Read kapsiki Zhaŋe 12 Bible Online

Zhaŋe 12 - kapsiki bible

Zhaŋe 12

¹Tene hɛ ŋkwaŋe yitea gəsəkəa Pake. Ntəŋə Yɛsə kadzawa Bɛtani, meleme ta yɛ Lazare, wəndə nya kelakame ŋkɛ same kwa kwele le mpi.

²Tagha ne, pa mbeli menete nda wəsə kezeme kazləvəa ŋkɛ, Marte nde hi nda wəshia shɛhɛ. Hwa mbeli nyi kezeme ɗafa shɛ Lazare.

³Pa Mari kelete kwa bake ta bela ta litrəa 'wərdə ganyɛ nya jakeja. Ntake nde kasheke te seɗa ta Yɛsə ba'a kasehwe le shintia ghəa nta. Ka'wərdəa shɛ zəŋwə ŋkwa nya ki ghɛ shɛ pɛtɛ.

⁴Ma ke Zhəwdas Iskariyote, wəndə nya ketepamte Yɛsə hwa mbeli nyi ketəkwə təkwə:

⁵«Va wa ɗema mbeli pamte 'wərdə nya yitea ve nda cɛdɛ nya kese te kaslibə mahekenemsə gwəmsə ke ka titikwəa kɛfi wa?»

⁶Va nya zhɛ heli ŋkɛ yitea ka titikwəa kɛfi nda gezete ghena shɛ Zhəwdas tsagha we, ama va nya nza ŋkɛ kande ghərə. Gheŋkɛ yanza slibə pase ve, kaghərə cɛdɛ nya kwa ŋkɛ.

⁷Ma ke Yɛsə shɛ: «Zlenekɛ male nyagha veyi 'wərdəa shɛ nde yitea fi ɗa nde te veci nya tela ɗa mbeli.

⁸Teke ka titikwəa kɛfi keveci keveci hwa gheyɛ, ama 'ya ne, teke tenza 'ya keveci keveci hwa gheyɛ we.»

⁹Nahe ka Zhəwif nyi ketsenete geva tipə tipə kefave se ta Yɛsə kwa Bɛtani. Deke yitea newe Yɛsə se hɛ we, ama yitea newe Lazare nya kelakame Yɛsə same kwa kwele le mpi.

¹⁰Pa mbeli nyi te ghəa ka dzeghe Shala tsahwe ghena ta nci yitea pesle Lazare perə,

¹¹va nya nza ŋkɛ kwele mbeli nyi kelənji ba'a nyi keyɛhwe Yɛsə.

¹²Te hendɛ ta ŋkwa, nahe mbeli nyi kese yitea gəsəkəa Pake kwele kwele kefa se ta Yɛsə kadzeme Zhɛrəzalɛm.

¹³Pa hɛ tsasleve dzeve ta peha kalə kakemane kwa hweŋkwa. Ma ke hɛ zlapete: «Tsahe ɓəmə Shala tehwə ghweme. Kewəpi wəpi nza wəndə nya kese te sləa Mahwətə. Wəpi yawəpi meghea ka Israyɛl ŋkɛ.»

¹⁴Pa Yɛsə nakɛ kwete leve ta kwara, tarame ŋkɛ pelɛ kala nya kerafete geva mbe Ghena ta Shala:

¹⁵«Meleme ta Siyon, ghazlənəma na ma: Wa nya meghea ŋa nya kasame te leve ta kwara.»

¹⁶Kenaka mbeli nyi ketəkwə təkwə Yɛsə kafave ghena shɛ we. Ma kwa dzembe zləvəa ŋkɛ Yɛsə ne, ntake hɛ kazəzə ghena nya kerafete geva mbe Ghena ta Shala te ghəa ŋkɛ, nahe mbeli kemenete wəsə nya gezete ghena shɛ.

¹⁷Ntake mbeli nyi tagha nda hekakame Lazare Yɛsə same kwa kwele le mpi kanegha fete te wəshi nyi nakɛ hɛ.

¹⁸Vatse se mbeli kakemane Yɛsə kwa hweŋkwa, kwa nza nde nahe hɛ kefave wəsə meŋele nya menete ŋkɛ.

¹⁹Tagha gɛ, ma ke ka Fariziyɛn kwelɛ ghəa nci: «Newe mə gɛ, kwete wəsə shɛ kamenete mə ɓiyitsa we. Pɛtɛ mbeli katəkwə təkwə tsetsenya.»

²⁰Pa kweci ka Grɛk hwa mbeli nyi kedzeme Zhɛrəzalɛm kahawe va Shala te vecia gəsəkə.

²¹Pa hɛ hendave nda geva ke Filipe nde Bɛtesayida nya te hɛɗia ka Galilɛ, ma ke hɛ shɛ: «Wəndə ɗa, kaɗe n'yɛ begeme le Yɛsə.»

²²Cape Filipe kalə kageze nda ke Andrɛ. Ntəŋə hɛ bake bake kalə kageze nda ke Yɛsə.

²³Ma ke Yɛsə sha hɛ: «Nahe və nya teŋ'we zləvəa ŋkɛ Wəzege ta za kwa kedzeghete geva tsetsenya.

²⁴Kaganda, ma 'ya sha gheyɛ: ma keɗema ha nya keteɗe te hɛɗi kemte ne, kwetɛŋenyɛ nza ŋkɛ. Ama ma kemte ŋkɛ ne, kwele kwele teya ŋkɛ.

²⁵Yayata wəndə nya keɗehwe mpia ŋkɛ ne, kateza ŋkɛ, ama wəndə nya keɗema mpia ŋkɛ teke te hɛɗi nya ne, mpi nya kaghala ghala yatekemave ŋkɛ.

²⁶Keɗe wəndə kamene slene ta ɗa ne, pa katəkwə təkwə ɗa. Te ŋkwa nya nza 'ya, tagha tenza wəndə nya kemene slene ta ɗa. Kateve nda zləvə Yita ke wəndəa shɛ.

²⁷Kwetɛ kwetɛŋe mehele ta ɗa tsetsenya. Wa 'ya sha geze tse gɛ. Kashɛ 'ya geze, Yita, fɛake yaka nya tesa nya 'ya mbe və nya, 'ya tse gɛ na? Va nya nza ŋkɛ kezha və nya se 'ya.

²⁸Yita, vate zləvə te sləa ŋa tsetsenya.» Tagha gɛ, ma ke kwete ghena sawa pelɛ ghweme: «Nahe 'ya kevate zləvə te, kateve zləvə 'ya te zhɛkwa.»

²⁹Ma ke mbeli nyi tagha na: «Va nde gaka.» Ma ke kweci: «Ewə, nde ghwene ta Shala nde se kageze nda ghena.»

³⁰Ma ke Yɛsə sha hɛ: «Kaŋa ɗa gezeke geva ghena nya sawa pelɛ ghweme we, ama kaŋa ŋayɛ.

³¹Tsetsenya ne, katemeha ghwə Shala te mbeli nyi te hɛɗi. Tsetsenya ne, kateŋkamte meghe nya ndiremia mehele nya Shala te hɛɗi nya.

³²Ma 'ya le ŋa ɗa, ma vəa ŋkwa nya tesletete geva 'ya dzeme yitea ghweme ne, katefə mbeli 'ya kase sha 'ya pɛtɛ.»

³³Ma laka ghena shɛhɛ ne, ncɛ yancɛ Yɛsə tsema tsema temte ŋkɛ.

³⁴Ma ke mbeli nyi ketsenete geva tagha: «Nahe n'yɛ kejaŋgate mbe palepa ta wəsə mahalegə, ma Mɛsi, wəndə nya ghweneke Shala ne, kaghala ghala tenza ŋkɛ, tsema geze na kateslete Wəzege ta za mbeli dzeme yitea ghweme pa wa? Wa Wəzege ta za shɛ wa?»

³⁵Ma ke Yɛsə sha hɛ: «Mbanyɛ waŋe kahɛ ɓɛhwɛ hwa gheyɛ. Dzeghwa mə tsetsenya yitea waŋea shɛ yagha ŋkwesle tese kaŋzlete ŋayɛ. Va nya nza ŋkɛ wəndə nya kedzeghwa te ŋkwesle ne, keɗepe ŋkwa nya dzeghwa ŋkɛ te we.

³⁶Yɛte mə waŋe mbanyɛ ŋkɛ kaɓele hwa gheyɛ, yitea nza yɛ kambelia waŋe.» Ma kwa gezemte ghena Yɛsə kala nya ne, pa slənyɛ ba'a wəfərənyɛ va hɛ.

³⁷Ya tsemanyɛ menete wəshi meŋele Yɛsə mbe kema ta nci ne, ashɛ hɛ kayɛ ŋkɛ we.

³⁸Wa nya tsetse menete geva wəsə nya gezete Ɛzayi, nde mɛ ŋkwa: «Shala Mahwətə, wa nde yɛte ghena ta n'yɛ wa? Ke wa ncɛte nda berete ta ŋkɛ Shala wa?»

³⁹Nahe Ɛzayi gezete va wa va wa shaŋe mbelia shɛhɛ kayɛ, ma ke:

⁴⁰«Nahe Shala keghwəghwələpəmte hɛ, nahe ŋkɛ keŋzleŋzlete mehele ta nci, yitea ɗema ntsə ta nci kanakɛ ŋkwa ba'a yitea ɗema mehele ta nci kafave ghena. Vatse ɗema hɛ shɛ zhɛre geva kase sha 'ya kezha mbe hɛ 'ya.»

⁴¹Ma nda gezete Ɛzayi kala nya ne, va nya nakɛ zləvəa Yɛsə ŋkɛ, va nya gezete ghena ŋkɛ te ghəa ŋkɛ.

⁴²Ya tsemanyɛ nza ŋkɛ tsagha, kwele kwele kweci hwa mbelia jama ta ka Zhəwif nyi keyɛte Yɛsə. Ama va ghazlənə va ka Fariziyɛn ne, hɛreɗɛ hɛ ɗema ncɛ ghəa nci yagha mbeli teŋkamte hɛ shave mbe cɛ kesəkwə ghə.

⁴³Ɗe ma zləvə nya kese hɛ va mbeli ke ŋa Shala.

⁴⁴Ma ke Yɛsə zlapete: «Yayata wəndə nya keyɛte ɗa ne, deke 'ya yayɛte ŋkɛ we, ama wəndə nya keghweneke ɗa perə.

⁴⁵Yayata wəndə nya kenakɛ ɗa ne, nahe ŋkɛ kenakɛ wəndə nya keghweneke ɗa ɓiyitsa.

⁴⁶Nahe 'ya kese te hɛɗi kala waŋe, yitea ɗema wəndə nya keyɛte ɗa kanza mbe ŋkwesle.

⁴⁷Mbeli nyi kefate ghena ta ɗa nda ɗema hɛ mene slene le ne, 'ya nde meha ghwə te hɛ we, kwa nza ŋkɛ ma se ta ɗa hwa mbeli ne, yitea meha ghwə te hɛ we, yitea mbele hɛ.

⁴⁸Ma wəndə nya keɓela ɗa ma ne, nya keɗema yɛ ghena ta ɗa ne, katemeha ghwə mbeli te, ghena nya gezete 'ya nde temeha ghwə te kwa keɗaŋe ta hɛ.

⁴⁹Kwa nza ŋkɛ ŋa ɗa ghena nya geze 'ya we, ama Yiteyɛ ɗa nya keghweneke ɗa nde gezete ɗa ghena nyi geze 'ya.

⁵⁰Nahe 'ya keɗepe, ma ghena nya gezeke ŋkɛ ne, gheŋkɛ nde ve nda mpi nya kaghala ghala ke mbeli. Nya gezete ɗa Yiteyɛ ɗa, kala gheŋkɛ geze nda 'ya ke mbeli.»