Read kapsiki Mark 13 Bible Online

Mark 13 - kapsiki bible

Mark 13

¹Ma vəa ŋkwa nya shave Yɛsə mbe ghɛa Shala ne, ma ke kwete wəndə nya ketəkwə təkwə shɛ: «Nde sleke ɗa, newema pelɛ nyi ba'a ŋa ta ŋkwa nyi gi!»

²Ma ke Yɛsə zhɛnete nda: «Nahe na kenakɛ ŋa ta ŋkwa nyi ŋate nyi mbeli jama jama na? Katenza pelɛ te kwete pelɛ kwetɛŋe we, pɛtɛ teŋzla hɛ.»

³Pa Yɛsə ntishɛ pelɛ ghweme ta Bekele, dzawa laka ghɛa Shala kema ta ŋkɛ. Ma ke Piyɛre, Zhake, Zhaŋe ba'a Andrɛ, ghenci nyi tagha yite kaghəa nci 'yɛwete ve:

⁴«Gezete n'yɛ: Hweŋkwa temene geva wəshia shɛhɛ wa? Wa wəsə nya ketencɛ n'yɛ vəa shɛ wa?»

⁵Tagha gɛ, ma ke Yɛsə sha hɛ: «Ntsehwele mə, yagha kwete wəndə teghwete ŋayɛ.

⁶Katese mbeli kwele kwele te sləa ɗa, ma ke hɛ sha tegeze: 'Ya ya kaMɛsi. Kwele kwele mbeli nyi teghwete hɛ.

⁷Katefa gaka ta mpa nyi dekwe dekwe keɗema nyi cakeɗa cakeɗa yɛ. Ghazlənəma yɛ ma: nda wəshia shɛhɛ kamenete geva kaba, ama kenaka kiɗi ta hɛɗi we.

⁸Katempa kwete hwelefe le kwete, kateha nda mpa kwete hɛɗi meghe ke kwete. Kategaŋkəɗə geva hɛɗi te kweci ŋkwa, katemene geva ma. Kala kwa ghate ta heha ta male nda teya wəzege nde tenza wəshia shɛhɛ.

⁹Ama ntsehwele mə yitea ghəa ŋayɛ. Katekese ŋayɛ mbeli kalə kadzete ghwə, kateɗa ŋayɛ mbe cɛ kesəkwə ghə ta ka Zhəwif, katekele ŋayɛ mbeli kadzete kema ta ka ŋgwamna ba'a ka meghea kɛfi tewəmbəreke 'ya, yitea negha fete yɛ te 'ya kwa kema ta mbeli.

¹⁰Nda Ghena kwatenca nya ganyɛ kazlapete nda geva ke pɛtɛa hwelefefi kaba.

¹¹Ma kefəghe ŋayɛ mbeli kalə kadzete ghwə ne, yirəma yɛ yitea ghena nya tesla yɛ ya nya tegeze yɛ ma. Te ŋkwa shɛnyɛ tedzembe ghəa ŋayɛ ghena nyi hi yɛ kageze. Kwa nza ŋkɛ va gheyɛ se ŋkɛ ghena shɛ we, ama va Sefəa Shala.

¹²Katekese nda wəza meghekɛ heli heli wəndə ke mbeli kezha pesle ŋkɛ mbeli, tsagha temene yita le wəzege ta ŋkɛ perə. Tsagha tezhɛne nda ghə ŋwale ke mbeli nyi keyakɛ hɛ kezha mpə hɛ mbeli.

¹³Katezlɛ mbeli pɛtɛ va gheyɛ tewəmbəreke 'ya, ama wəndə nya kehwepete ghə pa te keɗaŋe ta və ne, pələsə nza ŋkɛ.

¹⁴Katenewe wəsə nya ndiremi kashasha yɛ mentare mbe ŋkwa nya keveyi geva tekeleke. Ma wəndə nya kejaŋga ne, fave ghena nya ŋkɛ ndeɗekə. Ma mbeli nyi mbe Zhəwdɛ ne, hwɛ hɛ kadzeme hwa ghweme.

¹⁵Ma wəndə nya pelɛ dɛɓere nya kənəa cɛ ne, katesawa ŋkɛ kafə wəshia ŋkɛ mbe cɛ we.

¹⁶Ma wəndə nya kwamte ne, katezhɛre geva ŋkɛ kakele lekwesa ta ŋkɛ we.

¹⁷Te vecia shɛ ne, yaka nde tenza te mi nyi le hwə ba'a nyi nza ŋwale te ŋ'wa va hɛ.

¹⁸Səkwə mə Shala yagha vəa shɛ tese hefeghwe hwa ntasle.

¹⁹Kwa nza ŋkɛ ma te vecia shɛ ne, za ma tenza yaka shɛ ke yaka nyi sahwe mbeli ghala ghate geva hɛɗi, kwa ghala pate wəshi Shala pa tsetsenya, katenza kwete shɛ kala gheŋkɛ we.

²⁰Ma ya kaɗema Mahwətə kentamte hɛa shɛhɛ ne, nza wəndə shɛ kambele we. Ama nahe ŋkɛ kentamte hɛ kezha mbelia ŋkɛ nyi tsehave ŋkɛ.

²¹Ma kegeze ŋayɛ kwete wəndə: Wa nya Mɛsi nya teke, keɗema: Wa ca ŋkɛ pelɛke, a ke ne, yɛma yɛ ma.

²²Kwa nza ŋkɛ katese ka tseŋwəa Mɛsi ba'a ka tseŋwəa ka mɛ ŋkwa, katemene wəshi kencɛ wəshi ba'a wəshi meŋele hɛ kezha ghwete ŋkwa. Ma ya kapesle hɛ yite ne, pa le mbeli nyi ntave Shala ɗe hɛ kazamte hɛ.

²³Ya mə ghəa ŋayɛ gɛ! Nahe 'ya kegezemte ŋayɛ mpelɛa.

²⁴Ama te vecia shɛ, kwa sebe ta yaka shɛ ne, kateɓele veci we, katezhɛne tere kaɓele we,

²⁵katebete yɛ saseregwa sawa pelɛ ghweme, kategaŋkəɗə berete nyi pelɛ ghweme.

²⁶Tagha gɛ, katenewe Wəzege ta za mbeli kasawa te ləmbə le berete ba'a zləvə kwele kwele.

²⁷Kateghwene ka ghwene ta ŋkɛ Shala kalə laka pɛtɛa bela ta hɛɗi wəfaɗe, katetsene mbelia ŋkɛ nyi tsehave ŋkɛ se te kwete mendɛkwe ta hɛɗi hwa'a te kwete.

²⁸Zəzəte mə və nya ncɛ ŋayɛ dasekwa. Ma kebetemte sleke ŋkɛ ba'a keɗa ŋkɛ ne, nahe yɛ keɗepe takwa takwa cimə.

²⁹Ma vəa ŋkwa nya nakɛ wəshi nyi kala nyi yɛ kamene geva ne, ɗepete mə takwa takwa və nya tese ŋkɛ kwa.

³⁰Kaganda ne, ma 'ya sha gheyɛ: katempə pɛtɛa mbeli nyi teghweme nyi teke tsetsenya nda tese ŋkɛ we.

³¹Kateza yɛ ghweme le hɛɗi, ama kateza ghena ta ɗa tɛape we.

³²Ma gɛ, wəndə shɛ keɗepe se ta vecia shɛ, ya ka ghwene ta Shala nyi pelɛ ghweme, ya Wəzege we, deke Yita nde ɗepe.

³³Ntsehwele mə, mba yɛ kedzete hɛ ŋayɛ, kwa nza ŋkɛ ne, keɗepe se ta vəa shɛ yɛ we.

³⁴Katenza ŋkɛ kala wəndə nya kedzehwa mte. Ma kaslə ŋkɛ shave ki ghɛa ŋkɛ ne, pa dapate wəshia ŋkɛ te dzeve ke ka mavashia ŋkɛ, pa ŋkɛ ndeke nda slene ke yayata wəndəa nci ba'a geze nda ke nde ya degha kanza le ntsə.

³⁵Nza mə le ntsə gɛ, kwa nza ŋkɛ keɗepe və nya tese wəndə ke ghɛ yɛ te we: nda kwete katenza ŋkɛ hetɛhwɛɗi, keɗema te tepe ta viɗi, keɗema hekama ta ŋələ, keɗema masheke.

³⁶Ma kese ŋkɛ vəkə ne, mba ŋkɛ kesləyi ŋayɛ yitea hɛ.

³⁷Ma ghena nya geze ŋayɛ nya 'ya ne, gheŋkɛ yageze nda 'ya ke mbeli pɛtɛ: nza mə le ntsə!»