Read kapsiki Matiye 3 Bible Online

Matiye 3 - kapsiki bible

Matiye 3

¹Ma vəa ŋkwa shɛ ne, pa Zhaŋe Batiste nca kwamte te ɓerama ta ka Zhəwdɛ, ntake ŋkɛ kazlape ghena.

²Ma ke: «Zhɛre mə nza ta ŋayɛ, takwa takwa Meghe nya pelɛ ghweme yitea gheyɛ.»

³Zhaŋe ya kawəndə nya gezete ghena ta ŋkɛ Ɛzayi nde mɛ ŋkwa ta Shala nya kegezete: Ma ke kwete wəndə zlapete kwamte te ɓerama: Hele nda mə hweŋkwa ke Mahwətə, hi nda mə yɛ hweŋkwa tiɗiɗia tiɗiɗia.

⁴Le shintia zlegwemə tsate lekwesa ta Zhaŋe mbeli, hətə ya hwa hwə ve, hegi ba'a mze nyi hwa gamba yazeme ŋkɛ.

⁵Kase ka Zhɛrəzalɛm, ka Zhəwdɛ ba'a mbeli nyi mɛa hələa Zhəwrdɛŋe shɛ.

⁶Kampi dzeve hɛ va jaɗafa ta nci kwa ntsə ta mbeli pɛtɛ, kamene nda batɛme Zhaŋe ke hɛ kwa hələa Zhəwrdɛŋe.

⁷Ma kwa nakɛ ka Fariziyɛn Zhaŋe le ka Sadəsɛyɛn kase shɛ kwele kwele kezha mene batɛme ne, ma ke sha hɛ: «Ŋwalea mentsape, wa nde tekete ŋayɛ wərə yɛ kambele va hwepe wənə ta Shala wa?

⁸Mene mə wəshi nyi kenza ncɛte nahe yɛ kezhɛrete nza ta ŋayɛ kaganda.

⁹Dambeghəma ŋayɛ yɛ kageze: Nahe Abraham kenza kashia n'yɛ, pe yɛ ma. Kaganda ne, ma 'ya sha gheyɛ: Wərə Shala kazhɛrete pelɛ nyi kaka shihɛnyɛa Abraham.

¹⁰Wa nya tseyɛ nya te slərəa wəfe kezha tsasle, yayata wəfe nya keɗema kaya ndeɗekə ne, katetsasle ŋkɛ mbeli kadzemɛa ghwə.

¹¹Le yɛmə mene ŋayɛ batɛme 'ya yitea zhɛre nza ta ŋayɛ yɛ. Ama katese kwete wəndə kwetere wəmbəa ɗa, le Sefəa Shala ba'a ghwə temene ŋayɛ batɛme ŋkɛ. Berete ma ŋkɛ ke 'ya, kehi 'ya kenza kawəndə nya keseɗe tsahwa shave mbe seɗa ta ŋkɛ we.

¹²Yitea dzeve 'yɛmbe ve kezha mehe ha, katetsene ha ŋkɛ kwa tame ta ŋkɛ, katendə cɛkəvə ŋkɛ le ghwə nya keɗema kamte kaghala ghala.»

¹³Pɛkwe Yɛsə sawa pelɛ Galilɛ kadzawa Zhəwrdɛŋe, hwa'a ŋkɛ sha Zhaŋe kezha mene batɛme.

¹⁴Ama pa Zhaŋe ɗema, ma ke shɛ: 'Ya nde hi kamene ɗa batɛme na, ama gha nde se sha 'ya.

¹⁵Ma ke Yɛsə zhɛnete nda: «Yɛte, shɛ na menete ɗa tsagha, va nya nza ŋkɛ tsetse mene mə nda nza mə yipəte wəsə nya ɗe Shala tiɗiɗi.» Pa Zhaŋe yɛte.

¹⁶Ma kwa nahemte mene nda batɛme mbeli ne, pa Yɛsə same hwa yɛmə. Taghanyɛ ne, pa ŋkwa nya pelɛ ghweme ghwenemte geva. Pa ŋkɛ nakɛ Sefəa Shala sawa pelɛ ghweme kala gheɗepe kadzeghə.

¹⁷Ma ke ghena gezeke geva sawa pelɛ ghweme: «Nya ya kaWəzege ta ɗa nya ɗe 'ya, nya zlama 'ya te kwele kwele.»