Read kapsiki Ləwke 21 Bible Online

Ləwke 21 - kapsiki bible

Ləwke 21

¹Newe ke Yɛsə ne, kabete cɛdɛ ka mcɛləa kɛfi kadzawa wəsə kebete nda wəshi ke Shala.

²Pa ŋkɛ nakɛ kwete male wede kakwa titikwə kabete dala dala bake kadzawa wəsəa shɛ.

³Ma ke Yɛsə: «Kaganda ne, ma 'ya sha gheyɛ: kwele ma beteyi wəsə wede kwa titikwə nya kwa ke pɛtɛa kweci mbeli.

⁴Kwa nza ŋkɛ ma cɛdɛ nya beteyi kweci mbeli kwa ne, nya ketene yitea slene ta nci. Ama ghenta mbe titikwəa nta ne, pɛtɛ beteyi nde kwa, pa ta ŋkɛ nyagha ve kaŋa wəsə kezeme ta nta.»

⁵Pa kweci mbeli slate ghena te ghɛa Shala ba'a gezete ganyɛke ŋkɛ le pelɛ nyi ŋate mbeli le hɛ ba'a wəshi nyi fə nda mbeli ke Shala. Ama ma ke Yɛsə gezete:

⁶«Te kwete hɛ ne, kanza pelɛ nyi newe nyi yɛ te kwete mbelia nci we, pɛtɛ teŋzla hɛ.»

⁷Ma ke kweci sha Yɛsə: «Nde sleke n'yɛ, hweŋkwa tese wəsə nya kala nya wa? Wa wəsə nya kencɛ katemene geva ŋkɛ wa?»

⁸Ma ke Yɛsə: «Ntsehwele mə yagha wəndə teghwete ŋayɛ. Kwa nza ŋkɛ kwele kwele tese kweci mbeli te sləa ɗa, ma ke sha tegeze: 'Ya ya kaMɛsi, ba'a ne: Nahe və kese. Ama zelema hɛ yɛ ma.

⁹Katefa gaka ta mpa nyi dekwe dekwe keɗema nyi cakeɗa cakeɗa. Ghazlənəma yɛ ma: nda wəshia shɛhɛ kamenete geva kaba, ama kenaka kiɗi ta hɛɗi we.»

¹⁰Ma ke sha hɛ ɓiyitsa: «Katempa kwete hwelefe le kwete, kateha nda mpa kwete hɛɗi meghe le kwete.

¹¹Kategaŋkəɗə geva hɛɗi te kweci ŋkwa keghə keghə. Te kweci hɛɗi ne, katemene geva ma ba'a damara. Katemene geva kweci wəshi nyi keghazlənə ŋkwa ba'a wəshi kencɛ wəshi nyi jama jama dzeyi te ghweme.

¹²Ama nda temene geva wəshi nyi kala nyi ne, katekese ŋayɛ mbeli, kateghweze mɛ mbeli hwa gheyɛ. Katekese nda ŋayɛ mbeli ke mbeli mbe yɛ cɛ kesəkwə ghə kezha meha ghwə te gheyɛ, katefə ŋayɛ mbeli kadzawa daŋgayɛ, katekele ŋayɛ mbeli kadzawa kema ta ka meghea kɛfi ba'a ka ŋgwamna tewəmbəreke 'ya.

¹³Tagha gɛ, hweŋkwa nde tenza va gheyɛ kanegha fete te 'ya kwa kema ta mbeli.

¹⁴Ɗepe mə tiɗiɗi, zəzəma ghena nya tegeze yɛ kwa kema ta mbeli yɛ ma.

¹⁵'Ya le ghəa ɗa nde teve ŋayɛ ghena kwa mɛa ŋayɛ ba'a ntsehwele mbe ghəa ŋayɛ. Katepesle kwete wəndəa ka jaga ta ŋayɛ yitea gheyɛ we.

¹⁶Katepamte ŋayɛ mbeli nyi keyake ŋayɛ, ka kesaka meyɛ ŋayɛ, ka menəhɛ ŋayɛ ba'a ka mcɛhɛ ŋayɛ. Kateve nda fete kemte hɛ ke kweci mbelia ŋayɛ kwele kwele.

¹⁷Katezlɛ mbeli pɛtɛ va gheyɛ tewəmbəreke 'ya.

¹⁸Ama kateza ya shinti kwetɛŋe mbe ghəa ŋayɛ we.

¹⁹Ma kehwepete ghə yɛ ne, katekemave mpi yɛ.

²⁰Ma vəa ŋkwa nya tenewe Zhɛrəzalɛm yɛ ntəslə kwa ka sewajɛ ne, wərə yɛ kaɗepe nahe və keŋzla ta ŋkɛ kese.

²¹Vəa ŋkwa shɛ ne, katehwɛ mbeli nyi mbe Zhəwdɛ kadzeme hwa ghweme. Kateslə nyi mbe Zhɛrəzalɛm le ghɛ shave mbe. Ma nyi kwamte hwa gamba ne, katese kadzembe melemea shɛ.

²²Kwa nza ŋkɛ te vecia shɛ tewa dewa Shala, katemene geva wəshi nyi pɛtɛ kala nyi kerafete geva.

²³Te veci shɛ ne, yaka nde tenza te mi nyi le hwə ba'a nyi nza ŋwale te ŋ'wa va hɛ. Va nya nza ŋkɛ kwele kwele tesa yaka mbeli nyi te hɛɗia shɛ, kwele kwele tehwepe wənəa Shala va mbelia shɛhɛ.

²⁴Katempə hɛ ka jaga ta nci le kafayɛ, katekese hɛ mbeli kaka mavashi kalə kadzete kweci hɛɗi. Kateŋkeɗe Zhɛrəzalɛm kweci hwelefefi hwa'a te və nya tekiɗi zlɛa nci.

²⁵Katencɛ geva wəshi nyi kencɛ wəsə te veci, te tere ba'a yɛ saseregwa. Kwetɛ kwetɛŋe tenza mehele ta mbeli nyi te hɛɗi, keyirə yirə tenza hɛ va gaka ta ndərə ba'a yɛ gaŋkeɓe ta ŋkɛ.

²⁶Katempə mbeli va ghazlənə va zəzə ndiremi nya ketemene geva te hɛɗi. Kwa nza ŋkɛ kategaŋkəɗə berete nyi pelɛ ghweme.

²⁷Tagha gɛ, katenewe Wəzege ta za mbeli kasawa te ləmbə le pɛtɛa berete ta ŋkɛ ba'a pɛtɛa zləvəa ŋkɛ.

²⁸Ma vəa ŋkwa nya teghate mene geva wəshia shɛhɛ ne, kafete mə ghəa ŋayɛ, hwepe mə ghə, va nya nza ŋkɛ takwa takwa mbele ta ŋayɛ kase.»

²⁹Ma ke Yɛsə sha hɛ le ghena keyipə pa: «Newe ma mə yɛ dasekwa ba'a kweci wəfe pɛtɛ.

³⁰Ma vəa ŋkwa nya nakɛ slekea nci yɛ kaɗa ne, nahe yɛ keɗepe takwa takwa cimə.

³¹Tsagha shɛ, ma vəa ŋkwa nya tenakɛ wəshi nyi kala nyi yɛ kamene geva ne, ɗepete mə takwa takwa Meghea Shala.

³²Kaganda ne, ma 'ya sha gheyɛ: katempə pɛtɛa mbeli nyi teghweme nyi teke tsetsenya nda tese ŋkɛ we.

³³Kateza yɛ ghweme le hɛɗi, ama kateza ghena ta ɗa tɛape we.

³⁴Ya mə ghəa ŋayɛ yagha mehele ta ŋayɛ tebeze va ɓerawe, ghwəyi ba'a yɛ yirə ta ghena ta nza ba'a yagha vəa shɛ kase vəkə sha gheyɛ,

³⁵kala bararawe. Kwa nza ŋkɛ kala bararawe tekese pɛtɛa mbeli nyi te hɛɗi lema ŋkɛ.

³⁶Nza mə le ntsə, səkwə mə ghə keveci keveci. Tagha gɛ, katenza berete va gheyɛ kasəwə wəsə nya ketemene geva ba'a kaghereŋe kwa kema Wəzege ta za.»

³⁷Ma heveci ne, kateke nda wəshi Yɛsə ke mbeli mbe ghɛa Shala. Ma heviɗi ne, kalə ŋkɛ kasəkwə ghə pelɛ ghweme ta yɛ Bekele.

³⁸Masheke masheke ne, pɛtɛ mbeli kase kadzembe ghɛa Shala kezha fa ghena ta ŋkɛ.