Read kapsiki Ləwke 9 Bible Online

Ləwke 9 - kapsiki bible

Ləwke 9

¹Pa Yɛsə tsenete mbeli nyi ketəkwə təkwə meŋe bakeghəmbe. Pa ŋkɛ ndeke nda berete ke hɛ kezha ŋka 'yi'yɛghwə shave mbe mbeli ba'a kezha mbe ka zereghwe.

²Pa ŋkɛ zhɛne kaghwenakɛ hɛ kalə kazlape nda ghena ta Meghea Shala ke mbeli ba'a kambe ka zereghwe.

³Ma ke sha hɛ: «Mba yɛ kekele kwete wəsə yitea dzeghwa shɛ, ya geta, ya slibə, ya ɗafa, ya cɛdɛ. Mba yɛ kekele lekwesa bake.

⁴Te yayata ŋkwa nya kemaneve ŋayɛ mbeli, te ŋkwa shɛ nza yɛ hwa'a te və nya teslə yɛ kadzete kwete ŋkwa.

⁵Ma te yayata ŋkwa nya ɗema mbeli kekemaneve ŋayɛ, slə ŋayɛ mə mbe melemea shɛ, bekwemte mə keləwə nya te seɗa ta ŋayɛ, gheŋkɛ nde tencɛ nda fete ta nci ke hɛ.»

⁶Cape mbeli nyi ketəkwə təkwə. Kadzeghwa hɛ kemeleme kemeleme, kageze nda Ghena kwatenca nya ganyɛ hɛ ke mbeli, kambe ŋkwa hɛ va zereghwe te yayata ŋkwa.

⁷Pa Hɛrode nde ŋgwamna fave ghena ta wəshi nyi kemenete geva pɛtɛ. Benake ŋkɛ, kwa nza ŋkɛ ma kweci mbeli: «Nahe Zhaŋe Batiste kesame kwa kwele le mpi.»

⁸Ma ke kweci: «Nahe Ɛli kencake geva.» Ma ke kweci zhɛkwa: «Kwete nde mɛ ŋkwa nya vəashi nde same kwa kwele le mpi.»

⁹Ama ma ke Hɛrode: «Nahe 'ya keslamte ghə te Zhaŋe, wa sləa nya wəndə nya fa nya 'ya kageze ghena ta ŋkɛ mbeli ɓiyitsa wa?» Ntake ŋkɛ kazele hweŋkwa kenewe Yɛsə.

¹⁰Pa ka ghwene ta Yɛsə Kriste zhɛneke geva kase shɛ ba'a gezete nda pɛtɛa wəshi nyi menete hɛ. Pa ŋkɛ keleghe hɛ kaghəa nci kalə laka kwete meleme nya nza sləa ŋkɛ kaBɛtesayida.

¹¹Ama nahe mbeli kefate ŋkwa nya nza ŋkɛ te, pa hɛ təkwə təkwə ŋkɛ. Pa Yɛsə kemaneve hɛ, pa gezete nda ghena ta Meghea Shala ke hɛ, pa mbete mbeli nyi keɗe mbe.

¹²Ma katepəkwə veci ne, pa mbeli nyi meŋe bakeghəmbe se sha Yɛsə. Ma ke hɛ: «Geze nda ke mbeli nyi yitea lə hɛ kasepa wəshi kezeme ba'a ŋkwa kehɛ mbe meleme nyi jama jama ba'a nyi ɓɛhwɛ ɓɛhwɛ nyi dekwede, kwa nza ŋkɛ hwa gamba mə teke.»

¹³Ma ke Yɛsə sha hɛ: «Ɗave nda mə wəshi kezeme ke hɛ le ghəa ŋayɛ.» Ma ke hɛ shɛ: «Deke 'yɛmbe dəghwəa ɗafa mcɛfe ba'a kelepe bake ya va ghen'yɛ. Na, gha ɗe kalə ghen'yɛ kapa wəshi kezeme kezha mbeli nyi pɛtɛ na?»

¹⁴Kwa nza ŋkɛ ma mbeli nyi te ŋkwa shɛ ne, gare slibə mcɛfe nza zhili. Ma ke Yɛsə sha mbeli nyi ketəkwə təkwə: «Geze nda mə ke hɛ kezha ntishɛnji hɛ kewəvəsə kewəvəsə gare mcɛfemsə mcɛfemsə.»

¹⁵Pa mbeli nyi ketəkwə təkwə yɛte ba'a geze nda ke hɛ kantishɛ.

¹⁶Pa Yɛsə kelete 'yɛmbe dəghwəa ɗafa nyi mcɛfe ba'a kelepe nyi bake. Pa ŋkɛ kafete kema yitea ghweme, tsate nda ŋ'wese ke Shala, neheve ɗafa shɛhɛ mbe ba'a ndeke nda ke mbeli nyi ketəkwə təkwə kezha nehe nda ke mbeli.

¹⁷Pa yayata wəndə zehwe behe. Pa mbeli pɛrekɛ kwaciga meŋe bakeghəmbe le kwetiɓəa ɗafa nyi ketene.

¹⁸Te kwete veci ne, ntake ŋkɛ kasəkwə ghə Yɛsə te ŋa ŋkɛ ŋkwa. Tagha mbeli nyi ketəkwə təkwə. Ma ke Yɛsə sha hɛ: «Wa ŋkɛ 'ya ke mbeli sha geze tse wa?»

¹⁹Ma ke hɛ shɛ: «Zhaŋe Batiste na, a ke kweci, Ɛli na, a ke kweci, kwete ŋkɛ nde mɛ ŋkwa nya vəashi nya kesame kwa kwele le mpi na, a ke kweci.»

²⁰Ma ke Yɛsə sha hɛ: «Yewə, take yɛ le ŋa ŋayɛ, wa ŋkɛ 'ya pe yɛ wa?» Ma ke Piyɛre shɛ: «Gha ya kaMɛsia Shala.»

²¹Pa Yɛsə meɗekɛ hɛ le berete kezha ɗema hɛ kageze nda ke kwete wəndə.

²²Ma ke mtsehete: «Nda Wəzege ta za kasahwe yaka kwele kwele, katenegha ŋkɛ mbelia jama, mbeli nyi te ghəa ka dzeghe Shala ba'a ka rafe wəshi mahalegə. Katepesle ŋkɛ mbeli, ama te kwa maheke ta hɛ, katesame ŋkɛ kwa kwele le mpi.»

²³Ma ke sha hɛ pɛtɛ: «Ma keɗe wəndə katəkwə təkwə ɗa, zaghəyite ghə ŋkɛ yitea ghəa ŋkɛ, heyite ghə ŋkɛ yitea sheghwə kwa zleŋkwa ta ŋkɛ ba'a təkwə təkwə ɗa ŋkɛ keveci keveci.

²⁴Ma wəndə nya keɗe kambele mpia ŋkɛ le ghəa ŋkɛ, kateza ŋkɛ ŋkɛ. Ama wəndə nya kezamte mpia ŋkɛ tewəmbəreke 'ya, katembele ŋkɛ ŋkɛ.

²⁵Wa yakete wəndə kemave pɛtɛa mcɛlə nyi te hɛɗi lema kezamte ghəa ŋkɛ ŋkɛ keɗema kezamte mpia ŋkɛ ŋkɛ wa?

²⁶Ma yayata wəndə nya zhɛ nda hawe va 'ya ba'a va ghena ta ɗa ne, tsagha tezhɛ nda hawe ke Wəzege ta za ve perə, vəa ŋkwa nya tesawa ŋkɛ mbe zləvəa ŋkɛ ba'a ŋa Yitenyɛ le ka ghwene ta Shala nyi ganji.

²⁷Kaganda ne, ma 'ya sha gheyɛ: katempə kweci hwa mbeli nyi teke nyi kaɗema hɛ kenaka kanakɛ Meghea Shala we.»

²⁸Gare hɛ deghese kwetere wəmbəa ghena shɛ, pa Yɛsə hekate Piyɛre, Zhaŋe ba'a Zhake, cape hɛ kadzeme ghweme kasəkwə ghə.

²⁹Ma vəa ŋkwa nya səkwə ghə Yɛsə ne, pa kema ta ŋkɛ zhɛrete pa, kwacakelɛ pa sha lekwesa ta ŋkɛ.

³⁰Te ŋkwa shɛnyɛ, mbeli ya shɛ bake tagha kageze ghena le Yɛsə: yɛ Moyize le Ɛli,

³¹nyi kencɛke geva mbe zləvə nya kesawa pelɛ ghweme. Ghena yageze hɛ le Yɛsə te mte nya temte ŋkɛ mbe Zhɛrəzalɛm.

³²Ma yɛ Piyɛre hɛ le mbeli nyi nza ŋkɛ le ne, yitea hɛ hɛ. Ma kwa feɗeghe hɛ ne pa hɛ nakɛ Yɛsə mbe zləvəa ŋkɛ le mbeli bake tagha yite.

³³Ma kaslə mbelia shɛhɛ yitea Yɛsə, ma ke Piyɛre shɛ: «Nde sleke ɗa, ndeɗekə nza ta ɓəmə teke. Katemɓe cɛ lekwesa n'yɛ mahekene teke, təhə kaŋa ŋa, təhə kaŋa Moyize, təhə kaŋa Ɛli.» Keɗepe wəsə nya gezete ŋkɛ we.

³⁴Ma mba ŋkɛ kageze ghena ne, pɛkwe kwete ləmbə, pa nde zhiɓəaghe geva kənəa hɛ. Benake mbeli nyi ketəkwə təkwə va ghazlənə kwa zhiɓəaghe geva ləmbəa shɛ kənəa hɛ.

³⁵Shave mbe ləmbəa shɛ, Ma ke hɛ fate kwete ghena: «Nya ya kaWəzege ta ɗa nya ntave 'ya nya. Fa nda mə ghena!»

³⁶Ma kwa sebe ta ghena shɛ ne, tene Yɛsə kwetɛŋenyɛ te ŋkwa shɛ. Tikə tikə mbeli nyi ketəkwə təkwə te ghena shɛ. Ma vəa ŋkwa shɛ ne, kese hɛ geze nda ghena shɛ ke kwete wəndə we.

³⁷Te hendɛ ta ŋkwa kwa sawa hɛ pelɛ ghweme ne, pa mbeli kwele kwele se kabegeme le Yɛsə.

³⁸Ma ke kwete wəndə zlapete hwa mbelia shɛhɛ: «Təhwə təhwə ŋa 'ya Nde sleke ɗa, newakɛ wəzege ta ɗa, kwa nza ŋkɛ wəzege kwetɛa ɗa ŋkɛ.

³⁹Ma kwa keseve 'yi'yɛghwəa shɛ ne, katsa lewela ŋkɛ. 'Yi'yɛghwəa shɛ nde mene nda hwɛfɛ yitea mɛ. Kwele kwele sahwe nda yaka ŋkɛ, tekwazhizhi gweɗakwe ŋkɛ yite.

⁴⁰Pa 'ya səkwəve mbeli nyi ketəkwə təkwə ŋa kezha ŋka 'yi'yɛghwəa shɛ, ama shaŋe hɛ ve.»

⁴¹Ma ke Yɛsə le berete: «Ka ndiremia mehele ba'a ka yɛma ghena, pa te nyama və tenza 'ya hwa gheyɛ wa? Hwa'a te nyama və tesəwə ghena ta ŋayɛ 'ya wa? Ndeke ɗa wəzege ta ŋa shɛ teke.»

⁴²Ma vəa ŋkwa nya hende geva wəzegea shɛ kase ne, pa 'yi'yɛghwəa shɛ neghate te ŋkwa ba'a gagəzəte le berete. Pa Yɛsə ntsehete nda ŋzle ke 'yi'yɛghwəa shɛ, pa mbete wəzegea shɛ ba'a zhɛnave nda ŋkɛ ke yitenyɛ.

⁴³Nahe mbeli pɛtɛ kenza heheɓake va wəba ta berete ta Shala. Ma kwa nza yayata wəndə heɓake va wəsə nya menete Yɛsə ne, ma ke sha mbeli nyi ketəkwə təkwə:

⁴⁴«Ma ghena nya geze ŋayɛ nya 'ya tsetsenya ne, veyite mə yitea ghəa ŋayɛ megela, katepamte nda Wəzege ta za mbeli ke kweci mbeli.»

⁴⁵Ama kefave ghena shɛ hɛ we. Tentikə ŋkɛ kezha ɗema hɛ kaɗepete ghena nya mbe. Kazhɛ nda ghazlənə ke hɛ ke'yɛwe ghena shɛ va Yɛsə.

⁴⁶Ntake mbeli nyi ketəkwə təkwə Yɛsə kaghəpə kwelɛ ghəa nci kezha ɗepe wəndə nya kwele ma.

⁴⁷Nahe Yɛsə keɗepe wəsə nya zəzə hɛ. Tagha gɛ, pa kelete wəzege, pa sleteyi ŋkɛ dzeme vare ghəa ŋkɛ.

⁴⁸Ma ke sha hɛ: «Ma yayata wəndə nya kekemaneve wəzege nya te sləa ɗa ne, 'ya yakemaneve ŋkɛ. Ma wəndə nya kekemaneve ɗa, nahe ŋkɛ kekemaneve wəndə nya keghweneke ɗa. Kwa nza ŋkɛ ma wəndə nya ɓɛhwɛ ma hwa gheyɛ ne, gheŋkɛ ya kwele ma.»

⁴⁹Ma ke Zhaŋe shɛ: «Nde sleke n'yɛ, nahe n'yɛ kenakɛ kwete wəndə nya keŋka 'yi'yɛghwə te sləa ŋa. Kaɗe n'yɛ kafɛa ŋkɛ, va nya ɗema ŋkɛ katəkwə təkwə ŋa le ghen'yɛ.»

⁵⁰Ma ke Yɛsə: «Fɛama ŋkɛ yɛ ma. Kwa nza ŋkɛ ma wəndə nya kempama le gheyɛ ne, kaŋa ŋayɛ ŋkɛ.»

⁵¹Ma kwa hendeke geva və kedzeme ghweme ta Yɛsə ne, pa Yɛsə tarete fate fate kadzeme Zhɛrəzalɛm.

⁵²Pa ŋkɛ ghweneghe ka mɛ ŋkwa kalə te kema ta ŋkɛ. Ntəŋə hɛ, pa hɛ dzembe kwete meleme ta ka Samari kezha hi ŋkwa yitea se ta Yɛsə.

⁵³Ama kaɗe Yɛsə mbeli nyi mbe melemea shɛ we, va nya nza ŋkɛ kadzeme Zhɛrəzalɛm.

⁵⁴Ma kwa fave ghena ta nci yɛ Zhake le Zhaŋe nyi kaka təkwə təkwə ne, ma ke hɛ sha Yɛsə: «Nde sleke ŋkwa, kaɗe na kezha 'yɛwakɛ ghwə ghen'yɛ sawa pelɛ ghweme katere hɛ na?»

⁵⁵Tewətelɛwe Yɛsə zhɛrete geva, pa ŋelete hɛ.

⁵⁶Cape hɛ kalə kadzembe kwete meleme ɓiyitsa.

⁵⁷Ma mbe hɛ kadzeghwa ne, ma ke kwete wəndə sha Yɛsə: «Katetəkwə təkwə ŋa 'ya ya tema tema telə na.»

⁵⁸Ma ke Yɛsə shɛ: «Ghɛa nci ya va yɛ mbeyiga ba'a yɛ 'yɛ hɛ, ama Wəzege ta za ne, ghwəli shɛ ve gare zhɛne mpi ŋkɛ mbe we.»

⁵⁹Ma ke Yɛsə sha kwete wəndə: «Təkwə təkwə ɗa.» Ma ke wəndəa shɛ: «Pelave ɗa hweŋkwa kezha lə 'ya kalamte yiteyɛ ɗa kaba.»

⁶⁰Ma ke Yɛsə shɛ: «Sərəakɛ ka mpə mpə kala ka mpə mpəa nci. Ma gha ne, kwiɗi kazlape ghena ta Meghea Shala.»

⁶¹Ma ke kwete wəndə zhɛkwa: «Katetəkwə təkwə ŋa 'ya Nde sleke ŋkwa, ama pelave ɗa hweŋkwa kalə 'ya njiŋwakɛ mbelia ɗa kaba.»

⁶²Ma ke Yɛsə shɛ: «Ma wəndə nya kekeseve leghe nda zhɛrete geva ŋkɛ kanewe ŋkwa nya kwetere wəmbəa ŋkɛ ne, kehite geva ŋkɛ kezha Meghea Shala we.»