Read kapsiki Zhɛne Ghwelə yitea Wəshi Mahalegə 27 Bible Online

Zhɛne Ghwelə yitea Wəshi Mahalegə 27 - kapsiki bible

Zhɛne Ghwelə yitea Wəshi Mahalegə 27

¹Ma ke yɛ Moyize le mbelia jama ta ka Israyɛl sha mbeli: «Katehawe yɛ va ghena nyi geze ŋayɛ nyi 'ya ɓeshi.

²Ma te veci nya tejive yɛ te Zhəwrdɛŋe kezha dzete hɛɗi nya ve ŋayɛ Shala Mahwətə ta ŋayɛ ne, katemɓe gɛaŋa nyi jama jama yɛ ba'a katefi hɛ yɛ le teɓehwe kwa tɛawetɛa.

³Katerafe yɛ ghena nyi mbe wəsə mahalegə nya yɛ pɛtɛ te gɛaŋa shɛhɛ, vəa ŋkwa nya tejive ŋayɛ yɛ te Zhəwrdɛŋe. Ma tsagha ne, katedzete hɛɗi nya ve ŋayɛ Shala Mahwətə ta ŋayɛ, hɛɗi nya hwɛ yɛ ŋ'wa le yɛməa mze te, kala nya meɗeyi ŋayɛ Shala Mahwətə ta ka shihɛ ŋayɛ.

⁴Ma vəa ŋkwa nya tejive ŋayɛ yɛ te Zhəwrdɛŋe ne, katemɓe gɛaŋa shɛhɛ yɛ pelɛ ghweme ta Garizim, kala nya geze ŋayɛ 'ya ɓeshi, katefi hɛ yɛ le teɓehwe kwa tɛawetɛa.

⁵Pelɛagha ne, kateŋa nda reghwetɛ yɛ ke Shala Mahwətə ta ŋayɛ le pelɛ nyi ghama lɛ kakwaɗakɛ.

⁶Deke le pelɛ nyi sema mbeli katsehe teŋa reghwetɛa shɛ yɛ ke Shala Mahwətə ta ŋayɛ. Katedzeghe nda melɛ kwa tere tere yɛ ke Shala Mahwətə ta ŋayɛ te reghwetɛa shɛ.

⁷Katedzeghe melɛ kejikə ghə yɛ perə. Te ŋkwa shɛ tezeme yɛ ba'a katezlama yɛ kwa kema ta Shala Mahwətə ta ŋayɛ.

⁸Katerafe ghena nyi mbe wəsə mahalegə nya yɛ pɛtɛ te gɛaŋa shɛhɛ, laka tsasle ta nci megela kadzete hɛ.»

⁹Kwa sebe ta ŋkɛ, ma ke yɛ Moyize le ka dzeghe Shala nyi kaka Lɛvi sha ka Israyɛl: «Ka Israyɛl, nza mə divə ba'a fa mə ghena! Ma ɓeshi ne, nahe Shala Mahwətə ta ŋayɛ kezhɛrete ŋayɛ kambelia ŋkɛ.

¹⁰Katefa nda ghena yɛ ke Shala Mahwətə ta ŋayɛ, katemene slene yɛ le ghena nyi gezete ŋkɛ ba'a wəshi mahalegəa ŋkɛ nyi ve ŋayɛ nyi 'ya ɓeshi.»

¹¹Ma te vecia shɛnyɛ ne, ma ke Moyize gezave nda ke mbeli:

¹²«Ma vəa ŋkwa nya tejive ŋayɛ yɛ te Zhəwrdɛŋe ne, kateghereŋe hwelefefia Simɛyon, Lɛvi, Zhəwda, Isakar, Zhozɛf ba'a Bɛnjamɛn pelɛ ghweme ta Garizim kezha wəpi ŋkwa.

¹³Ma hwelefefia Rəbɛn, Gad, Asɛr, Zabəlon, Dan ba'a Nɛftali ne, pelɛ ghweme ta Ɛbal teghereŋe hɛ kezha bezla ŋkwa.»

¹⁴Ma ke ka Lɛvi sha tezlape nda ke pɛtɛa ka Israyɛl:

¹⁵Kebezla bezla nza wəndə nya ketemene wəsə nya zhɛre mbeli kashala yitea sheghwə keɗema yitea mze kezha hawe ve tewəfərə. Kawəsə nya ndiremi kashasha wəsə nya menete nde mene wəshi le dzeve ta ŋkɛ sha Mahwətə. Ma ke mbeli pɛtɛ sha tezhɛne: Amɛn!

¹⁶Kebezla bezla nza wəndə nya keɗema kahawe va yitenyɛ ba'a meghekɛ. Ma ke mbeli pɛtɛ sha tezhɛne: Amɛn!

¹⁷Kebezla bezla nza wəndə nya kehende ghala kadzembe wəvea nde ghala ta ŋkɛ. Ma ke mbeli pɛtɛ sha tezhɛne: Amɛn!

¹⁸Kebezla bezla nza wəndə nya kencɛ nda hweŋkwa nya ndiremi ke ghwələ. Ma ke mbeli pɛtɛ sha tezhɛne: Amɛn!

¹⁹Kebezla bezla nza wəndə nya kemeha nda ghwə mbəɗəkwə ke nde se se, ke mezhɛte ba'a ke male wede. Ma ke mbeli pɛtɛ sha tezhɛne: Amɛn!

²⁰Kebezla bezla nza wəndə nya keɓelahe le kwete hwa mia yitenyɛ, kwa nza ŋkɛ ne, hweŋkwa shɛ ve we. Deke ŋa yitenyɛ nde! Ma ke mbeli pɛtɛ sha tezhɛne: Amɛn!

²¹Kebezla bezla nza wəndə nya keɓelahe le wəsə keseɗa! Ma ke mbeli pɛtɛ sha tezhɛne: Amɛn!

²²Kebezla bezla nza wəndə nya keɓelahe le wəzha ta yitenyɛ keɗema le wəzha ta meghekɛ! Ma ke mbeli pɛtɛ sha tezhɛne: Amɛn!

²³Kebezla bezla nza wəndə nya keɓelahe le meghekɛa male ta ŋkɛ! Ma ke mbeli pɛtɛ sha tezhɛne: Amɛn!

²⁴Kebezla bezla nza wəndə nya kepesle wəndə tewəfərə! Ma ke mbeli pɛtɛ sha tezhɛne: Amɛn!

²⁵Kebezla bezla nza wəndə nya kekele cɛdɛ kezha pesle wəndə nya ɗema fete ve! Ma ke mbeli pɛtɛ sha tezhɛne: Amɛn!

²⁶Kebezla bezla nza wəndə nya keɗema kayipə ghena nyi mbe wəsə mahalegə nya kadzawa ba'a nya keɗema kamene slene le hɛ! Ma ke mbeli pɛtɛ sha tezhɛne: Amɛn!