Read kapsiki Zhaŋe 17 Bible Online

Zhaŋe 17 - kapsiki bible

Zhaŋe 17

¹Ma kwa gezemte ghena nyi Yɛsə ne, pa kafete kema yitea ghweme. Ma ke: «Yita, na və kese. Ncɛte zləvəa Wəzege ta ŋa, nda ncɛ zləvəa ŋa Wəzege ta ŋa perə.

²Tewəmbəreke nahe na kendeke nda berete kasleke mbeli pɛtɛ yitea ve nda mpi nya kaghala ghala ŋkɛ ke mbeli nyi ndeke nda na.

³Ma kemave mpi nya kaghala ghala ne, gheŋkɛ kemaneve ŋa, gha Shala kwetɛŋe nya kakaganda ba'a Yɛsə Kriste nya ghweneke na.

⁴Nahe 'ya kencɛmte nda zləvəa ŋa ke mbeli nyi te hɛɗi, nahe 'ya kekiɗimte slene nya ndeke ɗa na kamene.

⁵Tsetsenya gɛ Yita, ndeke ɗa zləvə nya kese va 'ya vare gha vəashi kwa nza mə le gha tewə hɛɗi kenaka pate geva.

⁶Nahe 'ya kencɛte nda ŋa ke mbeli nyi tsehave ɗa na shave hwa mbeli nyi te hɛɗi. Ŋa ŋa hɛ, pa na fəave ɗa hɛ, pa hɛ yɛte fete yitea ghena ta ŋa.

⁷Nahe hɛ keɗepe tsetsenya yayata wəsə nya kaŋa ɗa ne, se va gha se ŋkɛ.

⁸Ghena nya gezete nda 'ya ke hɛ, gha nde gezete ɗa. Nahe hɛ keyɛte megela. Nahe hɛ keɗepe fate fate laka gha se 'ya. Nahe hɛ keyɛte gha nde ghweneke ɗa.

⁹Yitea hɛ səkwə ghə 'ya. Yitea pɛtɛa mbeli nyi te hɛɗi səkwə ghə 'ya we, deke yitea mbeli nyi ndeke ɗa na, va nya nza hɛ kaŋa ŋa.

¹⁰Yayata wəsəa ɗa ne, ŋa ŋa ŋkɛ. Yayata wəsəa ŋa ne, ŋa ɗa ŋkɛ perə. Tsetse nza zləvə te 'ya mbe hɛ.

¹¹Mba 'ya kwake te hɛɗi we, ama ghenci ne, mba hɛ te hɛɗi. 'Ya kadzeme sha gha Yita nya keveyi geva tekeleke, yate hɛ te zlaɓa ta sləa ŋa nya ndeke ɗa na, yitea nza hɛ kanya kwetɛŋe kala nya nza mə le gha.

¹²Kwa nza n'yɛ le hɛ ghalanza ne, nahe 'ya keyate hɛ le berete ta ŋa. Nahe 'ya keyate hɛ, kwete shɛ keza hwa hɛ we, deke wəndə nya keveyi geva kezha za, yitea yipə geva wəshi nyi kerafete geva mbe Ghena ta Shala.

¹³'Ya lə sha gha tsetsenya. Mba 'ya teke te hɛɗi nda geze nda ghena shɛ 'ya ke hɛ, yitea nza zlama ta ɗa kwa wənəa nci fate fate.

¹⁴Nahe 'ya kegezete nda ghena ta ŋa ke hɛ. Ama nahe mbeli nyi te hɛɗi kezlɛnji va hɛ kwa ɗema hɛ kaŋa nci mbeli, kala nya ɗema 'ya kaŋa nci perə.

¹⁵Kelemte hɛ te hɛɗi 'ya sha gha we, ama yate hɛ va Nde ghwete ŋkwa.

¹⁶Ashɛ hɛ kaŋa ŋkwa nya te hɛɗi kala nya ɗema 'ya kaŋa ŋkwa nya te hɛɗi we.

¹⁷Veyi hɛ kaŋa ŋa mbeli fəyitekeghə laka kaganda. Ghena ta ŋa ya kakaganda deŋwa.

¹⁸Kaghwene hɛ 'ya dzeyi te ŋkwa pɛtɛ kala nya ghweneke ɗa na kadzete ŋkwa nya te hɛɗi.

¹⁹Kave ŋa pɛtɛa ghəa ɗa 'ya kezha hɛ, yitea nza hɛ kaŋa ŋa fəyitekeghə.

²⁰Deke kezha hɛ səkwə ghə ŋa 'ya we, ama kezha mbeli nyi keteyɛ ɗa te zlaɓa ta ghena ta nci.

²¹Kasəkwə ghə 'ya yitea nza hɛ kanya kwetɛŋe. Te zlaɓa ta ŋa Yita, jikəte hɛ le gheɓə yitea nza mə le hɛ kanya kwetɛŋe kala nya nza na mbe 'ya ba'a kala nya nza 'ya mbe gha, nda nza mbeli kaɗepe gha nde ghweneke ɗa.

²²Nahe 'ya kendeke nda zləvə nya ndeke ɗa na ke hɛ, yitea nza hɛ kanya kwetɛŋe kala nya nza mə le gha,

²³mbe hɛ 'ya kala nya nza na mbe 'ya, yitea nza hɛ kanya kwetɛŋe fate fate, yitea ɗepe mbeli nyi te hɛɗi gha nde ghweneke ɗa, yitea ɗepe hɛ ɓiyitsa kaɗe mbelia shɛhɛ na kala nya ɗehwe ɗa na.

²⁴Yita, nahe na kendeke ɗa hɛ. Kaɗe 'ya kanza hɛ te ŋkwa nya kwetɛŋe le 'ya, yitea nakɛ zləvə nya ndeke ɗa na hɛ, va nya ɗete ɗa na tewə hɛɗi kenaka pate geva.

²⁵Yita nya tiɗiɗi, keɗepe ŋa mbeli nyi te hɛɗi we, ama 'ya ne, nahe 'ya keɗepe ŋa. Mbelia ɗa nyi ɓiyitsa ne, nahe hɛ keɗepe, gha nde ghweneke ɗa.

²⁶Nahe 'ya kencɛte nda sləa ŋa ke hɛ, mba 'ya tencɛ nda ŋa ke hɛ zhɛkwa, yitea nza ɗe nya ɗe ɗa na mbe wənəa nci, yitea nza 'ya mbe wənəa nci perə.»