere wəmbəa same ta Yɛsə kwa kwele. Kwele kwele mbeli nyi kenakɛ hɛ.

⁵⁴Ma kwa nakɛ gaŋkəɗə ta hɛɗi ba'a wəshi nyi kemenete geva wəndə nya te ghəa ka sewajɛ ba'a mbelia ŋkɛ nyi keya Yɛsə ne, pa ghazlənə zhɛte nda ke hɛ. Ma ke hɛ: «Wəzege ta Shala wəndə nya kaganda.»

⁵⁵Kwele kwele mi nyi tagha nyi kenewe ŋkwa cakeɗake. Ghenci ka təkwə təkwəte Yɛsə same kwa Galilɛ yitea mene nda slene.

⁵⁶Hwa hɛ Mari, wəzha ta ka Magdala, Mari meghekɛa Zhake ba'a Zhozɛf, tsagha meghekɛa ŋwalea Zɛbɛdɛ.

⁵⁷Ma kwa se tɛhwɛɗi ne, pɛkwe kwete nde Arimatɛ, nde mcɛlə nya nza sləa ŋkɛ kaZhozɛf. Kande təkwə təkwə Yɛsə ŋkɛ perə.

⁵⁸Pa ŋkɛ lə sha Pilate ka'yɛwe geva ta Yɛsə. Tagha gɛ, pa Pilate gezete kezha ve nda ŋkɛ mbeli.

⁵⁹Pa Zhozɛf kelete geva ta Yɛsə, pa veheyi ŋkɛ mbe mɛnɛfɛa ghamca.

⁶⁰Pa ŋkɛ lamte ŋkɛ kwa kwele kwatela nya late ŋkɛ kaŋa ŋkɛ mbe gela. Kwa sebe ta ŋkɛ, pa pəŋəke pelɛ nya wəba kezha ŋzle ŋkwa kedzawa kwele ba'a dzeghwanyɛ.

⁶¹Tagha yɛ Mari, wəzha ta ka Magdala le kwete Mari mentishɛ mɛa kwele.

⁶²Te hendɛ ta veci nya hi wəshi mbeli yitea veci kezhɛne mpi ne, pa mbeli nyi te ghəa ka dzeghe Shala ba'a ka Fariziyɛn tsenete geva kalə sha Pilate.

⁶³Ma ke hɛ shɛ: «Wəndə kwele, nahe n'yɛ kezəzəte kwete ghena nya gezete nde tseŋwə nya, kwa nza ŋkɛ mba teghweme, ma ke: Kwetere wəmbəa hɛ mahekene ne, kasame 'ya kwa kwele le mpi.

⁶⁴Geze nda ke mbelia ŋa kaya kwele ta ŋkɛ kahɛ mahekene, yagha mbeli nyi ketəkwə təkwə kase kaghərəhwe geva ta ŋkɛ. Ma ke hɛ sha tegeze nda ke mbeli: Nahe ŋkɛ kesame kwa kwele le mpi. Za ma tezeme ŋkwa nyagha tseŋwəa nci ke nya kaghate.»

⁶⁵Ma ke Pilate sha hɛ: «Wa nyi ka sewajɛ nyi kezha ya. Kwiɗi mə kalə kaya kwelea shɛ kala nya nza yɛ kamenete.»

⁶⁶Cape hɛ tsagha, pa hɛ dɛŋeyite wəsə yitea pelɛ nya mɛa kwele ba'a beteyi ka sewajɛ kezha ya.