Read kapsiki Zhɛne Ghwelə yitea Wəshi Mahalegə 25 Bible Online

Zhɛne Ghwelə yitea Wəshi Mahalegə 25 - kapsiki bible

Zhɛne Ghwelə yitea Wəshi Mahalegə 25

¹Ma kenza ghena kwelɛ mbeli bake ne, katelə hɛ kadzete ghwə ba'a katemeha ghwə ta nci mbeli. Katenza kwete kawəndə nya ɗema fete ve ba'a katenza kwete kande fete.

²Ma kenakɛ mbeli wərə ɗa wəndə nya nza fete ve ne, kategeze nda nde meha ghwə ke mbeli kabərəɓə ŋkɛ te hɛɗi kwa kema ta ŋkɛ. Kateɗa ŋkɛ mbeli kala nza ta fete ta ŋkɛ.

³Ama katezlake wəfaɗemsə ɗa shɛ we. Ma keɗate ŋkɛ mbeli kwele ma ke nyagha ne, katekelemte geva zləvə te menə ŋayɛ kwa kema ta ŋayɛ.

⁴Katehwepe nda wəsə yɛ mbe mɛ ke mca nya keleke ha we.

⁵Ma kenza ka kesaka ma bake te ŋkwa nya kwetɛŋe nda mtenyɛ kwete wəndəa nci kaɗema wəzege teza ve ne, katewəme wəndə ŋkwərə wedea ŋkɛ we. Wəza meghekɛa za nta yanza hweŋkwa ve kalə shɛ: katekele ŋkɛ kamale ta ŋkɛ ba'a kateɓelahe ŋkɛ le.

⁶Ma nde ghate ta wəzege teza nya teya nde ne, kawəzege ta wəndə nya kemte nza ŋkɛ, yitea ɗema sebe kaza te sləa ŋkɛ te hɛɗia Israyɛl.

⁷Ma keɗema wəme male ta wəza meghekɛ wəndəa shɛ ne, katelə malea shɛ sha mbelia jama te ŋkwa kemeha ghwə, ma ke sha tegeze: «Nahe wəza meghekɛa za ɗa keɗema kezha nza sləa wəza meghekɛ te hɛɗia Israyɛl. Nahe ŋkɛ keɗema mene wəsə nya hi wəza meghekɛa za kamene laka 'ya.»

⁸Kateheka wəndəa shɛ mbelia jama nyi mbe meleme ba'a kategeze nda ghena hɛ. Ma kenza ŋkɛ mba kaɗema kele wede ta wəza meghekɛ ne,

⁹katehende nda geva malea shɛ kwa ntsə ta mbelia jama, kateseɗe tsahwa nde shave mbe seɗa ta ŋkɛ ba'a katentifə nda ndɛghwɛɗɛ nde kwa kema, ma ke sha tegeze: «Wa nya tsetse mene nda mbeli ke wəndə nya keɗema kaya nda wəzege teza ke wəza meghekɛ!»

¹⁰Ma se te vəa shɛ mbe Israyɛl ne, “hwelefe ta ka seɗemte tsahwa” teheka mbeli nyi kwa peləa wəndəa shɛ mbeli.

¹¹Ma kenza zhili bake kampa, nda hendeke geva male ta kwete wəndəa nci kezha mbele za nta shave mbe dzeve ta ghema ta ŋkɛ, ma kehaghe dzeve nde kezha kese wəndəa shɛ te yɛ sepele ne,

¹²katezhɛ heli yɛ yitea malea shɛ we: katetsasle dzeve yɛ te.

¹³Katefə wəshi kedzeghe ɗaŋeɗa ta wəshi yɛ bake keghə keghə kwa slibəa ŋayɛ, nya wəba ba'a nya ɓɛhwɛ we.

¹⁴Katenza agweda kedzeghe wəshi bake keghə keghə ki ghɛa ŋayɛ, nya wəba ba'a nya ɓɛhwɛ we.

¹⁵Deke wəshi kedzeghe ɗaŋeɗa ta wəshi nyi tiɗiɗi ba'a agweda nyi tiɗiɗi ka tenza va gheyɛ. Ma tsagha ne, katetemə yɛ kwele kwele te hɛɗi nya teve ŋayɛ Shala Mahwətə ta ŋayɛ.

¹⁶Kwa nza ŋkɛ ma yayata wəndə nya kemene wəsə nya kala nyagha, nya kemene mbəɗəkwə ne, wəsə nya ndiremi kashasha yamene ŋkɛ kwa kema ta Shala Mahwətə ta ŋayɛ.

¹⁷Zəzəte mə wəsə nya menete ŋayɛ ka Amalɛk vəa ŋkwa nya nza yɛ kwa hweŋkwa, kwa sebe ta shave ta ŋayɛ mbe Ɛzhipte.

¹⁸Kese hɛ kaghazlənə va Shala we, nahe hɛ kehave nda mpa ke mbelia ŋayɛ kwa sebe, vəa ŋkwa nya nza hɛ keleɓe leɓe ba'a laŋase laŋase kwa hweŋkwa.

¹⁹Ma tsetsenya ne, kateve ŋayɛ zhɛne mpi Shala Mahwətə ta ŋayɛ kwa kema ta pɛtɛa ka ghema ta ŋayɛ, te hɛɗi nya teve ŋayɛ nya Shala Mahwətə ta ŋayɛ kezha kele yɛ kaŋa ŋayɛ. Kateza yɛ te ka Amalɛk. Ma tsagha ne, wəndə shɛ katezhɛne kazəzə hɛ te hɛɗi lema we. Zaghəyitema ghena nya yɛ ma!