Read kapsiki Ləwke 17 Bible Online

Ləwke 17 - kapsiki bible

Ləwke 17

¹Ma ke Yɛsə sha mbeli nyi ketəkwə təkwə: «Katenza wəshi nyi keghwete ŋkwa kadzembe jaɗafa shɛ. Ama ndiremi ya te wəndə nya keghwete ŋkwa kadzembe jaɗafa.

²Megela ma hwepeyi nda vena nya wəba mbeli kwa welɛ ba'a negheyi ŋkɛ mbeli kwa ndərə kenya ghwetete wəndə kwetɛŋe ŋkɛ kadzembe jaɗafa hwa mbeli nyi ɓɛhwɛ ɓɛhwɛa shɛhɛ.

³Ntsehwele mə! Ma kebezemte ŋa ghena wəza meyɛ ŋa, ncɛte nda ghena nya bezemte ŋkɛ. Ma kempiyi dzeve ŋkɛ ne, kelemte ghena shɛ te wənəa ŋa.

⁴Ma kemenete ŋa jaɗafa ŋkɛ ya mberefaŋe zhigə mbe vəghwə, nda kese ŋkɛ mberefaŋe zhigə mbe vəghwə kampi ŋa dzeve ne, katekelemte nda ghena shɛ na te wənə.»

⁵Ma ke ka ghwene ta ŋkɛ sha Nde sleke ŋkwa: «Mtsehete n'yɛ yɛ ta n'yɛ.»

⁶Ma ke Nde sleke ŋkwa sha hɛ: «Ma nda le yɛ va gheyɛ ɓɛhwɛ kala ghəa zhiwə ne, wərə yɛ kageze nda ke mekweɗa nya kezha nteɗemte geva teke ba'a kezha lə ŋkɛ kamɓe geva kwa ndərə. Katefa ghena ta ŋayɛ ŋkɛ.

⁷Ya kwete kwete wəndəa ŋayɛ nya nza mava nya kewəza nda wəza keɗema nya keya nda wəshi ya shɛ. Ma kwa sheke ŋkɛ kwamte ne, kategeze nda ŋkɛ kezha lə ŋkɛ kadzawa mentsehe na?

⁸Ama ma ke sha tegeze nda: Takɛ ɗa wəsə kezeme. Kwa sebe ta ŋkɛ, mbeɗete lekwesa kezha se kave ɗa wəsə kezeme, hwa'a te və nya zehwe wəsə kezeme ba'a nya sahwe wəsə kesa 'ya. Ma kwa sebe ta ŋkɛ ne, katezeme wəsə kezeme na ba'a katesa wəsə kesa na.

⁹Nahe ŋkɛ ketsate nda hana ke mava shɛ va nya menete slene ŋkɛ kala nya gezete ŋkɛ na?

¹⁰Tsagha shɛ ŋkɛ kaŋa ŋayɛ perə, ma kemenete wəshi nyi gezete ŋayɛ mbeli yɛ ne, ma pe yɛ sha geze: Ka mavashi nyi gəmə gəmə ghen'yɛ. Deke wəshi nyi gezete n'yɛ mbeli yamenete ghen'yɛ.»

¹¹Kadzeme Zhɛrəzalɛm Yɛsə ne, pa ŋkɛ kelete hweŋkwa dzeme kwelɛ yɛ Samari le Galilɛ.

¹²Dzembe kwete meleme ŋkɛ ne, pɛkwe kweci ka derena meŋe kabegeme le Yɛsə. Pa hɛ ghereŋenji cakeɗake.

¹³Ma ke hɛ tsate lewela: «Yɛsə, Nde sleke ŋkwa, zhɛakɛ heli yitea ghen'yɛ gi!»

¹⁴Ma kwa nakɛ hɛ Yɛsə ne, ma ke sha hɛ: «Kwiɗi mə kalə kancɛ nda mə ghəa ŋayɛ ke ka dzeghe Shala.» Ma mbe dzeghwa hɛ kalə ne, pa derena ta nci kiɗinji wɛŋe wɛŋe kwa hweŋkwa.

¹⁵Ma kwete wəndə kwetɛŋe hwa hɛ kwa nakɛ ghəa ŋkɛ ŋkɛ wɛŋe ne, tewətelɛwe ŋkɛ zhɛneke geva kase sha Yɛsə. Katsahe Shala ŋkɛ le berete.

¹⁶Pa ŋkɛ ŋame ghəa ŋkɛ mbe hɛɗi yitea seɗa ta Yɛsə ba'a tsate nda hana. Nde Samari wəndəa shɛ.

¹⁷Tagha gɛ, ma ke Yɛsə: «Ashɛ meŋe hɛ pɛtɛ nci kembe wəka? Tema kweci mbeli nyi mesli wa?

¹⁸Wəndə shɛ hwa hɛ kezəzəte se katsahe Shala, keɗema nde se se nya wəka?»

¹⁹Ma ke Yɛsə shɛ: «Sate ŋa ba'a kwiɗi. Yɛ ta ŋa nde mbelete ŋa.»

²⁰Ma ke ka Fariziyɛn 'yɛwakɛ va Yɛsə: «Hweŋkwa tese Meghea Shala wa?» Ma ke sha hɛ: «Kase Meghea Shala kala wəsə nya newe mbeli le ntsə we.

²¹Kategeze mbeli: Wa nya ŋkɛ teke, keɗema: Waca ŋkɛ pelɛke, we. Kwa nza ŋkɛ hwa gheyɛ Meghea Shala.»

²²Ma ke sha ka təkwə təkwə ɓiyitsa: «Katese veci nya teɗe yɛ kanewe Wəzege ta za ya kaveci kwetɛŋe, ama katenakɛ ŋkɛ yɛ we.

²³Ma ke mbelia sha tegeze ŋayɛ: Wa nya ŋkɛ teke keɗema: Waca ŋkɛ pelɛke, ama ləma yɛ ma, hwɛma yɛ kalə ma.

²⁴Kala va nya keslesla dzeyi te ghweme ba'a nya kewaŋe ŋkwa se te kwete mendɛkwe ta hɛɗi hwa'a te kwete ne, tsagha tenza se ta Wəzege ta za.

²⁵Ama nda ŋkɛ kasahwe yaka kwele kwele ba'a nda mbeli nyi tsetsenya kaɗema ghena ta ŋkɛ.

²⁶Wəsə nya kemenete geva te vəa Nowɛ nde temene geva te vecia se Wəzege ta za.

²⁷Ma te vecia shɛ ne, mbe mpeɗe wəshi kezeme ba'a mbe sa wəshi kesa mbeli, kaŋzle makwa mbeli, kave nda ŋwalea nci kweci ke zhili, hwa'a te veci nya dzembe kwambelə Nowɛ. Tagha gɛ, pa yɛmə nya wəba se kazamte sebe te hɛ pɛtɛ.

²⁸Keɗema katenza ŋkɛ kala wəsə nya kemenete geva te vəa Lot. Mbe mpeɗe wəshi kezeme ba'a mbe sa wəshi kesa mbeli. Kapa wəshi ba'a kapamte wəshi mbeli, kamɓete yɛ wəfe ba'a kaŋa yɛ ghɛ mbeli.

²⁹Ama te veci nya shave Lot mbe meleme ta ka Sodome ne, nahe Shala kemaghe ghwə kənəa hɛ kala va, pa ghwəa shɛ mpəmte hɛ pɛtɛ.

³⁰Tsagha temene geva ŋkɛ te veci nya tenca geva Wəzege ta za.

³¹Te vecia shɛ ne, ma wəndə nya pelɛ dɛɓere nya kənəa cɛ ne, katesawa ŋkɛ kafə wəshia ŋkɛ mbe cɛ we. Ma wəndə nya kwamte ɓiyitsa ne, katezhɛre geva ŋkɛ kesheke we.

³²Zəzəte mə wəsə nya kemenete nda geva ke male ta Lot.

³³Ma wəndə nya keɗe kaya mpia ŋkɛ ne, kateza ŋkɛ ŋkɛ. Ma wəndə nya keɗe kazamte mpia ŋkɛ ne, kateya mpia ŋkɛ ŋkɛ.

³⁴Ma 'ya sha gheyɛ: ma te viɗia shɛ ne, katenza mbeli bake te ŋgezle nya kwetɛŋe, katekelehwe geva kwete, sərə kwete.

³⁵Katehə mi bake te vena nya kwetɛŋe, katekelehwe geva kwete, sərə kwete.

³⁶Katewəza zhili bake kwamte, katekelehwe geva kwete, sərə kwete.»

³⁷Ma ke mbeli nyi ketəkwə təkwə 'yɛwete ve: «Tema temene geva wəshia shɛhɛ wa Nde sleke ŋkwa?» Ma ke zhɛnete: «Te ŋkwa nya nza wəsə kwa mte mte tsene geva yɛ zleŋa.»