Read kapsiki Ləwke 7 Bible Online

Ləwke 7 - kapsiki bible

Ləwke 7

¹Ma kwa kiɗimte geze nda ghena Yɛsə ke mbeli ne, cape ŋkɛ kadzawa Kapɛrnawəm.

²Kwagha ne, kwete wəndə nya te ghəa ka sewajɛa ka Rome ya shɛ. Shewə kwete mava ta ŋkɛ kwele kwele cɛame cɛame yɛmə. Kwele kwele ɗe mava ta ŋkɛa shɛ ŋkɛ.

³Ma kwa fave ghena nya geze mbeli te Yɛsə ŋkɛ ne, pa ghweneghe mbelia jama ta ka Zhəwif kezha 'yɛwe va Yɛsə kase ŋkɛ kambe nde mene ta ŋkɛ.

⁴Pɛkwe hɛ sha Yɛsə, pa hɛ mpiyi nda dzeve, ma ke hɛ shɛ: «Ma wəndəa shɛ ne, tserame kekemanakɛ ŋkɛ na.

⁵Kaɗe hwelefe ta ɓəmə ŋkɛ, gheŋkɛ nde ŋate n'yɛ cɛ kesəkwə ghə.»

⁶Ntəŋə Yɛsə le hɛ. Ma takwa takwa hɛ yitea ghɛa shɛ ne, pa wəndəa shɛ ghweneghe ka mcɛhɛnyɛ, ma ke hɛ shɛ: «Nde sleke ŋkwa, leɓema ghəa ŋa na ma. Kehi 'ya kawəndə nya dzeki ghɛa ŋkɛ na we.

⁷Va nya nza ŋkɛ kehi 'ya kalə sha gha we. Ɗama ta ŋa kegezete ghena ne, katembe nde mene slene ta ɗa shɛ.

⁸'Ya le ghəa ɗa ne, kafa nda ghena 'ya ke mbelia jama nyi kənəa 'ya, ka sewajɛ nyi kefa ɗa ghena ya va perə: Kwiɗi, 'ya sha kwete, ntəŋə ŋkɛ. Nde, 'ya sha kwete, kase ŋkɛ. Menete nya, 'ya sha mava ta ɗa, kamene wəsəa shɛ ŋkɛ.»

⁹Ma kwa fate ghena shɛ Yɛsə, hake ŋkɛ. Tewətelɛwe ŋkɛ sha geva laka mbeli nyi kezele kwele kwele, ma ke: «Kaganda ne, ma 'ya sha gheyɛ: kegha 'ya kanakɛ yɛ nya kala nya ya hwa ka Israyɛl we.»

¹⁰Ma kwa zhɛneke geva mbeli nyi ghwenakɛ wəndə nya te ghəa ka sewajɛa shɛ kase sha mava shɛ ne, nahe ŋkɛ kenza bazhaŋe.

¹¹Kwetere wəmbəa ŋkɛ, cape Yɛsə kalə kadzembe kwete meleme nya nza sləa ŋkɛ kaNayin, mbeli nyi ketəkwə təkwə ba'a kweci mbeli kwele kwele ka begheghe ŋkɛ.

¹²Ma vəa ŋkwa nya nza ŋkɛ takwa takwa kadzembe meleme ne, kakele kwete wəndə kemte mte mbeli kadzeme kwele, nahe ŋkɛ kenza kawəzege kwetɛa kwete male wede. Kwele kwele mbeli nyi mbe melemea shɛ kwa sebe ta malea shɛ.

¹³Ma kwa nakɛ malea shɛ Nde sleke ŋkwa ne, kwele kwele zhɛte nda helia ŋkɛ yite. Ma ke shɛ: «Nehwenema na ma.»

¹⁴Pa ŋkɛ hendeke geva ba'a pa kwaɗakɛ ghamca, ghereŋe mbeli nyi kekele wəndə kemte mte. Ma ke Yɛsə: «Megela ganyɛ, 'ya nde geze ŋa, feɗeghe ŋa!»

¹⁵Tagha gɛ, pa wəndə kemte mtea shɛ ntishɛ, ntake ŋkɛ kageze ghena. Pa Yɛsə zhɛnave nda ŋkɛ ke meghekɛ.

¹⁶Benake mbeli pɛtɛ, ntake hɛ katsahe Shala, ma ke hɛ: «Nahe nde mɛ ŋkwa ta Shala nya wəba kenca hwa gheɓəmə ɓeshi. Nahe Shala kese kakemane mbelia ŋkɛ.»

¹⁷Ntake mbeli kageze wəsə nya menete Yɛsə mbe pɛtɛa Zhəwdɛ ba'a kweci meleme nyi dzeyi yite.

¹⁸Pa mbeli nyi ketəkwə təkwə Zhaŋe gezete nda pɛtɛa wəshi nyi kemenete geva. Pa Zhaŋe hekakɛ kweci mbelia nci bake

¹⁹ba'a ghweneghe hɛ kalə sha Nde sleke ŋkwa, ma ke hɛ 'yɛwete ve: «Gha ya kawəndə nya neghe se ta ŋkɛ n'yɛ na, na, kwete wəndə yaneghe n'yɛ na?»

²⁰Ma kwa se hɛ sha Yɛsə ne, ma ke hɛ shɛ: «Zhaŋe Batiste nde ghweneke n'yɛ, ma ke sha gha: Gha wəndə nya neghe se ta ŋkɛ n'yɛ na, na, kwete wəndə tekeleke na?»

²¹Ma taghanyɛ hɛ ne, kwele kwele Yɛsə mbete mbeli va zereghwe ta nci, va wəshi nyi kezhɛ nda ke hɛ ba'a va yɛ 'yi'yɛghwə, pa pelemte nda ntsə ta ka ghwələa kɛfi kwele kwele.

²²Ma ke zhɛnete nda ke mbeli nyi ghwenakɛ Zhaŋe: «Kwiɗi mə kalə kageze nda wəshi nyi nakɛ yɛ ba'a nyi fate yɛ ke Zhaŋe: kanewe ŋkwa ka ghwələa kɛfi, kadzeghwa ka gwadare tiɗiɗi, kembe mbe ka derena, kafa ghena ka mədəŋəa kɛfi, kasame mbeli nyi kempə mpə kwa kwele, kazlape nda Ghena kwatenca nya ganyɛ mbeli ke ka titikwəa kɛfi.

²³Zlama ya va wəndə nya keɗema kateteɗe tewəmbəreke 'ya Shala.»

²⁴Ma kwa slənji mbeli nyi ketəkwə təkwə Zhaŋe, ntake Yɛsə kageze nda ghena te ghəa Zhaŋe ke mbeli nyi tagha. Ma ke: «Wa yase yɛ kwamte te ɓerama kanewe wa? Bəremə nya kegaŋkəɗə va sefə na?

²⁵Wa yase yɛ kanewe tsagha wa? Wəndə nya keseɗete lekwesa ganji na? Ama ma mbeli nyi keseɗe lekwesa ganji nyi kaka galɛpi ne, kwa degha ta ka meghea kɛfi nza hɛ wəka?

²⁶Nde mɛ ŋkwa yase yɛ kanewe na? Ma 'ya sha gheyɛ ne, kaganda shɛ ŋkɛ, ama za ma ŋkɛ ke nde mɛ ŋkwa.

²⁷Kwa nza ŋkɛ ma ke Ghena ta Shala gezete te ghəa Zhaŋe: Wa nya 'ya nya kaghwene nde mɛ ŋkwa ta ɗa te kema ta ŋa kezha hi ŋa hweŋkwa.»

²⁸Ma ke Yɛsə mtsehete: «Ma 'ya sha gheyɛ: wəndə shɛ keyake geva hwa male kwele ma ke Zhaŋe Batiste we. Ndagwara kwele ma wəndə nya ɓɛhwɛ mbe Meghea Shala ke Zhaŋe.

²⁹Pa pɛtɛ mbeli ba'a ka tsehe jaɓeregwale fate ghena ta Zhaŋe. Nahe hɛ keɗepete tiɗiɗi Shala, vatse 'yɛwe batɛme hɛ va Zhaŋe.

³⁰Ama ka Fariziyɛn ba'a ka rafe wəsə mahalegə ne, nahe hɛ kewəfəyite wəsə nya ɗe Shala kamene nda ke hɛ, hɛreɗɛ hɛ ɗema batɛmea Zhaŋe.»

³¹Ma ke Yɛsə zhɛkwa: «Le wa nza 'ya kayipəte mbeli nyi tsetse ŋkwa tse wa? Wa wəndə nya nza hɛ yipə yipə le tse wa?

³²Yipə yipə hɛ le ŋwale nyi ketsenete geva te ŋkwa shikwə, ma ke kweci sha zlape nda ghena ke kweci mbelia nci: Nahe ghen'yɛ kevɛte ŋayɛ shela, kese yɛ kawetse we. Nahe ghen'yɛ keghate ŋayɛ nehwene, kese yɛ kanehwene we.

³³Kwa nza ŋkɛ nahe Zhaŋe Batiste kese. Kazeme ɗafa ŋkɛ ba'a kasa tɛ ŋkɛ we. Ama ma pe yɛ sha geze: 'Yi'yɛghwə ya yitea ghə ve.

³⁴Nahe Wəzege ta za kese, kazeme wəsə kezeme ba'a kasa wəsə kesa ŋkɛ. Ama ma pe yɛ gezete: Wa nya nde ɓerawe ba'a nde ghwəyi nya kamcɛnyɛa ka tsehe jaɓeregwale ba'a ka jaɗafa nya gɛ!

³⁵Ama nahe ntsehwele ta Shala kenza tiɗiɗi sha mbeli nyi keyɛ ŋkɛ pɛtɛ.»

³⁶Pa kwete nde Fariziyɛn hekakɛ Yɛsə yitea zeme wəsə ki ghɛa ŋkɛ. Cape Yɛsə kalə shɛ, ntake ŋkɛ kazeme wəsə kezeme.

³⁷Pɛkwe kwete male se mbe meleme, male mefətekwə nde. Nahe nde kefave ki ghɛa nde Fariziyɛn Yɛsə kazeme ɗafa. Pa nde keleke tereme viɗi 'wərdə te.

³⁸Gwəɗəŋə nde yitea seɗa ta Yɛsə. Ntake nde kanehwene sərəɓə sərəɓə ba'a kaɓasle seɗa ta ŋkɛ le nehwene. Kwa sebe ta ŋkɛ, kasehwe hɛ nde le shintia ghəa nta, kahəməwə hɛ nde ba'a kasheke 'wərdə nde te hɛ.

³⁹Ma kwa nakɛ wəsəa shɛ nde Fariziyɛn nya kehekakɛ Yɛsə ne, ma ke mbe ghəa ŋkɛ: «Ma ya nde mɛ ŋkwa wəndə nya kaganda ne, nza wərə ŋkɛ kaɗepete male nya kekwaɗe ŋkɛ nya tsetsenya kakwa jaɗafa.»

⁴⁰Ma ke Yɛsə sha nde Fariziyɛn shɛ: «Simon, kwete ghena ya shɛ va 'ya kageze ŋa.» Ma ke Simon: «Geze gi, nde sleke ɗa.»

⁴¹Ma ke Yɛsə shɛ: «Pa kwete wəndə nzəɓəave nda cɛdɛ ke kweci mbeli bake. Slibə mcɛfemsə ya va kwete, slibə mcɛfe ŋa kwete.

⁴²Ma kwa ɗema wəsə va hɛ kezha ŋki nda ne, pa zhɛakɛ heli yitea hɛ bakea nci. Nyama wəndə hwa mbeli nyi bake nyi nde teɗe ŋkɛ za ma wa?»

⁴³Ma ke Simon shɛ: «Ma zəzə 'ya ne, za ma wəndə nya sərəakɛ nda dewa ta ŋkɛ nya kwele ŋkɛ.» Ma ke Yɛsə shɛ: «Kaganda ya va gha.»

⁴⁴Pa Yɛsə zhɛrete geva laka malea shɛ, ma ke sha Simon: «Kanewe male nya na na? Nahe 'ya kesəaki ghɛa ŋa, ama kegəate ɗa yɛmə na te seɗa ta ɗa we, ama ghenta ne, nahe nde kepɛkɛ ɗa seɗa ta ɗa le nehwene ta nta ba'a kesehwemte hɛ le shintia ghəa nta.

⁴⁵Kehəməwəve ɗa na we, ama ghenta, ghala səaki nde ne, kefɛa nde yitea həməwə seɗa ta ɗa we.

⁴⁶Keshekeyi ɗa n'yi na mbe ghəa ɗa we, ama ghenta ne, nahe nde keshekeyi 'wərdə te seɗa ta ɗa.

⁴⁷Vatse gɛ, ma 'ya sha gha: nahe ɗe nya wəba nya ncɛte nya nde kencɛte nahe jaɗafa ta nta nyi kwele kwele kekelemte geva te wənə. Ama wəndə nya kelemte nda ghena mbeli ɓɛhwɛ te wənə ne, ɓɛhwɛ ncɛ ɗe ŋkɛ.»

⁴⁸Ma ke Yɛsə sha malea shɛ: «Nahe yɛ jaɗafa ta ŋa kekelemte geva te wənə.»

⁴⁹Ma ke mbeli nyi kezeme ɗafa le Yɛsə kwelɛ ghəa nci: «Wa sləa nya wəndə nya kekelemte nya pa le jaɗafa te wənə wa?»

⁵⁰Ama ma ke Yɛsə sha malea shɛ: «Yɛ ta ŋa nde mbelete ŋa. Kwiɗi kwelɛŋe.»