Read kapsiki Zhaŋe 13 Bible Online

Zhaŋe 13 - kapsiki bible

Zhaŋe 13

¹Nda tenaka gəsəkəa Pake, nahe Yɛsə keɗepe nahe vəa ŋkɛ kedzeghete geva kasərə hɛɗi nya yitea lə sha Yitenyɛ. Mbe ɗe mbeli nyi ketəkwə təkwə nyi kwake te hɛɗi ŋkɛ shanda. Nahe ŋkɛ keɗete hɛ hwa'a te kwa keɗaŋe.

²Kazeme ɗafa yɛ Yɛsə le mbeli nyi ketəkwə təkwə. Nahe gətəli kevame zəzə mbe wənəa Zhəwdas, wəzege ta Simon Iskariyote, yitea pamte Yɛsə.

³Nahe Yɛsə keɗepe pɛtɛ ndeke nda wəshi Yitenyɛ mbe dzeve ta ŋkɛ. Nahe ŋkɛ keɗepe se laka Shala se ŋkɛ, katezhɛne geva ŋkɛ kalə shɛ zhɛkwa.

⁴Pa Yɛsə sate, pa seɗemte kwete lekwesa ta ŋkɛ, laŋe kelete zlave pa hwepekɛ hwə le.

⁵Kwa sebe ta ŋkɛ pa gəve yɛmə kwa kwapɛ, ntake kapɛ seɗa ta mbeli nyi ketəkwə təkwə le, kasehwe yɛmə ŋkɛ sawa te hɛ le zlave nya hwepete hwə ŋkɛ le.

⁶Hwa'a ŋkɛ sha Simon Piyɛre yitea pɛ nda ŋa ŋkɛ seɗa. Ma ke Piyɛre shɛ: «Nde sleke ŋkwa, gha nde pɛ ɗa seɗa na?»

⁷Ma ke Yɛsə shɛ: «Kenaka na kaɗepe wəsə nya mene 'ya tsetsenya we, te kwete veci teɗepe na.»

⁸Ma ke Piyɛre shɛ: «Katepɛ ɗa seɗa na tɛape we.» Ma ke Yɛsə shɛ: «Ma keɗema 'ya kepɛkɛ ŋa seɗa ne, wəsə shɛ kateŋ'we na mbe wəsə nya tekele 'ya kase we.»

⁹Ma ke Simon Piyɛre shɛ: «Ma nda tsagha nde ne, deke seɗa yapɛ na we, ama pɛkɛ ɗa yɛ dzeve ba'a ghə perə.»

¹⁰Ma ke Yɛsə shɛ: «Ma wəndə nya kepɛkɛ pɛ ne, kazhɛne ŋkɛ kaɗe kapɛ we, deke yɛ seɗa. Kwa nza ŋkɛ ne, pɛtɛa geva ta ŋkɛ wɛŋe. Ma gheyɛ ne, nahe yɛ kenza wɛŋe wɛŋe, ama pɛtɛa ŋayɛ we.»

¹¹Nahe Yɛsə keɗepe wəndə nya ketepamte ŋkɛ, vatse gɛ, ma ke: «Kenza yɛ pɛtɛ wɛŋe wɛŋe we.»

¹²Pɛmtema ta Yɛsə ke seɗa ta nci, seɗakwe ŋkɛ sha lekwesa ta ŋkɛ, ntishɛ ŋkɛ te ŋkwa ŋkɛ, ma ke sha hɛ: «Nahe yɛ keɗepe wəsə nya menete ŋayɛ nya 'ya na?

¹³Nde sleke ɗa, pe yɛ sha 'ya, Nde sleke ŋkwa, pe yɛ sha 'ya, kaganda ŋayɛ, gheŋkɛa shɛ 'ya deŋwa.

¹⁴Kwa nza ŋkɛ Nde sleke ŋkwa 'ya ba'a Nde sleke ŋayɛ 'ya ne, nahe 'ya kepɛkɛ ŋayɛ seɗa ta ŋayɛ, nahe ŋkɛ kehite geva yitea pɛ nda yɛ ke ghəa ŋayɛ perə.

¹⁵Nahe 'ya kencɛte ŋayɛ hweŋkwa yitea mene yɛ kala nya menete ŋayɛ 'ya.

¹⁶Kaganda ne, ma 'ya sha gheyɛ: mava shɛ kanza kwele ma ke wəndə nya kesleke we, kanza wəndə nya ghwenakɛ mbeli kwele ma ke wəndə nya keghwenakɛ we.

¹⁷Tsetsenya ne, nahe yɛ keɗepe ghena shɛ, katezlama yɛ kemenete yɛ.

¹⁸Gheyɛ pɛtɛ yageze 'ya we, nahe 'ya keɗepe mbeli nyi tsehave 'ya. Nahe ŋkɛ kemenete geva kala nya yitea nza wəshi nyi kerafete geva mbe Ghena ta Shala kaganda, ma ke: Wəndə nya kezehwe ɗafa le 'ya nde zhɛrenyɛ kande ghema ta ɗa.

¹⁹Tsetsenyanyɛ geze ŋayɛ 'ya tewə wəsəa shɛ kemenete geva, yitea yɛte yɛ veci nya temene geva ŋkɛ: 'Ya ya ka'ya.

²⁰Kaganda geze ŋayɛ 'ya, ma wəndə nya kekemaneve wəndə nya ghwenakɛ 'ya ne, 'ya yakemaneve ŋkɛ. Ma wəndə nya kekemaneve ɗa ne, wəndə nya keghweneke ɗa yakemaneve ŋkɛ.»

²¹Kwa gezemte ghena nyi Yɛsə ne, pa mehele ta ŋkɛ tazemte geva kwetɛ kwetɛŋe, ma ke: «Kaganda ne, ma 'ya sha gheyɛ: kwete wəndə hwa gheyɛ katepamte ɗa.»

²²Ntake mbeli nyi ketəkwə təkwə kanewe ghəa nci, ma ke hɛ: «Wa wəndə nya geze ghena nya ŋkɛ te wa?»

²³Ntishɛnyɛ kwete wəndə nya ɗe ŋkɛ za ma hwa nyi ketəkwə təkwə dzeme vare Yɛsə.

²⁴Deghwaɗe Simon Piyɛre deghwaɗakɛ yitea 'yɛwe wəndəa shɛ va Yɛsə.

²⁵Pa yiŋwəte geva laka Yɛsə, ma ke: «Wa wəndəa shɛ wa, Nde sleke ŋkwa?»

²⁶Ma a ke Yɛsə zhɛnete: «'Ya katemze nɗeli te ɗafa: ma wəndə nya teve nda ɗafa shɛ 'ya ne, gheŋkɛ ŋkɛ.» Pa Yɛsə ŋave ɗafa, pa mzate nɗeli te ba'a ndeke nda ke Zhəwdas, wəzege ta Simon Iskariyote.

²⁷Keletema ta Zhəwdas ke ɗafa shɛ, shilimə Satan mbe wənəa ŋkɛ. Ma ke Yɛsə shɛ: «Ma wəsə nya ɗe nya na kamene ne, menete kahe kahe.»

²⁸Wəndə shɛ hwa mbeli nyi kənəa ɗafa le Yɛsə keɗepete va wa va wa geze nda ghena nya ŋkɛ ke Zhəwdas we.

²⁹Ma ke kweci hwa hɛ: «Nahe Yɛsə keghwenakɛ Zhəwdas kapa wəshi yitea gəsəkə keɗema kaneheve nda cɛdɛ ke ka titikwəa kɛfi.» Va nya nza cɛdɛa nci va Zhəwdas.

³⁰Zehwema ta Zhəwdas ke ɗafa shɛ ne, ntəŋə shavenyɛ. Heviɗi ŋkwa.

³¹Kwa shavenyɛ Zhəwdas ne, ma ke Yɛsə: «Tsetsenya ne, kateve geva zləvə te Wəzege ta za. Tsetsenya ɓiyitsa ne, katenewe zləvəa Shala mbeli laka gheŋkɛ.

³²Ma kenakɛ zləvəa Shala mbeli laka gheŋkɛ ne, Shala nde tencɛ zləvəa Wəzege ta ŋkɛ le ghəa ŋkɛ perə, takwa takwa ŋkɛ katencɛ.

³³Ŋwalea ɗa, mba 'ya katetemə le gheyɛ kwele kwele ɓiyitsa we. Katezele ɗa yɛ, kala nya gezete nda 'ya ke ka Zhəwif: ashɛ yɛ kakekave ŋkwa nya telə 'ya te we.

³⁴Wa nya ghena mɛnɛfɛ nya geze ŋayɛ 'ya nya: ɗe mə ghəa ŋayɛ. Pa yɛ hi kaɗe ghəa ŋayɛ kala nya se 'ya ɗe ŋayɛ.

³⁵Ma kenza nde kaɗe ghəa ŋayɛ yɛ ne, pɛtɛ teɗepe ŋayɛ mbeli kaka təkwə təkwə ɗa yɛ.»

³⁶Ma ke Simon Piyɛre sha Yɛsə: «Kadzema na wa, Nde sleke ŋkwa?» Ma ke Yɛsə shɛ: «Ashɛ nahe na kantsehe ŋa te ŋkwa nya telə 'ya te kaba we, te kwete veci nza na kantsehe ŋa te.»

³⁷Ma ke Piyɛre shɛ: «Nde sleke ŋkwa, va wa ɗema 'ya kazele ŋa tsetsenya wa? Ya mtenyɛ ŋkɛ ne, wərə 'ya kamte kezha gha.»

³⁸Ma ke Yɛsə zhɛnete nda: «Kaganda ɗe na kamte tewəmbəreke 'ya pa na? Fəyitekeghə geze ŋa 'ya kaganda ne, ma nda teheka ŋələ, kategeze na mahekene zhigə kaɗema na keɗepe ɗa.»