Read kapsiki Zhɛne Ghwelə yitea Wəshi Mahalegə 22 Bible Online

Zhɛne Ghwelə yitea Wəshi Mahalegə 22 - kapsiki bible

Zhɛne Ghwelə yitea Wəshi Mahalegə 22

¹Ma kenakɛ sla, təmə keɗema kwe ta menə ŋayɛ yɛ kandeŋe ne, katewesle ghə yɛ ve we. Ama katedzeghe yɛ kaŋka nda kase ke wəndə ke gheŋkɛ.

²Ma keɗema wəndə ke gheŋkɛ dekwede yitea gheyɛ ba'a keɗema yɛ keɗepe ŋkɛ ne, kateve wəsə keseɗa shɛ yɛ ki ghɛa ŋayɛ, katenza nde ki ghɛa ŋayɛ pa te və nya se ŋkɛ kazele. Tsagha gɛ, kateve nda wəsə keseɗa ta ŋkɛ yɛ.

³Katemene yɛ tsagha kesləyi kwara, lekwesa keɗema yayata wəsə nya zamte wəndə ke gheŋkɛ yɛ. Katewesle ghə yɛ ve we.

⁴Ma kenakɛ kwara keɗema sla ta menə ŋayɛ yɛ ŋgwape kwa hweŋkwa ne, katewesle ghə yɛ ve we. Ama katekemane menə ŋayɛ yɛ kapəkə ŋkɛ sate te ŋkwa.

⁵Ashɛ male kateseɗe lekwesa ta za we, ya za kateseɗe ŋa male we. Kwa nza ŋkɛ ma yayata wəndə nya kemene wəsə nya kala nyagha ne, wəsə nya ndiremi kashasha yamene ŋkɛ kwa kema ta Shala Mahwətə ta ŋayɛ.

⁶Ma kenakɛ ghɛa 'yɛ nya nza ma kənəa yɛ slesle ta ŋkɛ keɗema kənəa ŋwalea ŋkɛ yɛ kwa hweŋkwa, hwa wəfe keɗema te hɛɗi ne, katefə yɛ ma le ŋwalea nta yɛ we.

⁷Katesərə ma yɛ kazlənyɛ, deke ŋwale yatefə yɛ. Ma tsagha ne, katetemə yɛ kwele kwele teghweme ba'a katenza yɛ le zlama.

⁸Ma kenza yɛ kaŋa dɛwa ne, kateŋa ŋkwa yɛ dzeyi yitea dɛɓere nya pelɛ ghəa cɛ, yitea ɗema fete ta mte ta wəndə nya keteɗe sawa pelɛ kanza kwa ghəa ŋayɛ.

⁹Katetsawe kweci mama ta felehwe ta wəshi yɛ dzeyi hwa rɛzɛŋea ŋayɛ we. Ma kemenete ŋkɛ tsagha ne, kateve geva wəshi nyi kese te wəvea shɛ pɛtɛ tekeleke, wəshi nyi tsawete yɛ ba'a yɛ rɛzɛŋe.

¹⁰Katejikə yɛ sla le kwara yɛ kezha wəza we.

¹¹Kateseɗe lekwesa nya tsate mbeli le shintia təmə ba'a pawa yɛ we.

¹²Katetsa wəshi yɛ gwedze gwedzare dzeyi mɛa bela nyi wəfaɗe te zlave nya tedəpə yɛ kənəa ghəa ŋayɛ.

¹³Ya kwete pa kewəmeve male kwete wəndə, pa ɓelahehwe ɓelahe le, kwa sebe ta ŋkɛ, pa ɗema ŋkɛ.

¹⁴Ntake ŋkɛ kasla nda tseŋwə ba'a kageze ghena nya ndiremi te, ma ke: «Nahe 'ya kewəmeve male nya, keɓelahehwe ɓelahe le ba'a kesləyi ŋkɛ kentsa ntsa.»

¹⁵Tsagha gɛ ne, katese yita ba'a meghekɛa malea shɛ le wəsə nya kencɛ kaɗema wəzha ta nci kentsa kadzawa kema ta mbelia jama nyi mɛa ŋkwa kedzembe meleme.

¹⁶Ma ke yita sha tegeze nda ke mbelia jama: «Nahe 'ya kendeke nda wəzha ta ɗa kamale ke wəndə nya, ama pa ɗema ŋkɛ.

¹⁷Ntake ŋkɛ kasla nda tseŋwə, ma ke sha 'ya: ‹Ma wəzha ta ŋa nya ne, kentsa ntsa sləyi 'ya.› Yawa, wa nya wəsə nya kencɛ nya kaɗema wəzha ta ɗa kentsa.» Katepelake wəsə kepelake te gezle nya nza mimia kwa ghate hɛ le makwa te hɛ kwa kema ta mbelia jama.

¹⁸Tagha gɛ, katekese wəndəa shɛ mbelia jama kezha ɗa ŋkɛ.

¹⁹Kategeze nda hɛ kaŋki dəɓərəa mze kwa tɛawetɛa gwəmsə ke yitenyɛa malea shɛ, va nya slave nda tseŋwə ŋkɛ ke deghelia ka Israyɛl. Kakwa keɗaŋe ne, katenza nde kamale ta ŋkɛ, katenza hweŋkwa kezha zhɛne kaŋkamte ŋkɛ kala nza ta hɛa ŋkɛ teghweme we.

²⁰Ama kenza nde kaganda ya va za, keɗema wəsə kencɛ shɛ kaɗema malea shɛ kentsa ne,

²¹katekele ŋkɛ mbeli kajive mɛa degha ta yitenyɛ ba'a katebeza ŋkɛ zhili nyi mbe meleme le pelɛ kezha pesle ŋkɛ. Kwa nza ŋkɛ ne, wəsə kwa ndiremi kashasha yamenete nde te hɛɗia Israyɛl, laka mene mefətekwə ki ghɛa yitenyɛ. Tsagha ne, kateza sebe yɛ te wəsə kwa ndiremi hwa gheyɛ.

²²Ma kekeseve wəndə mbeli kaɓelahe le male ta za ne, bake nci tempə hɛ mbeli, za nya keɓelahehwe ɓelahe le male ba'a malea shɛ le ghəa nta. Tsagha ne, kateza sebe yɛ te wəsə kwa ndiremi hwa ka Israyɛl.

²³Ma kenza degheli kwa ghwa va kwete wəndə, nda sləyi ŋkɛ kwete wəndə mbe meleme ba'a nda ɓelahehwe ɓelahe ŋkɛ le ne,

²⁴katefə hɛ mbeli bake nci kajive mɛa ŋkwa kedzembe meleme ba'a katebeza hɛ yɛ le pelɛ kezha mpə hɛ. Ma nda pesle deghelia shɛ mbeli ne, va nya sema nde katsa lewela, ndagwara mbe meleme menete geva ghena shɛ. Ma za le ŋa ŋkɛ ne, va nya ɓelahehwe ɓelahe ŋkɛ le makwa nya kwa ghwa va kwete wəndə. Tsagha ne, kateza sebe yɛ te wəsə kwa ndiremi hwa gheyɛ.

²⁵Ama kenza nde hwa gamba sləyi degheli nya kwa ghwa va kwete wəndə wəndəa shɛ nda keseve ŋkɛ kaɓelahehwe ɓelahe le kaberete ne, deke wəndə nya keɓelahehwe ɓelahe le yatepesle mbeli.

²⁶Wəsə shɛ katemene nda yɛ ke deghelia shɛ we, kwa nza ŋkɛ kemenete fete kemte nde we. Kanya kwetɛŋe ghena nya le ghena ta wəndə nya kentsa yitea nde ghedəkwəa ŋkɛ kezha pesle ŋkɛ.

²⁷Kwa nza ŋkɛ hwa gamba sləyi ŋkɛ, ya deghelia shɛ tsate lewela ne, wəndə shɛ kezha se kaya ŋkɛ we.

²⁸Ma kesləyi degheli nya kenakama kantsa ba'a nya keɗema kamakwa ta wəndə kwa ghwa kwete wəndə, nda ɓelahehwe ɓelahe ŋkɛ le kaberete ba'a nda keseve hɛ mbeli ne,

²⁹kateve nda dəɓərəa mze kwa tɛawetɛa wəndəa shɛ mcɛfemsə ke yitenyɛa wəzha shɛ ba'a katekele ŋkɛ kamale ta ŋkɛ, va nya ɓelahehwe ɓelahe ŋkɛ le kaberete. Katenza hweŋkwa ve kezha ŋkamte ŋkɛ kala nza ta hɛa ŋkɛ teghweme we.