Read kapsiki Matiye 6 Bible Online

Matiye 6 - kapsiki bible

Matiye 6

¹Ntsehwele mə yitea tserame wəshi nyi 'yɛwe Shala va gheyɛ kwa kema ta mbeli kezha tsagha ŋayɛ mbeli pɛtɛ. Ma kenza nde tsetse mene yɛ ne, katekemave zhɛme yɛ va Yiteyɛ ŋayɛ nya pelɛ ghweme we.

²Ma keɗe na kaɗe nda wəsə ke ka titikwəa kɛfi, menema na kwa kema ta mbeli kezha tsahe ŋa hɛ kala nya mene ka mbəɗəkwə mbe yɛ cɛ kesəkwə ghə ba'a dzeyi kwa yɛ hweŋkwa. Kaganda ne, ma 'ya sha gheyɛ: nahe hɛ kekemave zhɛme ta nci tsetsenya.

³Ma kenza na kakemane ka titikwəa kɛfi ne, ncɛ nda ma na ya ke mcɛ ŋa kwa sla pela ŋkɛ ma.

⁴Tsagha ne, tewəfərə wəsə nya ndeke nda na. Nahe Shala, Yiteyɛ ŋa kenakɛ pɛtɛa wəshi nyi mene na tewəfərə, kateve ŋa zhɛme ŋkɛ.

⁵Ma kenza yɛ kasəkwə Shala, mba yɛ kemene kala ka mbəɗəkwə, meslete ɗe hɛ kasəkwə ghə mbe cɛ kesəkwə ghə keɗema dzeyi kwa yɛ baŋwa ta hweŋkwa yitea newe hɛ mbeli. Kaganda ne, ma 'ya sha gheyɛ: nahe hɛ kekemave zhɛme ta nci teke te hɛɗi.

⁶Ma keɗe na kasəkwə Shala ne, dzembe cɛa ŋa, ŋzlete ŋkwa, səkwə Shala Yiteyɛ ŋa nya mbe cɛa shɛ. Nahe Yiteyɛ ŋa kenakɛ pɛtɛa wəshi nyi mene na tewəfərə, kateve ŋa zhɛme ŋkɛ.

⁷Ma kenza yɛ kasəkwə Shala ne, mba yɛ kezhɛne ghena nya kwetɛŋe kala nya mene kweci hwelefefi. Ma zəzə hɛ ne, te ghena nyi zhezhɛne hɛ nza Shala fate səkwə ghə ta nci.

⁸Tekema hɛ yɛ ma, kwa nza nde nahe Shala Yiteyɛ ŋayɛ keɗepe ghena nya ɗe yɛ tewə yɛ kenaka ka'yɛwe ve.

⁹Wa nya tsetse səkwə ghə yɛ: Yiteyɛa n'yɛ nya pelɛ ghweme, hawe mbeli va ganyɛa sləa ŋa,

¹⁰Sawa Meghea ŋa, mene wəshi nyi ɗe na mbeli nyi te hɛɗi kala nya mene mbeli nyi pelɛ ghweme.

¹¹Ɗave n'yɛ wəsə kezeme behe n'yɛ ve ɓeshi.

¹²Kelemte ghena bezemte ŋa n'yɛ te wənə, kala nya kelemte nda n'yɛ ke mbeli nyi kebezemte n'yɛ ghena.

¹³Kelema n'yɛ na kadzete ŋkwa kedzeghe ŋkwa ma, ama yakɛ n'yɛ va Nde ghwete ŋkwa, kwa nza ŋkɛ, ŋa ŋa meghe, berete, ba'a zləvə, kaghala ghala. Amɛn.

¹⁴Kwa nza ŋkɛ ma kekelemte ghena nyi bezemte ŋayɛ kweci mbeli yɛ te wənə ne, katekelemte ŋa ŋayɛ Yiteyɛ ŋayɛ nya pelɛ ghweme te wənə perə.

¹⁵Ma keɗema yɛ kekelemte ghena nyi bezemte ŋayɛ kweci mbeli te wənə ne, katekelemte ŋayɛ Yiteyɛ ŋayɛ nya pelɛ ghweme te wənə perə we.

¹⁶Ma kenza yɛ kamene səwəmayɛ, nzama yɛ le kema teheɗe kala mbeli nyi shewə ma, tsagha mene ka mbəɗəkwə, pa hɛ zhɛrete kema tɛarawe rawe kezha ɗepe pɛtɛa mbeli səwəmayɛ yamene hɛ. Kaganda ne, ma 'ya sha gheyɛ: nahe hɛ kekemave zhɛme ta nci tsetsenya.

¹⁷Ama gha, kenza na kamene səwəmayɛ ne, pɛkɛ kema ta ŋa, slaɗete ghəa ŋa,

¹⁸yitea ɗepema mbeli səwəmayɛ yamene na. Nahe Yiteyɛ ŋa kenakɛ pɛtɛa wəshi nyi mene na tewəfərə, kateve ŋa zhɛme ŋkɛ.

¹⁹Tsenema mcɛlə yɛ kwake te hɛɗi, te ŋkwa nya beze hɛ yɛ lema ba'a dene, ŋkwa nya belaŋe gelembe ka ghərəa kɛfi kezha fə hɛ ma.

²⁰Tsene mə mcɛləa ŋayɛ pelɛ ghweme, te ŋkwa nya ɗema yɛ lema ba'a dene kezha beze hɛ, ya ka ghərəa kɛfi kezha belaŋe gelembe ba'a kezha fə hɛ.

²¹Kwa nza ŋkɛ ne, te ŋkwa nya nza yɛ mcɛləa ŋa tenza mehele ta ŋa shanda.

²²Ntsə ya kapaterela ta geva, ma kenza nde lɛŋe lɛŋe ntsə ta ŋa ne, waŋe ŋkwa nya mbe pɛtɛa geva ta ŋa.

²³Ma kenza nde nahe ntsə ta ŋa kebeze ne, te ŋkwesle pɛtɛa geva ta ŋa. Ma kenza nde nahe waŋe nya mbe geva ta ŋa kenza kaŋkwesle ne, katenza ŋkweslea shɛ zhikwətəkwə.

²⁴Wəndə shɛ kamenete nda slene ke ka sleke ŋkwa bake we, kateɗema ghena ta kwete ŋkɛ, kateɗe ŋa kwete ŋkɛ. Katenza ŋkɛ dɛŋe dɛŋe te kwete, kateɓelama ghena ta kwete ŋkɛ. Kapesle yɛ yitea mene nda slene ke Shala ba'a ke cɛdɛ kanya kwetɛŋe we.

²⁵Vatse gɛ, ma 'ya sha gheyɛ: mba yɛ keheha yitea wəshi kezeme ta ŋayɛ ba'a wəshi nyi tesa yɛ, lekwesa nyi teseɗe yɛ. Za ma mpi ke wəsə kezeme, za ma geva ke lekwesa wəka?

²⁶Newe mə 'yɛ nyi kezlə yitea ghweme, katsawe wəshi kezeme hɛ we, kamene wəshi hɛ te wəve we, katsene hɛ kadzawa tame we, ama Yiteyɛ ŋayɛ nya pelɛ ghweme nde zeme nda wəshi kezeme ke hɛ. Ŋkwini zhigə nza zləvəa ŋayɛ za ma ke 'yɛ wa?

²⁷Wa wəndə nya kenza kambakete hɛa ŋkɛ hwa gheyɛ laka heha ta ŋkɛ wa?

²⁸Yitea wa heha yɛ kwele kwele yitea lekwesa wa? Newe ma mə nza ta ghwə ta wəfe kwamte, kamene slene hɛ we, katsa lekwesa hɛ we.

²⁹Ma 'ya sha gheyɛ: ya Salomon mbe zləvəa ŋkɛ ne, kegha ŋkɛ kaseɗete lekwesa nyi ganji ganji ma ke ghwə ta wəfea shɛhɛ we.

³⁰Mbe seɗe nda lekwesa Shala ke gwəzə nya kenza megela ɓeshi ne, hendɛ mbe ghwə ŋkɛ, ashɛ ŋkɛ kateseɗe ŋayɛ lekwesa za ma ke hɛ wəka? Dewə ndeke nda ghə yɛ ke Shala deŋwa.

³¹Hehama yɛ laka geze: Wa yatezeme gheɓəmə wa? Wa yatesa gheɓəmə wa? Wa yateseɗe mə wa, pe yɛ ma.

³²Kweci hwelefefi kazele wəshi nyi kala nyi keveci keveci. Nahe Yiteyɛ ŋayɛ nya pelɛ ghweme keɗepe nahe wəshia shɛhɛ ketsakɛ ŋayɛ.

³³Zelete mə Meghea Shala ba'a nza tiɗiɗi kaba. Kateve ŋayɛ pɛtɛa wəshi nyi ketene Shala kadzeghə.

³⁴Mba yɛ kedambeghə ŋayɛ kaheha yitea hendɛ, hendɛ nde ɗepe ghəa ŋkɛ. Wərə heha nya ɓeshi kaŋa veci nya ɓeshi.