Read kapsiki Mark 15 Bible Online

Mark 15 - kapsiki bible

Mark 15

¹Masheke masheke ne, tsene yɛ mbeli nyi te ghəa ka dzeghe Shala, mbelia jama, ka rafe wəsə mahalegə ba'a pɛtɛa mbelia jama ta ka Zhəwif pɛtɛ kayipəte ghena. Pa hɛ hwepete Yɛsə, keleke ŋkɛ ba'a ndeke nda ŋkɛ ke Pilate.

²Ma ke Pilate 'yɛwete va Yɛsə: «Gha ya kameghea ka Zhəwif na?» Ma ke Yɛsə zhɛnete nda: «Gha nde gezete.»

³Pa mbeli nyi te ghəa ka dzeghe Shala keleke fete kwele kwele kadzete Yɛsə.

⁴Ma ke Pilate 'yɛwete va Yɛsə zhɛkwa: «Kazhɛne ghena na wəka? Kafa fete nyi ve ŋa nyi hɛ na wəka?»

⁵Ama kazhɛne ghena Yɛsə we, heɓake Pilate kwele kwele.

⁶Keva keva hwa gəsəkəa Pake ne, kapele nda nde daŋgayɛ Pilate kwetɛŋe ke mbeli, wəndə nya ɗe hɛ yapele nda ŋkɛ ke hɛ.

⁷Kwete wəndə nya nza sləa ŋkɛ kaBarabas ya kwa daŋgayɛ, va nya peslekɛ kwete hɛ wəndə le kweci mbeli hwa mpa nya kemenete geva.

⁸Pa mbeli dzeme sha Pilate ka'yɛwe wəsə nya seneve ŋkɛ kamene.

⁹Ma ke Pilate zhɛnete nda ke hɛ: «Kaɗe yɛ kapelave ŋayɛ meghea ka Zhəwif 'ya na?»

¹⁰Kwa nza ŋkɛ nahe Pilate keɗepe va zlɛ kesave nda Yɛsə mbelia jama ta ka dzeghe Shala.

¹¹Ama nahe mbeli nyi te ghəa ka dzeghe Shala keghwetete mbeli nyi ketsenete geva kezha 'yɛwe hɛ va Pilate kapele nda Barabas ŋkɛ ke hɛ.

¹²Ma ke Pilate 'yɛwete va mbeli zhɛkwa: «Tsema ɗe yɛ kamene 'ya le wəndə nya heka nya yɛ kameghea ka Zhəwif wa?»

¹³Ma ke hɛ zhɛnete nda le lewela: «Baŋate ŋkɛ te sheghwə kwa zleŋkwa.»

¹⁴Ma ke Pilate sha hɛ: «Wa wəsə nya bezemte ŋkɛ wa?» Ama ma ke hɛ sha lewela le berete ɓiyitsa: «Baŋate ŋkɛ te sheghwə kwa zleŋkwa.»

¹⁵Ma kwa ɗe Pilate kagwəfə nda ghəa mbeli ne, waɗe ŋkɛ pelave nda Barabas ke hɛ. Pa ŋkɛ ndeke nda Yɛsə ke mbeli kezha ɗa ŋkɛ hɛ le ghweɗa ba'a ndeke nda ŋkɛ ke hɛ kezha baŋe ŋkɛ te sheghwə kwa zleŋkwa.

¹⁶Pa ka sewajɛ keleke Yɛsə kadzeki ghɛa ŋgwamna, pa hɛ hekakɛ wəvəsəa ka sewajɛ pɛtɛ.

¹⁷Pa hɛ seɗaghe nda gare kwa gheme ke Yɛsə ba'a menete derə meghe le tigə ba'a veyi nda mbe ghə.

¹⁸Ntake hɛ kanjiŋwe ŋkɛ, ma ke hɛ: «Same meghea ka Zhəwif!»

¹⁹Pa hɛ mpave ŋkɛ le ghwəvərə kwa ghə, ntifəate ndɛghwɛɗɛ te ba'a gwəɗəŋə ntiŋə ghə mbe hɛɗi kwa kema ta ŋkɛ.

²⁰Ma kwa kiɗimte ŋ'wəshi ŋkɛ ne, pa hɛ seɗemte gare kwa gheme kənə ba'a zhɛnaghe nda lekwesa ta ŋkɛ, ntəŋə hɛ kalə kabaŋe ŋkɛ te sheghwə kwa zleŋkwa.

²¹Pa kwete nde Sirɛne nya nza sləa ŋkɛ kaSimon, yitenyɛa Alɛgezandre ba'a Rəfəs, se laka hweŋkwa shɛ sheke kwamte. Pa ka sewajɛ ŋkeyite ŋkɛ yitea kele sheghwə kwa zleŋkwa ta Yɛsə.

²²Pa hɛ keleghe Yɛsə kalə kadzete kwete ŋkwa nya nza sləa ŋkɛ ka Golgota, geze ta ŋkɛ: Ŋkwa 'yɛ'yɛa ghə.

²³Kaɗe hɛ kasa nda tɛ nya kegweɗə gweɗə le 'wərdə ganyɛ, ama pa Yɛsə ɗema sa.

²⁴Pa hɛ baŋete ŋkɛ te sheghwə kwa zleŋkwa, nehehwe lekwesa ta ŋkɛ le sla kwasheghediɗi kezha ɗepe nde wəsə mbe geva nya kekele.

²⁵Kentsə ntsə kwəsərə masheke nda baŋate ŋkɛ hɛ te sheghwə kwa zleŋkwa.

²⁶Ma te wəsə nya rafete hɛ kezha ncɛ ghena nya peslekɛ mbeli te ne, ma ke kwete ghena: «Meghea ka Zhəwif.»

²⁷Pa hɛ baŋete ka ŋwasle ŋkwa bake te sheghwə kwa zleŋkwa yitea Yɛsə, te kwa zeme ta ŋkɛ kwete, te kwa gwela kwete.

²⁸Tsetse yipəte geva ghena nya mbe Ghena ta Shala nya kegeze: «Nahe mbeli keɓelahwe ŋkɛ hwa ka mefətekwə.»

²⁹Ma mbeli nyi kedzeyi laka hweŋkwa shɛ ne, kakeɗeŋe ghə hɛ, kaŋele ŋkɛ hɛ, ma ke hɛ shɛ: «Yawa, ma gha nya keɗe nya kampə ghɛa Shala ba'a kazhɛne kaŋa ŋkɛ mbe hɛ mahekene ne,

³⁰mbelete ghəa ŋa le ghəa ŋa gɛ, sawa ŋa pelɛ sheghwə kwa zleŋkwa nya gɛ!»

³¹Tsagha shɛ ne, kaŋ'wəshi ŋkɛ mbeli nyi te ghəa ka dzeghe Shala ba'a ka rafe wəsə mahalegə, ma ke hɛ sha geze kwelɛ ghəa nci: «Nahe ŋkɛ kembelete kweci mbeli, ama kashɛ ŋkɛ mbele ŋa ŋkɛ ghə we.

³²Sawanyɛ Mɛsi, meghea ka Israyɛl te sheghwə nya tsetsenya. Ma kenakɛ ghen'yɛ kala nyagha ne, kateyɛ ŋkɛ ghen'yɛ.» Ma mbeli nyi baŋete mbeli le Yɛsə perə ne, kaŋele ŋkɛ hɛ.

³³Talala veci kwa ghə ne, pa viɗi veci menete geva te hɛɗi pɛtɛ. Ma nda kiɗi ŋkɛ ne, kwa mtsa veci.

³⁴Ma te lerə mahekene ne, ma ke Yɛsə zlapete le berete: «Ɛli, Ɛli, lema sabaktani», geze ta ŋkɛ, «Shala ta ɗa, Shala ta ɗa, va wa sərəakɛ ɗa na wa?»

³⁵Ma kweci mbeli nyi tagha ne, nahe hɛ kefate zlape ta ŋkɛ, ma ke hɛ: «Fama mə, Ɛli yaheka ŋkɛ.»

³⁶Ntəŋə kwete wəndəa nci le hwɛ, pa selamahwe bəzə hwa tɛa rɛzɛŋe nya ŋkɛara, pa hwepate ŋkɛ te tsafetse ba'a haghe nda ŋkɛ kadzeme ke Yɛsə kezha sa ŋkɛ. Ma ke: «Ntsagwe mə, katenewe mə ɓeshi kenza nde katese Ɛli kakele ŋkɛ sawa te sheghwə kwa zleŋkwa gɛ!»

³⁷Ama kɛake Yɛsə sha lewela le berete, mtiwə ŋkɛ.

³⁸Pa mayafe nya keneheve ŋkwa nya mbe ghɛa Shala perawenyɛ sawa pelɛghə hwa'a kwake te hɛɗi.

³⁹Ma wəndə nya te ghəa ka sewajɛ nya tagha, kwa nakɛ mte ta Yɛsə ŋkɛ ne, ma ke: «Wəzege ta Shala wəndə nya kaganda.»

⁴⁰Tagha kweci mi perə kanewe ŋkwa cakeɗake. Hwa hɛ Mari, wəzha ta ka Magdala, Mari meghekɛa Zhake nya ɓɛhwɛ ba'a Zhozɛs, ba'a Salomɛ.

⁴¹Nahe hɛ ketəkwə təkwəte Yɛsə ba'a kese kamene nda slene vəa ŋkwa nya nza ŋkɛ kwa Galilɛ. Tagha kweci mi kwele kwele nyi kedzeme Zhɛrəzalɛm le gheŋkɛ.

⁴²Nahe tɛhwɛɗi kese, ma kwa nza ŋkɛ veci kehi geva yitea veci kezhɛne mpi ŋkɛ, geze ta ŋkɛ, veci nya ketene te kema ta veci kezhɛne mpi ne,

⁴³pa Zhozɛf nde Arimatɛ se. Wəndə nya hawe mbeli nyi te ghəa meleme ve ŋkɛ, mbe neghe se ta meghea Shala ŋkɛ perə. Pa ŋkɛ hwepete ghə kadzeki ghɛa Pilate ka'yɛwe geva ta Yɛsə.

⁴⁴Ama heɓake Pilate va nya fa ŋkɛ nahe Yɛsə kemte kahe kahe. Pa ŋkɛ hekakɛ wəndə nya te ghəa ka sewajɛ kezha 'yɛwe ve kenza nde nahe Yɛsə ketemə kwele kwele ghala mte ŋkɛ.

⁴⁵Ma kwa fate ghena nya zhɛnete nda wəndə nya te ghəa ka sewajɛ ŋkɛ ne, pa pelave nda hweŋkwa ke Zhozɛf kakele geva ta Yɛsə.

⁴⁶Pa Zhozɛf pave ghamca, pa kelakawa geva ta Yɛsə te sheghwə kwa zleŋkwa, veheyi ŋkɛ mbe ghamca ba'a veyi ŋkɛ kwa kwele nya kelate geva mbe gela. Kwa sebe ta ŋkɛ, pa pəŋəke pelɛ nya wəba kezha ŋzle ŋkwa kedzawa.

⁴⁷Mbe newe yɛ Mari wəzha ta ka Magdala le Mari meghekɛa Zhozɛs, tema tema teve Yɛsə mbeli.