Read kapsiki Zhɛne Ghwelə yitea Wəshi Mahalegə 2 Bible Online

Zhɛne Ghwelə yitea Wəshi Mahalegə 2 - kapsiki bible

Zhɛne Ghwelə yitea Wəshi Mahalegə 2

¹Ma kwa sebe ta ŋkɛ, pa gheɓəmə zhɛreghe geva kajive laka ɓerama, jive laka ndərəa ghwəvərə, kala nya gezave ɗa Mahwətə. Kavə kwele kwele ne, pa gheɓəmə ntəsləte ghweme ta Sɛyir.

²Kwa sebe ta ŋkɛ, ma ke Mahwətə sha 'ya:

³«Nahe yɛ ketemə kwele kwele kantəslə ghweme nya, zhɛre mə geva kajive laka bela kwa gwela.

⁴Ma pa na sha tegeze nda ke mbeli: Katejive yɛ vare ghala ta hɛɗia Sɛyir, nya nza ka menəhɛ ŋayɛ, hwelefefia Ɛzawə te. Katezhɛ nda ghazlənə ke hɛ va gheyɛ, ama ntsehwele mə.

⁵Ha nda ma mpa yɛ ke hɛ ma, kwa nza ŋkɛ ne, wəsə shɛ kateve ŋayɛ 'ya te hɛɗia nci, ya ŋkwa keŋkeɗe seɗa ŋkɛ we. Kwa nza ŋkɛ ne, kaŋa Ɛzawə ndeke nda ŋkwa nya hwa ghweme ta Sɛyir 'ya.

⁶Le dala tepa wəshi nyi tezeme yɛ yɛ va hɛ, ya yɛmə nya tesa yɛ.»

⁷Kwa nza ŋkɛ ne, nahe Shala Mahwətə ta ŋayɛ kewəpikɛ ŋayɛ mbe wəshi nyi mene yɛ pɛtɛ, nahe ŋkɛ kese kanewe ghweme te gheyɛ mbe dzeghwa ta ŋayɛ te ɓerama nya wəba nya. Kava wəfaɗemsə ne, le gheyɛ se ŋkɛ, wəsə shɛ kaɗema va gheyɛ we.

⁸Nahe gheɓəmə keseyi ɓəmə vare hɛɗia Sɛyir nya nza ka menəhɛ ɓəmə, hwelefefia Ɛzawə te. Pa gheɓəmə kelete hweŋkwa ta ŋwela nya kedzembe yɛ Ɛlat le Ɛsiyon-Gɛbɛr. Kwa sebe ta ŋkɛ, pa gheɓəmə zhɛrete geva laka hweŋkwa nya kejive laka ɓerama ta Mowab.

⁹Ma ke Mahwətə gezete ɗa: «Ha nda ma mpa yɛ ke ka Mowab ma, gha nda ma mpa yɛ ke hɛ ma, kwa nza ŋkɛ, ŋkwa shɛ kateve ŋayɛ 'ya te hɛɗia nci we. Kwa nza ŋkɛ ne, ke hwelefe ta Lot ndeke nda hɛɗia Ar 'ya kaŋa nci.»

¹⁰Ma vəashi ne, ka Ɛm ka se te hɛɗia Ar. Kambeli nyi berete berete, nyi kwele kwele ba'a nyi bebiya bebiya kala hwelefefia Anak se hɛ.

¹¹Ma newe kweci mbeli ne, kaka Refay hɛ kala ka Anak, ama kaka Ɛm heka hɛ ka Mowab.

¹²Ma hɛɗia Sɛyir ne, ka Hor ka se te vəashi. Ama pa hwelefefia Ɛzawə ŋkamte hɛ, mpəmte hɛ ba'a nzanji te ŋkwa nci, kala nya menete ka Israyɛl te hɛɗi nya va hɛ nya, nya ndeke nda nya Mahwətə ke hɛ.

¹³Ma ke Mahwətə gezave ɓəmə: «Kele mə hweŋkwa tsetsenya, jive ŋayɛ mə te hələa Zɛrɛd.» Tsagha shɛ menete gheɓəmə.

¹⁴Va mahekenemsə degheseghəmbe menete gheɓəmə kadzeghwa slə mbe Kadɛs-Barnɛya hwa'a te jive ta ɓəmə te hələa Zɛrɛd. Ma vəa ŋkwa shɛ ne, pɛtɛ zanyɛ sebe te mbeli nyi wərə dzemte mpa te və nya slə mbeli, kala nya zemete nda fela Mahwətə ke hɛ.

¹⁵Nahe Mahwətə le ghəa ŋkɛ kevate ɗa te hɛ kezha zanyɛ sebe te hɛ pa te kwa keɗaŋe.

¹⁶Ma kwa sebe ta nya mpənji mbelia shɛhɛ pɛtɛ ne,

¹⁷ma ke Mahwətə sha 'ya:

¹⁸«Ɓeshi nya ne, Katezlake ghala ta Mowab yɛ ba'a katejive yɛ mbe hɛɗia Ar.

¹⁹Katentsehe yɛ kwa kema ta hɛɗia ka Amon. Ha nda ma mpa yɛ ke hɛ ma, gha nda ma mpa yɛ ke hɛ ma, kwa nza ŋkɛ, ŋkwa shɛ kateve ŋayɛ 'ya te hɛɗia nci we. Va nya nza ŋkɛ ne, hwelefefia Lot hɛ perə, ke hɛ ndeke nda hɛɗia shɛ 'ya kaŋa nci.»

²⁰Ma zəzə mbeli ne, kahɛɗia ka Refay ŋkɛ. Va nya nza ŋkɛ ma vəashi ne, nahe ka Refay kese te. Kaka Zamzəwm se ka Amon kaheka hɛ.

²¹Kambeli nyi berete berete, nyi kwele kwele ba'a bebiya bebiya se hɛ kala ka Anak. Ama pa Mahwətə zamte sebe te hɛ kwa kema ta ka Amon nyi keŋkamte hɛ ba'a nyi kenzanji te ŋkwa nci.

²²Tsagha menete nda Mahwətə ke ka Ɛdom nyi kaka hwelefefia Ɛzawə, nyi kese mbe Sɛyir. Pa ŋkɛ zamte sebe te ka Hor kwa kema ta ka Ɛdom nyi keŋkamte hɛ ba'a nyi kenzanji te ŋkwa nci pa ɓeshi.

²³Ma ka Ava nyi kese mbe meleme nyi te hɛɗia Gaza ne, nahe mbeli nyi kesenji mbe Kaftor kempəmte hɛ ba'a kenzanji te ŋkwa nci.

²⁴Ɓiyitsa ne, ma ke Mahwətə gezete ɗa: «Kele mə hweŋkwa, jive ŋayɛ mə te hələa Arnon. Newema mə, 'ya kateve meghe Sihon, nde Amor nya mbe Hɛshebon ba'a hɛɗia ŋkɛ mbe dzeve ta ŋayɛ. Gha mə kakele hɛɗia ŋkɛ, ha nda mə mpa!

²⁵Ɓəshi veci nya ne, 'ya kagha kave nda ghazlənə ba'a nza benake va gheyɛ ke mbeli nyi te hɛɗi lema. Ma vəa ŋkwa nya tefa ghena nyi geze mbeli te gheyɛ hɛ ne, katebare bare hɛ ba'a benake tenza hɛ kwa kema ta ŋayɛ.»

²⁶Nahe 'ya keghwenakɛ nda mbeli ke meghe Sihon nya mbe Hɛshebon se te ɓerama ta Kedɛmot le ghena ta kwelɛŋe, ma 'ya shɛ:

²⁷«Pelave n'yɛ hweŋkwa kajive mbe hɛɗia ŋa. Deke kwa hweŋkwa tedzeghwa ghen'yɛ, kaɗema kasame kwa jive laka bela kwa zeme keɗema kwa gwela.

²⁸Ma wəshi kezeme nyi tezeme n'yɛ ba'a yɛmə nya tesa n'yɛ ne, te cɛdɛ tepa ghen'yɛ va gha. Pelave n'yɛ hweŋkwa nahe kajive mbe hɛɗia ŋa.

²⁹Nahe hwelefefia Ɛzawə nyi mbe Sɛyir ba'a ka Mowab nyi mbe Ar kepelave n'yɛ hweŋkwa kajive mbe hɛɗia nci. Kwa sebe ta ŋkɛ ne, katejive n'yɛ te Zhəwrdɛŋe kezha ntsehe te hɛɗi nya ndeke n'yɛ Shala Mahwətə ta n'yɛ.»

³⁰Ama hɛreɗɛ Sihon, meghe nya mbe Hɛshebon ɗema pele ɓəmə hweŋkwa kejive mbe hɛɗia ŋkɛ. Va nya nza ŋkɛ ne, nahe Shala Mahwətə ta ŋayɛ kezhɛrete mehele ta ŋkɛ ba'a wənəa ŋkɛ ntɛaŋe ntɛaŋe kala pelɛ kezha ve ŋkɛ mbe dzeve ta ŋayɛ ɓeshi veci nya.

³¹Kwa sebe ta ŋkɛ, ma ke Mahwətə sha 'ya: «Newema, nahe 'ya keghate kave Sihon ba'a hɛɗia ŋkɛ mbe dzeve ta ŋa. Ghate kakele hɛɗia ŋkɛ tsetsenya.»

³²Təkwəsəmə yɛ Sihon le mbelia ŋkɛ pɛtɛ shave kezha mpa le gheɓəmə mbe Yahas.

³³Ama pa Shala Mahwətə ta ɓəmə vame ŋkɛ mbe dzeve ta ɓəmə. Pa gheɓəmə ɗate ŋkɛ, tsagha ŋwalea ŋkɛ ba'a mbelia ŋkɛ pɛtɛ.

³⁴Tagha gɛ, pa gheɓəmə kekelehwe yɛ meleme ta nci pɛtɛ, pa gheɓəmə zamte sebe te hɛ. Pa gheɓəmə mpəmte zhili, mi ba'a ŋwale. Wəndə shɛ ketenakɛ gheɓəmə teghweme we.

³⁵Deke wəshi keseɗa ba'a wəshi nyi mbe meleme nyi kekelehwe gheɓəmə yafəhwe gheɓəmə kawəshi nyi hwa mpa.

³⁶Se mbe Arowɛr nya mɛa hələa Arnon ba'a se mbe kwete meleme nya kwelɛ zlərəa shɛ, hwa'a te hɛɗia Gala'ad ne, meleme shɛ kezhɛnete ɓəmə ghə we. Nahe Shala Mahwətə ta ɓəmə kevame hɛ pɛtɛ mbe dzeve ta ɓəmə.

³⁷Ama deke hɛɗia Amon, geze ta ŋkɛ, hɛɗi nya mɛa hələa Yabok, meleme nyi dzeme hwa ghweme ba'a pɛtɛa ŋkwa nyi fɛake ɓəmə Shala Mahwətə ta ɓəmə keha nda mpa ke hɛ yasema gheɓəmə kahende nda geva.