Read kapsiki Matiye 28 Bible Online

Matiye 28 - kapsiki bible

Matiye 28

¹Kwetere wəmbəa veci kezhɛne mpi, masheke masheke vəa ŋkwa demase, cape yɛ Mari, wəzha ta ka Magdala le kwete Mari kalə kanewe kwele.

²Te ŋkwa shɛnyɛ, pa hɛɗi gaŋkəɗəte geva kwele kwele, pɛkwe nde ghwene ta Nde sleke ŋkwa sawa pelɛ ghweme, pa pəŋəmte pelɛ mɛa kwele, pa ntishɛnyɛ te.

³Kaslesla pa ta ŋkɛ ba'a kala kwacakelɛ lekwesa ta ŋkɛ.

⁴Kwele kwele ghazlənə keseve ka sewajɛ, ntake hɛ kabare bare ba'a pa hɛ zhɛrenji kala mbeli nyi kempə mpə.

⁵Ma ke nde ghwene ta Shala sha mia shɛ: «Ghazlənəma yɛ ma. Nahe 'ya keɗepe Yɛsə yazele yɛ, nya baŋete mbeli te sheghwə kwa zleŋkwa.

⁶Mba ŋkɛ teke we, nahe ŋkɛ kesamenyɛ kwa kwele le mpi kala nya gezete ŋkɛ. Nde mə, newakɛ mə ŋkwa nya se ŋkɛ te.

⁷Kwiɗi mə kahe kahe, ma pe yɛ sha mbeli nyi ketəkwə təkwə: Nahe ŋkɛ kesamenyɛ kwa kwele le mpi, wa nya mpelɛa ma tedzawa Galilɛ ŋkɛ ke gheyɛ, kwagha tebegeme yɛ le. Nya ya kaghena nya va 'ya nya kageze ŋayɛ.»

⁸Ntəŋə hɛ kahe kahe sawa pelɛ kwele le ghazlənə ba'a zlama. Cape hɛ le hwɛ kalə kageze nda ke mbelia ŋkɛ nyi ketəkwə təkwə.

⁹Taghanyɛ, pɛkwe Yɛsə sha hɛ, ma ke sha hɛ: «Nahe yɛ kehɛ na.» Pa hɛ hendave nda geva, pa hɛ gwəɗəŋə hɛ mbe kema ta ŋkɛ kezha hawe ve, kwaɗakɛ seɗa ta ŋkɛ.

¹⁰Ma ke Yɛsə sha hɛ: «Ghazlənəma yɛ ma. Kwiɗi mə kalə kageze nda ke ka kesaka meyɛ ɗa nda dzawa Galilɛ hɛ, kwagha tenewe ɗa hɛ.»

¹¹Mbanji hɛ kwa hweŋkwa ne, nahe kweci ka sewajɛ nyi kese kaya kwele kedzembenji mbe meleme ba'a keɓelate nda wəsə nya kemenete geva ke mbeli nyi te ghəa ka dzeghe Shala.

¹²Pa mbeli nyi te ghəa ka dzeghe Shala ba'a mbelia jama tsenete geva. Ma kwa tsahwe ghena hɛ, pa hɛ fəave nda cɛdɛ kwele kwele ke ka sewajɛ.

¹³Ma ke hɛ sha hɛ: «Ma pe yɛ sha geze: Nahe mbeli nyi ketəkwə təkwə kese heviɗi. Nahe hɛ keghərəhwe geva ta ŋkɛ vəa ŋkwa nya nza n'yɛ yitea hɛ.

¹⁴Ma kefate ghena shɛ ŋgwamna ne, katelə ghen'yɛ kadəpə ghena shɛ, tagha gɛ, katenza yɛ keyirə yirə we.»

¹⁵Pa ka sewajɛ kelete cɛdɛ, ntake hɛ kamene kala nya gezete nda mbeli ke hɛ. Nahe ghena shɛ kepesleyi geva hwa ka Zhəwif pa ɓeshi.

¹⁶Pa mbeli nyi ketəkwə təkwə meŋe kwetɛŋeghəmbe slə kadzawa Galilɛ, kezha dzeme ghəa ghweme nya gezete nda Yɛsə ke hɛ.

¹⁷Kwa nakɛ ŋkɛ hɛ ne, gwəɗəŋə hɛ mbe kema ta ŋkɛ. Ama bake bake ghəa kweci mbelia nci.

¹⁸Pa Yɛsə hendave nda geva ke hɛ. Ma ke: «Nahe pɛtɛa berete nya pelɛ ghweme ba'a nya kwake te hɛɗi kendeke ɗa geva.

¹⁹Kwiɗi mə kalə sha pɛtɛa hwelefefi, zhɛrete mə hɛ kambeli nyi ketəkwə təkwə ɗa. Mene nda mə batɛme ke hɛ te sləa Yita, Wəzege ba'a Sefəa Shala.

²⁰Tekete nda mə ke hɛ kahawe va pɛtɛa wəshi nyi gezete ŋayɛ 'ya. Ɗepete mə megela, nahe 'ya kenza le gheyɛ keveci keveci hwa'a te kiɗi ta hɛɗi.»