Read kapsiki Zhaŋe 16 Bible Online

Zhaŋe 16 - kapsiki bible

Zhaŋe 16

¹Nahe 'ya kencɛmte ŋayɛ wəshi nyi yagha tehene tetsa ŋayɛ mbe dzeghe nya ketedzeghe ŋayɛ.

²Kateŋka ŋayɛ mbeli shave mbe cɛ kesəkwə ghə. Katese kwete və, katezəzə yayata wəndə nya kempə ŋayɛ kaslene ta Shala yamene ŋkɛ, ke mbe ghəa ŋkɛ.

³Ma nda mene wəshi nyi kala nyi hɛ ne, va nya ɗepema Yiteyɛ ɗa hɛ le 'ya perə.

⁴Nahe 'ya kegezete ŋayɛ ghena nyi tsetsenya yitea zəzə ghena shɛ yɛ, və nya tesa ŋayɛ yaka hɛ. Ma nda ɗema 'ya geze ŋayɛ ghala veci ne, va nya nza mə le gheyɛ.

⁵Tsetsenya, 'ya kazhɛne geva kalə sha wəndə nya keghweneke ɗa. Wəndə shɛ hwa gheyɛ ka'yɛwe ŋkwa nya lə 'ya te we.

⁶Kazhɛ ŋayɛ ghena shɛ te wənə va nya gezete ŋayɛ 'ya kala nya.

⁷Ndagwara kaganda yageze ŋayɛ 'ya: Jara slə 'ya kezha gheyɛ, tewəmbəreke keɗema 'ya kelə ne, ashɛ wəndə nya ketekemane ŋayɛ katese we. Kelə 'ya, kateghwene ŋayɛ 'ya kase.

⁸Vəa ŋkwa nya tese ŋkɛ ne, kancɛ nda ŋkɛ ke mbeli nyi te hɛɗi, nahe hɛ kezamte hweŋkwa le zəzə ta nci te jaɗafa, katencɛ nda ghena nya tiɗiɗi ŋkɛ ke hɛ, le ghwə nya temeha Shala.

⁹Nahe hɛ kezamte hweŋkwa le zəzə ta nci te jaɗafa, va nya ɗema hɛ keyɛte ɗa.

¹⁰Nahe hɛ kezamte hweŋkwa le zəzə ta nza tiɗiɗi, va nya nza 'ya kalə sha Yiteyɛ ɗa, mba yɛ zhɛkwa nakɛ ɗa we.

¹¹Nahe hɛ kezamte hweŋkwa le zəzə te ghwə nya meha Shala, va nya ndeke nda fete Shala ke meghe nya ndiremia mehele nya te hɛɗi nya.

¹²Mba ghena va 'ya kwele kwele kageze ŋayɛ, ama kazereghete yɛ kaba we.

¹³Ma kese Sefəa Shala nya kaganda, katebeghe ŋayɛ ŋkɛ kalə sha kaganda. Se ve se ghena nya tegeze ŋkɛ we, wəshi nyi fave ŋkɛ yategeze ŋkɛ, katencɛ ŋayɛ wəshi nyi ketese ŋkɛ.

¹⁴Kateve zləvə ŋkɛ te 'ya, va nya nza ŋkɛ va 'ya tefa ghena nyi tegeze ŋayɛ ŋkɛ.

¹⁵Yayata wəsə nya va Yiteyɛ ɗa, ŋa ɗa ŋkɛ. Vatse geze 'ya, Sefəa Shala shɛ nde tekele ghena ta ɗa kageze ŋayɛ.»

¹⁶Ma ke Yɛsə: «Mbe və ɓɛhwɛ ne, katenakɛ ɗa yɛ we, temə vireɗi ɓiyitsa, katenakɛ ɗa yɛ.»

¹⁷Ma ke kweci ka təkwə təkwə kwelɛ ghəa nci: «Wa yaɗe ŋkɛ kageze kwa geze ŋkɛ: Mbe və ɓɛhwɛ ne, katenakɛ ɗa yɛ we, temə vireɗi ɓiyitsa, katenakɛ ɗa yɛ ba'a va nya nza 'ya kalə sha Yiteyɛ ɗa wa?»

¹⁸Ma ke hɛ ɓiyitsa: «Mbe və ɓɛhwɛ, wa yaɗe ŋkɛ kageze wa? Ashɛ mə keɗepe wəsə nya ɗe ŋkɛ kageze we.»

¹⁹Nahe Yɛsə keɗepe kaɗe hɛ ka'yɛwe ghena ve. Ma ke sha hɛ: «Va nya geze 'ya: Mbe və ɓɛhwɛ ne, katenakɛ ɗa yɛ we, temə vireɗi ɓiyitsa, katenakɛ ɗa yɛ, vatse 'yɛwe yɛ kwelɛ ghəa ŋayɛ na?

²⁰Kaganda ne, ma 'ya sha gheyɛ: katenehwene yɛ ba'a kateŋələvə yɛ. Ma mbeli nyi teke te hɛɗi, katezlama hɛ. Ama katezhɛre geva heɗe kema ta ŋayɛ kazlama.

²¹Kala nya nza male kaheha nda teya nde, teheɗe kema ve kwa se vəa nta. Ama kwa nakɛ wəzege nde, pa zaghəyite yaka nya sahwe nde. Kazlama nde yitea ya ta wəzege kanza teghweme.

²²Tsagha yɛ perə tsetsenya, teheɗe kema va gheyɛ. Ama katese 'ya kanewe ŋayɛ zhɛkwa. Kwele kwele tezlama yɛ te vecia shɛ, wəndə shɛ katekelemte zlama mbe wənəa ŋayɛ we.

²³Veci ŋkwa shɛ ne, kwete wəsə shɛ kate'yɛwe yɛ va 'ya we. Kaganda ne, ma 'ya sha gheyɛ: yayata wəsə nya te'yɛwe yɛ va Yiteyɛ ɗa te sləa ɗa ne, kateve ŋayɛ ŋkɛ.

²⁴Pa tsetsenya, kese yɛ ka'yɛwe wəsə te sləa ɗa we. 'Yɛwe mə, kateve ŋayɛ mbeli nda zlama yɛ fate fate.

²⁵Le ghena keyipə pa se 'ya geze ŋayɛ ghena nyi. Katese kwete və nya ɗema 'ya tegeze ŋayɛ ghena le ghena keyipə pa te zhɛkwa, ama ntare ntare tegeze ŋayɛ ghena ta Yiteyɛ ɗa 'ya.

²⁶Ma vəa ŋkwa shɛ ne, gheyɛ le ghəa ŋayɛ nde te'yɛwe wəsə va Yiteyɛ ɗa te sləa ɗa. Kegeze 'ya, 'ya nde səkwə Shala kezha gheyɛ 'ya we,

²⁷tewəmbəreke kaɗe ŋayɛ Yiteyɛ ɗa le ghəa ŋkɛ. Kaɗe ŋayɛ ŋkɛ va nya nza yɛ kaɗe ɗa ba'a va nya yɛte yɛ se laka Shala se 'ya.

²⁸Se laka Yita se 'ya kasawa kadzete hɛɗi. Tsetsenya ne, 'ya kaslə te hɛɗi kalə ɗa sha Yita.»

²⁹Ma ke mbeli nyi ketəkwə təkwə shɛ: «Yawa, tsetsenya ne, ntare ntare geze ghena na, ghena keyipə pa hwe ɓiyitsa we.

³⁰Nahe n'yɛ keɗepe tsetsenya pɛtɛ ɗepe wəshi na. Ma nda te'yɛwe ghena wəndə va gha ne, nahe na keɗepe wəsə nya ɗe ŋkɛ. Vatse yɛ n'yɛ se va Shala se na.»

³¹Ma ke Yɛsə sha hɛ: «Kayɛ yɛ tsetsenya na?

³²Yawa, takwa takwa və nya tetaze geva yɛ kwetɛ kwetɛŋe te. Nahe vəa shɛ kese. Katelə yɛ pɛtɛ sha ghɛa ŋayɛ, tene 'ya kwetɛŋe ɗa. Ama kwetɛŋe ɗa tenza 'ya we, 'ya le Yiteyɛ ɗa.

³³Nahe 'ya kegezete ŋayɛ wəshi nyi pɛtɛ yitea kemave kwelɛŋe yɛ kwa nza mə jikə le gheyɛ. Katesa yaka yɛ teke te hɛɗi, ama hwepe mə ghə, nahe 'ya kehərəte berete ta hɛɗi lema.»