Read kapsiki Zhɛne Ghwelə yitea Wəshi Mahalegə 13 Bible Online

Zhɛne Ghwelə yitea Wəshi Mahalegə 13 - kapsiki bible

Zhɛne Ghwelə yitea Wəshi Mahalegə 13

¹Ama ntsə mə geva kamene slene le ghena nyi geze ŋayɛ nyi 'ya pɛtɛ. Mtsehema kwete yɛ kadzeyite ba'a ntamtema kwete yɛ shave hwe ma.

²Ya kwete pa kenca kwete nde mɛ ŋkwa keɗema kwete nde kelɛŋə nya ketegeze ŋayɛ kamene wəsə meŋele keɗema kwete wəsə hwa gheyɛ te kwete hɛ.

³Ma keyipəyi geva wəsə nya gezete ŋayɛ ŋkɛ kwa, nda geze ŋayɛ ŋkɛ kazele ba'a kahawe va kweci shala, shala nyi ɗepema yɛ ne,

⁴fa nda ma ŋa nde mɛ ŋkwa shɛ keɗema ŋa nde kelɛŋəa shɛ yɛ ma. Kwa nza ŋkɛ Shala Mahwətə ta ŋayɛ nde dzeghe ŋayɛ tsagha kezha ɗepe kenza ŋkɛ kaganda ɗe Shala Mahwətə ta ŋayɛ yɛ le wənəa ŋayɛ pɛtɛ ba'a le nza ŋayɛ pɛtɛ.

⁵Deke Shala Mahwətə ta ŋayɛ yatezele yɛ, gheŋkɛ yatehawe yɛ ve. Wəshi mahalegəa ŋkɛ yatemene slene yɛ le, ŋwələa ŋkɛ yatefa, gheŋkɛ yatemene nda slene yɛ ba'a gheŋkɛ yateve nda ghə yɛ.

⁶Ma nde mɛ ŋkwa shɛ keɗema nde kelɛŋəa shɛ ne, katepesle ŋkɛ mbeli, va nya tsəkwəyite ŋayɛ ŋkɛ yitea fa nda ma ghena ke Shala Mahwətə ta ŋayɛ nya kefəakave ŋayɛ mbe Ɛzhipte ba'a nya kembeɗeke ŋayɛ shave mbe mava. Wəndəa shɛ ɗe kakelemte ŋayɛ same kwa hweŋkwa nya gezete ŋayɛ Shala Mahwətə ta ŋayɛ kazele. Tsagha gɛ, kateza sebe te wəsə kwa ndiremi hwa gheyɛ.

⁷Ma kenakɛ wəza meghekɛ, wəzege teza ta ŋkɛ, wəzha ta ŋkɛ, male ta ŋkɛ keɗema mcɛ kwa sla pela ta kwete wəndəa ŋayɛ kase tewəfərə kageze nda kezha hawe va kweci shala nyi ɗepema gheyɛ keɗema ka shihɛ ŋayɛ,

⁸shala nyi hawe kweci hwelefefi nyi dzeyi yitea gheyɛ ve, nyi dekwede keɗema nyi cakeɗa, se te kwete bela ta hɛɗi hwa'a te kwete ne,

⁹kateyɛ nda yɛ we, katefa nda ghena yɛ we, katezhɛ heli yɛ yitea nde beze ghena shɛ we, katewəfərə ŋkɛ yɛ we, kateya ŋkɛ yɛ we.

¹⁰Ama katepesle ŋkɛ yɛ. Wəndə nya ghate ŋkɛ kaghwete nde gha kabeza ŋkɛ le pelɛ kezha pesle ŋkɛ, nda tezele ŋkɛ mbeli nyi ketene.

¹¹Katebeza ŋkɛ yɛ le pelɛ ba'a katemte ŋkɛ, va nya dzeghakɛ ŋkɛ kaghwete wəndə yitea Shala Mahwətə nya kefəakave ŋayɛ mbe Ɛzhipte nya se yɛ kaka mavashi.

¹²Katefa ghena shɛ ka Israyɛl pɛtɛ ba'a katenza hɛ benake va ghazlənə. Katezhɛne hɛ kamene wəsə kwa ndiremi nya kala nya hwa gheyɛ we.

¹³Ma vəa ŋkwa nya tefa yɛ mbe kwete hwa meleme nyi ndeke ŋayɛ Shala Mahwətə ta ŋayɛ kezha nza mbe,

¹⁴nahe ka dewə mehele keshave hwa gheyɛ ba'a keghwetete mbeli nyi mbe meleme ta nci kezha hawe va kweci shala nyi ɗepema yɛ ne,

¹⁵katezele zeweve ta ghena shɛ yɛ, kate'yɛwe ghena shɛ yɛ, katezele yɛ kafa zeweve ta ghena shɛ tsape. Ma kentsate mbeli kaganda menete geva wəsə kwa ndiremia shɛ hwa gheyɛ ne,

¹⁶Katempə mbeli nyi mbe melemea shɛ yɛ pɛtɛ, katempə wəshi keseɗa nyi mbe yɛ pɛtɛ perə. Ma kwa sebe ta ŋkɛ ne, kateza sebe yɛ te melemea shɛ le wəshi nyi mbe pɛtɛ.

¹⁷Katetsene wəshi nyi mbe yɛ te tepe ta ŋkwa kebeke, katetere hɛ yɛ ba'a katetere melemea shɛ yɛ. Kala wəsə nya teremte nda melɛ kwa tere tere yɛ ke Shala Mahwətə ta ŋayɛ tenza ŋkɛ. Kakwəfi tenza melemea shɛ kaghala ghala, va nya ɗema nde katezhɛne kaŋa geva.

¹⁸Wəsə shɛ katekele yɛ hwa wəshi nyi keveyi geva katere we. Ma tsagha ne, kategweɗakwe ghwə ta hwepe wənəa Mahwətə. Katencɛ ŋayɛ ganyɛa ŋkɛ ŋkɛ ba'a kateya yɛ kala repanja, kala nya meɗeyi nda ŋkɛ ke ka shihɛ ŋayɛ.

¹⁹Ama nda yɛ kafa nda ŋa Shala Mahwətə ta ŋayɛ, laka mene slene le wəshi mahalegəa ŋkɛ nyi ve ŋayɛ nyi 'ya ɓeshi ba'a laka mene wəsə nya tiɗiɗi kwa ntsə ta Shala Mahwətə ta ŋayɛ.