Read kapsiki Zhɛne Ghwelə yitea Wəshi Mahalegə 23 Bible Online

Zhɛne Ghwelə yitea Wəshi Mahalegə 23 - kapsiki bible

Zhɛne Ghwelə yitea Wəshi Mahalegə 23

¹Hweŋkwa shɛ va wəndə kezha ɓelahe le kwete hwa mia yitenyɛ we. Kwa nza ŋkɛ ne, deke kaŋa yitenyɛ veyi geva hɛ.

²Ma wəndə nya ketare tare keɗema nya slahwe geva kwala yite ne, katedzehwa tsene ta mbelia Mahwətə ŋkɛ we.

³Ma wəndə nya keyake mbeli sawa mbe mene mefətekwə ne, katedzehwa tsene ta mbelia Mahwətə ŋkɛ we. Ya kwa meŋe ta shia ŋkɛ ne, katedzehwa tsene ta mbelia Mahwətə ŋkɛ we.

⁴Katedzehwa tsene ta mbelia Mahwətə ka Amon ba'a ka Mowab tɛape we. Ya kwa meŋe ta shi nya kesawa mbe hɛ ne, katedzehwa tsene ta mbelia Mahwətə ŋkɛ we.

⁵Va nya nza ŋkɛ ne, kese mbelia shɛhɛ kalə kakemane ŋayɛ kwa hweŋkwa le ɗafa ba'a yɛmə, vəa ŋkwa nya shave yɛ mbe Ɛzhipte we. Ama nahe hɛ kehekake Balam, wəzege ta Bɛyor, nde Petor nya mbe Mɛzopotami nya pelɛghə kezha bezla ŋayɛ.

⁶Ama hɛreɗɛ Shala Mahwətə ta ŋayɛ ɗema fa nda ŋa Balam. Pa Shala Mahwətə ta ŋayɛ zhɛrete bezla kawəpi kaŋa ŋayɛ, va nya ɗe ŋayɛ Shala Mahwətə ta ŋayɛ.

⁷Kala nza ta ŋayɛ teghweme ne, katezele kwelɛŋea nci keɗema zeɗe nza ta nci yɛ we.

⁸Kateɓelama ntsə ta ka Ɛdom yɛ, va nya nza hɛ kaka menəhɛ ŋayɛ we. Kateɓelama ntsə ta ka Ɛzhipte perə, va nya se yɛ kaka se se te hɛɗia nci we.

⁹Katedzehwa tsene ta mbelia Mahwətə kwa mahekene ta ka shihɛ nyi ketesawa mbe hɛ.

¹⁰Ma vəa ŋkwa nya tedzemte yɛ kampa le ka jaga ta ŋayɛ ba'a nya temenete ghedəkwəa ŋayɛ yɛ ne, kateya ghəa ŋayɛ yɛ va yayata wəsə kwa ndiremi.

¹¹Ma kezhɛrenyɛ kwete hwa ka sewajɛa ŋayɛ wale wale shave hwa viɗi va kameya nya kese kahwɛ yite ne, katesame ŋkɛ mbe ghedəkwə ba'a kateɗema ŋkɛ kazhɛne kadzawa taghanyɛ.

¹²Ma hetɛhwɛɗi ne, katepɛ ŋkɛ. Ma yipə le pəkwə ta veci ne, katezhɛne geva ŋkɛ kadzembe ghedəkwə.

¹³Katenza kwete ŋkwa va gheyɛ pelɛ te wəmbəa ghedəkwə. Tagha tedzawa bemte yɛ.

¹⁴Katenza yayata sewajɛ le wəsə kela ŋkwa hwa wəshia ŋkɛ. Ma vəa ŋkwa nya dzawa bemte ŋkɛ ne, katela ŋkwa ŋkɛ le ba'a katefə hɛɗi ŋkɛ kadzeghəa wevɛa ŋkɛ le.

¹⁵Kaŋkwa nya keveyi geva tekeleke tenza ghedəkwəa ŋayɛ, kwa nza ŋkɛ, kadzedzeghwa Shala Mahwətə ta ŋayɛ dzeyi kwa kezha ya ŋayɛ ba'a kezha ve ŋayɛ ka jaga ta ŋayɛ kadzembe dzeve. Ma kenakɛ wəsə nya kepəli nda hawe Mahwətə kwa ne, katenza ŋkɛ hwa gheyɛ we.

¹⁶Ma kehwɛnyɛ mava shave ki ghɛa nde sleke ŋkɛ kase kawəfərənyɛ te hɛɗia ŋayɛ ne, katezhɛne nda ŋkɛ yɛ kalə ke nde sleke ŋkɛ we.

¹⁷Katenza ŋkɛ te ŋkwa nya ɗe ŋkɛ hwa gheyɛ mbe kwete meleme ta ŋayɛ nya tentave ŋkɛ. Katesa nda yaka yɛ we.

¹⁸Nde Israyɛl shɛ, za keɗema male katemene mefətekwə nya keveyi geva tekeleke[1] we.

¹⁹Ma kezha yipə meɗe mɛ ne, katekele wəsə nya kemave male keɗema za te mene mefətekwə kase kadzembe ghɛa Shala Mahwətə ta ŋayɛ we. Kwa nza ŋkɛ ne, kambeli nyi kemene wəshi nyi ndiremi ndiremi kashasha hɛ sha Mahwətə.

²⁰Ma kenzəɓəave nda dewa ta cɛdɛ, wəsə kezeme keɗema kwete wəsə yɛ ke menə ŋayɛ ne, 'yɛwema yɛmə yɛ yite ma.

²¹Wərə yɛ ka'yɛwe yɛmə yitea ŋa nde mentiɓə, ama 'yɛwema yɛ yitea ŋa menə ŋayɛ ma. Ma tsagha ne, katewəpi ŋayɛ Shala Mahwətə ta ŋayɛ mbe yayata wəsə nya temene yɛ te hɛɗi nya tedzete yɛ kakele kaŋa ŋayɛ.

²²Ma kemeɗeyi nda ve wəsə yɛ ke Shala Mahwətə ta ŋayɛ ne, derama yɛ kezha yipə meɗe mɛa shɛ kadzawa ma. Ma keɗema ŋkɛ tsagha ne, katenzanyɛ Shala Mahwətə ta ŋayɛ ke'yɛwe va gheyɛ we, tsagha gɛ, kajaɗafa tenza ŋkɛ kaŋa ŋayɛ.

²³Ma keɗema yɛ mene meɗe mɛ ne, kenza ŋkɛ kajaɗafa va gheyɛ we.

²⁴Ama kemenete meɗe mɛ yɛ ne, yipəyi kwa tserame kala nya meɗeyi nda yɛ ke Shala Mahwətə ta ŋayɛ le mɛa ŋayɛ.

²⁵Ma kenza yɛ kajive mbe wəvea rɛzɛŋea nde ghedəkwəa ŋayɛ ne, wərə yɛ kazeme rɛzɛŋe behe behe kala nya ɗe yɛ. Ama hweŋkwa va gheyɛ kaslə le kwa kwaciga ta ŋayɛ we.

²⁶Ma kenza yɛ kajive mbe wəvea ha ta nde ghedəkwəa ŋayɛ ne, wərə yɛ kaɓeleve yɛ ghəa ŋkɛ le dzeve, ama katesla hɛ yɛ le hwətə we.