Read kapsiki Mark 5 Bible Online

Mark 5 - kapsiki bible

Mark 5

¹Pɛkwe yɛ Yɛsə le mbeli nyi ketəkwə təkwə shave pelɛ kema ta ndərəa Galilɛ kadzete hɛɗia ka Zhɛraza.

²Ma kwa sawa Yɛsə kwa kwambelə ne, pɛkwe kwete nde 'yi'yɛghwə taghanyɛ shave hwa kwele se shɛ kabegeme le.

³Hwa kwelea shɛhɛ nza ŋkɛ, wəndə shɛ kapesle yitea hwepe ŋkɛ ya kwa zewe lɛ we.

⁴Kwa nza ŋkɛ ne, nahe mbeli kese kahwehwepe ŋkɛ le zewe lɛ, ama nahe ŋkɛ keŋsleŋslemte hɛ pɛtɛ. Wəndə shɛ bereteke kezha keseyi ŋkɛ divə we.

⁵Mbe pɛtɛa və, viɗi le veci ne, kanza ŋkɛ dzeyi hwa yɛ kwele ba'a dzeyi hwa yɛ ghweme katsa lewela ba'a kadaŋwe ghəa ŋkɛ le pelɛ.

⁶Ma kwa nakɛ Yɛsə ŋkɛ cakeɗake ne, tereŋe tehwɛ kase shɛ, gwəɗəŋə ŋkɛ mbeyitere hwəa ŋkɛ kahawe ve.

⁷Ma ke tsate lewela le berete: «Wa yaɗe na le 'ya wa, Yɛsə Wəzege ta Shala tehwə ghweme. Təhwə təhwə ŋa 'ya te sləa Shala, mba na kesa ɗa yaka.»

⁸Kwa nza ŋkɛ ma ke Yɛsə gezete nda: «'Yi'yɛghwə, shave mbe wəndə nya.»

⁹Ma ke Yɛsə 'yɛwete va wəndəa shɛ: «Wa sləa ŋa wa?» Ma ke zhɛnete nda: «Wəvəsə sləa ɗa. Kwa nza ghen'yɛ kwele kwele.»

¹⁰Pa ŋkɛ mpiyi nda dzeve kwele kwele kezha ɗema ŋkɛ kaŋka 'yi'yɛghwəa shɛhɛ seyi te hɛɗia shɛ.

¹¹Tagha gərədə kwele kwele dzeme vare ghweme kazele wəshi kezemea nci.

¹²Ma ke 'yi'yɛghwəa shɛhɛ səkwəve hweŋkwa va Yɛsə: «Ghweneghe n'yɛ kadzembe gərədə nyi, pelakɛ n'yɛ kadzembe hɛ.»

¹³Pa Yɛsə pelave nda hweŋkwa ke hɛ, pa hɛ shavenji mbe wəndəa shɛ ba'a dzembenji mbe yɛ gərədə. Pɛtɛa gərədəa shɛhɛ kwesayɛ le hwɛ betakawa geva sawa pelɛ wəmbəa ŋkwa kadzawa ndərə. Nahe hɛ kemene gare slibə bake, pɛtɛ hɛ mpənji.

¹⁴Kweracɛ ka ya gərədəa shɛhɛ hwɛnji kajɛghɛ ba'a gezete wəsə nya kemenete geva mbe meleme nya wəba ba'a dzeyi mbe meleme nyi ɓɛhwɛ ɓɛhwɛ, tekwəsəmə mbeli shave mbe meleme kanewe wəsə nya kemenete geva.

¹⁵Ma kwa se hɛ sha Yɛsə ne, mentishɛ wəndə nya se nyagha 'yi'yɛghwə kwele kwele mbe. Le lekwesa kənəa geva ve, tiɗiɗi mehele ta ŋkɛ. Benake hɛ va ghazlənə.

¹⁶Ma mbeli nyi kenakɛ mbe ta wəndəa shɛ ne, pa hɛ gezete nda ke hɛ tsema tsema menete geva ŋkɛ le nde 'yi'yɛghwəa shɛ ba'a le gərədə.

¹⁷Ntake hɛ katsa nda təhwətə ke Yɛsə kezha slənyɛ ŋkɛ te hɛɗia nci.

¹⁸Ma kadzawa kwambelə Yɛsə ne, ntake wəndə nya se 'yi'yɛghwə yitea ghə ve kasəkwə hweŋkwa ve kezha nza ŋkɛ le.

¹⁹Kese Yɛsə kayɛ nda we, ma ke: «Kwiɗi sha ghɛa ŋa, sha mbelia ŋayɛ, gezete nda wəsə nya menete ŋa Mahwətə ke hɛ mbe zeɗe helia ŋkɛ yitea gha.»

²⁰Ntəŋə wəndəa shɛ yitea geze yayata wəsə nya menete nda Yɛsə dzeyi te hɛɗia Meleme Meŋe. Pɛtɛa mbeli nyi kefate ne, heheɓake nza hɛ va wəsəa shɛ.

²¹Ma kwa zhɛneke geva Yɛsə shave pelɛ kwete kema ta ndərə ne, kwele kwele mbeli tsenete geva yite mɛa hələbə.

²²Pa kwete wəndə nya te ghəa cɛ kesəkwə ghə nya nza sləa ŋkɛ kaZhayirəs se. Ma kwa nakɛ Yɛsə ŋkɛ, gwəɗəŋə ŋkɛ mbe hwəa ŋkɛ,

²³ma ke mpiyi nda dzeve: «Mbe wənə mbe wənə tene wəzha ta ɗa. Təhwə təhwə ŋa 'ya, nde dapakɛ le dzeve ta ŋa nda mbele nde ba'a nda nza nde teghweme.»

²⁴Ntəŋə Yɛsə le, kwele kwele mbeli nyi kebeghakɛ kalə ba'a nyi ketsetsəkwə ŋkɛ laka yayata bela.

²⁵Tagha male nya hwɛ mimi yite ghalanza kava meŋe bakeghəmbe.

²⁶Kwele kwele sahwe yaka nde kazele ghwɛ laka ka dakwəterə, pɛtɛ cɛdɛ zamte geva yitea dzeve ve. Ama kemenete yimə le we nde we, kwele ma zhɛkwa ŋkɛ kazhɛ nda.

²⁷Ma kwa fave zləvəa Yɛsə nde, pa ŋkɛ se kadzehwa mbeli, pa dzeyi nda kwetere wəmbəa Yɛsə kakwaɗakɛ lekwesa ta ŋkɛ.

²⁸Kwa nza ŋkɛ, ma ke mbe ghəa nta: «Ma ya kakwaɗakɛ deke lekwesa ta ŋkɛ 'ya ne, nza pələsə nza 'ya.»

²⁹Te ŋkwa shɛnyɛ hase mimi nya kehwɛ yite, fa nde mbe geva ta nta ne, lɛŋe lɛŋe nde.

³⁰Te ŋkwa shɛnyɛ, pa Yɛsə fate berete shave mbe geva ta ŋkɛ, tewətelɛwe ŋkɛ sha geva hwa mbeli: «Wa nde kwaɗakɛ lekwesa ta ɗa wa?»

³¹Ma ke mbeli nyi ketəkwə təkwə shɛ: «Kanewe mbeli na katsəkwə ŋa se laka yayata bela ne, ama ka'yɛwe wəndə nya kekwaɗakɛ ŋa na.»

³²Ama mba ŋkɛ kanewe ŋkwa nya dzeyi yite kezha newe wəndə nya kemenete wəsəa shɛ.

³³Mbe bare bare male nyagha va ghazlənə, kwa nza ŋkɛ nahe nde keɗepe wəsə nya kemenete nda geva. Pa nde se kagwəɗəŋə yitea seɗa ta ŋkɛ kagezete nda kaganda ta wəsə nya kemenete nda geva pɛtɛ.

³⁴Ma ke Yɛsə shɛ: «Wəzha ta ɗa, yɛ ta ŋa nde mbete ŋa. Kwiɗi le kwelɛŋe, kiɗimte ŋa geva zereghwe ta ŋa.»

³⁵Mba Yɛsə mbe geze ghena nyagha ne, pa mbeli se ki ghɛa Zhayirəs, wəndə nya te ghə, ma ke hɛ shɛ: «Nahe wəzha ta ŋa kemte, wa yaleɓe Nde sleke n'yɛ na yite gəmə zhɛkwa wa?»

³⁶Ama kese Yɛsə kave sleme yitea ghena ta nci we, ma ke sha Zhayirəs: «Ghazlənəma na ma, yɛhwe nahe ke ta ŋa.»

³⁷Keɗe ŋkɛ kabeghe ŋkɛ kwete wəndə we, deke yɛ Piyɛre le Zhake ba'a Zhaŋe, wəza meghekɛa Zhake.

³⁸Ma kwa ntsehe hɛ ki ghɛa wəndə nya te ghəa cɛ kesəkwə ghə, newe ke Yɛsə ne, kaheha mbeli, kanehwene katsa lewela kwele kwele.

³⁹Pa ŋkɛ dzeki ghɛ, ma ke: «Wa raberə heha yɛ kala nya wa? Wa raberə nehwene yɛ wa? Kemte wəzegea shɛ we, ama te hɛ nde.»

⁴⁰Ntake hɛ kaŋ'wəshi Yɛsə. Pa ŋkakave mbeli pɛtɛ, pa hekakɛ yitenyɛa wəzege le meghekɛ ba'a ka təkwə təkwə ŋkɛ mahekene kadzembe cɛ nya nza wəzegea shɛ.

⁴¹Pa ŋkɛ keseve dzeve ta wəzegea shɛ, ma ke: «Talita kəwm», geze ta ŋkɛ: «Wəzha, ma 'ya sha gha: sate te ŋkwa.»

⁴²Pelɛhetɛme wəzha shɛ kahe kahe, ntake nde kadzeghwa. Nahe va ta nta kenza meŋe bakeghəmbe. Ma kwa nakɛ hɛ kala nya, heheɓake hɛ kwele kwele.

⁴³Ama pa Yɛsə meɗekɛ hɛ ndeɗekə kezha ɗema hɛ kageze nda ke kwete wəndə. Ma ke sha hɛ: «Ɗave nda mə wəsə kezeme.»