Read kapsiki Mark 9 Bible Online

Mark 9 - kapsiki bible

Mark 9

¹Ma ke Yɛsə sha hɛ zhɛkwa: «Kaganda ne, ma 'ya sha gheyɛ: kampə kweci hwa mbeli nyi teke nyi keɗema hɛ kenaka kanakɛ Meghea Shala kase le berete we.»

²Ŋkwaŋe hɛ kwetere wəmbəa ŋkɛ, pa Yɛsə hekakɛ Piyɛre, Zhake ba'a Zhaŋe, pa keleghe hɛ kadzeme kwete ghweme nya biya deke ghenci kaghəa nci, pa Yɛsə zhɛrete pa tagha kwa ntsə ta nci.

³Tɛawetɛa ma lekwesa ta ŋkɛ ke kwacakelɛ, wəndə shɛ kamenete lekwesa tɛawe tɛawe kwake te hɛɗi kala gheŋkɛ we.

⁴Pa mbeli nyi ketəkwə təkwə nyi mahekene nyighɛ nakɛ yɛ Ɛli le Moyize kageze ghena le Yɛsə.

⁵Ma ke Piyɛre sha Yɛsə: «Rabi, ndeɗekə nza ta ɓəmə teke, katemɓe cɛ lekwesa n'yɛ mahekene teke, təhə kaŋa ŋa, təhə kaŋa Moyize ba'a təhə kaŋa Ɛli.»

⁶Keɗepe ghena kegeze ŋkɛ we, kwa nza ŋkɛ ne, shewə hɛ va ghazlənə.

⁷Pa ləmbə se ba'a zhiɓəaghe geva kənəa hɛ, shave mbe ləmbəa shɛ ne, ma ke kwete ŋwələ: «Nya ya kaWəzege ta ɗa nya ɗehwe 'ya. Fa nda mə ghena.»

⁸Taghanyɛ, newe ke mbeli nyi ketəkwə təkwə sha ŋkwa nya tagha ne, kenakɛ wəndə hɛ we, deke Yɛsə ya le hɛ.

⁹Ma kasawa hɛ pelɛ ghweme ne, ma ke Yɛsə gezave nda ke hɛ: «Mba yɛ kegeze nda wəsə nya nakɛ nya yɛ ke kwete wəndə hwa'a te və nya tesame Wəzege ta za kwa kwele le mpi.»

¹⁰Nahe hɛ keyɛte fete yitea ghena nya gezete ŋkɛ, ama ma ke hɛ 'yɛwete kwelɛ ghəa nci: «Take ne, wa yaɗe same kwa kwele kageze le wa?»

¹¹Ma ke hɛ 'yɛwete va Yɛsə: «Va wa nda geze ka rafe wəsə mahalegə katese Ɛli kaba wa?»

¹²Ma ke sha hɛ: «Kaganda ne, katese Ɛli ba'a katehi pɛtɛa wəshi ŋkɛ. Ama va wa rafete geva ŋkɛ katesa titikwə Wəzege ta za kwele kwele ba'a kateɓelama ŋkɛ mbeli wa?

¹³Ma 'ya le ŋa ɗa ne, ma 'ya sha gheyɛ: Nahe Ɛli kesenyɛ, ama nahe hɛ kemenete nda kala nya ɗe hɛ. Tsagha rafete geva ŋkɛ te ghəa ŋkɛ.»

¹⁴Ma kwa se hɛ sha kweci mbeli nyi ketəkwə təkwə ne, kwele kwele mbeli ketsenete geva yitea hɛ, kazhɛne ghəpə ka rafe wəsə mahalegə le hɛ.

¹⁵Ma kwa nakɛ Yɛsə mbeli ne, heheɓake hɛ, kweracɛ hɛ le hwɛ kalə kanjiŋwe ŋkɛ.

¹⁶Ma ke Yɛsə 'yɛwete va mbeli nyi ketəkwə təkwə: «Te wa zhɛne ghəpə yɛ le hɛ wa?»

¹⁷Ma ke wəndəa mbelia shɛhɛ zhɛnete nda: «Nde sleke ɗa, nahe 'ya kekeleke ŋa wəzege ta ɗa kwa nza 'yi'yɛghwə nya kefɛa ŋkɛ kegeze ghena yitea ghə ve.

¹⁸Ya tema tema sate ŋkɛ mbe geva ta ŋkɛ ne, kanegha ŋkɛ nde te ŋkwa, kase hwɛfɛ yitea mɛa ŋkɛ ba'a kampeɗe slene ŋkɛ, dzaŋe dzaŋe ntsəte geva ta ŋkɛ, pa 'ya geze nda ke mbeli nyi ketəkwə təkwə ŋa nyi kezha ŋkamte hɛ ne, ama shaŋe hɛ ve.»

¹⁹Ma ke Yɛsə sha hɛ: «Ka ndiremia mehele ba'a ka yɛma ghena, pa te nyama və tenza 'ya hwa gheyɛ wa? Hwa'a te nyama və tesəwə ghena ta ŋayɛ 'ya wa? Ndeke ɗa mə wəzegea shɛ.»

²⁰Pa mbeli keleke nda. Ma kwa nakɛ Yɛsə 'yi'yɛghwəa shɛ ne, pa gagəzəte wəzegea shɛ le berete, ŋwəpə ŋkɛ teɗenyɛ te hɛɗi, ntake ŋkɛ kateŋwələŋwə geva te hɛɗi, nda hwɛfɛ yitea mɛ va wəzegea shɛ.

²¹Ma ke Yɛsə 'yɛwete va yitenyɛ: «Hweŋkwa ghate zhɛ nda ŋkɛ kala nya wa?» Ma ke yita zhɛnete: «Se kawəzege.

²²Kwele kwele zhigə nenegheyi ŋkɛ 'yi'yɛghwəa shɛ mbe ghwə ba'a kwa yɛmə kezha pesle ŋkɛ, ama kenza nde wərə na kamenete kwete wəsə ne, zhɛ heli yitea ghen'yɛ ba'a kemane n'yɛ.»

²³Ma ke Yɛsə: «Kenza nde kamenete kwete wəsə na, a pa. Ama wəsə shɛ dzawe sha wəndə nya keyɛ we.»

²⁴Taghanyɛ, ma ke yitenyɛa wəzegea shɛ zlapete: «Kayɛ 'ya, kemane ɗa mbe dewə yɛ ta ɗa.»

²⁵Newe ke Yɛsə ne, mbe tsene geva mbeli kwele kwele kase sha hɛ, ma ke sha 'yi'yɛghwə nyagha: «Sefə nya kezhɛre ŋkwa kamədəŋə nya keshɛma sla ghena, ma 'ya sha gha: Shave ŋa mbe wəzege nya, zhɛnema geva kadzembe tɛape ma.»

²⁶Pa 'yi'yɛghwəa shɛ tsate lewela, gagəzəte wəzegea shɛ le berete ba'a shavenyɛ mbe. Nahe ŋkɛ kenza kala wəndə nya kemte mte, ma ke mbeli kwele kwele sha geze: «Nahe ŋkɛ kemte.»

²⁷Ama pa Yɛsə keseve ŋkɛ te dzeve ba'a kesakate ŋkɛ, pa wəzegea shɛ nzanyɛ meghereŋe.

²⁸Ma kwa zhɛneke geva Yɛsə kadzeki ghɛ ne, ma ke ka təkwə təkwə ŋkɛ nyi kaghəa nci 'yɛwete ve: «Va wa ndɛare ghen'yɛ kaŋka 'yi'yɛghwəa shɛ tse wa?»

²⁹Ma ke Yɛsə sha hɛ: «Deke le səkwə ghə nza mbeli kaŋkamte mama ta 'yi'yɛghwəa shɛ.»

³⁰Pa hɛ slənji tagha ba'a jivenji mbe hɛɗia Galilɛ. Kaɗe Yɛsə kaɗepete ŋkwa nya nza ŋkɛ te mbeli we.

³¹Ma kwa nza ŋkɛ mbe teke nda wəsə ke mbelia ŋkɛ ne, ma ke sha hɛ: «Katepamte Wəzege ta za mbeli va kweci mbeli ba'a katepesle ŋkɛ hɛ, ama te kwa maheke ta hɛ ne, katesame ŋkɛ kwa kwele le mpi.»

³²Ama kefave ghena shɛ mbeli nyi ketəkwə təkwə we, kazhɛ nda ghazlənə ke'yɛwe ve ke hɛ.

³³Ma kwa ntsehe hɛ mbe Kapɛrnawəm ne, pa hɛ dzeki ghɛ, ma ke Yɛsə sha mbeli nyi ketəkwə təkwə: «Te wa zhɛne ghəpə yɛ kwa hweŋkwa mshena wa?»

³⁴Tikə tikə hɛ, kwa nza ŋkɛ te ghəa wəndə nya kwele ma hwa hɛ se hɛ kaghəpə kwa hweŋkwa mshena.

³⁵Ntishɛ Yɛsə, pa hekakɛ mbeli nyi ketəkwə təkwə meŋe bakeghəmbe, ma ke sha hɛ: «Ma keɗe kwete wəndəa ŋayɛ kanza kawəndə nya te kema ma ne, pa ŋkɛ nza kawəndə nya kwa sebe ta pɛtɛa mbeli, kande mene nda slene ke pɛtɛa mbeli.»

³⁶Pa ŋkɛ hekakɛ wəzege, pa ŋkɛ keseve ŋkɛ le dzeve ba'a veyi ŋkɛ te kema ta nci. Ma ke sha hɛ:

³⁷«Ma yayata wəndə nya kekemaneve wəzege nya ɓɛhwɛ kala nya te sləa ɗa ne, 'ya yakemaneve ŋkɛ tsagha. Wəndə nya kekemaneve ɗa ne, deke 'ya yakemaneve ŋkɛ we, ama Nde ghweneke ɗa.»

³⁸Ma ke Zhaŋe sha Yɛsə: «Nde sleke n'yɛ, nahe ghen'yɛ kenakɛ kwete wəndə kaŋka 'yi'yɛghwə te sləa ŋa, kaɗe ghen'yɛ kafɛa ŋkɛ va nya ɗema ŋkɛ hwa gheɓəmə.»

³⁹Ma ke Yɛsə: «Fɛama ŋkɛ yɛ ma, ma yayata wəndə nya kemenete wəsə meŋele te sləa ɗa ne, keɗema ghena ta ɗa ŋkɛ taghanyɛ we.

⁴⁰Ma wəndə nya keɗema kande jaga ta ɓəmə ne, ŋa ɓəmə ŋkɛ wəndə.

⁴¹Kaganda ne, ma 'ya sha gheyɛ: ma yayata wəndə nya kesame ŋayɛ ya deke yɛmə ŋelɛ ɓɛhwɛ va nya nza yɛ kambelia Kriste ne, katekemave zhɛme ta ŋkɛ ŋkɛ.

⁴²Ma keghwetete kwete hwa ŋwale nyi keyɛ ghena ta ɗa nyi wəndə kadzembe jaɗafa ne, ganyɛ ma hwepeyi nda vena nya wəba mbeli kwa welɛ ba'a negheyi ŋkɛ mbeli kwa ndərə.

⁴³Ma kenza nde dzeve ta ŋa nde veyi ŋa mbe jaɗafa ne, tsaslemte ŋkɛ. Megela ma dzembe mpi na le dzeve kwetɛŋe kenya nza dzeve bake te gha kadzembe ghwə nya keɗema kakiɗi.

⁴⁴Te ŋkwa shɛ ne, kampə menciɗi nyi kezeme yɛ geva we, kamte ghwə tɛape we.

⁴⁵Ma kenza nde tewəmbəreke seɗa ta ŋa teɗe na mbe jaɗafa ne, tsaslemte ŋkɛ. Megela ma dzembe mpi na le seɗa kwetɛŋe kenya nza seɗa bake te gha kadzembe ghwə nya keɗema kakiɗi.

⁴⁶Te ŋkwa shɛ ne, kampə menciɗi nyi kezeme yɛ geva we, kamte ghwə tɛape we.

⁴⁷Ma kenza nde va ntsə ta ŋa teɗe na kadzembe jaɗafa ne, feraɗemte ŋkɛ. Megela ma dzembe Meghea Shala na le ntsə kwetɛŋe kenya dzembe ghwə nya keɗema kakiɗi na le ntsə bake.

⁴⁸Te ŋkwa shɛ ne, kampə menciɗi nyi kezeme yɛ geva we, kamte ghwə tɛape we.

⁴⁹Kwa nza ŋkɛ ghwənə ghwənə tenza geva ta yayata wəndə mbe ghwə.

⁵⁰Ma ghwene ne, wəsə ganyɛ ŋkɛ. Ama keshavenyɛ mele mbe ghwene ne, tsema nza ghwənəghwə kazhɛname geva mbe wa? Nza mə kambeli nyi nza ghwene mbe, nza mə kwelɛŋe kwelɛ ghəa ŋayɛ.»