Read kapsiki Zhɛne Ghwelə yitea Wəshi Mahalegə 1 Bible Online

Zhɛne Ghwelə yitea Wəshi Mahalegə 1 - kapsiki bible

Zhɛne Ghwelə yitea Wəshi Mahalegə 1

¹Ma palepa nya ne, ghena nyi gezete nda Moyize ke pɛtɛa ka Israyɛl, vəa ŋkwa nya nza hɛ mba laka ŋkwa kesame ta veci yitea ŋwela ta Zhəwrdɛŋe, te ɓerama, mbe kema ta Səwf, kwelɛ yɛ Paran le Tofɛl, Laban, Hasɛrot ba'a Di-Zahab yageze ŋkɛ.

²Slə pelɛ ghweme ta Horɛb hwa'a kwa Kadɛs-Barnɛya ne, hɛ meŋe kwetɛŋeghəmbe menete mbeli kadzeghwa sawa laka hweŋkwa ta ghweme ta Sɛyir.

³Ma te kwa ghate ta hɛa tere kwa meŋe kwetɛŋeghəmbe, mbe va kwa wəfaɗemsə kwa sebe ta shave ta nci mbe Ɛzhipte ne, tserame Moyize gezemte nda pɛtɛa ghena nyi gezave nda Mahwətə kageze nda ke ka Israyɛl.

⁴Kwa sebe ta nya hərəte Sihon, meghea ka Amor nya mbe Hɛshebon ba'a Og, meghea ka Bashan nya mbe Ashetarot ba'a mbe Ɛdrɛyi Moyize menete geva ŋkɛ.

⁵Ma laka ŋkwa kesame ta veci yitea Zhəwrdɛŋe, te hɛɗia Mowab ne, pa Moyize ghate kateke nda wəsə mahalegəa Shala ke mbeli.

⁶Ma ke sha hɛ: «Ma vəa ŋkwa nya se gheɓəmə pelɛ ghweme ta Horɛb ne, ma ke Shala Mahwətə ta ɓəmə sha gheɓəmə: ‹Nahe yɛ ketemə kwele kwele yitea ghweme nya.

⁷Zhɛrete mə geva, dzeme mə hwa ghweme ta ka Amor ba'a dzembe mə hɛɗi nyi dzeyi yite nyi nza nyi ka Kanan dzeyi mbe, geze ta ŋkɛ, ŋwela ta Zhəwrdɛŋe, ŋkwa nyi dzeyi pelɛ yɛ wəmbə, hɛɗi nya kwake kwake, Nɛgɛv, ŋkwa nya dzeyi mɛa ndərə. Dzeme mə hwa'a pelɛ yɛ ghweme ta Liban ba'a hwa'a mɛa Efrate, hələ nya wəba.

⁸Newe mə, 'ya kave ŋayɛ hɛɗia shɛ. Dzembe mə shɛ yɛ kelehwe hɛɗi nya zemete Mahwətə kafela kave nda ke ka shihɛ ŋayɛ Abraham, Izak ba'a Zhakob ba'a ke ka hwelefefia nci kwa sebe ta nci.›»

⁹Ma vəa ŋkwa shɛ ne, ma ke Moyize zhɛkwa: «Mba 'ya kaɗe kanza te ghəa ŋayɛ kwetɛŋe ɗa we.

¹⁰Nahe Shala Mahwətə ta ŋayɛ keyate ŋayɛ kwele kwele, tsetsenya ne, kwele kwele yɛ kala saseregwa te ghweme.

¹¹Yate ŋayɛ Shala Mahwətə ta ka shihɛ ŋayɛ zhigə slibə kwele ma ke nya ba'a wəpikɛ ŋayɛ ŋkɛ kala nya meɗeyi ŋayɛ ŋkɛ.

¹²Tsema nza 'ya kanewete ghweme te gheyɛ, kaɗepe wəshi nyi 'yɛwe yɛ ba'a kahite ghena nyi kwelɛ gheyɛ kwetɛŋe ɗa 'ya tse wa?

¹³Tsehave mə mbeli nyi kentsehwele ntsehwele, nyi keɗepe wəshi ba'a nyi nza zləvə te hɛ hwa hwelefefia ŋayɛ. Tsagha ne, kateve hɛ 'ya te ghəa ŋayɛ.»

¹⁴Ma pe yɛ zhɛnete ɗa: «Ganyɛke wəsə nya zəzəte nya na.»

¹⁵Kezha nza te ghəa ŋayɛ ne, nahe 'ya kefəte mbeli nyi kentsehwele ntsehwele ba'a nyi nza zləvə te hɛ, pa 'ya veyi hɛ te ghəa mbelia ŋayɛ slibə, te ghəa mbelia ŋayɛ gwəmsə, te ghəa mbelia ŋayɛ mcɛfemsə keɗema te ghəa mbelia ŋayɛ meŋe. Ma kweci ne, nahe 'ya keveyi hɛ kaka newe ghweme te yayata yita.

¹⁶Ma vəa ŋkwa shɛ ne, ma 'ya gezave nda ke ka meha ghwə nyi hwa gheyɛ: «Fa mə ghena ta ka menəhɛ ŋayɛ megela ba'a meha mə ghwə tiɗiɗi kwelɛ yɛ nde Israyɛl le menənyɛ keɗema le nde se se.

¹⁷Mba yɛ kenta ghala kwelɛ mbeli kenza yɛ kameha ghwə. Fa mə ghena ta nde dewə berete le ŋa wəndə kwele. Ghazlənəma yɛ va wəndə ma, kwa nza ŋkɛ ne, te sləa Shala meha ghwə yɛ. Ma kendakɛ ŋayɛ berete ghena ne, ghweneke ɗa mə kezha fave 'ya.»

¹⁸Ma vəa ŋkwa shɛ ne, nahe 'ya kegezave ŋayɛ pɛtɛa wəshi nyi hi yɛ kamene.

¹⁹Ma kwa sebe ta ŋkɛ ne, cape gheɓəmə sawa pelɛ ghweme ta Horɛb, pa gheɓəmə dzeyi ɓəmə te ɓerama nya bezle ba'a nya ghazlənə mbeli ve, nya ɗepe nya yɛ. Pa gheɓəmə kelete hweŋkwa kedzeme laka ghweme ta ka Amor kala nya gezave ɓəmə Shala Mahwətə ta ɓəmə. Pa gheɓəmə ntsehe mbe Kadɛs-Barnɛya.

²⁰Tagha gɛ, ma 'ya sha gheyɛ: «Nahe yɛ kentsehe hwa ghweme ta ka Amor nya ve ɓəmə Shala Mahwətə ta ɓəmə.

²¹Newe mə, nahe Shala Mahwətə ta ŋayɛ keveyi hɛɗia shɛ te kema ta ŋayɛ. Dzeme mə shɛ yɛ kelehwe, kala nya meɗeyi ŋayɛ Shala Mahwətə ta ka shihɛ ŋayɛ. Hwepe mə ghə ba'a nza mə le berete!»

²²Pɛtɛa ŋayɛ kese sha 'ya, ma pe yɛ sha 'ya: «Ghweneghe ɓəmə mbeli te kema: katenewe zeweve ta hɛɗia shɛ hɛ ba'a kategeze ɓəmə ghena hɛ te hweŋkwa nya tekele gheɓəmə ba'a te meleme nyi tedzembe gheɓəmə.»

²³Zeɗehwe ɗa zəzə ta ŋayɛa sha. Vatse tsehave zhili 'ya meŋe bakeghəmbe hwa gheyɛ, kwete kwete mbe yayata yita.

²⁴Pa hɛ kelete hweŋkwa kedzeme hwa ghweme, hwa'a hɛ ntsehe kwa zlərəa Ɛshekol nya newemte ŋkwa nya kwa hɛ.

²⁵Pa hɛ ndake yɛ ya ta wəfe se te hɛɗia shɛ ba'a fəke ɓəmə hɛ kase. Ma ke hɛ sha gheɓəmə: «Ma hɛɗi nya ve ɓəmə Shala Mahwətə ta ɓəmə ne, hɛɗi ganyɛ ŋkɛ.»

²⁶Ama hɛreɗɛ yɛ ɗema dzeme. Nahe yɛ kefatema ghena nyi gezete Shala Mahwətə ta ŋayɛ.

²⁷Ntake yɛ kageze ghena te dzeyi mbe yɛ cɛ lekwesa ta ŋayɛ, ma pe yɛ gezete: «Va nya ɗema ɓəmə Mahwətə nda fəakave ɓəmə ŋkɛ shave mbe Ɛzhipte, yitea nza gheɓəmə mbe dzeve va ka Amor ba'a yitea za sebe te gheɓəmə.

²⁸Kadzemema tedzeme gheɓəmə wa? Nahe ka menəhɛ ɓəmə ketamte geva ta ɓəmə, ma ke hɛ: ‹Kwele kwele ma mbeli nyi mbe ke gheɓəmə ba'a berete berete ma hɛ ke gheɓəmə. Meleme nyi jama jama ba'a nyi nza zlia nci ntsake yitea ghweme ya yitea yɛ meleme ta nci. Pa le hwelefefia Anak nyi bebiya bebiya nakɛ ghen'yɛ mbe melemea shɛhɛ.›»

²⁹Ma 'ya zhɛnete ŋayɛ: «Bare barema yɛ ma, ghazlənəma yɛ va hɛ ma.

³⁰Ma Shala Mahwətə ta ŋayɛ nya kedzeghwa te kema ta ŋayɛ ne, gheŋkɛ le ghəa ŋkɛ nde tempa ŋayɛ mpa kala nya menete ŋkɛ kwa ntsə ta ŋayɛ mbe Ɛzhipte

³¹ba'a te ɓerama. Nahe yɛ kenakɛ tsema tsema newete ghweme ŋkɛ te gheyɛ kala nya newe ghweme wəndə te wəzege ta ŋkɛ, mbe pɛtɛa dzeghwa ta ŋayɛ hwa'a te ntsehe ta ŋayɛ te ŋkwa nya.»

³²Ya tsagha shɛnyɛ ŋkɛ ne, kese yɛ kave nda ghə ke Shala Mahwətə ta ŋayɛ we.

³³Ndagwara gheŋkɛ nde se kadzeghwa te kema ta ŋayɛ kwa hweŋkwa kezha zele ŋayɛ ŋkwa keghereŋe. Ma heviɗi ne, mbe geɗeɗe ta ghwə ŋkɛ kezha waŋe ŋayɛ hweŋkwa nya dzeghwa yɛ kwa, ma heveci, mbe geɗeɗe ta meləkwə ləkwə ŋkɛ.

³⁴Pa Mahwətə fate ghena nyi geze yɛ. Mbe hwepe wənəa ŋkɛ ne, ma ke gezete:

³⁵«Wəndə shɛ hwa mbeli nyi ndiremi ndiremi nyi te və nya katedzete hɛɗi ganyɛ nya meɗeyi nda nya 'ya ke ka shihɛ ŋayɛ we.

³⁶Deke Kalɛb, wəzege ta Yefəwnɛ nde tenewe. Kateve nda hɛɗi nya newemte ŋkɛ 'ya ke hɛ le ka hwelefefia ŋkɛ, va nya se ŋkɛ dɛŋe dɛŋe te 'ya, 'ya Mahwətə.»

³⁷Tewəmbəreke gheyɛ ne, nahe Mahwətə kehwepete wənə va 'ya. Ma ke sha 'ya: «Ya gha ŋkɛ ne, katedzete hɛɗia shɛ na we.

³⁸Ama nde mene slene ta ŋa Zhozəwɛ, wəzege ta Nəwn nde tedzete. Ntsəte nda berete, kwa nza ŋkɛ, gheŋkɛ nde teve nda hɛɗia shɛ kawəsə kezeme ghɛ ke ka Israyɛl.»

³⁹Ma kwa sebe ta ŋkɛ, ma ke Shala sha gheyɛ pɛtɛ: «Ama ŋwalea ŋayɛ nyi gezete nyi yɛ katefə ka ghema, ŋwalea ŋayɛ nyi keɗepema nehe wəsə nya ganyɛ le wəsə nya ndiremi nyi ɓeshi ne, ghenci ka tedzete. Ke ghenci teve nda ŋkɛ 'ya. Ghenci ka tekele ŋkɛ kaŋa nci.

⁴⁰Ama gheyɛ le ŋa ŋayɛ ne, zhɛre mə geva kadzete ɓerama, kajive laka ndərəa Ghwəvərə.»

⁴¹Tagha gɛ, ma pe yɛ zhɛnete ɗa: «Nahe ghen'yɛ kebezemte nda ghena ke Mahwətə. Katedzeme ghen'yɛ kampa kala nya gezave n'yɛ Shala Mahwətə ta ɓəmə.» Kəliɓə yayata wəndəa ŋayɛ te wəshi kempa ta ŋkɛ, va nya zəzəte yɛ, kawəsə nya dekwede kele ŋkwa nya hwa ghweme.

⁴²Ama ma ke Mahwətə sha 'ya: «Geze nda ke hɛ kezha ɗema hɛ kadzeme kampa, kwa nza ŋkɛ ne, hwa hɛ 'ya we. Ma tsagha ne, katedzeme hɛ kezha ɗa hɛ ka jaga ta nci we.»

⁴³Pa 'ya gezete ŋayɛ, ama kese yɛ kafa ɗa ŋa ɗa we. Hɛreɗɛ yɛ ɗema yɛ ghena ta Mahwətə, ntəŋə yɛ le ŋkele ntsə kadzeme hwa ghweme.

⁴⁴Tagha gɛ, ŋkeɗe ka Amor nyi hwa ghwemea shɛ sawa sha gheyɛ le mpa. Pa hɛ kekate ŋayɛ kala zhiwəa mze, pa hɛ ɗate ŋayɛ se mbe Sɛyir hwa'a kwa Horma.

⁴⁵Ma kwa zhɛreke geva yɛ ne, nahe yɛ kese kanehwene kwa kema ta Mahwətə, ama kese ŋkɛ kafa ŋayɛ ŋa ŋayɛ we, kese ŋkɛ kave sleme yitea nehwene ta ŋayɛ we.

⁴⁶Tagha gɛ, pa yɛ temə ŋayɛ kavə kwele kwele mbe Kadɛs-Barnɛya.