Read kapsiki Zhɛne Ghwelə yitea Wəshi Mahalegə 11 Bible Online

Zhɛne Ghwelə yitea Wəshi Mahalegə 11 - kapsiki bible

Zhɛne Ghwelə yitea Wəshi Mahalegə 11

¹Kateɗe Shala Mahwətə ta ŋayɛ yɛ ba'a katemene slene yɛ le wəshi nyi gezete ŋkɛ, wəshi mahalegəa ŋkɛ, wəshi keshia ŋkɛ ba'a ghena nyi gezete ŋkɛ keveci keveci.

²Ma ɓeshi veci nya ne, ke ŋwalea ŋayɛ geze nda ghena 'ya we. Ghenci ne, kenakɛ keɗema keɗepe wəsə nya menete Shala Mahwətə ta ŋayɛ hɛ we. Ama ma ke gheyɛ nyi kenakɛ zləvəa ŋkɛ, berete ta ŋkɛ nya wəba ba'a kwelea ŋkɛ geze ŋayɛ ghena 'ya.

³Nahe yɛ kenakɛ wəshi meŋele nyi menete ŋkɛ mbe Ɛzhipte, wəsə nya menete nda ŋkɛ ke Farawon, meghea ka Ɛzhipte ba'a ke pɛtɛa hɛɗia ŋkɛ.

⁴Nahe ŋkɛ kevate ɗa te ka sewajɛa ŋkɛ, te yɛ gədəwəa ŋkɛ ba'a te yɛ wəmata gədəwəa ŋkɛ. Pa ŋkɛ zhiɓəaghe yɛməa ndərəa ghwəvərə kənəa hɛ, vəa ŋkwa nya nza hɛ kakeka ŋayɛ. Nahe ŋkɛ kezamte sebe te hɛ kaghala ghala.

⁵Nahe ŋkɛ kekemanakɛ ŋayɛ te ɓerama pa te ntsehe ta ŋayɛ teke.

⁶Nahe ŋkɛ kevate ɗa te yɛ Datan le Abiram, ŋwalea Ɛliyab nya kwa yita ta Rəbɛn. Kwa kema ta pɛtɛa ka Israyɛl ne, wakaka hɛɗi ghwenemte geva, pa nde ndahwe hɛ le mbeli nyi ki ghɛa nci, cɛ lekwesa ta nci ba'a mbeli nyi yitea hɛ pɛtɛ.

⁷Nahe yɛ kenakɛ wəshi nyi jama jama nyi menete Mahwətə le ntsə ta ŋayɛ.

⁸Katemene slene yɛ le wəshi mahalegə nyi ve ŋayɛ nyi 'ya pɛtɛ ɓeshi, yitea nza yɛ le hwepe ghə kezha dzete hɛɗi nya tedzete nya yɛ kezha kele kaŋa ŋayɛ

⁹ba'a kezha temə yɛ kwele kwele te hɛɗi nya zemete nda Mahwətə kafela ke ka shihɛ ŋayɛ kave nda ke hɛ, tsagha ke hwelefefia nci, hɛɗi nya hwɛ nya yɛ ŋ'wa le yɛməa mze te.

¹⁰Ma hɛɗi nya tedzete nya yɛ kakele kaŋa ŋayɛ ne, kenza ŋkɛ kala Ɛzhipte nya shave ŋayɛ nya yɛ mbe. Ma ketsawete wəshi yɛ pelɛagha ne, nda yɛ kagə nda yɛmə ke wəve le ghəa ŋayɛ kala nya gə nda yɛmə mbeli ke wəshi nyi kwa ntsa.

¹¹Ama hɛɗi nya tedzete nya yɛ kakele ne, hɛɗi nya nza yɛ ghweme ba'a yɛ zlərə te, nya me va sawa yitea ghweme kadzete.

¹²Shala Mahwətə ta ŋayɛ nde newe ghweme te hɛɗia shɛ. Te hɛɗia shɛ nza ntsə ta Shala Mahwətə ta ŋayɛ se te gha ta va hwa'a te keɗaŋe ta ŋkɛ.

¹³Ma kenza yɛ kahawe tsape tsape va wəshi mahalegə nyi ve ŋayɛ nyi 'ya ɓeshi, ma kenza yɛ kaɗe Shala Mahwətə ta ŋayɛ ba'a kamene nda slene le wənəa ŋayɛ pɛtɛ ba'a mehele ta ŋayɛ pɛtɛ ne,

¹⁴kateme nda va ŋkɛ ke hɛɗi te vəa ŋkɛ, va cimə ba'a va feghwe. Ma tsagha gɛ, kateŋ'we wəshi yɛ kwele kwele se te wəve: ha, tɛ ba'a n'yi.

¹⁵Katepese yɛ gwəzə ŋkɛ perə dzeyi mbe wəvea ŋayɛ kezha wəshi keseɗa ta ŋayɛ. Behe behe tezeme wəshi kezeme yɛ.

¹⁶Ya mə ghəa ŋayɛ megela yagha yɛ teghwete ghəa ŋayɛ kasame ŋayɛ kwa hweŋkwa nya tiɗiɗi kezha ve zləvə te kweci shala ba'a kezha gwəɗəŋə mbe kema ta nci.

¹⁷Ma kemenete yɛ tsagha ne, katehwepe wənə Mahwətə va gheyɛ, kateŋzle ghweme ŋkɛ kezha ɗema va kame zhɛkwa. Katezhɛne hɛɗi kamene wəshi we, kahe kahe teza sebe te gheyɛ te hɛɗi ganyɛ nya teve ŋayɛ nya Mahwətə.

¹⁸Kateve wəshi mahalegə nyi ve ŋayɛ nyi 'ya yɛ kwa wənəa ŋayɛ ba'a mbe mehele ta ŋayɛ. Kezha ɗema kazaghəyite ne, katehwepe hɛ yɛ kwa dzeve ta ŋayɛ ba'a mɛa kema ta ŋayɛ.

¹⁹Kateteke nda hɛ yɛ ke ŋwalea ŋayɛ. Kategeze nda hɛ yɛ ke hɛ vəa ŋkwa nya nza yɛ ki ghɛa ŋayɛ, vəa ŋkwa nya tedzeghwa yɛ kwa hweŋkwa, vəa ŋkwa nya teɓelahe yɛ ba'a vəa ŋkwa nya tesate yɛ te ŋkwa.

²⁰Katerafe hɛ yɛ dzeme vare yɛ sheghwəa gelembe nyi mɛa ghɛa ŋayɛ ba'a dzeyi kənəa ŋkwa kedzembe yɛ meleme ta ŋayɛ.

²¹Ma tsagha gɛ, katetemə gheyɛ le ŋwalea ŋayɛ kwele kwele te hɛɗi nya zemete Mahwətə kafela kave nda ke ka shihɛ ŋayɛ, kala nya tetemə ghweme kənəa hɛɗi lema.

²²Kwa nza ŋkɛ ma keyate wəshi mahalegə nyi ve ŋayɛ nyi 'ya yɛ, laka mene slene le hɛ, laka ɗe Shala Mahwətə ta ŋayɛ, laka dzeghwa kwa hweŋkwa ta ŋkɛ ba'a laka ve nda ghəa ŋayɛ ne,

²³kateŋkamte hwelefefi nyi Mahwətə pɛtɛ mbe kema ta ŋayɛ ba'a kateŋkamte hwelefefi nyi kwele kwele ma nyi ba'a nyi berete berete ma ke gheyɛ yɛ.

²⁴Ma yayata ŋkwa nya teŋkeɗe yɛ ne, kaŋa ŋayɛ tenza ŋkɛ. Kateslə hɛɗia ŋayɛ se te ɓerama hwa'a pelɛ Liban, se mɛa hələa Efrate hwa'a mɛa ndərə nya laka ŋkwa kepəkwə ta veci.

²⁵Wəndə shɛ kateghereŋe mbe kema ta ŋayɛ we. Ma te yayata ŋkwa nya tedzete yɛ te hɛɗia shɛ ne, kateve nda ghazlənə ba'a nza benake va gheyɛ Mahwətə ke mbeli, kala nya meɗeyi ŋayɛ ŋkɛ.

²⁶Newema mə, 'ya kave wəpi ba'a bezla mbe kema ta ŋayɛ ɓeshi:

²⁷kewəpi wəpi tenza yɛ kenza yɛ kahawe va ghena ta Shala Mahwətə ta ŋayɛ nyi geze ŋayɛ nyi 'ya ɓeshi,

²⁸ama kebezla bezla tenza yɛ keɗema yɛ kahawe va ghena ta Shala Mahwətə ta ŋayɛ ba'a kesame ŋayɛ yɛ kwa hweŋkwa nya ncɛ ŋayɛ nya 'ya ɓeshi kezha zele kweci shala nyi ɗepema yɛ.

²⁹Ma vəa ŋkwa nya keleghe ŋayɛ Mahwətə kadzete hɛɗi nya tekele yɛ kaŋa ŋayɛ ne, katewəpi ŋkwa yɛ kwa ghəa ghweme ta Garizim, katebezla ŋkwa yɛ kwa ghəa ghweme ta Ɛbal.

³⁰Ma ghwemea shɛhɛ ne, pelɛ kema ta Zhəwrdɛŋe hɛ, laka ŋkwa kepəkwə ta veci, te hɛɗia ka Kanan nyi kwa zlərəa Zhəwrdɛŋe. Dekwede ghwemea shɛhɛ yitea cɛana nyi keveyi geva tekeleke mbe Morɛ, kwa kema ta Gilgal.

³¹Takwa takwa yɛ katejive te Zhəwrdɛŋe kezha kele hɛɗi nya ve ŋayɛ Shala Mahwətə ta ŋayɛ. Katekele yɛ ba'a katenza yɛ te.

³²Ntsə mə geva kamene slene le pɛtɛa wəshi mahalegə ba'a wəshi keshi nyi ve ŋayɛ nyi 'ya ɓeshi.