Read kapsiki Zhɛne Ghwelə yitea Wəshi Mahalegə 9 Bible Online

Zhɛne Ghwelə yitea Wəshi Mahalegə 9 - kapsiki bible

Zhɛne Ghwelə yitea Wəshi Mahalegə 9

¹Ka Israyɛl, fa mə! Takwa takwa yɛ katejive te Zhəwrdɛŋe kezha ŋka hwelefefi nyi kwele kwele ma ba'a nyi berete berete ma ke gheyɛ. Katefə meleme ta nci nyi jama jama nyi nza zli yitea hɛ ntsake yitea ghweme yɛ.

²Katehərə hwelefefia Anak, mbeli nyi berete berete ba'a nyi bebiya bebiya nyi yɛ. Nahe yɛ keɗepe ma ke mbeli sha geze te hɛ: «Wa nde nza kaghereŋe kwa kema ta hwelefefia Anak wa?»

³Kateɗepe yɛ ɓeshi Shala Mahwətə ta ŋayɛ nde tedzeghwa te kema ta ŋayɛ kala ghwə nya ketere wəshi pɛtɛ. Gheŋkɛ nde teza sebe te hɛ, gheŋkɛ nde teɗa hɛ mbe kema ta ŋayɛ. Kateŋka hɛ yɛ ba'a kateza sebe yɛ te hɛ kahe kahe kala nya meɗeyi Mahwətə.

⁴Ma vəa ŋkwa nya teŋkamte hɛ Shala Mahwətə ta ŋayɛ te kema ta ŋayɛ ne, zəzəma yɛ mbe ghəa ŋayɛ: «Va nya hi ŋkɛ va gheɓəmə nda pelave ɓəmə hweŋkwa Mahwətə kakele hɛɗi nya kaŋa ɓəmə», pe yɛ ma. Tsagha ŋkɛ we, va nya menete fete hwelefefia shɛhɛ nda ŋkamte hɛ Mahwətə te kema ta ŋayɛ.

⁵Ma nda kele hɛɗia nci yɛ ne, kenza va nya nza yɛ tiɗiɗi keɗema va nya nza wənəa ŋayɛ tiɗiɗi we. Kaganda ne, va nya menete fete hwelefefia shɛhɛ nda ŋkamte hɛ Shala Mahwətə ta ŋayɛ te kema ta ŋayɛ. Ma nda menete ŋkɛ ɓiyitsa ne, kezha yipə meɗe mɛ nya menete nda ŋkɛ ke ka shihɛ ŋayɛ Abraham, Izak ba'a Zhakob.

⁶Ɗepete mə megela, va nya nza yɛ tiɗiɗi nda ve ŋayɛ hɛɗi nya ganyɛ nya Shala Mahwətə ta ŋayɛ kaŋa ŋayɛ we, kwa nza ŋkɛ ne, mbeli nyi ntɛaŋentɛa ghə yɛ.

⁷Zəzəte mə tsema tsema mtseke hwepe wənəa Shala Mahwətə ta ŋayɛ yɛ te ɓerama. Zaghəyitema yɛ tɛape ma. Ma se te veci nya shave yɛ mbe Ɛzhipte hwa'a te ntsehe ta ŋayɛ teke ne, nahe yɛ kese kaka fa nda ma ghena ke Mahwətə.

⁸Ma yitea ghweme ta Horɛb ne, nahe yɛ kebezemte nda wənə ke Mahwətə. Kwele kwele bezenyɛ wənəa Mahwətə va gheyɛ, yare keza sebe ŋkɛ te gheyɛ.

⁹Ma kwa dzeme ghweme 'ya kezha fə pelɛ nyi slapesla slapesla, yɛ pelɛa jikə geva nya menete Mahwətə le gheyɛ ne, nahe 'ya kenza ɗa pelɛ ghweme kaveci wəfaɗemsə ba'a kaviɗi wəfaɗemsə, kaɗema kezehwe ɗafa ba'a kesakɛ yɛmə.

¹⁰Pa Mahwətə fəave ɗa pelɛ nyi slapesla slapesla bake nyi rafate wəshi mahalegəa ŋkɛ ŋkɛ pɛtɛ te hɛ le dzeve ta ŋkɛ. Shave mbe tepe ta ghwə gezete ŋayɛ hɛ ŋkɛ, te veci nya se yɛ pɛtɛ rəkwə yitea ghweme.

¹¹Ma kwetere wəmbəa veci wəfaɗemsə ba'a viɗi wəfaɗemsə ne, pa Mahwətə fəave ɗa pelɛ nyi slapesla slapesla nyi bake, pelɛ nyi slapesla slapesla ta jikə geva.

¹²Tagha gɛ, ma ke Mahwətə sha 'ya: «Dzawa ŋa kahe kahe, kwa nza ŋkɛ nahe mbeli nyi fəakave nyi na mbe Ɛzhipte kemenete jaɗafa nya wəba. Kese hɛ katemə kwa hweŋkwa nya ncɛte nda 'ya ke hɛ we. Nahe hɛ kevɛsəte kwete shala yitea mze.»

¹³Kwa sebe ta ŋkɛ, ma ke Mahwətə sha 'ya: «Tsetsenya gɛ ne, nahe 'ya keneweve mbeli nyi: mbeli nyi ntɛaŋentɛa ghə hɛ.

¹⁴Pelakɛ ɗa kaza sebe 'ya te hɛ ba'a kaza sləa nci te hɛɗi lema. Ma kwa sebe ta ŋkɛ ne, kateya hwelefe nya berete ma ba'a nya kwele kwele ma ke hɛ 'ya sawa hwa gha.»

¹⁵Pa 'ya zhɛnakawa geva sawa pelɛ ghweme nya kaghwə le pelɛ nyi slapesla slapesla ta jikə geva bake yitea dzeve ta ɗa nyi bake.

¹⁶Tagha gɛ, pa 'ya nakɛ nahe yɛ kebezemte nda ghena ke Shala Mahwətə ta ŋayɛ. Nahe yɛ kevɛsəte leve ta sla le mze. Nahe yɛ kesame ŋayɛ kahe kahe kwa hweŋkwa nya ncɛte ŋayɛ Mahwətə.

¹⁷Tagha gɛ, pa 'ya betakɛ pelɛ nyi slapesla slapesla nyi bake yitea dzeve va 'ya ba'a pa 'ya mpəmte hɛ kwa ntsə ta ŋayɛ.

¹⁸Kwa sebe ta ŋkɛ, gwəɗəŋə 'ya ntiŋə ghə mbe hɛɗi kwa kema ta Mahwətə. Kala nya kaghate ne, pa 'ya menete veci wəfaɗemsə ba'a viɗi wəfaɗemsə kaɗema kezehwe ɗafa ba'a kesakɛ yɛmə tewəmbəreke pɛtɛa jaɗafa nyi menete yɛ. Nahe yɛ kemenete wəsə nya ndiremi kwa ntsə ta Mahwətə laka mene wəsə nya keɗema zeɗehwe nda.

¹⁹Nahe 'ya keghazlənə ɗa va ghwə ta hwepe wənəa Mahwətə kənəa gheyɛ, vəa ŋkwa nya ɗe ŋkɛ kaza sebe te gheyɛ. Ama pa Mahwətə fate səkwə ghə ta ɗa ɓiyitsa vəa ŋkwa shɛ.

²⁰Kwele kwele hwepete wənə Mahwətə va Aron perə, yare kepesle ŋkɛ, ama pa 'ya səkwəte ghə kaŋa Aron vəa ŋkwa shɛ perə.

²¹Laŋe 'ya te leve ta sla shɛ, wəsə jaɗafa nya vɛsəte nya yɛ, pa 'ya negheyi mbe ghwə. Kwa sebe ta ŋkɛ, pa 'ya mpəmte ba'a həmte kwerɗike ɗike, pa 'ya beteyite keləwəa ŋkɛ yitea yɛmə nya kehwɛ sawa pelɛ ghweme.

²²Ma mbe Tabɛra, Masa ba'a Kibrot-Tava ne, nahe yɛ kehwepete nda wənəa Mahwətə.

²³Ma mbe Kadɛs-Barnɛya ne, nahe Mahwətə keɗe kaghwene ŋayɛ, ma ke sha gheyɛ: «Kwiɗi mə kadzeme kakele hɛɗi nya ve ŋayɛ 'ya.» Nahe yɛ kese kaka fa nda ma ghena ke Shala Mahwətə ta ŋayɛ, kese yɛ kave nda ghəa ŋayɛ ba'a kafa nda ŋa ŋkɛ we.

²⁴Ghala se te veci nya ɗepe ŋayɛ Mahwətə ne, kaka fa nda ma ghena se yɛ.

²⁵Ma kwa gezete Mahwətə kaza sebe te gheyɛ ne, nahe 'ya kegwəɗəŋə ɗa kwa kema ta Mahwətə kaveci wəfaɗemsə ba'a kaviɗi wəfaɗemsə.

²⁶Pa 'ya səkwəte Mahwətə, ma 'ya shɛ: «Shala Mahwətə, zama sebe na te mbeli nyi kaŋa ŋa nyi, nyi mbeɗeke nyi na laka kwelea ŋa ba'a nyi fəakave nyi na mbe Ɛzhipte laka berete ta ŋa nya wəba ma.

²⁷Zəzəte ka mene slene ta ŋa Abraham, Izak ba'a Zhakob. Ɓelama ntɛaŋentɛa ghəa mbeli, 'yaghwa mehele ta nci ba'a jaɗafa ta nci na ma.

²⁸Yagha mbeli tegeze mbe hɛɗi nya fəakave n'yɛ na: ‹Kapesle Mahwətə yitea fə hɛ kadzete hɛɗi nya meɗeyi nda ŋkɛ ke hɛ we. Kaɗe ntsə ta nci ŋkɛ we, vatse fəakave hɛ ŋkɛ kezha mpə hɛ te ɓerama›, ke hɛ.

²⁹Ndagwara mbelia ŋa hɛ, mbelia ŋa nyi fəakave na laka berete ta ŋa nya wəba ba'a laka kwelea ŋa.»