Read kapsiki Zhɛne Ghwelə yitea Wəshi Mahalegə 21 Bible Online

Zhɛne Ghwelə yitea Wəshi Mahalegə 21 - kapsiki bible

Zhɛne Ghwelə yitea Wəshi Mahalegə 21

¹Ma kenakɛ wəndə nya peslekɛ mbeli yɛ ɓelayɛ hwa gamba, kaɗema mbeli keɗepe wəndə nya kepeslekɛ te hɛɗi nya teve ŋayɛ nya Shala Mahwətə ta ŋayɛ kaŋa ŋayɛ ne,

²katelə mbelia jama ta ŋayɛ ba'a ka meha ghwə ta ŋayɛ kadzeghe ŋkwa nya kwelɛ yɛ wəndə kemte mtea shɛ le meleme nyi dzeyi yite.

³Katenakɛ meleme nya dekwe ma yitea wəndəa shɛ hɛ. Tagha gɛ, katekese mbəkwəa sla nya ghama mbeli kamene slene le, ya kave sheghwə te welɛ ve mbelia jama nyi mbe melemea shɛ kase.

⁴Kateŋka mbəkwəa sla shɛ mbelia jama nyi mbe meleme kadzawa laka hələ nya ɗema yɛmə kahase kwa, te ŋkwa nya ghama mbeli kawəza keɗema katsawe wəshi. Tagha kwa hələa shɛ ne, kateŋkwape tsaraka hɛ te mbəkwəa shɛ.

⁵Ma vəa ŋkwa shɛ gɛ, katehende geva ka dzeghe Shala nyi kaka Lɛvi kase, kwa za ŋkɛ ghenci yantave Shala Mahwətə ta ŋayɛ yitea mene nda slene ba'a yitea wəpi ŋkwa te sləa ŋkɛ. Ghenci yanza hweŋkwa va hɛ kezha yipə yɛ ghəpə, ghena ta ɗa ŋkwa ba'a ŋa yɛ zhi.

⁶Katepɛ dzeve ta nci pɛtɛa mbelia jama nyi mbe meleme, nyi kehendave nda geva ke wəndə kemte mtea shɛ kwa hələ kənəa mbəkwə nya dzərəɗəmte welɛ mbeli te.

⁷Ma ke hɛ sha tegeze: «Dzeve ta n'yɛ nde peslekɛ wəndə nya we, kenakɛ wəsə nya kemenete nda geva ntsə ta n'yɛ we.

⁸Mahwətə, kelemte mbelia ŋa nyi mbeɗeke na te wənə, vema fete ta mte ta wəndə nya ɗema nya fete ve na kwa ghəa ka Israyɛl ma.» Ma tsagha gɛ, katekelemte fete ta nci Shala te wənə.

⁹Tsagha ne, katemene wəsə nya zeɗehwe nda ke Mahwətə yɛ ba'a kateya ghəa ŋayɛ yɛ va fete ta mte ta wəndə nya ɗema fete ve.

¹⁰Ma vəa ŋkwa nya tedzemte yɛ kampa le ka jaga ta ŋayɛ, nya tevame hɛ Shala Mahwətə ta ŋayɛ mbe dzeve ta ŋayɛ ba'a nya tekeseve mbeli yɛ kaka mavashi,

¹¹ma ketenakɛ male kwete wəndəa ŋayɛ kendeɗe nda hwa hɛ, ketemawehwe ŋkɛ, nda kelete ŋkɛ kamale ne,

¹²katelə ŋkɛ kadzeki ghɛa ŋkɛ. Kateŋsə ghəa nta malea shɛ ba'a katesla yɛ pela ta nta nde.

¹³Kateseɗemte lekwesa kwatera ta nta nde ba'a katenza nde ki ghɛa ŋkɛ. Katenehwene yɛ yitenyɛ le meghekɛ nde katere zake. Ma kwa sebe ta ŋkɛ ne, kateɓelahe za le ba'a katewəme ŋkɛ kamale ta ŋkɛ.

¹⁴Ma vəa ŋkwa nya ɗema nde mba ndeɗehwe nda ne, katepele ŋkɛ waɗe. Katenza hweŋkwa ve kezha pamte ŋkɛ te cɛdɛ, ya kamene nda kala kwatera, va nya tərənəte ŋkɛ kanza kamale ta ŋkɛ we.

¹⁵Ma kenza mi bake yitea za, kwajiwəni kwete ba'a kwazerema kwete, nda yake tezhɛa kɛfi mia shɛhɛ, ama mpelɛa ma tezhɛa male kwa zerema nakɛ veci ne,

¹⁶kateve nda nza kawəzege nya kwele ŋkɛ ke wəzege teza ta kwajiwəni, mba tezhɛa kwazerema nya keghate kanakɛ veci vəa ŋkwa nya tenehe nda wəshia ŋkɛ ŋkɛ ke ŋwalea ŋkɛ we.

¹⁷Ama kateɗepe wəzege ta kwazerema ŋkɛ kawəzege nya kwele ba'a kateɗa nda pɛtɛa wəshia ŋkɛ ŋkɛ bake zhigə. Kwa nza ŋkɛ ne, gheŋkɛ ya kawəzege ta ŋkɛ nya kwele ba'a gheŋkɛ yanza hweŋkwa kenza kawəndə kwele ve.

¹⁸Ma kenza wəzege teza nya kehawema ba'a nya kefama ghena va kwete wəndə, nya keɗema kave sleme yitea ghena ta yitenyɛ keɗema meghekɛ, ya ghenci nza ka'yɛ ŋkɛ, kaɗema ŋkɛ kafa nda ŋa nci ke hɛ ne,

¹⁹katekese ŋkɛ yɛ yitenyɛ le meghekɛ ba'a katekele nda ŋkɛ ke mbelia jama nyi mbe meleme ta ŋkɛ, mɛa ŋkwa kedzeki meleme ta ŋkɛ.

²⁰Ma tegeze nda hɛ ke mbelia jama: «Ma wəzege ta n'yɛ nya ne, kahawe ŋkɛ ba'a kafa ghena ŋkɛ we, kave sleme ŋkɛ yitea ghena nyi geze nda ghen'yɛ we. Wəshi kezeme ba'a wəshi kesa yave nda ghə ŋkɛ.»

²¹Tagha gɛ, katebeza ŋkɛ pɛtɛa mbeli nyi mbe meleme le pelɛ kezha pesle ŋkɛ. Ma tsagha ne, kateza sebe yɛ te wəsə kwa ndiremi hwa gheyɛ. Katefa ghena shɛ pɛtɛa ka Israyɛl ba'a katezhɛ nda ghazlənə ke hɛ.

²²Ma kemenete fete nya wərə mte wəndə nda peslekɛ ŋkɛ mbeli, kwa sebe ta ŋkɛ, pa mbeli hwepeyi wəndə kemte mtea ŋkɛ ŋalawe te wəfe ne,

²³katehɛ wəndə kemte mtea ŋkɛ te wəfe we. Katela ŋkɛ yɛ te vecia shɛnyɛ, kwa nza ŋkɛ ne, bezla ta Shala yakele wəndə nya kemte ŋalawe te wəfe kase. Katezhɛre hɛɗia ŋayɛ yɛ wale wale, hɛɗi nya ve ŋayɛ Shala Mahwətə ta ŋayɛ kaŋa ŋayɛ we.