Read kapsiki Ləwke 5 Bible Online

Ləwke 5 - kapsiki bible

Ləwke 5

¹Te kwete veci, kwa nza Yɛsə mɛa ndərəa Zhɛnɛzarɛt ne, kwele kwele mbeli nyi kedzaslete ŋkɛ yitea fa ghena ta Shala.

²Pa Yɛsə nakɛ kwambelə bake vare hələbə, nahe ka kese kelepe kesawanji kwa hɛ kayaɓe bararawea nci.

³Tarame Yɛsə pelɛ ŋa Simon, ma ke shɛ: «Hendemte geva ɓɛhwɛ seyi vare hələbə.» Pa ŋkɛ ntishɛnyɛ kwa kwambelə, ntake ŋkɛ kateke nda wəshi ke mbeli.

⁴Ma kwa nahe ghena ta ŋkɛ ne, ma ke sha Simon: «Hendakɛ kwambelə kadzete ŋkwəɗə, neghate mə bararawea ŋayɛ kezha kese kelepe.»

⁵Ma ke Simon shɛ: «Wəndə kwele, kwa ndərə hɛ ghen'yɛ kakese kelepe, shaŋe ghen'yɛ ve ya kwetɛŋe. Ama kwa nza nde gha nde geze ɗa ne, katenegha 'ya.»

⁶Ma kwa negheyi hɛ kwa ne, kwele kwele keseve kelepe hɛ, mbe ŋkwahe bararawea nci.

⁷Pa hɛ ɓakakɛ kweci mbelia nci nyi kwa kwete kwambelə le dzeve kezha se hɛ kakemane hɛ. Pɛkwe hɛ, bake pɛtɛ hɛ pɛrekɛ kwambelə le kelepe, weli kendahwe kwambelə yɛmə va kwelea kelepe nyi kwa.

⁸Ma kwa nakɛ Simon Piyɛre, te ŋkwa shɛnyɛ gwəɗəŋə ŋkɛ yitea hwəa Yɛsə. Ma ke shɛ: «Hendemte geva vare 'ya Nde sleke ŋkwa, kwa nza ŋkɛ nde jaɗafa 'ya.»

⁹Heɓake Simon, ntake ŋkɛ kabare bare zlaɓe le mbeli nyi nza ŋkɛ le hɛ, va kwelea kelepe nyi keseve hɛ.

¹⁰Tsagha shɛ mbeli nyi kemene slene le Simon, yɛ Zhake le Zhaŋe, ŋwalea Zɛbɛdɛ. Ma ke Yɛsə sha Simon: «Ghazlənəma na ma. Se mɛa ɓeshi ne, mbeli yatekese.»

¹¹Ma kwa keleke kwambeləa nci hɛ kadzevare hələbə ne, pa hɛ zlenekɛ pɛtɛa wəshia nci, pa hɛ təkwə təkwəte Yɛsə.

¹²Kwa nza Yɛsə mbe kwete hwa melemea shɛhɛ ne, hwa'a kwete wəndə bətə mbe derena. Ma kwa nakɛ Yɛsə ŋkɛ ne, gwəɗəŋə ŋkɛ ntiŋə ghə mbe hɛɗi, ma ke mpiyi nda dzeve: «Nde sleke ŋkwa, ma keɗe na ne, wərə na kakiɗimte ɗa derena ta ɗa wɛŋe.»

¹³Pa Yɛsə hake dzeve ba'a kwaɗakɛ ŋkɛ. Ma ke shɛ: «Kaɗe 'ya, nza wɛŋe.» Taghanyɛ ne, pa derena kiɗinyɛ te wəndəa shɛ.

¹⁴Ma ke Yɛsə shɛ: «Fa ndeɗekə, geze nda ma na ghena nya ke kwete wəndə ma. Ama kwiɗi ncɛte nda ghəa ŋa ke nde dzeghe Shala, dzeghekɛ melɛ kala nya gezete Moyize kezha ncɛ nda ke mbeli pɛtɛ nahe na kembe.»

¹⁵Kwele ma geze ghena mbeli te Yɛsə zhɛkwa ke nya kaghate, kwele kwele tseneke geva mbeli kezha fa ghena ta ŋkɛ ba'a kezha mbe ghəa nci va yɛ zereghwe ta nci.

¹⁶Ama pa Yɛsə slənyɛ kalə te kwete ŋkwa kwetɛŋenyɛ kezha səkwə ghə.

¹⁷Ma te kwete hɛ, ntake Yɛsə kateke nda wəshi ke mbeli. Tagha kweci ka Fariziyɛn ba'a ka teke nda wəshi mahalegə ke mbeli. Se mbe pɛtɛa meleme nyi ɓɛhwɛ ɓɛhwɛ dzeyi yitea Galilɛ ba'a Zhəwdɛ se hɛ, tsagha Zhɛrəzalɛm perə. Nahe berete ta Mahwətə kenza le Yɛsə kezha mbe mbeli.

¹⁸Pa kweci mbeli keleke kwete nde mte mtea geva te gezle ta ŋkɛ. Ntake hɛ kazele hweŋkwa kedzeki ghɛ kezha ve ŋkɛ kwa kema ta Yɛsə.

¹⁹Ama ŋkwa shɛ kezha kele ŋkɛ kadzeki va wəba ta mbeli we. Pa hɛ dzemenji pelɛ dɛɓere nya kənəa ghɛ, ŋate ŋkwa te ba'a keleghe ŋkɛ kadzawa te tepe ta mbeli kadzawa kema ta Yɛsə.

²⁰Ma kwa nakɛ Yɛsə nahe mbelia shɛhɛ keyɛte ghena ta ŋkɛ ne, ma ke sha wəndə nya shewə: «Mcɛ ɗa, nahe jaɗafa ta ŋa kekelemte geva te wənə.»

²¹Ma ke ka rafe wəsə mahalegə ba'a ka Fariziyɛn zəzəte: «Wa sləa nya wəndə nya keŋele Shala nya wa? Wa nde nza kakelemte jaɗafa te wənə, keɗema deke Shala wa?»

²²Nahe Yɛsə keɗepe wəsə nya zəzə hɛ, ma ke sha hɛ: «Wa raberə nda nza zəzə nya kala nya mbe ghəa ŋayɛ wa?

²³Wa ya dekwede ma wa? Geze: Nahe jaɗafa ta ŋa kekelemte geva te wənə na, na, geze: Sate te ŋkwa ba'a dzeghwa na?

²⁴Ama kaɗe 'ya kaɗepe yɛ berete ya va Wəzege ta za kezha kelemte jaɗafa ta mbeli te wənə kwake te hɛɗi.» Ma ke sha nde mte mtea geva: «Sate ŋa, kelete gezle ta ŋa, kwiɗi sha ghɛa ŋa.»

²⁵Te ŋkwa shɛnyɛ, pelɛhetɛme wəndəa shɛ kwa kema ta mbeli pɛtɛ, laŋe ŋkɛ sha gezle nya se ŋkɛ te meɓelahe, cape ŋkɛ kalə sha ghɛa ŋkɛ. Ma kalə ŋkɛ ne, kageze zləvəa Shala ŋkɛ.

²⁶Benake mbeli pɛtɛ va ghazlənə. Katsahe Shala hɛ, kabare bare hɛ. Ma ke hɛ: «Nahe gheɓəmə kenakɛ wəshi meŋele ɓeshi.»

²⁷Ma kwetere wəmbəa ŋkɛ, cape Yɛsə shavenyɛ, dəkwə ŋkɛ te kwete nde tsehe jaɓeregwale nya nza sləa ŋkɛ kaLɛvi, mentishɛ te ŋkwa ketsehe jaɓeregwale. Ma ke shɛ: «Təkwə təkwə ɗa.»

²⁸Pelɛhetɛme Lɛvi, pa zlenekɛ pɛtɛa wəshia ŋkɛ ba'a təkwə təkwəte ŋkɛ.

²⁹Pa Lɛvi takɛ nda wəshi kezeme kwele kwele ki ghɛa ŋkɛ, kwele kwele ka tsehe jaɓeregwale ba'a kweci mbeli kazeme ɗafa le hɛ.

³⁰Ntake ka Fariziyɛn ba'a ka rafe wəsə mahalegə kandəghwə ndəghwə. Ma ke hɛ sha mbeli nyi ketəkwə təkwə Yɛsə: «Wa raberə zeme wəsə kezeme yɛ ba'a sa wəsə kesa yɛ le ka tsehe jaɓeregwale ba'a kweci ka jaɗafa wa?»

³¹Ma ke Yɛsə zhɛnete nda ke hɛ: «Wa tsewe va mbeli nyi lɛŋe lɛŋe le dakwəterə wa? Nda mbeli nyi shewə ka ɗe dakwəterə.

³²Kese 'ya kaheka mbeli nyi tiɗiɗi we, ama nyi kaka jaɗafa kezha zhɛre nza ta nci hɛ.»

³³Ma ke hɛ sha Yɛsə: «Keveci keveci mene səwəmayɛ mbeli nyi ketəkwə təkwə Zhaŋe ba'a səkwə ghə hɛ, kala nya mene mbeli nyi ketəkwə təkwə ka Fariziyɛn. Ama ka təkwə təkwə ŋa ne, kazeme wəshi kezeme hɛ ba'a kasa wəshi kesa hɛ.»

³⁴Ma ke Yɛsə sha hɛ: «Kashɛ mbeli nyi hekakɛ mbeli yitea veghe ɗema zeme ɗafa tagha za makwa hwa hɛ na?

³⁵Ama katese kwete və nya tekelehwe za makwa mbeli va hɛ, te vecia shɛ temene səwəmayɛ hɛ.»

³⁶Ma ke Yɛsə gezete nda ghena keyipə pa ke hɛ zhɛkwa: «Wəndə shɛ kakele lekwesa nya kamɛnɛfɛ kezha ntsəzlə te nya kameha we. Kateŋkwahe lekwesa shɛ ŋkɛ, va nya ɗema lekwesa mɛnɛfɛ kajikəte geva le nya kameha.

³⁷Wəndə shɛ ka'yɛ tɛ kwa ghɛni kadzawa slibə hweta nya kameha we. Ma kemenete mbeli tsagha ne, katewətətsə slibəa shɛ ŋkɛ. Katesheke tɛ mɛnɛfɛ kadzete hɛɗi ba'a bətə tenza slibəa shɛ.

³⁸Ama slibə mɛnɛfɛ yaɗe mbeli kezha 'yɛ tɛ kwa ghɛni kadzawa.

³⁹Wəndə shɛ kaɗe tɛ kwa ghɛni kwa se ta nya sahwe tɛ kwa msle msle ŋkɛ we. Kwa nza ŋkɛ ma ke mbeli sha geze: Megela ma tɛ kwa msle msle.»