Read kapsiki Zhaŋe 15 Bible Online

Zhaŋe 15 - kapsiki bible

Zhaŋe 15

¹Ma ke Yɛsə: «'Ya ya kawəfe ta rɛzɛŋe[2] ganyɛ, Yiteyɛ ɗa nde mɓete wəfea shɛ.

²Katsasle dzeve ta wəfe nyi te 'ya nyi keɗema kaya ŋkɛ, sahwe yasahwe dzeve nya keya ŋkɛ nda ya ŋkɛ kwele ma.

³Kesahwe sahwe yɛ va ghena nya gezete ŋayɛ 'ya.

⁴Nza mə jikə le 'ya kala nya nza 'ya le gheyɛ. Tsagha dzeve ta wəfe perə kayate ya le ghəa ŋkɛ keɗema ŋkɛ te dəŋwəa ŋkɛ we. Tsagha yɛ perə, ashɛ yɛ kayate ya keɗema yɛ jikə le 'ya we.

⁵'Ya ya kadəŋwəa wəfe, ma gheyɛ ne, dzeve ta ɗa yɛ. Wəndə nya kenza te 'ya, nya nza n'yɛ jikə le ne, kwele kwele teya ŋkɛ, va nya ɗema yɛ kamenete wəsə keɗema 'ya kanza le gheyɛ.

⁶Yayata wəndə nya keɗema kanza jikə le 'ya ne, pa mbeli tsaslemte kala dzeve ta wəfe nya tsasle mbeli, pa ghwelenyɛ, pa mbeli tsenete kandəmte le ghwə.

⁷Ma kenza yɛ jikə le 'ya, pa ghena ta ɗa mbe wənəa ŋayɛ ɓiyitsa ne, 'yɛwe mə yayata wəsə nya ɗe yɛ, katekemave yɛ.

⁸Ma wəsə nya ketencɛ zləvəa Yiteyɛ ɗa ne, nda yɛ kayate ya kwele kwele, pa yɛ kancɛ ghəa ŋayɛ kambeli nyi ketəkwə təkwə ɗa.

⁹Kaɗe ŋayɛ 'ya kala nya ɗe ɗa Yiteyɛ ɗa. Nza mə mbe ɗe nya ɗe ŋayɛ 'ya.

¹⁰Ma keyate ghena nya gezeke 'ya yɛ ne, mbe ɗe nya ɗe ŋayɛ 'ya tenza yɛ, kala nya yate ghena nya gezeke Yiteyɛ ɗa 'ya ba'a nya nza ɗa 'ya mbe ɗe ta ŋkɛ.

¹¹Nda gezete ŋayɛ 'ya kala nya ne, yitea nza zlama nya mbe wənəa ɗa mbe wənəa ŋayɛ, nda zlama yɛ fate fate.

¹²Wa nya ghena nya geze ŋayɛ 'ya kamene yɛ nya: Ɗe mə ghəa ŋayɛ kala nya ɗe ŋayɛ 'ya.

¹³Ma ɗe nya wəba nya nza wəndə kancɛte ne, zamte mpia ŋkɛ ŋkɛ yitea ka mcɛhɛnyɛ.

¹⁴Kaka mcɛhɛ ɗa yɛ kemenete wəshi nyi geze ŋayɛ 'ya kamene yɛ.

¹⁵Kazhɛne 'ya kaheka ŋayɛ kaka mavashi ɓiyitsa we, va nya ɗema mava keɗepe wəshi nyi mene wəndə nya kesleke. Kaka mcɛhɛ ɗa zhɛne 'ya kaheka ŋayɛ, va nya nza ŋkɛ pɛtɛ 'ya kencɛmte ŋayɛ wəshi nyi fave 'ya va Yiteyɛ ɗa.

¹⁶Gheyɛ ka ntave ɗa we, ama 'ya nde tsehave ŋayɛ. Nahe 'ya keghwenakɛ ŋayɛ hwa mbeli kezha yate ya nya ketemə yɛ. Ma tsagha ne, pɛtɛa wəshi nyi 'yɛwe yɛ va Yiteyɛ ɗa te sləa ɗa, kateve ŋayɛ ŋkɛ.

¹⁷Gheŋkɛ ghena nya gezeke ŋayɛ 'ya tsetsenya, ɗe mə ghəa ŋayɛ.

¹⁸Ma kenza mbeli kazlɛ va gheyɛ ne, 'ya yaghate hɛ kazlɛ ve.

¹⁹Ma ya ŋa mbeli nyi te hɛɗi nya yɛ ne, nza mbe ɗe ŋayɛ hɛ. Ama ŋa nci yɛ we, 'ya nde tsehave ŋayɛ kafəmte ŋayɛ shave hwa hɛ, vatse zlɛ hɛ va gheyɛ.

²⁰Zəzəte mə ghena nya gezete ŋayɛ 'ya: Mava shɛ kanza kwele ma ke wəndə nya kesleke we. Mbeli nyi kese kaghweze mɛ hwa 'ya, tsagha shɛ teghweze mɛ hɛ hwa gheyɛ perə. Ma ya nahe hɛ keyate ghena ta ɗa, tsagha teya ŋa ŋayɛ hɛ perə.

²¹Pɛtɛ temene ŋayɛ wəshi nyi hɛ tewəmbəreke 'ya, va nya ɗepema wəndə nya keghweneke ɗa hɛ.

²²Ma keɗema 'ya kese kageze nda ghena ke hɛ ne, fete ta jaɗafa va hɛ we. Nahe 'ya kese sha hɛ. Kashɛ hɛ zhɛne ghəpə tsetsenya laka geze: Fete ta jaɗafa va ghen'yɛ we, ke hɛ we.

²³Ma wəndə nya kezlɛ va 'ya ne, kazlɛ ŋkɛ va Yiteyɛ ɗa perə.

²⁴Ma ya kaɗema 'ya kese kamenete slene nya ɗema yayata wəndə kamenete ne, nza fete ta jaɗafa va hɛ we. Ama tsetsenya, nahe hɛ kenakɛ wəshi nyi menete 'ya, mba hɛ kazlɛ va ghen'yɛ le Yiteyɛ ɗa.

²⁵Nahe wəsəa shɛ kemenete geva kezha yipə geva le ghena nya kerafete geva mbe Ghena ta Shala, ma ke: Gəmə ɗema ntsə ta hɛ.

²⁶Ma kese wəndə nya ketekemane ŋayɛ, nya teghwene ŋayɛ 'ya se va Yita, Sefəa Shala nya kaganda nya kaŋa Yita ne, gheŋkɛ nde tenegha fete yitea 'ya le ghəa ŋkɛ.

²⁷Ma gheyɛ le ŋa ŋayɛ ne, kaka negha fete yitea 'ya tenza yɛ, va nya nza mə le gheyɛ ghalanza.