Read kapsiki Zhɛne Ghwelə yitea Wəshi Mahalegə 18 Bible Online

Zhɛne Ghwelə yitea Wəshi Mahalegə 18 - kapsiki bible

Zhɛne Ghwelə yitea Wəshi Mahalegə 18

¹Ma ka dzeghe Shala nyi kaka Lɛvi ba'a pɛtɛa mbeli nyi kwa yita ta Lɛvi ne, katekemave wəve hɛ kaŋa nci kala kweci ka Israyɛl we. Wəshi nyi dzeghekɛ nda melɛ mbeli le hɛ ke Mahwətə ba'a kweci wəshi nyi kaŋa ŋkɛ yatezeme hɛ.

²Hɛɗi shɛ katenza va hɛ hwa ka Israyɛl we, kwa nza ŋkɛ, Mahwətə ya kaŋa nci wəve, kala nya meɗeyi nda ŋkɛ ke hɛ.

³Hweŋkwa ya va ka dzeghe Shala kezha nza kweci bela ta wəshi keseɗa, sla, təmə keɗema kwe nya dzeghe melɛ mbeli le hɛ kaŋa nci: pehwepe, yɛ ghweleme ba'a hwetamaze.

⁴Kateve ka ghate ta wəshi nyi kese te hɛɗi yɛ ke hɛ: ha, tɛ mɛnɛfɛ ba'a n'yi, tsagha kwa ghate ta shinti nya tsehe mbeli te təmə.

⁵Kwa nza ŋkɛ ne, ghenci le ŋwalea nci yantave Shala Mahwətə ta ŋayɛ hwa hwelefefia ŋayɛ kezha mene slene ta Mahwətə keveci keveci.

⁶Ma keɗe kwete Lɛvi kaslə mbe kwete hwa meleme ta ka Israyɛl nya nza ŋkɛ ne, wərə ŋkɛ kase kadzembe ŋkwa nya ntave Mahwətə kala nya ɗe ŋkɛ.

⁷Katemene nda slene ŋkɛ ke Shala Mahwətə ta ŋkɛ kala kweci ka menəhɛnyɛ nyi kaka Lɛvi nyi kemene slene tagha kwa kema ta Mahwətə.

⁸Kezha zeme ŋkɛ ne, hweŋkwa ya ve kezha kemave wəsə yipə yipə le ŋa nci, kadzeyitea wəsə nya ŋ'we ŋkɛ kepamte wəshia yitenyɛ ŋkɛ.

⁹Ma vəa ŋkwa nya tentsehe yɛ te hɛɗi nya teve ŋayɛ Shala Mahwətə ta ŋayɛ ne, kateteke wəshi nyi ndiremi ndiremi kashasha ta mbeli nyi te yɛ we.

¹⁰Katesləyi wəndə nya ketere wəzege teza ta ŋkɛ keɗema wəzha ta ŋkɛ, nya keŋa zlera keɗema nya kemene ghwɛ, nya kenewe nza ta wəshi nyi pelɛ ghweme keɗema nya kemene meŋele,

¹¹nya kebeze ŋkwa le ghwɛ, nya kedzawa weta keɗema nya ke'yɛwe ghena va mbelia kwahɛɗi mbeli hwa gheyɛ we.

¹²Kwa nza ŋkɛ ma yayata wəndə nya kemene wəshi nyi kala nyi ne, wəsə nya ndiremi kashasha yamene ŋkɛ sha Shala Mahwətə ta ŋayɛ. Tewəmbəreke wəshi nyi kala nyi teŋka mbeli nyi te hɛɗia shɛ Mahwətə mbe kema ta ŋayɛ.

¹³Ma gheyɛ ne, katenza yɛ kambeli nyi kendeke nda wənəa ŋayɛ fəyitekeghə ke Mahwətə.

¹⁴Ma mbeli nyi teŋka nyi yɛ ne, ka fa nda ghena ke ka mene ghwɛ ba'a ke ka ŋa zlera hɛ. Ama kaɗe Shala Mahwətə ta ŋayɛ kamene wəsə nya kala nyagha yɛ we.

¹⁵Katenta nde mɛ ŋkwa Shala Mahwətə ta ŋayɛ kala 'ya shave hwa gheyɛ, shave hwa hwelefe ta ŋayɛ. Gheŋkɛ yatefa nda ghena yɛ.

¹⁶Gheŋkɛ wəsə nya 'yɛwete yɛ va Shala Mahwətə ta ŋayɛ te veci nya tsenete geva yɛ pelɛ ghweme ta Horɛb. Ma pe yɛ: «Kazhɛne n'yɛ kaɗe kageze n'yɛ ghena Shala Mahwətə ta n'yɛ le ghəa ŋkɛ we, kazhɛne n'yɛ kaɗe kanewe ghwə nya wəba nya ba'a kaɗe n'yɛ kampə we!»

¹⁷Tagha gɛ, ma ke Mahwətə sha 'ya: «Tiɗiɗi gezete ghena mbeli nyi.

¹⁸Katenta nda nde mɛ ŋkwa 'ya ke hɛ shave mbe hwelefe ta nci kala gha. Kateve ghena ta ɗa 'ya kwa mɛa ŋkɛ ba'a kategeze nda yayata ghena nya tegeze nda 'ya ŋkɛ ke hɛ.

¹⁹Ma keɗema wəndə kafa ghena ta ɗa, ghena nyi tegeze nde mɛ ŋkwa shɛ te sləa ɗa ne, kateve ɗa 'ya te wəndəa shɛ le ghəa ɗa.

²⁰Ama kendave nde mɛ ŋkwa kagezete ghena nya ɗema 'ya kagezete nda te sləa ɗa, keɗema kenza ŋkɛ kageze ghena te sləa kweci shala ne, katemte nde mɛ ŋkwa shɛ.»

²¹Ya kwete kate'yɛwe yɛ tsema tsema nza yɛ kaɗepete ghena nya keɗema kese va Mahwətə.

²²Ma kegezete ghena nde mɛ ŋkwa nyagha te sləa Mahwətə, nda ɗema ŋkɛ keyipəyi geva kwa ne, kese ghena nyi gezete ŋkɛ va Mahwətə tsagha we. Ghena nya kese mbe ghəa ŋkɛ yagezete ŋkɛ. Ghazlənəma yɛ ve ma.