Read kapsiki Ləwke 16 Bible Online

Ləwke 16 - kapsiki bible

Ləwke 16

¹Ma ke Yɛsə sha mbeli nyi ketəkwə təkwə: «Pa kwete nde mcɛlə dapate nda wəshia ŋkɛ te dzeve ke kwete wəndə. Pa mbeli geze nda ke wəndəa shɛ tsema tsema beze wəshia ŋkɛ wəndə nyagha.

²Pa ŋkɛ hekakɛ wəndəa shɛ, ma ke shɛ: Tsema mene na ke mbeli kafa 'ya wa? Ɓelate ɗa wəshi nyi dapate ŋa 'ya pɛtɛ te dzeve. Kaɗe ŋa 'ya mbe slenea shɛ zhɛkwa we.

³Ma ke wəndəa shɛ mbe ghəa ŋkɛ: Nde sleke ɗa katekelemte ɗa te slene ta ɗa. Wa yatemene 'ya tse wa? Katepesle 'ya yitea wəza we, katezhɛ ɗa hawe kesəkwə wəshi va mbeli.

⁴Yawa, nahe 'ya keɗepe wəsə nya temene 'ya. Ma keŋkamte ɗa mbeli mbe slene ne, kapele ɗa ŋkwa kedzawa ki ghɛa nci kweci mbeli.

⁵Pa ŋkɛ hekakɛ mbeli nyi nza dewa ta nde sleke ŋkɛ hwa hɛ. Ma ke sha nde ghate: Ŋkwini dewa ta nde sleke ɗa hwa gha wa?

⁶Ma ke zhɛnete nda: Dereməa n'yia bekele. Ma ke shɛ: Ntishɛ ŋa. Wa nya palepa ta dewa ta ŋa nya. Rafete mcɛfemsə kahe kahe.

⁷Ma ke sha kwete wəndə ɓiyitsa, ma ke shɛ: Gha, ŋkwini ŋa ŋa wa? Ma ke zhɛnete nda: Behwea ha gwəmsə. Ma ke shɛ: Wa nya palepa ta dewa ta ŋa nya. Rafete deghesemsə.

⁸Pa nde sleke ŋkɛ tsahekɛ wəndə nya dapate nda wəshi ŋkɛ te dzeve va nya menete slene ŋkɛ le ntsehwele menete na. Kwa nza ŋkɛ za ma mene ntsehwele mbeli nyi tsetse ŋkwa nyi kwelɛ ghəa nci ke mbeli nyi mbe waŋe ta ŋkwa.»

⁹Ma ke Yɛsə mtsehete: «Ma 'ya sha gheyɛ le ŋa ɗa: Kese mə mcɛ kaŋa ghəa ŋayɛ ke mbeli le cɛdɛ nya keghwete ŋkwa. Ma vəa ŋkwa nya tekiɗi ŋkɛ ne, katekemaneve ŋayɛ ka mcɛhɛa shɛhɛ te ŋkwa nya kaghala ghala.

¹⁰Ma wəndə nya tiɗiɗi mbeli mbe slene nyi ɓɛhwɛ ɓɛhwɛ ne, tiɗiɗi tenza ŋkɛ mbe slene nyi jama jama. Ma wəndə nya kemene mbəɗəkwə le slene nyi ɓɛhwɛ ɓɛhwɛ ne, mbəɗəkwə yatemene ŋkɛ mbe nyi jama jama perə.

¹¹Ma shaŋe mbeli kave ghə te gheyɛ mbe mene slene le cɛdɛ nya keghwete ŋkwa ne, wa nde tedape ŋayɛ mcɛlə ganji te dzeve wa?

¹²Ma keshaŋe mbeli kave ghə te gheyɛ te wəshi nyi keɗema kaŋa ŋayɛ ne, wa nde teve ŋayɛ wəsə nya kaŋa ŋayɛ wa?

¹³Nde mene shɛ kamenete nda slene ke ka sleke ŋkwa bake we: kateɗema ghena ta kwete ŋkɛ, kateɗe ŋa kwete ŋkɛ, keɗema ne, katenza ŋkɛ dɛŋe dɛŋe te kwete, kateɓelama kwete ŋkɛ. Kapesle yɛ yitea mene nda slene ke Shala ba'a ke cɛdɛ kanya kwetɛŋe we.»

¹⁴Ma kwa fate pɛtɛa ghena nyi ka Fariziyɛn ne, ntake hɛ kaŋ'wəshi Yɛsə, kwa nza ŋkɛ nahe hɛ keɗehwe cɛdɛ.

¹⁵Ma ke Yɛsə sha hɛ: «Ma gheyɛ ne, kambeli tiɗiɗi zhɛre ghəa ŋayɛ yɛ kwa ntsə ta kweci mbeli, ama nahe Shala keɗepe mehele ta ŋayɛ. Ma wəsə nya newe mbeli kawəsə nya wəba ne, wəsə nya ndiremi kashasha ŋkɛ kwa kema ta Shala.

¹⁶Zhaŋe Batiste nde keɗaŋemte vəa wəsə mahalegəa Shala ba'a ŋa ka mɛ ŋkwa ta ŋkɛ. Kwetere wəmbəa ŋkɛ, nahe Ghena kwatenca nya ganyɛ ta Meghea Shala kezlapete geva, yayata wəndə kahwepe ghə kezha dzembe Meghea Shala.

¹⁷Dekwede ma nza za ta sebe te yɛ ghweme le hɛɗi ke ntamte geva ta wəsə mahalegə nya ɓɛhwɛ ma.

¹⁸Yayata wəndə nya keŋkamte male ta ŋkɛ ba'a nya kewəmeve kwete ne, vale tahe yamene ŋkɛ. Yayata wəndə nya kewəme male nya ŋkamte za ŋkɛ ne, vale tahe yamene ŋkɛ.

¹⁹Kwete wəndə ya shɛ kande mcɛlə. Lekwesa ganji nyi ɗeke gheme ba'a jakeja jakeja yaseɗe ŋkɛ. Keveci keveci ne, kamene wəshi kezeme ganji ŋkɛ.

²⁰Kwete nde titikwə nya nza sləa ŋkɛ kaLazare ya shɛ. Tagha ŋkɛ kwa degha ta wəndə nyagha, bətə geva ta ŋkɛ va zhi.

²¹Kaɗe ŋkɛ kabehe hwəa ŋkɛ le wəshi kezeme nyi kebete kadzete hɛɗi kwa mentsehe ta nde mcɛləa shɛ. Zhɛne ne, kelɛa keti ka se kanini zhia ŋkɛ.

²²Mtiwə nde titikwəa shɛ, pa ka ghwene ta Shala keleghe ŋkɛ kadzeme kantishɛ yitea Abraham. Mtiwə nde mcɛlə perə, pa mbeli lamte ŋkɛ.

²³Kwele kwele sa yaka nde mcɛlə kwa ghɛa mbelia kwahɛɗi. Newe ke ne, pa nakɛ Lazare vare Abraham.

²⁴Tagha gɛ, ma ke nde mcɛləa shɛ sha lewela: Yita Abraham, zhɛ heli yitea 'ya ba'a ghweneke Lazare kezha hahwe kwatɛka ta dzeve ta ŋkɛ ŋkɛ hwa yɛmə kezha lɛnɛake ɗa ghɛni, kwa nza ŋkɛ ne, kwele kwele sa titikwə 'ya mbe ghwə nya.

²⁵Ma ke Abraham shɛ: Wəzege ta ɗa, zəzəte zeɗe nza nya se na kazeme vəa ŋkwa nya nza na teghweme. Ma Lazare le ŋa ŋkɛ ne, titikwə yase ŋkɛ kasa kwele kwele. Tsetsenya gɛ ne, mbe zeɗe nza ŋkɛ teke, ma gha le ŋa ŋa ne, titikwə yasa na.

²⁶Ɓiyitsa ne, ki nya ɗema ghala kwa ya kwelɛ tepe ta gheyɛ le ghen'yɛ. Ma wəndə nya keɗe kadzawa sha gheyɛ ne, kashɛ ŋkɛ dzawa we. Kashɛ wəndə nya kwagha sha gheyɛ same sha ghen'yɛ ɓiyitsa we.

²⁷Ma ke nde mcɛlə shɛ: Təhwə təhwə yita, ghwenakɛ Lazare kalə kadzeki ghɛa yiteyɛ ɗa,

²⁸kwa nza ŋkɛ ka kesaka ma ya va 'ya mcɛfe. Geze nda ŋkɛ ke hɛ kezha ɗema hɛ kase kadzete titikwə nya nza 'ya mbe te ŋkwa nya.

²⁹Ma ke Abraham shɛ: Ghena ta Moyize ba'a ŋa ka mɛ ŋkwa ta Shala ya va hɛ kezha fa hɛ hɛ.

³⁰Ma ke nde mcɛlə: Kenza wərə we yiteyɛ ɗa Abraham we. Ma kesame wəndə kwa kwele kalə kasla nda ke hɛ ne, katezhɛre nza ta nci hɛ.

³¹Ma ke Abraham shɛ: Ma keɗema hɛ kafa ghena ta yɛ Moyize le ka mɛ ŋkwa, ya wəndə nya kesame kwa kwele le mpi nde lə sha hɛ ne, katefa ghena ta ŋkɛ hɛ we.»