Read kapsiki Zhɛne Ghwelə yitea Wəshi Mahalegə 17 Bible Online

Zhɛne Ghwelə yitea Wəshi Mahalegə 17 - kapsiki bible

Zhɛne Ghwelə yitea Wəshi Mahalegə 17

¹Katedzeghe nda melɛ yɛ ke Shala Mahwətə ta ŋayɛ le sla, təmə keɗema kwe nya nza yayata beze te we, kwa nza ŋkɛ ne, wəsə nya ndiremi kashasha ŋkɛ sha Shala Mahwətə ta ŋayɛ.

²Ma kenza kwete wəndə hwa gheyɛ, za keɗema male kamene wəsə nya ndiremi kwa ntsə ta Shala Mahwətə ta ŋayɛ, laka hawema va jikə geva ta ŋkɛ, mbe kwete hwa meleme nyi ve ŋayɛ Shala Mahwətə ta ŋayɛ,

³kahawe ŋkɛ va kweci shala ba'a kagwəɗəŋə ŋkɛ mbe kema ta nci, mbe kema ta veci, tere keɗema pɛtɛa saseregwa nyi te ghweme, kaɗema kala nya gezete 'ya,

⁴ma kegezete ŋayɛ ghena shɛ mbeli keɗema kefate yɛ kageze mbeli ne, katezele zeweve ta ghena shɛ yɛ megela. Ma kentsate mbeli kaganda menete geva wəsə nya ndiremia shɛ kashasha te hɛɗia Israyɛl ne,

⁵katekele wəndə nya kebezemte ghena shɛ, ya gheŋkɛ nza kaza keɗema kamale yɛ kashave mɛa ŋkwa kedzeki meleme. Katebeza ŋkɛ yɛ le pelɛ kezha pesle ŋkɛ.

⁶Nda ka negha fete bake keɗema mahekene kendeke nda fete ke wəndəa shɛ nda nza mbeli kapeslekɛ ŋkɛ. Katepesle ŋkɛ mbeli te ghena ta negha fete kwetɛŋe we.

⁷Ka negha fete kategha kabeza ŋkɛ le pelɛ kezha pesle ŋkɛ. Kwa sebe ta ŋkɛ, katebeza ŋkɛ mbeli nyi ketene. Ma tsagha ne, kateza sebe yɛ te wəsə nya ndiremi hwa gheyɛ.

⁸Ma kendakɛ ŋayɛ berete meha ta ghwə te ghena ta pesle ŋkwa, ɗa ŋkwa le zhi keɗema kwete ghena ne, katedzeme ŋkwa nya tentave Shala Mahwətə ta ŋayɛ yɛ.

⁹Katelə yɛ sha ka dzeghe Shala nyi kaka Lɛvi ba'a sha nde meha ghwə nya te slene te vəa shɛ. Katefa ghena yɛ va hɛ ba'a kategeze ŋayɛ ghena ta ghwəa shɛ hɛ.

¹⁰Kala ghena nya tegeze ŋayɛ hɛ te ŋkwa nya tentave Mahwətə temene yɛ. Tserame temene slene yɛ le ghena nyi tegeze ŋayɛ hɛ.

¹¹Katemene yɛ kala ghena nyi tegeze ŋayɛ hɛ ba'a kala ghwə nya teslamte hɛ. Kateseyi yɛ ya laka bela kwa zeme keɗema kwa gwela yitea wəshi nyi tegeze ŋayɛ hɛ we.

¹²Ma kemenete ŋkele ntsə kwete wəndə, kaɗema fa nda ŋa nde dzeghe Shala nya tagha kezha mene slene ta ŋkɛ kwa kema ta Shala Mahwətə ta ŋayɛ, kaɗema fa nda ŋa nde meha ghwə ne, katepesle wəndəa shɛ mbeli. Ma tsagha ne, kateza sebe yɛ te wəsə nya ndiremi te hɛɗia Israyɛl.

¹³Katefate ghena pɛtɛa ka Israyɛl ba'a katezhɛ nda ghazlənə ke hɛ. Tsagha ne, katezhɛne hɛ kamene wəshi le ŋkele ntsə we.

¹⁴Ma vəa ŋkwa nya tentsehe yɛ te hɛɗi nya teve ŋayɛ Shala Mahwətə ta ŋayɛ, nya tekelete ŋkɛ yɛ ba'a tenza yɛ te ne, ya kwete kateɗe yɛ kanza meghe hwa gheyɛ kala kweci hwelefefi nyi dzeyi yitea gheyɛ.

¹⁵Ma wəndə nya teve yɛ kameghe gɛ ne, wəndə nya tenta Shala Mahwətə ta ŋayɛ le ghəa ŋkɛ. Kande Israyɛl tenza ŋkɛ. Kateve nde se se nya keɗema kamenə ŋayɛ yɛ te ghəa ŋayɛ we.

¹⁶Katenza gədəwə kwele kwele va meghea ŋayɛ we. Kateghwene mbeli ŋkɛ kadzawa Ɛzhipte kezha pa nda hɛ we. Kwa nza ŋkɛ ne, ma ke Mahwətə sha gheyɛ: «Katezhɛne yɛ kazhɛre geva kadzete hɛɗi nya we.»

¹⁷Katewəme mi ŋkɛ kwele kwele, yagha hɛ katezhɛremte mehele ta ŋkɛ same kwa hweŋkwa ta Shala we. Katenza mze kwa tɛawetɛa ba'a mze kwa tere tere kwele kwele ve we.

¹⁸Ma vəa ŋkwa nya tedzeme pasla ta meghe ŋkɛ ne, katerafe nda wəshi mahalegə nyi tegeze nda ka dzeghe Shala nyi kaka Lɛvi ŋkɛ mbe palepa ke ghəa ŋkɛ.

¹⁹Katenza palepa shɛ ve ba'a katejaŋga ŋkɛ kala nza ta hɛa ŋkɛ teghweme. Ma tsagha ne, katetekeve hawe va Shala Mahwətə ta ŋkɛ ŋkɛ, katemene slene ŋkɛ le pɛtɛa ghena nyi mbe wəshi mahalegə nya ba'a pɛtɛa wəshi nyi kegezete geva.

²⁰Ma tsagha gɛ, katekele ghəa ŋkɛ ŋkɛ kwa kema ta ka menəhɛnyɛ we, kateɗema hawe va ghena nya ɓɛhwɛ ma hwa wəshi mahalegə we. Tagha gɛ, katenza hɛ te ghəa ka Israyɛl kavə kwele kwele, gheŋkɛ le ŋwalea ŋkɛ.