Read kapsiki Zhaŋe 14 Bible Online

Zhaŋe 14 - kapsiki bible

Zhaŋe 14

¹Ma ke Yɛsə: «Ghazlənəma yɛ ma, yɛhwe mə Shala, yɛte ɗa mə perə.

²Kwele kwele ŋkwa kenza pelɛ ghɛa Yiteyɛ ɗa. Dzeme yadzeme 'ya yitea hi ŋayɛ ŋkwa. Keɗema ŋkɛ kakaganda ne, nza kageze ŋayɛ 'ya we.

³Ma kehite ŋayɛ ŋkwa 'ya ne, nda se 'ya kakele ŋayɛ kadzete ŋkwa nya se 'ya, yitea nza mə le gheyɛ te ŋkwa shɛ.

⁴Nahe yɛ keɗepe hweŋkwa kelə kadzete ŋkwa nya telə 'ya te.»

⁵Ma ke Tomas shɛ: «Nde sleke ŋkwa, keɗepe ŋkwa nya telə na te ghen'yɛ we. Tsema nza n'yɛ kateɗepete hweŋkwa kelə wa?»

⁶Ma ke Yɛsə shɛ: «'Ya ya kahweŋkwa, kakaganda ba'a kampi. Wəndə shɛ kalə sha Yita keɗema laka 'ya we.

⁷Ma nahe yɛ keɗepe ɗa ne, kateɗepe Yiteyɛ ɗa yɛ perə. Tsetsenyanyɛ ne, nahe yɛ keɗepe, nahe yɛ kenakɛ.»

⁸Ma ke Filipe shɛ: «Nde sleke ŋkwa, ncɛte n'yɛ Yite ŋa shɛ, wərə n'yɛ ŋkɛ.»

⁹Ma ke Yɛsə shɛ: «Filipe, ghalanza mə le gheyɛ ne, nda keɗepe ɗa na we pa na? Wəndə nya kenakɛ ɗa ne, nahe ŋkɛ kenakɛ Yiteyɛ ɗa. Yitea wa 'yɛwe na va 'ya: Ncɛte n'yɛ Yita pa wa?

¹⁰Keyɛte na mbe Yiteyɛ ɗa 'ya, mbe 'ya Yiteyɛ ɗa wəka? Se va 'ya se ghena nyi geze ŋayɛ 'ya we. Yiteyɛ ɗa nya kenza mbe 'ya nde mene slene ta ŋkɛ.

¹¹Yɛte ɗa mə, mbe Yiteyɛ ɗa 'ya, mbe 'ya Yiteyɛ ɗa. Keɗema yɛ kayɛ ghena ta ɗa, yɛte mə te wəshi meŋele nyi se 'ya kamene.

¹²Kaganda ne, ma 'ya sha gheyɛ: ma wəndə nya keyɛte ɗa ne, katemene slene nyi se 'ya kamene ŋkɛ. Za ma ŋkɛ temene ke 'ya, va nya nza 'ya katelə ɗa sha Yiteyɛ ɗa.

¹³Yayata wəsə nya 'yɛwe yɛ te sləa ɗa ne, katemene ŋayɛ 'ya yitea ncɛte geva zləvəa Yita mbe Wəzege ta ŋkɛ.

¹⁴Yayata wəsə nya 'yɛwete yɛ te sləa ɗa ne, katemene ŋayɛ hɛ 'ya.

¹⁵Ma kenza nde kaɗe ɗa yɛ ne, katehawe yɛ va ghena nya gezeke 'ya.

¹⁶Katesəkwə Yita 'ya yitea ve ŋayɛ wəndə nya kekemane ŋayɛ ŋkɛ, yitea nza ŋkɛ le gheyɛ keveci keveci,

¹⁷gheŋkɛ Sefəa Shala nya le kaganda, ashɛ mbeli nyi te hɛɗi kakemaneve we, va nya nza ŋkɛ shaŋe hɛ kanakɛ, shaŋe hɛ kaɗepe. Ama gheyɛ kwa ŋa ŋayɛ ne, nahe yɛ keɗepe, va nya nza ŋkɛ le gheyɛ, mbe gheyɛ ŋkɛ.

¹⁸Kazlenekɛ ŋayɛ 'ya kaka mezhɛtiti we, katese 'ya sha gheyɛ zhɛkwa.

¹⁹Temə vireɗi ne, katezhɛne mbeli kanakɛ ɗa we, ama gheyɛ ne, katenakɛ ɗa yɛ le mpi, le mpia shɛ tenza yɛ perə.

²⁰Te vecia shɛ ne, kateɗepe yɛ mbe Yiteyɛ ɗa 'ya, gheyɛ ɓiyitsa, mbe 'ya yɛ, mbe gheyɛ 'ya.

²¹Wəndə nya kendeke nda ghəa ŋkɛ ke ghena nya gezeke 'ya, pa ŋkɛ menete slene le ne, gheŋkɛ nde ɗe ɗa. Wəndə nya keɗe ɗa, gheŋkɛ yaɗe Yiteyɛ ɗa. Kateɗe wəndəa shɛ 'ya perə, pa 'ya ncɛte nda ghəa ɗa.»

²²Ma ke Zhəwde nya keɗema kaZhəwdas Iskariyote shɛ: «Nde sleke ŋkwa, tsema temene geva ŋkɛ nda nza na kancɛte n'yɛ ghəa ŋa, kaɗema ke kweci mbeli wa?»

²³Ma ke Yɛsə shɛ: «Wəndə nya keɗe ɗa ne, katehawe ŋkɛ va ghena ta ɗa, kateɗe Yiteyɛ ɗa. Ghen'yɛ le Yiteyɛ ɗa katese n'yɛ shɛ kanza mbe.

²⁴Wəndə nya keɗema ɗa ne, kahawe ŋkɛ va ghena ta ɗa we. Ghena nya fa nya yɛ va 'ya tse ne, ŋa ɗa ghena shɛ we, ama ŋa Yiteyɛ ɗa nya keghweneke ɗa kase.

²⁵Nahe 'ya kegezete ŋayɛ wəshi nyi mba 'ya teke hwa gheyɛ.

²⁶Wəndə kekemane ŋkwa nya teghwene ŋayɛ Yiteyɛ ɗa te sləa ɗa ne, gheŋkɛ Sefəa Shala, gheŋkɛ nde teteke ŋayɛ wəshi pɛtɛ, gheŋkɛ nde tezəzə ŋayɛ wəshi nyi se 'ya teke ŋayɛ pɛtɛ.

²⁷Nza mə kwelɛŋe kwetere wəmbəa ɗa, ŋa ɗa kwelɛŋe nya ve ŋayɛ 'ya. Kala nya ve mbeli nyi te hɛɗi ve ŋayɛ 'ya we. Nzama mehele ta ŋayɛ ketaze taze ba'a ghazlənəma yɛ ma.

²⁸Nahe yɛ kefate ghena nya gezete ŋayɛ 'ya: Dzeghwa ɗa 'ya, ama katese 'ya sha gheyɛ zhɛkwa. Kenza nde kaɗe ɗa yɛ ne, katezlama yɛ te lə ta ɗa sha Yiteyɛ ɗa, va nya nza ŋkɛ wəba ma ke 'ya.

²⁹Nahe 'ya kegezete ŋayɛ ghena tsetsenya nda temene geva wəshia shɛhɛ. Tewəmbəreke nda temene geva hɛ, pa yɛ yɛte.

³⁰Katezhɛne 'ya kageze ghena kwele kwele le gheyɛ we, kwa nza ŋkɛ se yase meghe nya ndiremia mehele nya kaŋa hɛɗi nya. Kaganda ne, berete kesleke ɗa shɛ ve we.

³¹Ama se ta ŋkɛ yitea ɗepe mbeli kaɗe Yiteyɛ ɗa 'ya, kamane pɛtɛa wəshi nyi gezete ɗa ŋkɛ 'ya. Sate mə, slə ɓəmə teke.»