Read kapsiki Zhɛne Ghwelə yitea Wəshi Mahalegə 12 Bible Online

Zhɛne Ghwelə yitea Wəshi Mahalegə 12 - kapsiki bible

Zhɛne Ghwelə yitea Wəshi Mahalegə 12

¹Wa nyi wəshi mahalegə ba'a wəshi keshi nyi temene slene yɛ le hɛ te hɛɗi nya ndeke ŋayɛ Shala Mahwətə ta ka shihɛ kaŋa ŋayɛ, kala hɛ nyi tenza yɛ teghweme te hɛɗia shɛ nyi.

²Pɛtɛ teza sebe yɛ te ŋkwa nyi keveyi tekeleke nyi dzeyi kwa ghəa yɛ ghweme ba'a nyi dzeyi te wəmbə ba'a nyi dzeyi mbe wəfe nyi zhiɓə. Te ŋkwa shɛhɛ hawe hwelefefi nyi teŋka nyi yɛ va shala ta nci.

³Kateŋzla yɛ reghwetɛa nci yɛ, katenteɗe yɛ gɛaŋa ta nci yɛ, katetere seləa nci nyi keveyi geva tekeleke yɛ ba'a katempə wəshi nyi menete hɛ kashala ta nci yɛ. Kateza sebe yɛ te sləa nci te ŋkwa shɛ.

⁴Ma mbe səkwə nya səkwə Shala Mahwətə ta ŋayɛ yɛ ne, menema yɛ kala hɛ ma.

⁵Deke te ŋkwa nya ntave Shala Mahwətə ta ŋayɛ hwa hwelefefia ŋayɛ pɛtɛ, kezha nza ŋkɛ te ba'a kezha ncɛ ghəa ŋkɛ ŋkɛ te, telə yɛ kahawe ve.

⁶Kase tagha tefə melɛ kwa tere terea ŋayɛ, melɛ kejikə ghəa ŋayɛ, kwa meŋe ta bela ta wəshia ŋayɛ nyi kese te wəve, wəshi nyi tsehe yɛ, wəshi gəmə nyi le ɗe ta ŋayɛ keɗema nyi kezha yipə meɗe mɛ. Kakwa keɗaŋe ne, katefə tsəməa ŋwalea sla ta ŋayɛ, timɛtia ŋayɛ ba'a kwia ŋayɛ yɛ kase.

⁷Tagha kwa kema ta Shala Mahwətə ta ŋayɛ tezeme wəshia shɛhɛ yɛ, gheyɛ le mbeli nyi ki ghɛa ŋayɛ. Katezlama yɛ kwele kwele, va nya wəpikɛ ŋayɛ Shala Mahwətə ta ŋayɛ mbe wəshi nyi menete yɛ pɛtɛ.

⁸Katemene yɛ kala nya mene nya gheɓəmə ɓeshi, yayata wəndə ka mene nya ɗe ghəa ŋkɛ we.

⁹Kwa nza ŋkɛ ne, kenaka yɛ kantsehe te ŋkwa kezhɛne mpi, te hɛɗi nya ve ŋayɛ Shala Mahwətə ta ŋayɛ we.

¹⁰Ama katejive yɛ te Zhəwrdɛŋe ba'a katenza te hɛɗi nya ve ŋayɛ Shala Mahwətə ta ŋayɛ kaŋa ŋayɛ. Kateya ŋayɛ ŋkɛ va pɛtɛa ka jaga ta ŋayɛ nyi dzasle yitea gheyɛ ba'a katenza yɛ gwezlayɛ te.

¹¹Kadzete ŋkwa nya ntave Shala Mahwətə ta ŋayɛ kezha ghəa ŋkɛ tefə wəshi nyi geze ŋayɛ 'ya pɛtɛ yɛ: melɛ kwa tere tere ta ŋayɛ, melɛ kejikə ghə, kwa meŋe ta bela ta wəshia ŋayɛ nyi kese te wəve, wəshi gəməa ŋayɛ ba'a pɛtɛa wəshi nyi zəzə yɛ kave nda ke Mahwətə kezha yipə meɗe mɛ.

¹²Katezlama yɛ mbe kema ta Shala Mahwətə ta ŋayɛ, gheyɛ, ŋwale tezhilia ŋayɛ, ŋwalea kwɛa ŋayɛ, ka mene slene ta ŋayɛ, ka kwaterashia ŋayɛ ba'a ka Lɛvi nyi mbe meleme ta ŋayɛ, kwa nza ŋkɛ bela ta hɛɗi shɛ va hɛ hwa gheyɛ we.

¹³Ya mə ghəa ŋayɛ va dzeghe melɛ kwa tere tere ta ŋayɛ te pɛtɛa ŋkwa nyi keveyi geva tekeleke nyi tenewe yɛ.

¹⁴Deke te ŋkwa nya ntave Mahwətə te hɛɗia kwete hwa hwelefefia ŋayɛ tedzeghe yɛ melɛ kwa tere tere ta ŋayɛ yɛ. Tagha temene pɛtɛa wəshi nyi gezave ŋayɛ 'ya yɛ.

¹⁵Ama wərə yɛ kahene wəshi keseɗa ba'a kazeme slia nci kala nya ɗe yɛ dzeyi mbe yɛ meleme ta ŋayɛ, kala wəpi nya ndeke ŋayɛ Shala Mahwətə ta ŋayɛ. Katezeme slia shɛhɛ wəndə nya wale wale keɗema wəndə nya wɛŋe, kala wəsə nya nza ŋkɛ kakɛme keɗema kale.

¹⁶Ama katezeme mimi yɛ we. Kadzete hɛɗi tesheke yɛ kala yɛmə.

¹⁷Katenza hweŋkwa va gheyɛ kazeme kwa meŋe ta bela ta ha, tɛ ba'a n'yi, ya tsəməa ŋwalea sla, timɛti ba'a kwi, ya pɛtɛa wəshi gəmə nyi le ɗe ta ŋayɛ, ya pɛtɛa wəshi keyipə meɗe mɛ ta ŋayɛ, ya wəshi nyi tseheke yɛ dzeyi mbe yɛ meleme ta ŋayɛ we.

¹⁸Deke mbe kema ta Shala Mahwətə ta ŋayɛ tezeme hɛ yɛ, te ŋkwa nya tentave Shala Mahwətə ta ŋayɛ. Katezeme yɛ le ŋwale tezhilia ŋayɛ, ŋwalea kwɛa ŋayɛ, ka mene slene ta ŋayɛ, ka kwaterashia ŋayɛ ba'a ka Lɛvi nyi dzeyi mbe yɛ meleme ta ŋayɛ. Katezlama yɛ mbe kema ta Shala Mahwətə ta ŋayɛ te pɛtɛa slene nyi menete yɛ.

¹⁹Ya mə ghəa ŋayɛ va pele se yitea ka Lɛvi mbe pɛtɛa hɛ nyi tenza yɛ teghweme te hɛɗia ŋayɛ.

²⁰Ma vəa ŋkwa nya tembake ŋayɛ hɛɗia ŋayɛ Shala Mahwətə ta ŋayɛ kala nya meɗeyi ŋayɛ ŋkɛ ba'a ma ketezhɛ ŋayɛ zhiɗiwəshi ne, katezeme sli yɛ kala nya ɗe yɛ.

²¹Ma kenza ŋkɛ cakeɗake ŋkwa nya ntave Shala Mahwətə ta ŋayɛ kezha ncɛ ŋayɛ ghəa ŋkɛ yitea gheyɛ ne, wərə yɛ kahene wəsə keseɗa nya keseve yɛ hwa yɛ sla, timɛti keɗema kwi nyi tendeke ŋayɛ Shala Mahwətə ta ŋayɛ, laka mene kala nya gezave ŋayɛ 'ya. Katezeme slia shɛhɛ yɛ dzeyi mbe yɛ meleme ta ŋayɛ kala nya ɗe yɛ.

²²Kaganda ne, katezeme slia shɛhɛ yɛ kala nya zeme kɛme keɗema le mbeli. Katezeme slia shɛhɛ yɛ wəndə nya wale wale le nya wɛŋe kanya kwetɛŋe.

²³Ama ya mə ghəa ŋayɛ tsape va zeme mimi, kwa nza ŋkɛ ne, mpi ya mbe. Zemema wəsə nya nza mpi mbe yɛ zlaɓe le sli ma.

²⁴Zemema mimi yɛ ma, ama kadzete hɛɗi sheke yɛ kala yɛmə.

²⁵Zemema yɛ tɛape ma. Ma tsagha ne, mbe zeɗe nza tenza yɛ, gheyɛ ba'a ŋwale nyi ketesawa mbe gheyɛ, va nya menete wəsə nya tiɗiɗi yɛ kwa ntsə ta Mahwətə.

²⁶Ama deke wəshi nyi veyi yɛ tekeleke hwa wəshia ŋayɛ keɗema wəshi keyipə meɗe mɛ yafə yɛ kase kadzete ŋkwa nya ntave Mahwətə.

²⁷Ma kenza ŋkɛ kamelɛ kwa tere tere ne, kateve sli ba'a mimi yɛ te reghwetɛa Shala Mahwətə ta ŋayɛ. Ma kenza ŋkɛ kamelɛ kejikə ghə ne, katesheke mimi yɛ kadzete reghwetɛa Shala Mahwətə ta ŋayɛ ba'a katezeme sli yɛ.

²⁸Fate mə ba'a mene mə slene le ghena nyi geze ŋayɛ nyi 'ya. Ma tsagha ne, mbe zeɗe nza tenza yɛ, gheyɛ ba'a ŋwale nyi ketesawa mbe gheyɛ kaghala ghala, va nya menete wəsə nya ganyɛ ba'a nya tiɗiɗi yɛ kwa ntsə ta Shala Mahwətə ta ŋayɛ.

²⁹Ma vəa ŋkwa nya tezamte sebe Shala Mahwətə ta ŋayɛ kwa kema ta ŋayɛ te hwelefefi nyi te hɛɗi nya tedzete yɛ kezha ŋka hɛ, ma vəa ŋkwa nya teŋkamte hɛ yɛ ba'a nya tenza yɛ te hɛɗia nci ne,

³⁰ya mə ghəa ŋayɛ va dzete keleŋa laka teke hɛ, vəa ŋkwa nya tezamte geva sebe te hɛ mbe kema ta ŋayɛ. Ya mə ghəa ŋayɛ va zele Shala ta nci. Gezema yɛ: «Tsema se mbeli nyi kahawe va shala ta nci, kezha mene n'yɛ kala hɛ tse wa», pe yɛ ma.

³¹Katemene nda yɛ tsagha ke Shala Mahwətə ta ŋayɛ we. Kwa nza ŋkɛ ne, mama ta wəshi nyi ndiremi ndiremi kashasha, wəshi nyi ɗema Mahwətə yamene nda hɛ ke shala ta nci. Pa le ŋwale tezhilia nci ba'a ŋwalea kwɛa nci tere nda hɛ ke shala ta nci.